Utshovঅধ্যায় 170
170.1
অর্জুন উবাচ
নিবর্তমানেন ময়া মহদ্দৃষ্টং ততোঽপরম্
পুরং কামচরং দিব্যং পাবকার্কসমপ্রভম্
170.2
দ্রুমৈ রত্নময়ৈশ্চৈত্রৈর্ভাস্বরৈশ্চ পতত্রিভিঃ
পৌলোমৈঃ কালকেয়ৈশ্চ নিত্যহৃষ্টৈরধিষ্ঠিতম্
170.3
গোপুরাট্টালকোপেতং চতুর্দ্বারং দুরাসদম্
সর্বরত্নময়ং দিব্যমদ্ভুতোপমদর্শনম্
দ্রুমৈঃ পুষ্পফলোপেতৈর্দিব্যরত্নময়ৈর্বৃতম্
170.4
তথা পতত্রিভির্দিব্যৈরুপেতং সুমনোহরৈঃ
অসুরৈর্নিত্যমুদিতৈঃ শূলর্ষ্টিমুসলায়ুধৈঃ
চাপমুদ্গরহস্তৈশ্চ স্রগ্বিভিঃ সর্বতো বৃতম্
170.5
তদহং প্রেক্ষ্য দৈত্যানাং পুরমদ্ভুতদর্শনম্
অপৃচ্ছং মাতলিং রাজন্কিমিদং দৃশ্যতেতি বৈ
170.6
মাতলিরুবাচ
পুলোমা নাম দৈতেয়ী কালকা চ মহাসুরী
দিব্যং বর্ষসহস্রং তে চেরতুঃ পরমং তপঃ
তপসোঽন্তে ততস্তাভ্যাং স্বয়ম্ভূরদদাদ্বরম্
170.7
অগৃহ্ণীতাং বরং তে তু সুতানামল্পদুঃখতাম্
অবধ্যতাং চ রাজেন্দ্র সুররাক্ষসপন্নগৈঃ
170.8
রমণীয়ং পুরং চেদং খচরং সুকৃতপ্রভম্
সর্বরত্নৈঃ সমুদিতং দুর্ধর্ষমমরৈরপি
সয়ক্ষগন্ধর্বগণৈঃ পন্নগাসুররাক্ষসৈঃ
170.9
সর্বকামগুণোপেতং বীতশোকমনাময়ম্
ব্রহ্মণা ভরতশ্রেষ্ঠ কালকেয়কৃতে কৃতম্
170.10
তদেতত্খচরং দিব্যং চরত্যমরবর্জিতম্
পৌলোমাধ্যুষিতং বীর কালকেয়ৈশ্চ দানবৈঃ
170.11
হিরণ্যপুরমিত্যেতত্খ্যায়তে নগরং মহৎ
রক্ষিতং কালকেয়ৈশ্চ পৌলোমৈশ্চ মহাসুরৈঃ
170.12
ত এতে মুদিতা নিত্যমবধ্যাঃ সর্বদৈবতৈঃ
নিবসন্ত্যত্র রাজেন্দ্র গতোদ্বেগা নিরুত্সুকাঃ
মানুষো মৃত্যুরেতেষাং নির্দিষ্টো ব্রহ্মণা পুরা
170.13
অর্জুন উবাচ
সুরাসুরৈরবধ্যাংস্তানহং জ্ঞাত্বা ততঃ প্রভো
অব্রুবং মাতলিং হৃষ্টো যাহ্যেতত্পুরমঞ্জসা
170.14
ত্রিদশেশদ্বিষো যাবত্ক্ষয়মস্ত্রৈর্নয়াম্যহম্
ন কথংচিদ্ধি মে পাপা ন বধ্যা যে সুরদ্বিষঃ
170.15
উবাহ মাং ততঃ শীঘ্রং হিরণ্যপুরমন্তিকাৎ
রথেন তেন দিব্যেন হরিয়ুক্তেন মাতলিঃ
170.16
তে মামালক্ষ্য দৈতেয়া বিচিত্রাভরণাম্বরাঃ
সমুত্পেতুর্মহাবেগা রথানাস্থায় দংশিতাঃ
170.17
