UtshovChapter 172
172.1
वैशंपायन उवाच
तस्यां रजन्यां व्युष्टायां धर्मराजो युधिष्ठिरः
उत्थायावश्यकार्याणि कृतवान्भ्रतृभिः सह
Vaishampayana uvacha
Tasyam rajanyam vyushtayam dharmarajo yudhishthirah
Utthayavashyakaryani kritavanbhratribhih saha
172.2
ततः संचोदयामास सोऽर्जुनं भ्रातृनन्दनम्
दर्शयास्त्राणि कौन्तेय यैर्जिता दानवास्त्वया
Tatah sanchodayamasa sorjunam bhratrinandanam
Darshayastrani kaunteya yairjita danavastvaya
172.3
ततो धनंजयो राजन्देवैर्दत्तानि पाण्डवः
अस्त्राणि तानि दिव्यानि दर्शयामास भारत
Tato dhananjayo rajandevairdattani pandavah
Astrani tani divyani darshayamasa bharata
172.4
यथान्यायं महातेजाः शौचं परममास्थितः
गिरिकूबरं पादपाङ्गं शुभवेणु त्रिवेणुकम्
पार्थिवं रथमास्थाय शोभमानो धनंजयः
Yathanyayam mahatejah shaucham paramamasthitah
Girikubaram padapangam shubhavenu trivenukam
Parthivam rathamasthaya shobhamano dhananjayah
172.5
ततः सुदंशितस्तेन कवचेन सुवर्चसा
धनुरादाय गाण्डीवं देवदत्तं च वारिजम्
Tatah sudanshitastena kavachena suvarchasa
Dhanuradaya gandivam devadattam cha varijam
172.6
शोशुभ्यमानः कौन्तेय आनुपूर्व्यान्महाभुजः
अस्त्राणि तानि दिव्यानि दर्शनायोपचक्रमे
Shoshubhyamanah kaunteya anupurvyanmahabhujah
Astrani tani divyani darshanayopachakrame
172.7
अथ प्रयोक्ष्यमाणेन दिव्यान्यस्त्राणि तेन वै
समाक्रान्ता मही पद्भ्यां समकम्पत सद्रुमा
Atha prayokshyamanena divyanyastrani tena vai
Samakranta mahi padbhyam samakampata sadruma
172.8
क्षुभिताः सरितश्चैव तथैव च महोदधिः
शैलाश्चापि व्यशीर्यन्त न ववौ च समीरणः
Kshubhitah saritashchaiva tathaiva cha mahodadhih
Shailashchapi vyashiryanta na vavau cha samiranah
172.9
न बभासे सहस्रांशुर्न जज्वाल च पावकः
न वेदाः प्रतिभान्ति स्म द्विजातीनां कथंचन
Na babhase sahasranshurna jajvala cha pavakah
Na vedah pratibhanti sma dvijatinam kathanchana
172.10
अन्तर्भूमिगता ये च प्राणिनो जनमेजय
पीड्यमानाः समुत्थाय पाण्डवं पर्यवारयन्
Antarbhumigata ye cha pranino janamejaya
Pidyamanah samutthaya pandavam paryavarayan
172.11
वेपमानाः प्राञ्जलयस्ते सर्वे पिहिताननाः
दह्यमानास्तदास्त्रैस्तैर्याचन्ति स्म धनंजयम्
Vepamanah pranjalayaste sarve pihitananah
Dahyamanastadastraistairyachanti sma dhananjayam
172.12
ततो ब्रह्मर्षयश्चैव सिद्धाश्चैव सुरर्षयः
जङ्गमानि च भूतानि सर्वाण्येवावतस्थिरे
Tato brahmarshayashchaiva siddhashchaiva surarshayah
Jangamani cha bhutani sarvanyevavatasthire
172.13
राजर्षयश्च प्रवरास्तथैव च दिवौकसः
यक्षराक्षसगन्धर्वास्तथैव च पतत्रिणः
Rajarshayashcha pravarastathaiva cha divaukasah
Yaksharakshasagandharvastathaiva cha patatrinah
172.14
ततः पितामहश्चैव लोकपालाश्च सर्वशः
भगवांश्च महादेवः सगणोऽभ्याययौ तदा
Tatah pitamahashchaiva lokapalashcha sarvashah
Bhagavanshcha mahadevah saganobhyayayau tada
172.15
ततो वायुर्महाराज दिव्यैर्माल्यैः सुगन्धिभिः
अभितः पाण्डवांश्चित्रैरवचक्रे समन्ततः
Tato vayurmaharaja divyairmalyaih sugandhibhih
Abhitah pandavanshchitrairavachakre samantatah
172.16
जगुश्च गाथा विविधा गन्धर्वाः सुरचोदिताः
ननृतुः संघशश्चैव राजन्नप्सरसां गणाः
Jagushcha gatha vividha gandharvah surachoditah
Nanrituh sanghashashchaiva rajannapsarasam ganah
172.17
तस्मिंस्तु तुमुले काले नारदः सुरचोदितः
आगम्याह वचः पार्थं श्रवणीयमिदं नृप
Tasminstu tumule kale naradah surachoditah
Agamyaha vachah partham shravaniyamidam nripa
172.18
अर्जुनार्जुन मा युङ्क्ष्व दिव्यान्यस्त्राणि भारत
नैतानि निरधिष्ठाने प्रयुज्यन्ते कदाचन
Arjunarjuna ma yunkshva divyanyastrani bharata
Naitani niradhishthane prayujyante kadachana
172.19
अधिष्ठाने न वानार्तः प्रयुञ्जीत कदाचन
प्रयोगे सुमहान्दोषो ह्यस्त्राणां कुरुनन्दन
Adhishthane na vanartah prayunjita kadachana
Prayoge sumahandosho hyastranam kurunandana
172.20
एतानि रक्ष्यमाणानि धनंजय यथागमम्
बलवन्ति सुखार्हाणि भविष्यन्ति न संशयः
Etani rakshyamanani dhananjaya yathagamam
Balavanti sukharhani bhavishyanti na sanshayah
172.21
अरक्ष्यमाणान्येतानि त्रैलोक्यस्यापि पाण्डव
भवन्ति स्म विनाशाय मैवं भूयः कृथाः क्वचित्
Arakshyamananyetani trailokyasyapi pandava
Bhavanti sma vinashaya maivam bhuyah krithah kvachit
172.22
अजातशत्रो त्वं चैव द्रक्ष्यसे तानि संयुगे
योज्यमानानि पार्थेन द्विषतामवमर्दने
Ajatashatro tvam chaiva drakshyase tani sanyuge
Yojyamanani parthena dvishatamavamardane
172.23
निवार्याथ ततः पार्थं सर्वे देवा यथागतम्
जग्मुरन्ये च ये तत्र समाजग्मुर्नरर्षभ
Nivaryatha tatah partham sarve deva yathagatam
Jagmuranye cha ye tatra samajagmurnararshabha
172.24
तेषु सर्वेषु कौरव्य प्रतियातेषु पाण्डवाः
तस्मिन्नेव वने हृष्टास्त ऊषुः सह कृष्णया
Teshu sarveshu kauravya pratiyateshu pandavah
Tasminneva vane hrishtasta ushuh saha krishnaya