Utshovঅধ্যায় 173
173.1
জনমেজয় উবাচ
তস্মিন্কৃতাস্ত্রে রথিনাং প্রধানে; প্রত্যাগতে ভবনাদ্বৃত্রহন্তুঃ
অতঃ পরং কিমকুর্বন্ত পার্থাঃ; সমেত্য শূরেণ ধনংজয়েন
173.2
বৈশংপায়ন উবাচ
বনেষু তেষ্বেব তু তে নরেন্দ্রাঃ; সহার্জুনেনেন্দ্রসমেন বীরাঃ
তস্মিংশ্চ শৈলপ্রবরে সুরম্যে; ধনেশ্বরাক্রীডগতা বিজহ্রুঃ
173.3
বেশ্মানি তান্যপ্রতিমানি পশ্য;ন্ক্রীডাশ্চ নানাদ্রুমসংনিকর্ষাঃ
চচার ধন্বী বহুধা নরেন্দ্রঃ; সোঽস্ত্রেষু যত্তঃ সততং কিরীটী
173.4
অবাপ্য বাসং নরদেবপুত্রাঃ; প্রসাদজং বৈশ্রবণস্য রাজ্ঞঃ
ন প্রাণিনাং তে স্পৃহয়ন্তি রাজ;ঞ্শিবশ্চ কালঃ স বভূব তেষাম্
173.5
সমেত্য পার্থেন যথৈকরাত্র;মূষুঃ সমাস্তত্র তদা চতস্রঃ
পূর্বাশ্চ ষট্তা দশ পাণ্ডবানাং; শিবা বভূবুর্বসতাং বনেষু
173.6
ততোঽব্রবীদ্বায়ুসুতস্তরস্বী; জিষ্ণুশ্চ রাজানমুপোপবিশ্য
যমৌ চ বীরৌ সুররাজকল্পা;বেকান্তমাস্থায় হিতং প্রিয়ং চ
173.7
তব প্রতিজ্ঞাং কুরুরাজ সত্যাং; চিকীর্ষমাণাস্ত্বদনু প্রিয়ং চ
ততোঽনুগচ্ছাম বনান্যপাস্য; সুয়োধনং সানুচরং নিহন্তুম্
173.8
একাদশং বর্ষমিদং বসামঃ; সুয়োধনেনাত্তসুখাঃ সুখার্হাঃ
তং বঞ্চয়িত্বাধমবুদ্ধিশীল;মজ্ঞাতবাসং সুখমাপ্নুয়ামঃ
173.9
তবাজ্ঞয়া পার্থিব নির্বিশঙ্কা; বিহায় মানং বিচরন্বনানি
সমীপবাসেন বিলোভিতাস্তে; জ্ঞাস্যন্তি নাস্মানপকৃষ্টদেশান্
173.10
সংবত্সরং তং তু বিহৃত্য গূঢং; নরাধমং তং সুখমুদ্ধরেম
নির্যাত্য বৈরং সফলং সপুষ্পং; তস্মৈ নরেন্দ্রাধমপূরুষায়
173.11
সুয়োধনায়ানুচরৈর্বৃতায়; ততো মহীমাহর ধর্মরাজ
স্বর্গোপমং শৈলমিমং চরদ্ভিঃ; শক্যো বিহন্তুং নরদেব শোকঃ
173.12
কীর্তিশ্চ তে ভারত পুণ্যগন্ধা; নশ্যেত লোকেষু চরাচরেষু
তত্প্রাপ্য রাজ্যং কুরুপুংগবানাং; শক্যং মহত্প্রাপ্তমথ ক্রিয়াশ্চ
173.13
ইদং তু শক্যং সততং নরেন্দ্র; প্রাপ্তুং ত্বয়া যল্লভসে কুবেরাৎ
কুরুষ্ব বুদ্ধিং দ্বিষতাং বধায়; কৃতাগসাং ভারত নিগ্রহে চ
173.14
তেজস্তবোগ্রং ন সহেত রাজ;ন্সমেত্য সাক্ষাদপি বজ্রপাণিঃ
ন হি ব্যথাং জাতু করিষ্যতস্তৌ; সমেত্য দেবৈরপি ধর্মরাজ
173.15
ত্বদর্থসিদ্ধ্যর্থমভিপ্রবৃত্তৌ; সুপর্ণকেতুশ্চ শিনেশ্চ নপ্তা
যথৈব কৃষ্ণোঽপ্রতিমো বলেন; তথৈব রাজন্স শিনিপ্রবীরঃ
173.16
তবার্থসিদ্ধ্যর্থমভিপ্রবৃত্তৌ; যথৈব কৃষ্ণঃ সহ যাদবৈস্তৈঃ
তথৈব চাবাং নরদেববর্য; যমৌ চ বীরৌ কৃতিনৌ প্রয়োগে
ত্বদর্থয়োগপ্রভবপ্রধানাঃ; সমং করিষ্যাম পরান্সমেত্য
173.17
ততস্তদাজ্ঞায় মতং মহাত্মা; তেষাং স ধর্মস্য সুতো বরিষ্ঠঃ
প্রদক্ষিণং বৈশ্রবণাধিবাসং; চকার ধর্মার্থবিদুত্তমৌজঃ
173.18
আমন্ত্র্য বেশ্মানি নদীঃ সরাংসি; সর্বাণি রক্ষাংসি চ ধর্মরাজঃ
যথাগতং মার্গমবেক্ষমাণঃ; পুনর্গিরিং চৈব নিরীক্ষমাণঃ
173.19
সমাপ্তকর্মা সহিতঃ সুহৃদ্ভি;র্জিত্বা সপত্নান্প্রতিলভ্য রাজ্যম্
শৈলেন্দ্র ভূয়স্তপসে ধৃতাত্মা; দ্রষ্টা তবাস্মীতি মতিং চকার
173.20
বৃতঃ স সর্বৈরনুজৈর্দ্বিজৈশ্চ; তেনৈব মার্গেণ পতিঃ কুরূণাম্
উবাহ চৈনান্সগণাংস্তথৈব; ঘটোত্কচঃ পর্বতনির্ঝরেষু
173.21
তান্প্রস্থিতান্প্রীতিমনা মহর্ষিঃ; পিতেব পুত্রাননুশিষ্য সর্বান্
স লোমশঃ প্রীতমনা জগাম; দিবৌকসাং পুণ্যতমং নিবাসম্
173.22
তেনানুশিষ্টার্ষ্টিষেণেন চৈব; তীর্থানি রম্যাণি তপোবনানি
মহান্তি চান্যানি সরাংসি পার্থাঃ; সংপশ্যমানাঃ প্রয়য়ুর্নরাগ্র্যাঃ