Utshovঅধ্যায় 164
164.1
অর্জুন উবাচ
ততস্তামবসং প্রীতো রজনীং তত্র ভারত
প্রসাদাদ্দেবদেবস্য ত্র্যম্বকস্য মহাত্মনঃ
164.2
ব্যুষিতো রজনীং চাহং কৃত্বা পূর্বাহ্ণিকক্রিয়াম্
অপশ্যং তং দ্বিজশ্রেষ্ঠং দৃষ্টবানস্মি যং পুরা
164.3
তস্মৈ চাহং যথাবৃত্তং সর্বমেব ন্যবেদয়ম্
ভগবন্তং মহাদেবং সমেতোঽস্মীতি ভারত
164.4
স মামুবাচ রাজেন্দ্র প্রীয়মাণো দ্বিজোত্তমঃ
দৃষ্টস্ত্বয়া মহাদেবো যথা নান্যেন কেনচিৎ
164.5
সমেত্য লোকপালৈস্তু সর্বৈর্বৈবস্বতাদিভিঃ
দ্রষ্টাস্যনঘ দেবেন্দ্রং স চ তেঽস্ত্রাণি দাস্যতি
164.6
এবমুক্ত্বা স মাং রাজন্নাশ্লিষ্য চ পুনঃ পুনঃ
অগচ্ছত্স যথাকামং ব্রাহ্মণঃ সূর্যসংনিভঃ
164.7
অথাপরাহ্ণে তস্যাহ্নঃ প্রাবাত্পুণ্যঃ সমীরণঃ
পুনর্নবমিমং লোকং কুর্বন্নিব সপত্নহন্
164.8
দিব্যানি চৈব মাল্যানি সুগন্ধীনি নবানি চ
শৈশিরস্য গিরেঃ পাদে প্রাদুরাসন্সমীপতঃ
164.9
বাদিত্রাণি চ দিব্যানি সুঘোষাণি সমন্ততঃ
স্তুতয়শ্চেন্দ্রসংয়ুক্তা অশ্রূয়ন্ত মনোহরাঃ
164.10
গণাশ্চাপ্সরসাং তত্র গন্ধর্বাণাং তথৈব চ
পুরস্তাদ্দেবদেবস্য জগুর্গীতানি সর্বশঃ
164.11
মরুতাং চ গণাস্তত্র দেবয়ানৈরুপাগমন্
মহেন্দ্রানুচরা যে চ দেবসদ্মনিবাসিনঃ
164.12
ততো মরুত্বান্হরিভির্যুক্তৈর্বাহৈঃ স্বলংকৃতৈঃ
শচীসহায়স্তত্রায়াত্সহ সর্বৈস্তদামরৈঃ
164.13
এতস্মিন্নেব কালে তু কুবেরো নরবাহনঃ
দর্শয়ামাস মাং রাজঁল্লক্ষ্ম্যা পরময়া যুতঃ
164.14
দক্ষিণস্যাং দিশি যমং প্রত্যপশ্যং ব্যবস্থিতম্
বরুণং দেবরাজং চ যথাস্থানমবস্থিতম্
164.15
তে মামূচুর্মহারাজ সান্ত্বয়িত্বা সুরর্ষভাঃ
সব্যসাচিন্সমীক্ষস্ব লোকপালানবস্থিতান্
164.16
সুরকার্যার্থসিদ্ধ্যর্থং দৃষ্টবানসি শংকরম্
অস্মত্তোঽপি গৃহাণ ত্বমস্ত্রাণীতি সমন্ততঃ
164.17
ততোঽহং প্রয়তো ভূত্বা প্রণিপত্য সুরর্ষভান্
প্রত্যগৃহ্ণং তদাস্ত্রাণি মহান্তি বিধিবত্প্রভো
164.18
গৃহীতাস্ত্রস্ততো দেবৈরনুজ্ঞাতোঽস্মি ভারত
অথ দেবা যয়ুঃ সর্বে যথাগতমরিংদম
164.19
মঘবানপি দেবেশো রথমারুহ্য সুপ্রভম্
উবাচ ভগবান্বাক্যং স্ময়ন্নিব সুরারিহা
164.20
পুরৈবাগমনাদস্মাদ্বেদাহং ত্বাং ধনংজয়
