Utshovঅধ্যায় 168
168.1
অর্জুন উবাচ
ততোঽশ্মবর্ষং সুমহত্প্রাদুরাসীত্সমন্ততঃ
নগমাত্রৈর্মহাঘোরৈস্তন্মাং দৃঢমপীডয়ৎ
168.2
তদহং বজ্রসংকাশৈঃ শরৈরিন্দ্রাস্ত্রচোদিতৈঃ
অচূর্ণয়ং বেগবদ্ভিঃ শতধৈকৈকমাহবে
168.3
চূর্ণ্যমানেঽশ্মবর্ষে তু পাবকঃ সমজায়ত
তত্রাশ্মচূর্ণমপতত্পাবকপ্রকরা ইব
168.4
ততোঽশ্মবর্ষে নিহতে জলবর্ষং মহত্তরম্
ধারাভিরক্ষমাত্রাভিঃ প্রাদুরাসীন্মমান্তিকে
168.5
নভসঃ প্রচ্যুতা ধারাস্তিগ্মবীর্যাঃ সহস্রশঃ
আবৃণ্বন্সর্বতো ব্যোম দিশশ্চোপদিশস্তথা
168.6
ধারাণাং চ নিপাতেন বায়োর্বিস্ফূর্জিতেন চ
গর্জিতেন চ দৈত্যানাং ন প্রাজ্ঞায়ত কিংচন
168.7
ধারা দিবি চ সংবদ্ধা বসুধায়াং চ সর্বশঃ
ব্যামোহয়ন্ত মাং তত্র নিপতন্ত্যোঽনিশং ভুবি
168.8
তত্রোপদিষ্টমিন্দ্রেণ দিব্যমস্ত্রং বিশোষণম্
দীপ্তং প্রাহিণবং ঘোরমশুষ্যত্তেন তজ্জলম্
168.9
হতেঽশ্মবর্ষে তু ময়া জলবর্ষে চ শোষিতে
মুমুচুর্দানবা মায়ামগ্নিং বায়ুং চ মানদ
168.10
ততোঽহমগ্নিং ব্যধমং সলিলাস্ত্রেণ সর্বশঃ
শৈলেন চ মহাস্ত্রেণ বায়োর্বেগমধারয়ম্
168.11
তস্যাং প্রতিহতায়াং তু দানবা যুদ্ধদুর্মদাঃ
প্রাকুর্বন্বিবিধা মায়া যৌগপদ্যেন ভারত
168.12
ততো বর্ষং প্রাদুরভূত্সুমহল্লোমহর্ষণম্
অস্ত্রাণাং ঘোররূপাণামগ্নের্বায়োস্তথাশ্মনাম্
168.13
সা তু মায়াময়ী বৃষ্টিঃ পীডয়ামাস মাং যুধি
অথ ঘোরং তমস্তীব্রং প্রাদুরাসীত্সমন্ততঃ
168.14
তমসা সংবৃতে লোকে ঘোরেণ পরুষেণ চ
তুরগা বিমুখাশ্চাসন্প্রাস্খলচ্চাপি মাতলিঃ
168.15
হস্তাদ্ধিরণ্ময়শ্চাস্য প্রতোদঃ প্রাপতদ্ভুবি
অসকৃচ্চাহ মাং ভীতঃ ক্বাসীতি ভরতর্ষভ
168.16
মাং চ ভীরাবিশত্তীব্রা তস্মিন্বিগতচেতসি
স চ মাং বিগতজ্ঞানঃ সংত্রস্ত ইদমব্রবীৎ
168.17
সুরাণামসুরাণাং চ সংগ্রামঃ সুমহানভূৎ
অমৃতার্থে পুরা পার্থ স চ দৃষ্টো ময়ানঘ
168.18
শম্বরস্য বধে চাপি সংগ্রামঃ সুমহানভূৎ
সারথ্যং দেবরাজস্য তত্রাপি কৃতবানহম্
168.19
তথৈব বৃত্রস্য বধে সংগৃহীতা হয়া ময়া
বৈরোচনের্ময়া যুদ্ধং দৃষ্টং চাপি সুদারুণম্
168.20
এতে ময়া মহাঘোরাঃ সংগ্রামাঃ পর্যুপাসিতাঃ
ন চাপি বিগতজ্ঞানো ভূতপূর্বোঽস্মি পাণ্ডব
168.21
পিতামহেন সংহারঃ প্রজানাং বিহিতো ধ্রুবম্
ন হি যুদ্ধমিদং যুক্তমন্যত্র জগতঃ ক্ষয়াৎ
168.22
তস্য তদ্বচনং শ্রুত্বা সংস্তভ্যাত্মানমাত্মনা
মোহয়িষ্যন্দানবানামহং মায়াময়ং বলম্
168.23
অব্রুবং মাতলিং ভীতং পশ্য মে ভুজয়োর্বলম্
অস্ত্রাণাং চ প্রভাবং মে ধনুষো গাণ্ডিবস্য চ
168.24
অদ্যাস্ত্রমায়য়ৈতেষাং মায়ামেতাং সুদারুণাম্
বিনিহন্মি তমশ্চোগ্রং মা ভৈঃ সূত স্থিরো ভব
168.25
এবমুক্ত্বাহমসৃজমস্ত্রমায়াং নরাধিপ
মোহনীং সর্বশত্রূণাং হিতায় ত্রিদিবৌকসাম্
168.26
পীড্যমানাসু মায়াসু তাসু তাস্বসুরেশ্বরাঃ
পুনর্বহুবিধা মায়াঃ প্রাকুর্বন্নমিতৌজসঃ
168.27
পুনঃ প্রকাশমভবত্তমসা গ্রস্যতে পুনঃ
ব্রজত্যদর্শনং লোকঃ পুনরপ্সু নিমজ্জতি
168.28
সুসংগৃহীতৈর্হরিভিঃ প্রকাশে সতি মাতলিঃ
ব্যচরত্স্যন্দনাগ্র্যেণ সংগ্রামে লোমহর্ষণে
168.29
ততঃ পর্যপতন্নুগ্রা নিবাতকবচা ময়ি
তানহং বিবরং দৃষ্ট্বা প্রাহিণ্বং যমসাদনম্
168.30
বর্তমানে তথা যুদ্ধে নিবাতকবচান্তকে
নাপশ্যং সহসা সর্বান্দানবান্মায়য়াবৃতান্