Utshovঅধ্যায় 169
169.1
অর্জুন উবাচ
অদৃশ্যমানাস্তে দৈত্যা যোধয়ন্তি স্ম মায়য়া
অদৃশ্যানস্ত্রবীর্যেণ তানপ্যহময়োধয়ম্
169.2
গাণ্ডীবমুক্তা বিশিখাঃ সম্যগস্ত্রপ্রচোদিতাঃ
অচ্ছিন্দন্নুত্তমাঙ্গানি যত্র যত্র স্ম তেঽভবন্
169.3
ততো নিবাতকবচা বধ্যমানা ময়া যুধি
সংহৃত্য মায়াং সহসা প্রাবিশন্পুরমাত্মনঃ
169.4
ব্যপয়াতেষু দৈত্যেষু প্রাদুর্ভূতে চ দর্শনে
অপশ্যং দানবাংস্তত্র হতাঞ্শতসহস্রশঃ
169.5
বিনিষ্পিষ্টানি তত্রৈষাং শস্ত্রাণ্যাভরণানি চ
কূটশঃ স্ম প্রদৃশ্যন্তে গাত্রাণি কবচানি চ
169.6
হয়ানাং নান্তরং হ্যাসীত্পদাদ্বিচলিতুং পদম্
উত্পত্য সহসা তস্থুরন্তরিক্ষগমাস্ততঃ
169.7
ততো নিবাতকবচা ব্যোম সংছাদ্য কেবলম্
অদৃশ্যা হ্যভ্যবর্তন্ত বিসৃজন্তঃ শিলোচ্চয়ান্
169.8
অন্তর্ভূমিগতাশ্চান্যে হয়ানাং চরণান্যথ
ন্যগৃহ্ণন্দানবা ঘোরা রথচক্রে চ ভারত
169.9
বিনিগৃহ্য হরীনশ্বান্রথং চ মম যুধ্যতঃ
সর্বতো মামচিন্বন্ত সরথং ধরণীধরৈঃ
169.10
পর্বতৈরুপচীয়দ্ভিঃ পতমানৈস্তথাপরৈঃ
স দেশো যত্র বর্তাম গুহেব সমপদ্যত
169.11
পর্বতৈশ্ছাদ্যমানোঽহং নিগৃহীতৈশ্চ বাজিভিঃ
অগচ্ছং পরমামার্তিং মাতলিস্তদলক্ষয়ৎ
169.12
লক্ষয়িত্বা তু মাং ভীতমিদং বচনমব্রবীৎ
অর্জুনার্জুন মা ভৈস্ত্বং বজ্রমস্ত্রমুদীরয়
169.13
ততোঽহং তস্য তদ্বাক্যং শ্রুত্বা বজ্রমুদীরয়ম্
দেবরাজস্য দয়িতং বজ্রমস্ত্রং নরাধিপ
169.14
অচলং স্থানমাসাদ্য গাণ্ডীবমনুমন্ত্র্য চ
অমুঞ্চং বজ্রসংস্পর্শানায়সান্নিশিতাঞ্শরান্
169.15
ততো মায়াশ্চ তাঃ সর্বা নিবাতকবচাংশ্চ তান্
তে বজ্রচোদিতা বাণা বজ্রভূতাঃ সমাবিশন্
169.16
তে বজ্রবেগাভিহতা দানবাঃ পর্বতোপমাঃ
ইতরেতরমাশ্লিষ্য ন্যপতন্পৃথিবীতলে
169.17
অন্তর্ভূমৌ তু যেঽগৃহ্ণন্দানবা রথবাজিনঃ
অনুপ্রবিশ্য তান্বাণাঃ প্রাহিণ্বন্যমসাদনম্
169.18
হতৈর্নিবাতকবচৈর্নিরস্তৈঃ পর্বতোপমৈঃ
সমাচ্ছাদ্যত দেশঃ স বিকীর্ণৈরিব পর্বতৈঃ
169.19
ন হয়ানাং ক্ষতিঃ কাচিন্ন রথস্য ন মাতলেঃ
মম চাদৃশ্যত তদা তদদ্ভুতমিবাভবৎ
169.20
ততো মাং প্রহসন্রাজন্মাতলিঃ প্রত্যভাষত
নৈতদর্জুন দেবেষু ত্বয়ি বীর্যং যদীক্ষ্যতে
169.21
হতেষ্বসুরসংঘেষু দারাস্তেষাং তু সর্বশঃ
প্রাক্রোশন্নগরে তস্মিন্যথা শরদি লক্ষ্মণাঃ
169.22
ততো মাতলিনা সার্ধমহং তত্পুরমভ্যয়াম্
ত্রাসয়ন্রথঘোষেণ নিবাতকবচস্ত্রিয়ঃ
169.23
তান্দৃষ্ট্বা দশসাহস্রান্ময়ূরসদৃশান্হয়ান্
রথং চ রবিসংকাশং প্রাদ্রবন্গণশঃ স্ত্রিয়ঃ
169.24
তাভিরাভরণৈঃ শব্দস্ত্রাসিতাভিঃ সমীরিতঃ
শিলানামিব শৈলেষু পতন্তীনামভূত্তদা
169.25
বিত্রস্তা দৈত্যনার্যস্তাঃ স্বানি বেশ্মান্যথাবিশন্
বহুরত্নবিচিত্রাণি শাতকুম্ভময়ানি চ
169.26
তদদ্ভুতাকারমহং দৃষ্ট্বা নগরমুত্তমম্
বিশিষ্টং দেবনগরাদপৃচ্ছং মাতলিং ততঃ
169.27
ইদমেবংবিধং কস্মাদ্দেবতা নাবিশন্ত্যুত
পুরংদরপুরাদ্ধীদং বিশিষ্টমিতি লক্ষয়ে
169.28
মাতলিরুবাচ
আসীদিদং পুরা পার্থ দেবরাজস্য নঃ পুরম্
ততো নিবাতকবচৈরিতঃ প্রচ্যাবিতাঃ সুরাঃ
169.29
তপস্তপ্ত্বা মহত্তীব্রং প্রসাদ্য চ পিতামহম্
ইদং বৃতং নিবাসায় দেবেভ্যশ্চাভয়ং যুধি
169.30
ততঃ শক্রেণ ভগবান্স্বয়ম্ভূরভিচোদিতঃ
বিধত্তাং ভগবানত্রেত্যাত্মনো হিতকাম্যয়া
169.31
তত উক্তো ভগবতা দিষ্টমত্রেতি বাসবঃ
ভবিতান্তস্ত্বমেবৈষাং দেহেনান্যেন বৃত্রহন্
169.32
তত এষাং বধার্থায় শক্রোঽস্ত্রাণি দদৌ তব
ন হি শক্যাঃ সুরৈর্হন্তুং য এতে নিহতাস্ত্বয়া
169.33
কালস্য পরিণামেন ততস্ত্বমিহ ভারত
এষামন্তকরঃ প্রাপ্তস্তত্ত্বয়া চ কৃতং তথা
169.34
দানবানাং বিনাশার্থং মহাস্ত্রাণাং মহদ্বলম্
গ্রাহিতস্ত্বং মহেন্দ্রেণ পুরুষেন্দ্র তদুত্তমম্
169.35
অর্জুন উবাচ
ততঃ প্রবিশ্য নগরং দানবাংশ্চ নিহত্য তান্
পুনর্মাতলিনা সার্ধমগচ্ছং দেবসদ্ম তৎ