ততো নালীকনারাচৈর্ভল্লশক্ত্যৃষ্টিতোমরৈঃ
অভ্যঘ্নন্দানবেন্দ্রা মাং ক্রুদ্ধাস্তীব্রপরাক্রমাঃ
170.18
তদহং চাস্ত্রবর্ষেণ মহতা প্রত্যবারয়ম্
শস্ত্রবর্ষং মহদ্রাজন্বিদ্যাবলমুপাশ্রিতঃ
170.19
ব্যামোহয়ং চ তান্সর্বান্রথমার্গৈশ্চরন্রণে
তেঽন্যোন্যমভিসংমূঢাঃ পাতয়ন্তি স্ম দানবাঃ
170.20
তেষামহং বিমূঢানামন্যোন্যমভিধাবতাম্
শিরাংসি বিশিখৈর্দীপ্তৈর্ব্যহরং শতসংঘশঃ
170.21
তে বধ্যমানা দৈতেয়াঃ পুরমাস্থায় তত্পুনঃ
খমুত্পেতুঃ সনগরা মায়ামাস্থায় দানবীম্
170.22
ততোঽহং শরবর্ষেণ মহতা প্রত্যবারয়ম্
মার্গমাবৃত্য দৈত্যানাং গতিং চৈষামবারয়ম্
170.23
তত্পুরং খচরং দিব্যং কামগং দিব্যবর্চসম্
দৈতেয়ৈর্বরদানেন ধার্যতে স্ম যথাসুখম্
170.24
অন্তর্ভূমৌ নিপতিতং পুনরূর্ধ্বং প্রতিষ্ঠতে
পুনস্তির্যক্প্রয়াত্যাশু পুনরপ্সু নিমজ্জতি
170.25
অমরাবতিসংকাশং পুরং কামগমং তু তৎ
অহমস্ত্রৈর্বহুবিধৈঃ প্রত্যগৃহ্ণং নরাধিপ
170.26
ততোঽহং শরজালেন দিব্যাস্ত্রমুদিতেন চ
ন্যগৃহ্ণং সহ দৈতেয়ৈস্তত্পুরং ভরতর্ষভ
170.27
বিক্ষতং চায়সৈর্বাণৈর্মত্প্রয়ুক্তৈরজিহ্মগৈঃ
মহীমভ্যপতদ্রাজন্প্রভগ্নং পুরমাসুরম্
170.28
তে বধ্যমানা মদ্বাণৈর্বজ্রবেগৈরয়স্ময়ৈঃ
পর্যভ্রমন্ত বৈ রাজন্নসুরাঃ কালচোদিতাঃ
170.29
ততো মাতলিরপ্যাশু পুরস্তান্নিপতন্নিব
মহীমবাতরত্ক্ষিপ্রং রথেনাদিত্যবর্চসা
170.30
ততো রথসহস্রাণি ষষ্টিস্তেষামমর্ষিণাম্
যুয়ুত্সূনাং ময়া সার্ধং পর্যবর্তন্ত ভারত
170.31
তানহং নিশিতৈর্বাণৈর্ব্যধমং গার্ধ্রবাজিতৈঃ
তে যুদ্ধে সংন্যবর্তন্ত সমুদ্রস্য যথোর্ময়ঃ
170.32
নেমে শক্যা মানুষেণ যুদ্ধেনেতি প্রচিন্ত্য বৈ
ততোঽহমানুপূর্ব্যেণ সর্বাণ্যস্ত্রাণ্যয়োজয়ম্
170.33
ততস্তানি সহস্রাণি রথানাং চিত্রয়োধিনাম্
অস্ত্রাণি মম দিব্যানি প্রত্যঘ্নঞ্শনকৈরিব
170.34
রথমার্গান্বিচিত্রাংস্তে বিচরন্তো মহারথাঃ
প্রত্যদৃশ্যন্ত সংগ্রামে শতশোঽথ সহস্রশঃ
170.35
বিচিত্রমুকুটাপীডা বিচিত্রকবচধ্বজাঃ
বিচিত্রাভরণাশ্চৈব নন্দয়ন্তীব মে মনঃ
