Utshovঅধ্যায় 163
163.1
বৈশংপায়ন উবাচ
যথাগতং গতে শক্রে ভ্রাতৃভিঃ সহ সংগতঃ
কৃষ্ণয়া চৈব বীভত্সুর্ধর্মপুত্রমপূজয়ৎ
163.2
অভিবাদয়মানং তু মূর্ধ্ন্যুপাঘ্রায় পাণ্ডবম্
হর্ষগদ্গদয়া বাচা প্রহৃষ্টোঽর্জুনমব্রবীৎ
163.3
কথমর্জুন কালোঽয়ং স্বর্গে ব্যতিগতস্তব
কথং চাস্ত্রাণ্যবাপ্তানি দেবরাজশ্চ তোষিতঃ
163.4
সম্যগ্বা তে গৃহীতানি কচ্চিদস্ত্রাণি ভারত
কচ্চিত্সুরাধিপঃ প্রীতো রুদ্রশ্চাস্ত্রাণ্যদাত্তব
163.5
যথা দৃষ্টশ্চ তে শক্রো ভগবান্বা পিনাকধৃক্
যথা চাস্ত্রাণ্যবাপ্তানি যথা চারাধিতশ্চ তে
163.6
যথোক্তবাংস্ত্বাং ভগবাঞ্শতক্রতুররিংদম
কৃতপ্রিয়স্ত্বয়াস্মীতি তচ্চ তে কিং প্রিয়ং কৃতম্
এতদিচ্ছাম্যহং শ্রোতুং বিস্তরেণ মহাদ্যুতে
163.7
যথা তুষ্টো মহাদেবো দেবরাজশ্চ তেঽনঘ
যচ্চাপি বজ্রপাণেস্তে প্রিয়ং কৃতমরিংদম
এতদাখ্যাহি মে সর্বমখিলেন ধনংজয়
163.8
অর্জুন উবাচ
শৃণু হন্ত মহারাজ বিধিনা যেন দৃষ্টবান্
শতক্রতুমহং দেবং ভগবন্তং চ শংকরম্
163.9
বিদ্যামধীত্য তাং রাজংস্ত্বয়োক্তামরিমর্দন
ভবতা চ সমাদিষ্টস্তপসে প্রস্থিতো বনম্
163.10
ভৃগুতুঙ্গমথো গত্বা কাম্যকাদাস্থিতস্তপঃ
একরাত্রোষিতঃ কংচিদপশ্যং ব্রাহ্মণং পথি
163.11
স মামপৃচ্ছত্কৌন্তেয় ক্বাসি গন্তা ব্রবীহি মে
তস্মা অবিতথং সর্বমব্রুবং কুরুনন্দন
163.12
স তথ্যং মম তচ্ছ্রুত্বা ব্রাহ্মণো রাজসত্তম
অপূজয়ত মাং রাজন্প্রীতিমাংশ্চাভবন্ময়ি
163.13
ততো মামব্রবীত্প্রীতস্তপ আতিষ্ঠ ভারত
তপস্বী নচিরেণ ত্বং দ্রক্ষ্যসে বিবুধাধিপম্
163.14
ততোঽহং বচনাত্তস্য গিরিমারুহ্য শৈশিরম্
তপোঽতপ্যং মহারাজ মাসং মূলফলাশনঃ
163.15
দ্বিতীয়শ্চাপি মে মাসো জলং ভক্ষয়তো গতঃ
নিরাহারস্তৃতীয়েঽথ মাসে পাণ্ডবনন্দন
163.16
ঊর্ধ্ববাহুশ্চতুর্থং তু মাসমস্মি স্থিতস্তদা
ন চ মে হীয়তে প্রাণস্তদদ্ভুতমিবাভবৎ
163.17
চতুর্থে সমভিক্রান্তে প্রথমে দিবসে গতে
বরাহসংস্থিতং ভূতং মত্সমীপমুপাগমৎ
163.18