অতঃ পরং ত্বহং বৈ ত্বাং দর্শয়ে ভরতর্ষভ
164.21
ত্বয়া হি তীর্থেষু পুরা সমাপ্লাবঃ কৃতোঽসকৃৎ
তপশ্চেদং পুরা তপ্তং স্বর্গং গন্তাসি পাণ্ডব
164.22
ভূয়শ্চৈব তু তপ্তব্যং তপঃ পরমদারুণম্
উবাচ ভগবান্সর্বং তপসশ্চোপপাদনম্
164.23
মাতলির্মন্নিয়োগাত্ত্বাং ত্রিদিবং প্রাপয়িষ্যতি
বিদিতস্ত্বং হি দেবানামৃষীণাং চ মহাত্মনাম্
164.24
ততোঽহমব্রুবং শক্রং প্রসীদ ভগবন্মম
আচার্যং বরয়ে ত্বাহমস্ত্রার্থং ত্রিদশেশ্বর
164.25
ইন্দ্র উবাচ
ক্রূরং কর্মাস্ত্রবিত্তাত করিষ্যসি পরংতপ
যদর্থমস্ত্রাণীপ্সুস্ত্বং তং কামং পাণ্ডবাপ্নুহি
164.26
অর্জুন উবাচ
ততোঽহমব্রুবং নাহং দিব্যান্যস্ত্রাণি শত্রুহন্
মানুষেষু প্রয়োক্ষ্যামি বিনাস্ত্রপ্রতিঘাতনম্
164.27
তানি দিব্যানি মেঽস্ত্রাণি প্রয়চ্ছ বিবুধাধিপ
লোকাংশ্চাস্ত্রজিতান্পশ্চাল্লভেয়ং সুরপুংগব
164.28
ইন্দ্র উবাচ
পরীক্ষার্থং ময়ৈতত্তে বাক্যমুক্তং ধনংজয়
মমাত্মজস্য বচনং সূপপন্নমিদং তব
164.29
শিক্ষ মে ভবনং গত্বা সর্বাণ্যস্ত্রাণি ভারত
বায়োরগ্নের্বসুভ্যোঽথ বরুণাত্সমরুদ্গণাৎ
164.30
সাধ্যং পৈতামহং চৈব গন্ধর্বোরগরক্ষসাম্
বৈষ্ণবানি চ সর্বাণি নৈরৃতানি তথৈব চ
মদ্গতানি চ যানীহ সর্বাস্ত্রাণি কুরূদ্বহ
164.31
অর্জুন উবাচ
এবমুক্ত্বা তু মাং শক্রস্তত্রৈবান্তরধীয়ত
অথাপশ্যং হরিয়ুজং রথমৈন্দ্রমুপস্থিতম্
দিব্যং মায়াময়ং পুণ্যং যত্তং মাতলিনা নৃপ
164.32
লোকপালেষু যাতেষু মামুবাচাথ মাতলিঃ
দ্রষ্টুমিচ্ছতি শক্রস্ত্বাং দেবরাজো মহাদ্যুতে
164.33
সংসিদ্ধস্ত্বং মহাবাহো কুরু কার্যমনুত্তমম্
পশ্য পুণ্যকৃতাং লোকান্সশরীরো দিবং ব্রজ
164.34
ইত্যুক্তোঽহং মাতলিনা গিরিমামন্ত্র্য শৈশিরম্
প্রদক্ষিণমুপাবৃত্য সমারোহং রথোত্তমম্
164.35
চোদয়ামাস স হয়ান্মনোমারুতরংহসঃ
মাতলির্হয়শাস্ত্রজ্ঞো যথাবদ্ভূরিদক্ষিণঃ
164.36
অবৈক্ষত চ মে বক্ত্রং স্থিতস্যাথ স সারথিঃ
তথা ভ্রান্তে রথে রাজন্বিস্মিতশ্চেদমব্রবীৎ
164.37
অত্যদ্ভুতমিদং মেঽদ্য বিচিত্রং প্রতিভাতি মাম্
যদাস্থিতো রথং দিব্যং পদা ন চলিতো ভবান্
164.38
দেবরাজোঽপি হি ময়া নিত্যমত্রোপলক্ষিতঃ
বিচলন্প্রথমোত্পাতে হয়ানাং ভরতর্ষভ
