অধ্যায় 171

171.1

অর্জুন উবাচ
ততো মামভিবিশ্বস্তং সংরূঢশরবিক্ষতম্
দেবরাজোঽনুগৃহ্যেদং কালে বচনমব্রবীৎ

দিব্যান্যস্ত্রাণি সর্বাণি ত্বয়ি তিষ্ঠন্তি ভারত
ন ত্বাভিভবিতুং শক্তো মানুষো ভুবি কশ্চন

ভীষ্মো দ্রোণঃ কৃপঃ কর্ণঃ শকুনিঃ সহ রাজভিঃ
সংগ্রামস্থস্য তে পুত্র কলাং নার্হন্তি ষোডশীম্

ইদং চ মে তনুত্রাণং প্রায়চ্ছন্মঘবান্প্রভুঃ
অভেদ্যং কবচং দিব্যং স্রজং চৈব হিরণ্ময়ীম্

দেবদত্তং চ মে শঙ্খং দেবঃ প্রাদান্মহারবম্
দিব্যং চেদং কিরীটং মে স্বয়মিন্দ্রো যুয়োজ হ

ততো দিব্যানি বস্ত্রাণি দিব্যান্যাভরণানি চ
প্রাদাচ্ছক্রো মমৈতানি রুচিরাণি বৃহন্তি চ

এবং সংপূজিতস্তত্র সুখমস্ম্যুষিতো নৃপ
ইন্দ্রস্য ভবনে পুণ্যে গন্ধর্বশিশুভিঃ সহ

ততো মামব্রবীচ্ছক্রঃ প্রীতিমানমরৈঃ সহ
সময়োঽর্জুন গন্তুং তে ভ্রাতরো হি স্মরন্তি তে

এবমিন্দ্রস্য ভবনে পঞ্চ বর্ষাণি ভারত
উষিতানি ময়া রাজন্স্মরতা দ্যূতজং কলিম্

ততো ভবন্তমদ্রাক্ষং ভ্রাতৃভিঃ পরিবারিতম্
গন্ধমাদনমাসাদ্য পর্বতস্যাস্য মূর্ধনি

যুধিষ্ঠির উবাচ
দিষ্ট্যা ধনংজয়াস্ত্রাণি ত্বয়া প্রাপ্তানি ভারত
দিষ্ট্যা চারাধিতো রাজা দেবানামীশ্বরঃ প্রভুঃ

দিষ্ট্যা চ ভগবান্স্থাণুর্দেব্যা সহ পরংতপ
সাক্ষাদ্দৃষ্টঃ সুয়ুদ্ধেন তোষিতশ্চ ত্বয়ানঘ

দিষ্ট্যা চ লোকপালৈস্ত্বং সমেতো ভরতর্ষভ
দিষ্ট্যা বর্ধামহে সর্বে দিষ্ট্যাসি পুনরাগতঃ

অদ্য কৃত্স্নামিমাং দেবীং বিজিতাং পুরমালিনীম্
মন্যে চ ধৃতরাষ্ট্রস্য পুত্রানপি বশীকৃতান্

তানি ত্বিচ্ছামি তে দ্রষ্টুং দিব্যান্যস্ত্রাণি ভারত
যৈস্তথা বীর্যবন্তস্তে নিবাতকবচা হতা

অর্জুন উবাচ
শ্বঃ প্রভাতে ভবান্দ্রষ্টা দিব্যান্যস্ত্রাণি সর্বশঃ
নিবাতকবচা ঘোরা যৈর্ময়া বিনিপাতিতাঃ

বৈশংপায়ন উবাচ
এবমাগমনং তত্র কথয়িত্বা ধনংজয়ঃ
ভ্রাতৃভিঃ সহিতঃ সর্বৈ রজনীং তামুবাস হ