Utshovঅধ্যায় 172
172.1
বৈশংপায়ন উবাচ
তস্যাং রজন্যাং ব্যুষ্টায়াং ধর্মরাজো যুধিষ্ঠিরঃ
উত্থায়াবশ্যকার্যাণি কৃতবান্ভ্রতৃভিঃ সহ
172.2
ততঃ সংচোদয়ামাস সোঽর্জুনং ভ্রাতৃনন্দনম্
দর্শয়াস্ত্রাণি কৌন্তেয় যৈর্জিতা দানবাস্ত্বয়া
172.3
ততো ধনংজয়ো রাজন্দেবৈর্দত্তানি পাণ্ডবঃ
অস্ত্রাণি তানি দিব্যানি দর্শয়ামাস ভারত
172.4
যথান্যায়ং মহাতেজাঃ শৌচং পরমমাস্থিতঃ
গিরিকূবরং পাদপাঙ্গং শুভবেণু ত্রিবেণুকম্
পার্থিবং রথমাস্থায় শোভমানো ধনংজয়ঃ
172.5
ততঃ সুদংশিতস্তেন কবচেন সুবর্চসা
ধনুরাদায় গাণ্ডীবং দেবদত্তং চ বারিজম্
172.6
শোশুভ্যমানঃ কৌন্তেয় আনুপূর্ব্যান্মহাভুজঃ
অস্ত্রাণি তানি দিব্যানি দর্শনায়োপচক্রমে
172.7
অথ প্রয়োক্ষ্যমাণেন দিব্যান্যস্ত্রাণি তেন বৈ
সমাক্রান্তা মহী পদ্ভ্যাং সমকম্পত সদ্রুমা
172.8
ক্ষুভিতাঃ সরিতশ্চৈব তথৈব চ মহোদধিঃ
শৈলাশ্চাপি ব্যশীর্যন্ত ন ববৌ চ সমীরণঃ
172.9
ন বভাসে সহস্রাংশুর্ন জজ্বাল চ পাবকঃ
ন বেদাঃ প্রতিভান্তি স্ম দ্বিজাতীনাং কথংচন
172.10
অন্তর্ভূমিগতা যে চ প্রাণিনো জনমেজয়
পীড্যমানাঃ সমুত্থায় পাণ্ডবং পর্যবারয়ন্
172.11
বেপমানাঃ প্রাঞ্জলয়স্তে সর্বে পিহিতাননাঃ
দহ্যমানাস্তদাস্ত্রৈস্তৈর্যাচন্তি স্ম ধনংজয়ম্
172.12
ততো ব্রহ্মর্ষয়শ্চৈব সিদ্ধাশ্চৈব সুরর্ষয়ঃ
জঙ্গমানি চ ভূতানি সর্বাণ্যেবাবতস্থিরে
172.13
রাজর্ষয়শ্চ প্রবরাস্তথৈব চ দিবৌকসঃ
যক্ষরাক্ষসগন্ধর্বাস্তথৈব চ পতত্রিণঃ
172.14
ততঃ পিতামহশ্চৈব লোকপালাশ্চ সর্বশঃ
ভগবাংশ্চ মহাদেবঃ সগণোঽভ্যায়য়ৌ তদা
172.15
ততো বায়ুর্মহারাজ দিব্যৈর্মাল্যৈঃ সুগন্ধিভিঃ
অভিতঃ পাণ্ডবাংশ্চিত্রৈরবচক্রে সমন্ততঃ
172.16
জগুশ্চ গাথা বিবিধা গন্ধর্বাঃ সুরচোদিতাঃ
ননৃতুঃ সংঘশশ্চৈব রাজন্নপ্সরসাং গণাঃ
172.17
তস্মিংস্তু তুমুলে কালে নারদঃ সুরচোদিতঃ
আগম্যাহ বচঃ পার্থং শ্রবণীয়মিদং নৃপ
172.18
অর্জুনার্জুন মা যুঙ্ক্ষ্ব দিব্যান্যস্ত্রাণি ভারত
নৈতানি নিরধিষ্ঠানে প্রয়ুজ্যন্তে কদাচন
172.19
অধিষ্ঠানে ন বানার্তঃ প্রয়ুঞ্জীত কদাচন
প্রয়োগে সুমহান্দোষো হ্যস্ত্রাণাং কুরুনন্দন
172.20
এতানি রক্ষ্যমাণানি ধনংজয় যথাগমম্
বলবন্তি সুখার্হাণি ভবিষ্যন্তি ন সংশয়ঃ
172.21
অরক্ষ্যমাণান্যেতানি ত্রৈলোক্যস্যাপি পাণ্ডব
ভবন্তি স্ম বিনাশায় মৈবং ভূয়ঃ কৃথাঃ ক্বচিৎ
172.22
অজাতশত্রো ত্বং চৈব দ্রক্ষ্যসে তানি সংয়ুগে
যোজ্যমানানি পার্থেন দ্বিষতামবমর্দনে
172.23
নিবার্যাথ ততঃ পার্থং সর্বে দেবা যথাগতম্
জগ্মুরন্যে চ যে তত্র সমাজগ্মুর্নরর্ষভ
172.24
তেষু সর্বেষু কৌরব্য প্রতিয়াতেষু পাণ্ডবাঃ
তস্মিন্নেব বনে হৃষ্টাস্ত ঊষুঃ সহ কৃষ্ণয়া