অধ্যায় 162

162.1

বৈশংপায়ন উবাচ
এতস্মিন্নেব কালে তু সর্ববাদিত্রনিস্বনঃ
বভূব তুমুলঃ শব্দস্ত্বন্তরিক্ষে দিবৌকসাম্

রথনেমিস্বনশ্চৈব ঘণ্টাশব্দশ্চ ভারত
পৃথগ্ব্যালমৃগাণাং চ পক্ষিণাং চৈব সর্বশঃ

তং সমন্তাদনুয়য়ুর্গন্ধর্বাপ্সরসস্তথা
বিমানৈঃ সূর্যসংকাশৈর্দেবরাজমরিংদমম্

ততঃ স হরিভির্যুক্তং জাম্বূনদপরিষ্কৃতম্
মেঘনাদিনমারুহ্য শ্রিয়া পরময়া জ্বলন্

পার্থানভ্যাজগামাশু দেবরাজঃ পুরংদরঃ
আগত্য চ সহস্রাক্ষো রথাদবরুরোহ বৈ

তং দৃষ্ট্বৈব মহাত্মানং ধর্মরাজো যুধিষ্ঠিরঃ
ভ্রাতৃভিঃ সহিতঃ শ্রীমান্দেবরাজমুপাগমৎ

পূজয়ামাস চৈবাথ বিধিবদ্ভূরিদক্ষিণঃ
যথার্হমমিতাত্মানং বিধিদৃষ্টেন কর্মণা

ধনংজয়শ্চ তেজস্বী প্রণিপত্য পুরংদরম্
ভৃত্যবত্প্রণতস্তস্থৌ দেবরাজসমীপতঃ

আপ্যায়ত মহাতেজাঃ কুন্তীপুত্রো যুধিষ্ঠিরঃ
ধনংজয়মভিপ্রেক্ষ্য বিনীতং স্থিতমন্তিকে

জটিলং দেবরাজস্য তপোয়ুক্তমকল্মষম্
হর্ষেণ মহতাবিষ্টঃ ফল্গুনস্যাথ দর্শনাৎ

তং তথাদীনমনসং রাজানং হর্ষসংপ্লুতম্
উবাচ বচনং ধীমান্দেবরাজঃ পুরংদরঃ

ত্বমিমাং পৃথিবীং রাজন্প্রশাসিষ্যসি পাণ্ডব
স্বস্তি প্রাপ্নুহি কৌন্তেয় কাম্যকং পুনরাশ্রমম্

অস্ত্রাণি লব্ধানি চ পাণ্ডবেন; সর্বাণি মত্তঃ প্রয়তেন রাজন্
কৃতপ্রিয়শ্চাস্মি ধনংজয়েন; জেতুং ন শক্যস্ত্রিভিরেষ লোকৈঃ

এবমুক্ত্বা সহস্রাক্ষঃ কুন্তীপুত্রং যুধিষ্ঠিরম্
জগাম ত্রিদিবং হৃষ্টঃ স্তূয়মানো মহর্ষিভিঃ

ধনেশ্বরগৃহস্থানাং পাণ্ডবানাং সমাগমম্
শক্রেণ য ইমং বিদ্বানধীয়ীত সমাহিতঃ

সংবত্সরং ব্রহ্মচারী নিয়তঃ সংশিতব্রতঃ
স জীবেত নিরাবাধঃ সুসুখী শরদাং শতম্