Utshovঅধ্যায় 174
174.1
বৈশংপায়ন উবাচ
নগোত্তমং প্রস্রবণৈরুপেতং; দিশাং গজৈঃ কিংনরপক্ষিভিশ্চ
সুখং নিবাসং জহতাং হি তেষাং; ন প্রীতিরাসীদ্ভরতর্ষভাণাম্
174.2
ততস্তু তেষাং পুনরেব হর্ষঃ; কৈলাসমালোক্য মহান্বভূব
কুবেরকান্তং ভরতর্ষভাণাং; মহীধরং বারিধরপ্রকাশম্
174.3
সমুচ্ছ্রয়ান্পর্বতসংনিরোধা;ন্গোষ্ঠান্গিরীণাং গিরিসেতুমালাঃ
বহূন্প্রপাতাংশ্চ সমীক্ষ্য বীরাঃ; স্থলানি নিম্নানি চ তত্র তত্র
174.4
তথৈব চান্যানি মহাবনানি; মৃগদ্বিজানেকপসেবিতানি
আলোকয়ন্তোঽভিয়য়ুঃ প্রতীতা;স্তে ধন্বিনঃ খড্গধরা নরাগ্র্যাঃ
174.5
বনানি রম্যাণি সরাংসি নদ্যো; গুহা গিরীণাং গিরিগহ্বরাণি
এতে নিবাসাঃ সততং বভূবু;র্নিশানিশং প্রাপ্য নরর্ষভাণাম্
174.6
তে দুর্গবাসং বহুধা নিরুষ্য; ব্যতীত্য কৈলাসমচিন্ত্যরূপম্
আসেদুরত্যর্থমনোরমং বৈ; তমাশ্রমাগ্র্যং বৃষপর্বণস্তে
174.7
সমেত্য রাজ্ঞা বৃষপর্বণস্তে; প্রত্যর্চিতাস্তেন চ বীতমোহাঃ
শশংসিরে বিস্তরশঃ প্রবাসং; শিবং যথাবদ্বৃষপর্বণস্তে
174.8
সুখোষিতাস্তত্র ত একরাত্রং; পুণ্যাশ্রমে দেবমহর্ষিজুষ্টে
অভ্যায়য়ুস্তে বদরীং বিশালাং; সুখেন বীরাঃ পুনরেব বাসম্
174.9
ঊষুস্ততস্তত্র মহানুভাবা; নারায়ণস্থানগতা নরাগ্র্যাঃ
কুবেরকান্তাং নলিনীং বিশোকাঃ; সংপশ্যমানাঃ সুরসিদ্ধজুষ্টাম্
174.10
তাং চাথ দৃষ্ট্বা নলিনীং বিশোকাঃ; পাণ্ডোঃ সুতাঃ সর্বনরপ্রবীরাঃ
তে রেমিরে নন্দনবাসমেত্য; দ্বিজর্ষয়ো বীতভয়া যথৈব
174.11
ততঃ ক্রমেণোপয়য়ুর্নৃবীরা; যথাগতেনৈব পথা সমগ্রাঃ
বিহৃত্য মাসং সুখিনো বদর্যাং; কিরাতরাজ্ঞো বিষয়ং সুবাহোঃ
174.12
চীনাংস্তুখারান্দরদান্সদার্বা;ন্দেশান্কুণিন্দস্য চ ভূরিরত্নান্
অতীত্য দুর্গং হিমবত্প্রদেশং; পুরং সুবাহোর্দদৃশুর্নৃবীরাঃ
174.13
শ্রুত্বা চ তান্পার্থিবপুত্রপৌত্রা;ন্প্রাপ্তান্সুবাহুর্বিষয়ে সমগ্রান্
প্রত্যুদ্যয়ৌ প্রীতিয়ুতঃ স রাজা; তং চাভ্যনন্দন্বৃষভাঃ কুরূণাম্
174.14
সমেত্য রাজ্ঞা তু সুবাহুনা তে; সূতৈর্বিশোকপ্রমুখৈশ্চ সর্বৈঃ
সহেন্দ্রসেনৈঃ পরিচারকৈশ্চ; পৌরোগবৈর্যে চ মহানসস্থাঃ
174.15
সুখোষিতাস্তত্র ত একরাত্রং; সূতানুপাদায় রথাংশ্চ সর্বান্
ঘটোত্কচং সানুচরং বিসৃজ্য; ততোঽভ্যয়ুর্যামুনমদ্রিরাজম্
174.16
তস্মিন্গিরৌ প্রস্রবণোপপন্নে; হিমোত্তরীয়ারুণপাণ্ডুসানৌ
বিশাখয়ূপং সমুপেত্য চক্রু;স্তদা নিবাসং পুরুষপ্রবীরাঃ
174.17
বরাহনানামৃগপক্ষিজুষ্টং; মহদ্বনং চৈত্ররথপ্রকাশম্
শিবেন যাত্বা মৃগয়াপ্রধানাঃ; সংবত্সরং তত্র বনে বিজহ্রুঃ
174.18
তত্রাসসাদাতিবলং ভুজংগং; ক্ষুধার্দিতং মৃত্যুমিবোগ্ররূপম্
বৃকোদরঃ পর্বতকন্দরায়াং; বিষাদমোহব্যথিতান্তরাত্মা
174.19
দ্বীপোঽভবদ্যত্র বৃকোদরস্য; যুধিষ্ঠিরো ধর্মভৃতাং বরিষ্ঠঃ
অমোক্ষয়দ্যস্তমনন্ততেজা; গ্রাহেণ সংবেষ্টিতসর্বগাত্রম্
174.20
তে দ্বাদশং বর্ষমথোপয়ান্তং; বনে বিহর্তুং কুরবঃ প্রতীতাঃ
তস্মাদ্বনাচ্চৈত্ররথপ্রকাশা;চ্ছ্রিয়া জ্বলন্তস্তপসা চ যুক্তাঃ
174.21
ততশ্চ যাত্বা মরুধন্বপার্শ্বং; সদা ধনুর্বেদরতিপ্রধানাঃ
সরস্বতীমেত্য নিবাসকামাঃ; সরস্ততো দ্বৈতবনং প্রতীয়ুঃ
174.22
সমীক্ষ্য তান্দ্বৈতবনে নিবিষ্টা;ন্নিবাসিনস্তত্র ততোঽভিজগ্মুঃ
তপোদমাচারসমাধিয়ুক্তা;স্তৃণোদপাত্রাহরণাশ্মকুট্টাঃ
174.23
প্লক্ষাক্ষরৌহীতকবেতসাশ্চ; স্নুহা বদর্যঃ খদিরাঃ শিরীষাঃ
বিল্বেঙ্গুদাঃ পীলুশমীকরীরাঃ; সরস্বতীতীররুহা বভূবুঃ
174.24
তাং যক্ষগন্ধর্বমহর্ষিকান্তা;মায়াগভূতামিব দেবতানাম্
সরস্বতীং প্রীতিয়ুতাশ্চরন্তঃ; সুখং বিজহ্রুর্নরদেবপুত্রাঃ