অধ্যায় 166

166.1

অর্জুন উবাচ
ততোঽহং স্তূয়মানস্তু তত্র তত্র মহর্ষিভিঃ
অপশ্যমুদধিং ভীমমপাংপতিমথাব্যয়ম্

ফেনবত্যঃ প্রকীর্ণাশ্চ সংহতাশ্চ সমুচ্ছ্রিতাঃ
ঊর্ময়শ্চাত্র দৃশ্যন্তে চলন্ত ইব পর্বতাঃ
নাবঃ সহস্রশস্তত্র রত্নপূর্ণাঃ সমন্ততঃ

তিমিংগিলাঃ কচ্ছপাশ্চ তথা তিমিতিমিংগিলাঃ
মকরাশ্চাত্র দৃশ্যন্তে জলে মগ্না ইবাদ্রয়ঃ

শঙ্খানাং চ সহস্রাণি মগ্নান্যপ্সু সমন্ততঃ
দৃশ্যন্তে স্ম যথা রাত্রৌ তারাস্তন্বভ্রসংবৃতাঃ

তথা সহস্রশস্তত্র রত্নসংঘাঃ প্লবন্ত্যুত
বায়ুশ্চ ঘূর্ণতে ভীমস্তদদ্ভুতমিবাভবৎ

তমতীত্য মহাবেগং সর্বাম্ভোনিধিমুত্তমম্
অপশ্যং দানবাকীর্ণং তদ্দৈত্যপুরমন্তিকাৎ

তত্রৈব মাতলিস্তূর্ণং নিপত্য পৃথিবীতলে
নাদয়ন্রথঘোষেণ তত্পুরং সমুপাদ্রবৎ

রথঘোষং তু তং শ্রুত্বা স্তনয়িত্নোরিবাম্বরে
মন্বানা দেবরাজং মাং সংবিগ্না দানবাভবন্

সর্বে সংভ্রান্তমনসঃ শরচাপধরাঃ স্থিতাঃ
তথা শূলাসিপরশুগদামুসলপাণয়ঃ

ততো দ্বারাণি পিদধুর্দানবাস্ত্রস্তচেতসঃ
সংবিধায় পুরে রক্ষাং ন স্ম কশ্চন দৃশ্যতে

ততঃ শঙ্খমুপাদায় দেবদত্তং মহাস্বনম্
পুরমাসুরমাশ্লিষ্য প্রাধমং তং শনৈরহম্

স তু শব্দো দিবং স্তব্ধ্বা প্রতিশব্দমজীজনৎ
বিত্রেসুশ্চ নিলিল্যুশ্চ ভূতানি সুমহান্ত্যপি

ততো নিবাতকবচাঃ সর্ব এব সমন্ততঃ
দংশিতা বিবিধৈস্ত্রাণৈর্বিবিধায়ুধপাণয়ঃ

আয়সৈশ্চ মহাশূলৈর্গদাভির্মুসলৈরপি
পট্টিশৈঃ করবালৈশ্চ রথচক্রৈশ্চ ভারত

শতঘ্নীভির্ভুশুণ্ডীভিঃ খড্গৈশ্চিত্রৈঃ স্বলংকৃতৈঃ
প্রগৃহীতৈর্দিতেঃ পুত্রাঃ প্রাদুরাসন্সহস্রশঃ

ততো বিচার্য বহুধা রথমার্গেষু তান্হয়ান্
প্রাচোদয়ত্সমে দেশে মাতলির্ভরতর্ষভ

তেন তেষাং প্রণুন্নানামাশুত্বাচ্ছীঘ্রগামিনাম্
নান্বপশ্যং তদা কিংচিত্তন্মেঽদ্ভুতমিবাভবৎ

ততস্তে দানবাস্তত্র যোধব্রাতান্যনেকশঃ
বিকৃতস্বররূপাণি ভৃশং সর্বাণ্যচোদয়ন্

তেন শব্দেন মহতা সমুদ্রে পর্বতোপমাঃ
আপ্লবন্ত গতৈঃ সত্ত্বৈর্মত্স্যাঃ শতসহস্রশঃ

ততো বেগেন মহতা দানবা মামুপাদ্রবন্
বিমুঞ্চন্তঃ শিতান্বাণাঞ্শতশোঽথ সহস্রশঃ

স সংপ্রহারস্তুমুলস্তেষাং মম চ ভারত
অবর্তত মহাঘোরো নিবাতকবচান্তকঃ

ততো দেবর্ষয়শ্চৈব দানবর্ষিগণাশ্চ যে
ব্রহ্মর্ষয়শ্চ সিদ্ধাশ্চ সমাজগ্মুর্মহামৃধে

তে বৈ মামনুরূপাভির্মধুরাভির্জয়ৈষিণঃ
অস্তুবন্মুনয়ো বাগ্ভির্যথেন্দ্রং তারকাময়ে