অধ্যায় 165

165.1

অর্জুন উবাচ
কৃতাস্ত্রমভিবিশ্বস্তমথ মাং হরিবাহনঃ
সংস্পৃশ্য মূর্ধ্নি পাণিভ্যামিদং বচনমব্রবীৎ

ন ত্বমদ্য যুধা জেতুং শক্যঃ সুরগণৈরপি
কিং পুনর্মানুষে লোকে মানুষৈরকৃতাত্মভিঃ
অপ্রমেয়োঽপ্রধৃষ্যশ্চ যুদ্ধেষ্বপ্রতিমস্তথা

অথাব্রবীত্পুনর্দেবঃ সংপ্রহৃষ্টতনূরুহঃ
অস্ত্রয়ুদ্ধে সমো বীর ন তে কশ্চিদ্ভবিষ্যতি

অপ্রমত্তঃ সদা দক্ষঃ সত্যবাদী জিতেন্দ্রিয়ঃ
ব্রহ্মণ্যশ্চাস্ত্রবিচ্চাসি শূরশ্চাসি কুরূদ্বহ

অস্ত্রাণি সমবাপ্তানি ত্বয়া দশ চ পঞ্চ চ
পঞ্চভির্বিধিভিঃ পার্থ ন ত্বয়া বিদ্যতে সমঃ

প্রয়োগমুপসংহারমাবৃত্তিং চ ধনংজয়
প্রায়শ্চিত্তং চ বেত্থ ত্বং প্রতিঘাতং চ সর্বশঃ

তব গুর্বর্থকালোঽয়মুপপন্নঃ পরংতপ
প্রতিজানীষ্ব তং কর্তুমতো বেত্স্যাম্যহং পরম্

ততোঽহমব্রুবং রাজন্দেবরাজমিদং বচঃ
বিষহ্যং চেন্ময়া কর্তুং কৃতমেব নিবোধ তৎ

ততো মামব্রবীদ্রাজন্প্রহস্য বলবৃত্রহা
নাবিষহ্যং তবাদ্যাস্তি ত্রিষু লোকেষু কিংচন

নিবাতকবচা নাম দানবা মম শত্রবঃ
সমুদ্রকুক্ষিমাশ্রিত্য দুর্গে প্রতিবসন্ত্যুত

তিস্রঃ কোট্যঃ সমাখ্যাতাস্তুল্যরূপবলপ্রভাঃ
তাংস্তত্র জহি কৌন্তেয় গুর্বর্থস্তে ভবিষ্যতি

ততো মাতলিসংয়ুক্তং ময়ূরসমরোমভিঃ
হয়ৈরুপেতং প্রাদান্মে রথং দিব্যং মহাপ্রভম্

ববন্ধ চৈব মে মূর্ধ্নি কিরীটমিদমুত্তমম্
স্বরূপসদৃশং চৈব প্রাদাদঙ্গবিভূষণম্

অভেদ্যং কবচং চেদং স্পর্শরূপবদুত্তমম্
অজরাং জ্যামিমাং চাপি গাণ্ডীবে সময়োজয়ৎ

ততঃ প্রায়ামহং তেন স্যন্দনেন বিরাজতা
যেনাজয়দ্দেবপতির্বলিং বৈরোচনিং পুরা

ততো দেবাঃ সর্ব এব তেন ঘোষেণ বোধিতঃ
মন্বানা দেবরাজং মাং সমাজগ্মুর্বিশাং পতে
দৃষ্ট্বা চ মামপৃচ্ছন্ত কিং করিষ্যসি ফল্গুন

তানব্রুবং যথাভূতমিদং কর্তাস্মি সংয়ুগে
নিবাতকবচানাং তু প্রস্থিতং মাং বধৈষিণম্
নিবোধত মহাভাগাঃ শিবং চাশাস্ত মেঽনঘাঃ

তুষ্টুবুর্মাং প্রসন্নাস্তে যথা দেবং পুরংদরম্
রথেনানেন মঘবা জিতবাঞ্শম্বরং যুধি
নমুচিং বলবৃত্রৌ চ প্রহ্লাদনরকাবপি

বহূনি চ সহস্রাণি প্রয়ুতান্যর্বুদানি চ
রথেনানেন দৈত্যানাং জিতবান্মঘবান্যুধি

ত্বমপ্যেতেন কৌন্তেয় নিবাতকবচান্রণে
বিজেতা যুধি বিক্রম্য পুরেব মঘবান্বশী

অয়ং চ শঙ্খপ্রবরো যেন জেতাসি দানবান্
অনেন বিজিতা লোকাঃ শক্রেণাপি মহাত্মনা

প্রদীয়মানং দেবৈস্তু দেবদত্তং জলোদ্ভবম্
প্রত্যগৃহ্ণং জয়ায়ৈনং স্তূয়মানস্তদামরৈঃ

স শঙ্খী কবচী বাণী প্রগৃহীতশরাসনঃ
দানবালয়মত্যুগ্রং প্রয়াতোঽস্মি যুয়ুত্সয়া