UtshovChapter 165
165.1
अर्जुन उवाच
कृतास्त्रमभिविश्वस्तमथ मां हरिवाहनः
संस्पृश्य मूर्ध्नि पाणिभ्यामिदं वचनमब्रवीत्
Arjuna uvacha
Kritastramabhivishvastamatha mam harivahanah
Sansprishya murdhni panibhyamidam vachanamabravit
165.2
न त्वमद्य युधा जेतुं शक्यः सुरगणैरपि
किं पुनर्मानुषे लोके मानुषैरकृतात्मभिः
अप्रमेयोऽप्रधृष्यश्च युद्धेष्वप्रतिमस्तथा
Na tvamadya yudha jetum shakyah suraganairapi
Kim punarmanushe loke manushairakritatmabhih
Aprameyopradhrishyashcha yuddheshvapratimastatha
165.3
अथाब्रवीत्पुनर्देवः संप्रहृष्टतनूरुहः
अस्त्रयुद्धे समो वीर न ते कश्चिद्भविष्यति
Athabravitpunardevah samprahrishtatanuruhah
Astrayuddhe samo vira na te kashchidbhavishyati
165.4
अप्रमत्तः सदा दक्षः सत्यवादी जितेन्द्रियः
ब्रह्मण्यश्चास्त्रविच्चासि शूरश्चासि कुरूद्वह
Apramattah sada dakshah satyavadi jitendriyah
Brahmanyashchastravichchasi shurashchasi kurudvaha
165.5
अस्त्राणि समवाप्तानि त्वया दश च पञ्च च
पञ्चभिर्विधिभिः पार्थ न त्वया विद्यते समः
Astrani samavaptani tvaya dasha cha pancha cha
Panchabhirvidhibhih partha na tvaya vidyate samah
165.6
प्रयोगमुपसंहारमावृत्तिं च धनंजय
प्रायश्चित्तं च वेत्थ त्वं प्रतिघातं च सर्वशः
Prayogamupasanharamavrittim cha dhananjaya
Prayashchittam cha vettha tvam pratighatam cha sarvashah
165.7
तव गुर्वर्थकालोऽयमुपपन्नः परंतप
प्रतिजानीष्व तं कर्तुमतो वेत्स्याम्यहं परम्
Tava gurvarthakaloyamupapannah parantapa
Pratijanishva tam kartumato vetsyamyaham param
165.8
ततोऽहमब्रुवं राजन्देवराजमिदं वचः
विषह्यं चेन्मया कर्तुं कृतमेव निबोध तत्
Tatohamabruvam rajandevarajamidam vachah
Vishahyam chenmaya kartum kritameva nibodha tat
165.9
ततो मामब्रवीद्राजन्प्रहस्य बलवृत्रहा
नाविषह्यं तवाद्यास्ति त्रिषु लोकेषु किंचन
Tato mamabravidrajanprahasya balavritraha
Navishahyam tavadyasti trishu lokeshu kinchana
165.10
निवातकवचा नाम दानवा मम शत्रवः
समुद्रकुक्षिमाश्रित्य दुर्गे प्रतिवसन्त्युत
Nivatakavacha nama danava mama shatravah
Samudrakukshimashritya durge prativasantyuta
165.11
तिस्रः कोट्यः समाख्यातास्तुल्यरूपबलप्रभाः
तांस्तत्र जहि कौन्तेय गुर्वर्थस्ते भविष्यति
Tisrah kotyah samakhyatastulyarupabalaprabhah
Tanstatra jahi kaunteya gurvarthaste bhavishyati
165.12
ततो मातलिसंयुक्तं मयूरसमरोमभिः
हयैरुपेतं प्रादान्मे रथं दिव्यं महाप्रभम्
Tato matalisanyuktam mayurasamaromabhih
Hayairupetam pradanme ratham divyam mahaprabham
165.13
बबन्ध चैव मे मूर्ध्नि किरीटमिदमुत्तमम्
स्वरूपसदृशं चैव प्रादादङ्गविभूषणम्
Babandha chaiva me murdhni kiritamidamuttamam
Svarupasadrisham chaiva pradadangavibhushanam
165.14
अभेद्यं कवचं चेदं स्पर्शरूपवदुत्तमम्
अजरां ज्यामिमां चापि गाण्डीवे समयोजयत्
Abhedyam kavacham chedam sparsharupavaduttamam
Ajaram jyamimam chapi gandive samayojayat
165.15
ततः प्रायामहं तेन स्यन्दनेन विराजता
येनाजयद्देवपतिर्बलिं वैरोचनिं पुरा
Tatah prayamaham tena syandanena virajata
Yenajayaddevapatirbalim vairochanim pura
165.16
ततो देवाः सर्व एव तेन घोषेण बोधितः
मन्वाना देवराजं मां समाजग्मुर्विशां पते
दृष्ट्वा च मामपृच्छन्त किं करिष्यसि फल्गुन
Tato devah sarva eva tena ghoshena bodhitah
Manvana devarajam mam samajagmurvisham pate
Drishtva cha mamaprichchhanta kim karishyasi phalguna
165.17
तानब्रुवं यथाभूतमिदं कर्तास्मि संयुगे
निवातकवचानां तु प्रस्थितं मां वधैषिणम्
निबोधत महाभागाः शिवं चाशास्त मेऽनघाः
Tanabruvam yathabhutamidam kartasmi sanyuge
Nivatakavachanam tu prasthitam mam vadhaishinam
Nibodhata mahabhagah shivam chashasta menaghah
165.18
तुष्टुवुर्मां प्रसन्नास्ते यथा देवं पुरंदरम्
रथेनानेन मघवा जितवाञ्शम्बरं युधि
नमुचिं बलवृत्रौ च प्रह्लादनरकावपि
Tushtuvurmam prasannaste yatha devam purandaram
Rathenanena maghava jitavanshambaram yudhi
Namuchim balavritrau cha prahladanarakavapi
165.19
बहूनि च सहस्राणि प्रयुतान्यर्बुदानि च
रथेनानेन दैत्यानां जितवान्मघवान्युधि
Bahuni cha sahasrani prayutanyarbudani cha
Rathenanena daityanam jitavanmaghavanyudhi
165.20
त्वमप्येतेन कौन्तेय निवातकवचान्रणे
विजेता युधि विक्रम्य पुरेव मघवान्वशी
Tvamapyetena kaunteya nivatakavachanrane
Vijeta yudhi vikramya pureva maghavanvashi
165.21
अयं च शङ्खप्रवरो येन जेतासि दानवान्
अनेन विजिता लोकाः शक्रेणापि महात्मना
Ayam cha shankhapravaro yena jetasi danavan
Anena vijita lokah shakrenapi mahatmana
165.22
प्रदीयमानं देवैस्तु देवदत्तं जलोद्भवम्
प्रत्यगृह्णं जयायैनं स्तूयमानस्तदामरैः
Pradiyamanam devaistu devadattam jalodbhavam
Pratyagrihnam jayayainam stuyamanastadamaraih
165.23
स शङ्खी कवची बाणी प्रगृहीतशरासनः
दानवालयमत्युग्रं प्रयातोऽस्मि युयुत्सया
Sa shankhi kavachi bani pragrihitasharasanah
Danavalayamatyugram prayatosmi yuyutsaya