UtshovChapter 171
171.1
अर्जुन उवाच
ततो मामभिविश्वस्तं संरूढशरविक्षतम्
देवराजोऽनुगृह्येदं काले वचनमब्रवीत्
Arjuna uvacha
Tato mamabhivishvastam sanrudhasharavikshatam
Devarajonugrihyedam kale vachanamabravit
171.2
दिव्यान्यस्त्राणि सर्वाणि त्वयि तिष्ठन्ति भारत
न त्वाभिभवितुं शक्तो मानुषो भुवि कश्चन
Divyanyastrani sarvani tvayi tishthanti bharata
Na tvabhibhavitum shakto manusho bhuvi kashchana
171.3
भीष्मो द्रोणः कृपः कर्णः शकुनिः सह राजभिः
संग्रामस्थस्य ते पुत्र कलां नार्हन्ति षोडशीम्
Bhishmo dronah kripah karnah shakunih saha rajabhih
Sangramasthasya te putra kalam narhanti shodashim
171.4
इदं च मे तनुत्राणं प्रायच्छन्मघवान्प्रभुः
अभेद्यं कवचं दिव्यं स्रजं चैव हिरण्मयीम्
Idam cha me tanutranam prayachchhanmaghavanprabhuh
Abhedyam kavacham divyam srajam chaiva hiranmayim
171.5
देवदत्तं च मे शङ्खं देवः प्रादान्महारवम्
दिव्यं चेदं किरीटं मे स्वयमिन्द्रो युयोज ह
Devadattam cha me shankham devah pradanmaharavam
Divyam chedam kiritam me svayamindro yuyoja ha
171.6
ततो दिव्यानि वस्त्राणि दिव्यान्याभरणानि च
प्रादाच्छक्रो ममैतानि रुचिराणि बृहन्ति च
Tato divyani vastrani divyanyabharanani cha
Pradachchhakro mamaitani ruchirani brihanti cha
171.7
एवं संपूजितस्तत्र सुखमस्म्युषितो नृप
इन्द्रस्य भवने पुण्ये गन्धर्वशिशुभिः सह
Evam sampujitastatra sukhamasmyushito nripa
Indrasya bhavane punye gandharvashishubhih saha
171.8
ततो मामब्रवीच्छक्रः प्रीतिमानमरैः सह
समयोऽर्जुन गन्तुं ते भ्रातरो हि स्मरन्ति ते
Tato mamabravichchhakrah pritimanamaraih saha
Samayorjuna gantum te bhrataro hi smaranti te
171.9
एवमिन्द्रस्य भवने पञ्च वर्षाणि भारत
उषितानि मया राजन्स्मरता द्यूतजं कलिम्
Evamindrasya bhavane pancha varshani bharata
Ushitani maya rajansmarata dyutajam kalim
171.10
ततो भवन्तमद्राक्षं भ्रातृभिः परिवारितम्
गन्धमादनमासाद्य पर्वतस्यास्य मूर्धनि
Tato bhavantamadraksham bhratribhih parivaritam
Gandhamadanamasadya parvatasyasya murdhani
171.11
युधिष्ठिर उवाच
दिष्ट्या धनंजयास्त्राणि त्वया प्राप्तानि भारत
दिष्ट्या चाराधितो राजा देवानामीश्वरः प्रभुः
Yudhishthira uvacha
Dishtya dhananjayastrani tvaya praptani bharata
Dishtya charadhito raja devanamishvarah prabhuh
171.12
दिष्ट्या च भगवान्स्थाणुर्देव्या सह परंतप
साक्षाद्दृष्टः सुयुद्धेन तोषितश्च त्वयानघ
Dishtya cha bhagavansthanurdevya saha parantapa
Sakshaddrishtah suyuddhena toshitashcha tvayanagha
171.13
दिष्ट्या च लोकपालैस्त्वं समेतो भरतर्षभ
दिष्ट्या वर्धामहे सर्वे दिष्ट्यासि पुनरागतः
Dishtya cha lokapalaistvam sameto bharatarshabha
Dishtya vardhamahe sarve dishtyasi punaragatah
171.14
अद्य कृत्स्नामिमां देवीं विजितां पुरमालिनीम्
मन्ये च धृतराष्ट्रस्य पुत्रानपि वशीकृतान्
Adya kritsnamimam devim vijitam puramalinim
Manye cha dhritarashtrasya putranapi vashikritan
171.15
तानि त्विच्छामि ते द्रष्टुं दिव्यान्यस्त्राणि भारत
यैस्तथा वीर्यवन्तस्ते निवातकवचा हता
Tani tvichchhami te drashtum divyanyastrani bharata
Yaistatha viryavantaste nivatakavacha hata
171.16
अर्जुन उवाच
श्वः प्रभाते भवान्द्रष्टा दिव्यान्यस्त्राणि सर्वशः
निवातकवचा घोरा यैर्मया विनिपातिताः
Arjuna uvacha
Shvah prabhate bhavandrashta divyanyastrani sarvashah
Nivatakavacha ghora yairmaya vinipatitah
171.17
वैशंपायन उवाच
एवमागमनं तत्र कथयित्वा धनंजयः
भ्रातृभिः सहितः सर्वै रजनीं तामुवास ह
Vaishampayana uvacha
Evamagamanam tatra kathayitva dhananjayah
Bhratribhih sahitah sarvai rajanim tamuvasa ha