অধ্যায় 167

167.1

অর্জুন উবাচ
ততো নিবাতকবচাঃ সর্বে বেগেন ভারত
অভ্যদ্রবন্মাং সহিতাঃ প্রগৃহীতায়ুধা রণে

167.2

আচ্ছিদ্য রথপন্থানমুত্ক্রোশন্তো মহারথাঃ
আবৃত্য সর্বতস্তে মাং শরবর্ষৈরবাকিরন্

167.3

ততোঽপরে মহাবীর্যাঃ শূলপট্টিশপাণয়ঃ
শূলানি চ ভুশুণ্ডীশ্চ মুমুচুর্দানবা ময়ি

167.4

তচ্ছূলবর্ষং সুমহদ্গদাশক্তিসমাকুলম্
অনিশং সৃজ্যমানং তৈরপতন্মদ্রথোপরি

167.5

অন্যে মামভ্যধাবন্ত নিবাতকবচা যুধি
শিতশস্ত্রায়ুধা রৌদ্রাঃ কালরূপাঃ প্রহারিণঃ

167.6

তানহং বিবিধৈর্বাণৈর্বেগবদ্ভিরজিহ্মগৈঃ
গাণ্ডীবমুক্তৈরভ্যঘ্নমেকৈকং দশভির্মৃধে
তে কৃতা বিমুখাঃ সর্বে মত্প্রয়ুক্তৈঃ শিলাশিতৈঃ

167.7

ততো মাতলিনা তূর্ণং হয়াস্তে সংপ্রচোদিতাঃ
রথমার্গাদ্বহূংস্তত্র বিচেরুর্বাতরংহসঃ
সুসংয়তা মাতলিনা প্রামথ্নন্ত দিতেঃ সুতান্

167.8

শতং শতাস্তে হরয়স্তস্মিন্যুক্তা মহারথে
তদা মাতলিনা যত্তা ব্যচরন্নল্পকা ইব

167.9

তেষাং চরণপাতেন রথনেমিস্বনেন চ
মম বাণনিপাতৈশ্চ হতাস্তে শতশোঽসুরাঃ

167.10

গতাসবস্তথা চান্যে প্রগৃহীতশরাসনাঃ
হতসারথয়স্তত্র ব্যকৃষ্যন্ত তুরংগমৈঃ

167.11

তে দিশো বিদিশঃ সর্বাঃ প্রতিরুধ্য প্রহারিণঃ
নিঘ্নন্তি বিবিধৈঃ শস্ত্রৈস্ততো মে ব্যথিতং মনঃ

167.12

ততোঽহং মাতলের্বীর্যমপশ্যং পরমাদ্ভুতম্
অশ্বাংস্তথা বেগবতো যদয়ত্নাদধারয়ৎ

167.13

ততোঽহং লঘুভিশ্চিত্রৈরস্ত্রৈস্তানসুরান্রণে
সায়ুধানচ্ছিনং রাজঞ্শতশোঽথ সহস্রশঃ

167.14

এবং মে চরতস্তত্র সর্বয়ত্নেন শত্রুহন্
প্রীতিমানভবদ্বীরো মাতলিঃ শক্রসারথিঃ

167.15

বধ্যমানাস্ততস্তে তু হয়ৈস্তেন রথেন চ
অগমন্প্রক্ষয়ং কেচিন্ন্যবর্তন্ত তথাপরে

167.16

স্পর্ধমানা ইবাস্মাভির্নিবাতকবচা রণে
শরবর্ষৈর্মহদ্ভির্মাং সমন্তাত্প্রত্যবারয়ন্

167.17

ততোঽহং লঘুভিশ্চিত্রৈর্ব্রহ্মাস্ত্রপরিমন্ত্রিতৈঃ
ব্যধমং সায়কৈরাশু শতশোঽথ সহস্রশঃ

167.18

ততঃ সংপীড্যমানাস্তে ক্রোধাবিষ্টা মহাসুরাঃ
অপীডয়ন্মাং সহিতাঃ শরশূলাসিবৃষ্টিভিঃ

167.19

ততোঽহমস্ত্রমাতিষ্ঠং পরমং তিগ্মতেজসম্
দয়িতং দেবরাজস্য মাধবং নাম ভারত

167.20

ততঃ খড্গাংস্ত্রিশূলাংশ্চ তোমরাংশ্চ সহস্রশঃ
অস্ত্রবীর্যেণ শতধা তৈর্মুক্তানহমচ্ছিনম্

167.21

ছিত্ত্বা প্রহরণান্যেষাং ততস্তানপি সর্বশঃ
প্রত্যবিধ্যমহং রোষাদ্দশভির্দশভিঃ শরৈঃ

167.22

গাণ্ডীবাদ্ধি তদা সংখ্যে যথা ভ্রমরপঙ্ক্তয়ঃ
নিষ্পতন্তি তথা বাণাস্তন্মাতলিরপূজয়ৎ

167.23

তেষামপি তু বাণাস্তে বহুত্বাচ্ছলভা ইব
অবাকিরন্মাং বলবত্তানহং ব্যধমং শরৈঃ

167.24

বধ্যমানাস্ততস্তে তু নিবাতকবচাঃ পুনঃ
শরবর্ষৈর্মহদ্ভির্মাং সমন্তাত্পর্যবারয়ন্

167.25

শরবেগান্নিহত্যাহমস্ত্রৈঃ শরবিঘাতিভিঃ
জ্বলদ্ভিঃ পরমৈঃ শীঘ্রৈস্তানবিধ্যং সহস্রশঃ

167.26

তেষাং ছিন্নানি গাত্রাণি বিসৃজন্তি স্ম শোণিতম্
প্রাবৃষীবাতিবৃষ্টানি শৃঙ্গাণীব ধরাভৃতাম্

167.27

ইন্দ্রাশনিসমস্পর্শৈর্বেগবদ্ভিরজিহ্মগৈঃ
মদ্বাণৈর্বধ্যমানাস্তে সমুদ্বিগ্নাঃ স্ম দানবাঃ

167.28

শতধা ভিন্নদেহান্ত্রাঃ ক্ষীণপ্রহরণৌজসঃ
ততো নিবাতকবচা মাময়ুধ্যন্ত মায়য়া

Contains text from DharmicData, made available under the Open Database License (ODbL). Simple meanings are written by AI and can contain mistakes.