170.36
অহং তু শরবর্ষৈস্তানস্ত্রপ্রমুদিতৈ রণে
নাশক্নুবং পীডয়িতুং তে তু মাং পর্যপীডয়ন্
170.37
তৈঃ পীড্যমানো বহুভিঃ কৃতাস্ত্রৈঃ কুশলৈর্যুধি
ব্যথিতোঽস্মি মহায়ুদ্ধে ভয়ং চাগান্মহন্মম
170.38
ততোঽহং দেবদেবায় রুদ্রায় প্রণতো রণে
স্বস্তি ভূতেভ্য ইত্যুক্ত্বা মহাস্ত্রং সময়োজয়ম্
যত্তদ্রৌদ্রমিতি খ্যাতং সর্বামিত্রবিনাশনম্
170.39
ততোঽপশ্যং ত্রিশিরসং পুরুষং নবলোচনম্
ত্রিমুখং ষড্ভুজং দীপ্তমর্কজ্বলনমূর্ধজম্
লেলিহানৈর্মহানাগৈঃ কৃতশীর্ষমমিত্রহন্
170.40
বিভীস্ততস্তদস্ত্রং তু ঘোরং রৌদ্রং সনাতনম্
দৃষ্ট্বা গাণ্ডীবসংয়োগমানীয় ভরতর্ষভ
170.41
নমস্কৃত্বা ত্রিনেত্রায় শর্বায়ামিততেজসে
মুক্তবান্দানবেন্দ্রাণাং পরাভাবায় ভারত
170.42
মুক্তমাত্রে ততস্তস্মিন্রূপাণ্যাসন্সহস্রশঃ
মৃগাণামথ সিংহানাং ব্যাঘ্রাণাং চ বিশাং পতে
ঋক্ষাণাং মহিষাণাং চ পন্নগানাং তথা গবাম্
170.43
গজানাং সৃমরাণাং চ শরভাণাং চ সর্বশঃ
ঋষভাণাং বরাহাণাং মার্জারাণাং তথৈব চ
শালাবৃকাণাং প্রেতানাং ভুরুণ্ডানাং চ সর্বশঃ
170.44
গৃধ্রাণাং গরুডানাং চ মকরাণাং তথৈব চ
পিশাচানাং সয়ক্ষাণাং তথৈব চ সুরদ্বিষাম্
170.45
গুহ্যকানাং চ সংগ্রামে নৈরৃতানাং তথৈব চ
ঝষাণাং গজবক্ত্রাণামুলূকানাং তথৈব চ
170.46
মীনকূর্মসমূহানাং নানাশস্ত্রাসিপাণিনাম্
তথৈব যাতু ধানানাং গদামুদ্গরধারিণাম্
170.47
এতৈশ্চান্যৈশ্চ বহুভির্নানারূপধরৈস্তথা
সর্বমাসীজ্জগদ্ব্যাপ্তং তস্মিন্নস্ত্রে বিসর্জিতে
170.48
ত্রিশিরোভিশ্চতুর্দংষ্ট্রৈশ্চতুরাস্যৈশ্চতুর্ভুজৈঃ
অনেকরূপসংয়ুক্তৈর্মাংসমেদোবসাশিভিঃ
অভীক্ষ্ণং বধ্যমানাস্তে দানবা যে সমাগতাঃ
170.49
অর্কজ্বলনতেজোভির্বজ্রাশনিসমপ্রভৈঃ
অদ্রিসারময়ৈশ্চান্যৈর্বাণৈররিবিদারণৈঃ
ন্যহনং দানবান্সর্বান্মুহূর্তেনৈব ভারত
170.50
গাণ্ডীবাস্ত্রপ্রণুন্নাংস্তান্গতাসূন্নভসশ্চ্যুতান্
দৃষ্ট্বাহং প্রাণমং ভূয়স্ত্রিপুরঘ্নায় বেধসে
170.51
তথা রৌদ্রাস্ত্রনিষ্পিষ্টান্দিব্যাভরণভূষিতান্