164.39
ত্বং পুনঃ স্থিত এবাত্র রথে ভ্রান্তে কুরূদ্বহ
অতিশক্রমিদং সত্ত্বং তবেতি প্রতিভাতি মে
164.40
ইত্যুক্ত্বাকাশমাবিশ্য মাতলির্বিবুধালয়ান্
দর্শয়ামাস মে রাজন্বিমানানি চ ভারত
164.41
নন্দনাদীনি দেবানাং বনানি বহুলান্যুত
দর্শয়ামাস মে প্রীত্যা মাতলিঃ শক্রসারথিঃ
164.42
ততঃ শক্রস্য ভবনমপশ্যমমরাবতীম্
দিব্যৈঃ কামফলৈর্বৃক্ষৈ রত্নৈশ্চ সমলংকৃতাম্
164.43
ন তাং ভাসয়তে সূর্যো ন শীতোষ্ণে ন চ ক্লমঃ
রজঃ পঙ্কো ন চ তমস্তত্রাস্তি ন জরা নৃপ
164.44
ন তত্র শোকো দৈন্যং বা বৈবর্ণ্যং চোপলক্ষ্যতে
দিবৌকসাং মহারাজ ন চ গ্লানিররিংদম
164.45
ন ক্রোধলোভৌ তত্রাস্তামশুভং চ বিশাং পতে
নিত্যতুষ্টাশ্চ হৃষ্টাশ্চ প্রাণিনঃ সুরবেশ্মনি
164.46
নিত্যপুষ্পফলাস্তত্র পাদপা হরিতচ্ছদাঃ
পুষ্করিণ্যশ্চ বিবিধাঃ পদ্মসৌগন্ধিকায়ুতাঃ
164.47
শীতস্তত্র ববৌ বায়ুঃ সুগন্ধো জীবনঃ শুচিঃ
সর্বরত্নবিচিত্রা চ ভূমিঃ পুষ্পবিভূষিতা
164.48
মৃগদ্বিজাশ্চ বহবো রুচিরা মধুরস্বরাঃ
বিমানয়ায়িনশ্চাত্র দৃশ্যন্তে বহবোঽমরাঃ
164.49
ততোঽপশ্যং বসূন্রুদ্রান্সাধ্যাংশ্চ সমরুদ্গণান্
আদিত্যানশ্বিনৌ চৈব তান্সর্বান্প্রত্যপূজয়ম্
164.50
তে মাং বীর্যেণ যশসা তেজসা চ বলেন চ
অস্ত্রৈশ্চাপ্যন্বজানন্ত সংগ্রামবিজয়েন চ
164.51
প্রবিশ্য তাং পুরীং রম্যাং দেবগন্ধর্বসেবিতাম্
দেবরাজং সহস্রাক্ষমুপাতিষ্ঠং কৃতাঞ্জলিঃ
164.52
দদাবর্ধাসনং প্রীতঃ শক্রো মে দদতাং বরঃ
বহুমানাচ্চ গাত্রাণি পস্পর্শ মম বাসবঃ
164.53
তত্রাহং দেবগন্ধর্বৈঃ সহিতো ভূরিদক্ষিণ
অস্ত্রার্থমবসং স্বর্গে কুর্বাণোঽস্ত্রাণি ভারত
164.54
বিশ্বাবসোশ্চ মে পুত্রশ্চিত্রসেনোঽভবত্সখা
স চ গান্ধর্বমখিলং গ্রাহয়ামাস মাং নৃপ
164.55
ততোঽহমবসং রাজন্গৃহীতাস্ত্রঃ সুপূজিতঃ
সুখং শক্রস্য ভবনে সর্বকামসমন্বিতঃ
164.56
শৃণ্বন্বৈ গীতশব্দং চ তূর্যশব্দং চ পুষ্কলম্
পশ্যংশ্চাপ্সরসঃ শ্রেষ্ঠা নৃত্যমানাঃ পরংতপ
164.57
তত্সর্বমনবজ্ঞায় তথ্যং বিজ্জ্ঞায় ভারত
অত্যর্থং প্রতিগৃহ্যাহমস্ত্রেষ্বেব ব্যবস্থিতঃ
164.58
ততোঽতুষ্যত্সহস্রাক্ষস্তেন কামেন মে বিভুঃ
এবং মে বসতো রাজন্নেষ কালোঽত্যগাদ্দিবি