নিঘ্নন্প্রোথেন পৃথিবীং বিলিখংশ্চরণৈরপি
সংমার্জঞ্জঠরেণোর্বীং বিবর্তংশ্চ মুহুর্মুহুঃ
163.19
অনু তস্যাপরং ভূতং মহত্কৈরাতসংস্থিতম্
ধনুর্বাণাসিমত্প্রাপ্তং স্ত্রীগণানুগতং তদা
163.20
ততোঽহং ধনুরাদায় তথাক্ষয্যৌ মহেষুধী
অতাডয়ং শরেণাথ তদ্ভূতং লোমহর্ষণম্
163.21
যুগপত্তত্কিরাতশ্চ বিকৃষ্য বলবদ্ধনুঃ
অভ্যাজঘ্নে দৃঢতরং কম্পয়ন্নিব মে মনঃ
163.22
স তু মামব্রবীদ্রাজন্মম পূর্বপরিগ্রহঃ
মৃগয়াধর্মমুত্সৃজ্য কিমর্থং তাডিতস্ত্বয়া
163.23
এষ তে নিশিতৈর্বাণৈর্দর্পং হন্মি স্থিরো ভব
স বর্ষ্মবান্মহাকায়স্ততো মামভ্যধাবত
163.24
ততো গিরিমিবাত্যর্থমাবৃণোন্মাং মহাশরৈঃ
তং চাহং শরবর্ষেণ মহতা সমবাকিরম্
163.25
ততঃ শরৈর্দীপ্তমুখৈঃ পত্রিতৈরনুমন্ত্রিতৈঃ
প্রত্যবিধ্যমহং তং তু বজ্রৈরিব শিলোচ্চয়ম্
163.26
তস্য তচ্ছতধা রূপমভবচ্চ সহস্রধা
তানি চাস্য শরীরাণি শরৈরহমতাডয়ম্
163.27
পুনস্তানি শরীরাণি একীভূতানি ভারত
অদৃশ্যন্ত মহারাজ তান্যহং ব্যধমং পুনঃ
163.28
অণুর্বৃহচ্ছিরা ভূত্বা বৃহচ্চাণুশিরাঃ পুনঃ
একীভূতস্তদা রাজন্সোঽভ্যবর্তত মাং যুধি
163.29
যদাভিভবিতুং বাণৈর্নৈব শক্নোমি তং রণে
ততোঽহমস্ত্রমাতিষ্ঠং বায়ব্যং ভরতর্ষভ
163.30
ন চৈনমশকং হন্তুং তদদ্ভুতমিবাভবৎ
তস্মিন্প্রতিহতে চাস্ত্রে বিস্ময়ো মে মহানভূৎ
163.31
ভূয়শ্চৈব মহারাজ সবিশেষমহং ততঃ
অস্ত্রপূগেন মহতা রণে ভূতমবাকিরম্
163.32
স্থূণাকর্ণময়োজালং শরবর্ষং শরোল্বণম্
শৈলাস্ত্রমশ্মবর্ষং চ সমাস্থায়াহমভ্যয়াম্
জগ্রাস প্রহসংস্তানি সর্বাণ্যস্ত্রাণি মেঽনঘ
163.33
তেষু সর্বেষু শান্তেষু ব্রহ্মাস্ত্রমহমাদিশম্
ততঃ প্রজ্বলিতৈর্বাণৈঃ সর্বতঃ সোপচীয়ত
উপচীয়মানশ্চ ময়া মহাস্ত্রেণ ব্যবর্ধত
163.34
ততঃ সংতাপিতো লোকো মত্প্রসূতেন তেজসা
ক্ষণেন হি দিশঃ খং চ সর্বতোঽভিবিদীপিতম্
163.35
তদপ্যস্ত্রং মহাতেজাঃ ক্ষণেনৈব ব্যশাতয়ৎ
ব্রহ্মাস্ত্রে তু হতে রাজন্ভয়ং মাং মহদাবিশৎ
163.36
ততোঽহং ধনুরাদায় তথাক্ষয্যৌ মহেষুধী