নিশাম্য পরমং হর্ষমগমদ্দেবসারথিঃ
170.52
তদসহ্যং কৃতং কর্ম দেবৈরপি দুরাসদম্
দৃষ্ট্বা মাং পূজয়ামাস মাতলিঃ শক্রসারথিঃ
170.53
উবাচ চেদং বচনং প্রীয়মাণঃ কৃতাঞ্জলিঃ
সুরাসুরৈরসহ্যং হি কর্ম যত্সাধিতং ত্বয়া
ন হ্যেতত্সংয়ুগে কর্তুমপি শক্তঃ সুরেশ্বরঃ
170.54
সুরাসুরৈরবধ্যং হি পুরমেতত্খগং মহৎ
ত্বয়া বিমথিতং বীর স্ববীর্যাস্ত্রতপোবলাৎ
170.55
বিধ্বস্তেঽথ পুরে তস্মিন্দানবেষু হতেষু চ
বিনদন্ত্যঃ স্ত্রিয়ঃ সর্বা নিষ্পেতুর্নগরাদ্বহিঃ
170.56
প্রকীর্ণকেশ্যো ব্যথিতাঃ কুরর্য ইব দুঃখিতাঃ
পেতুঃ পুত্রান্পিতৄন্ভ্রাতৄঞ্শোচমানা মহীতলে
170.57
রুদন্ত্যো দীনকণ্ঠ্যস্তা বিনদন্ত্যো হতেশ্বরাঃ
উরাংসি পাণিভির্ঘ্নন্ত্যঃ প্রস্রস্তস্রগ্বিভূষণাঃ
170.58
তচ্ছোকয়ুক্তমশ্রীকং দুঃখদৈন্যসমাহতম্
ন বভৌ দানবপুরং হতত্বিট্কং হতেশ্বরম্
170.59
গন্ধর্বনগরাকারং হতনাগমিব হ্রদম্
শুষ্কবৃক্ষমিবারণ্যমদৃশ্যমভবত্পুরম্
170.60
মাং তু সংহৃষ্টমনসং ক্ষিপ্রং মাতলিরানয়ৎ
দেবরাজস্য ভবনং কৃতকর্মাণমাহবাৎ
170.61
হিরণ্যপুরমারুজ্য নিহত্য চ মহাসুরান্
নিবাতকবচাংশ্চৈব ততোঽহং শক্রমাগমম্
170.62
মম কর্ম চ দেবেন্দ্রং মাতলির্বিস্তরেণ তৎ
সর্বং বিশ্রাবয়ামাস যথা ভূতং মহাদ্যুতে
170.63
হিরণ্যপুরঘাতং চ মায়ানাং চ নিবারণম্
নিবাতকবচানাং চ বধং সংখ্যে মহৌজসাম্
170.64
তচ্ছ্রুত্বা ভগবান্প্রীতঃ সহস্রাক্ষঃ পুরংদরঃ
মরুদ্ভিঃ সহিতঃ শ্রীমান্সাধু সাধ্বিত্যথাব্রবীৎ
170.65
ততো মাং দেবরাজো বৈ সমাশ্বাস্য পুনঃ পুনঃ
অব্রবীদ্বিবুধৈঃ সার্ধমিদং সুমধুরং বচঃ
170.66
অতিদেবাসুরং কর্ম কৃতমেতত্ত্বয়া রণে
গুর্বর্থশ্চ মহান্পার্থ কৃতঃ শত্রূন্ঘ্নতা মম
170.67
এবমেব সদা ভাব্যং স্থিরেণাজৌ ধনংজয়
অসংমূঢেন চাস্ত্রাণাং কর্তব্যং প্রতিপাদনম্
170.68
অবিষহ্যো রণে হি ত্বং দেবদানবরাক্ষসৈঃ
সয়ক্ষাসুরগন্ধর্বৈঃ সপক্ষিগণপন্নগৈঃ
170.69
বসুধাং চাপি কৌন্তেয় ত্বদ্বাহুবলনির্জিতাম্
পালয়িষ্যতি ধর্মাত্মা কুন্তীপুত্রো যুধিষ্ঠিরঃ