সহসাভ্যহনং ভূতং তান্যপ্যস্ত্রাণ্যভক্ষয়ৎ
163.37
হতেষ্বস্ত্রেষু সর্বেষু ভক্ষিতেষ্বায়ুধেষু চ
মম তস্য চ ভূতস্য বাহুয়ুদ্ধমবর্তত
163.38
ব্যায়ামং মুষ্টিভিঃ কৃত্বা তলৈরপি সমাহতৌ
অপাতয়চ্চ তদ্ভূতং নিশ্চেষ্টো হ্যগমং মহীম্
163.39
ততঃ প্রহস্য তদ্ভূতং তত্রৈবান্তরধীয়ত
সহ স্ত্রীভির্মহারাজ পশ্যতো মেঽদ্ভুতোপমম্
163.40
এবং কৃত্বা স ভগবাংস্ততোঽন্যদ্রূপমাত্মনঃ
দিব্যমেব মহারাজ বসানোঽদ্ভুতমম্বরম্
163.41
হিত্বা কিরাতরূপং চ ভগবাংস্ত্রিদশেশ্বরঃ
স্বরূপং দিব্যমাস্থায় তস্থৌ তত্র মহেশ্বরঃ
163.42
অদৃশ্যত ততঃ সাক্ষাদ্ভগবান্গোবৃষধ্বজঃ
উমাসহায়ো হরিদৃগ্বহুরূপঃ পিনাকধৃক্
163.43
স মামভ্যেত্য সমরে তথৈবাভিমুখং স্থিতম্
শূলপাণিরথোবাচ তুষ্টোঽস্মীতি পরংতপ
163.44
ততস্তদ্ধনুরাদায় তূণৌ চাক্ষয্যসায়কৌ
প্রাদান্মমৈব ভগবান্বরয়স্বেতি চাব্রবীৎ
163.45
তুষ্টোঽস্মি তব কৌন্তেয় ব্রূহি কিং করবাণি তে
যত্তে মনোগতং বীর তদ্ব্রূহি বিতরাম্যহম্
অমরত্বমপাহায় ব্রূহি যত্তে মনোগতম্
163.46
ততঃ প্রাঞ্জলিরেবাহমস্ত্রেষু গতমানসঃ
প্রণম্য শিরসা শর্বং ততো বচনমাদদে
163.47
ভগবান্মে প্রসন্নশ্চেদীপ্সিতোঽয়ং বরো মম
অস্ত্রাণীচ্ছাম্যহং জ্ঞাতুং যানি দেবেষু কানিচিৎ
দদানীত্যেব ভগবানব্রবীত্ত্র্যম্বকশ্চ মাম্
163.48
রৌদ্রমস্ত্রং মদীয়ং ত্বামুপস্থাস্যতি পাণ্ডব
প্রদদৌ চ মম প্রীতঃ সোঽস্ত্রং পাশুপতং প্রভুঃ
163.49
উবাচ চ মহাদেবো দত্ত্বা মেঽস্ত্রং সনাতনম্
ন প্রয়োজ্যং ভবেদেতন্মানুষেষু কথংচন
163.50
পীড্যমানেন বলবত্প্রয়োজ্যং তে ধনংজয়
অস্ত্রাণাং প্রতিঘাতে চ সর্বথৈব প্রয়োজয়েঃ
163.51
তদপ্রতিহতং দিব্যং সর্বাস্ত্রপ্রতিষেধনম্
মূর্তিমন্মে স্থিতং পার্শ্বে প্রসন্নে গোবৃষধ্বজে
163.52
উত্সাদনমমিত্রাণাং পরসেনানিকর্তনম্
দুরাসদং দুষ্প্রহসং সুরদানবরাক্ষসৈঃ
163.53
অনুজ্ঞাতস্ত্বহং তেন তত্রৈব সমুপাবিশম্
প্রেক্ষতশ্চৈব মে দেবস্তত্রৈবান্তরধীয়ত