অধ্যায় 175

175.1

জনমেজয় উবাচ
কথং নাগায়ুতপ্রাণো ভীমসেনো মহাবলঃ
ভয়মাহারয়ত্তীব্রং তস্মাদজগরান্মুনে

পৌলস্ত্যং যোঽঽহ্বয়দ্যুদ্ধে ধনদং বলদর্পিতঃ
নলিন্যাং কদনং কৃত্বা বরাণাং যক্ষরক্ষসাম্

তং শংসসি ভয়াবিষ্টমাপন্নমরিকর্ষণম্
এতদিচ্ছাম্যহং শ্রোতুং পরং কৌতূহলং হি মে

বৈশংপায়ন উবাচ
বহ্বাশ্চর্যে বনে তেষাং বসতামুগ্রধন্বিনাম্
প্রাপ্তানামাশ্রমাদ্রাজন্রাজর্ষের্বৃষপর্বণঃ

যদৃচ্ছয়া ধনুষ্পাণির্বদ্ধখড্গো বৃকোদরঃ
দদর্শ তদ্বনং রম্যং দেবগন্ধর্বসেবিতম্

স দদর্শ শুভান্দেশান্গিরের্হিমবতস্তদা
দেবর্ষিসিদ্ধচরিতানপ্সরোগণসেবিতান্

চকোরৈশ্চক্রবাকৈশ্চ পক্ষিভির্জীবজীবকৈঃ
কোকিলৈর্ভৃঙ্গরাজৈশ্চ তত্র তত্র বিনাদিতান্

নিত্যপুষ্পফলৈর্বৃক্ষৈর্হিমসংস্পর্শকোমলৈঃ
উপেতান্বহুলচ্ছায়ৈর্মনোনয়ননন্দনৈঃ

স সংপশ্যন্গিরিনদীর্বৈডূর্যমণিসংনিভৈঃ
সলিলৈর্হিমসংস্পর্শৈর্হংসকারণ্ডবায়ুতৈঃ

বনানি দেবদারূণাং মেঘানামিব বাগুরাঃ
হরিচন্দনমিশ্রাণি তুঙ্গকালীয়কান্যপি

মৃগয়াং পরিধাবন্স সমেষু মরুধন্বসু
বিধ্যন্মৃগাঞ্শরৈঃ শুদ্ধৈশ্চচার সুমহাবলঃ

স দদর্শ মহাকায়ং ভুজঙ্গং লোমহর্ষণম্
গিরিদুর্গে সমাপন্নং কায়েনাবৃত্য কন্দরম্

পর্বতাভোগবর্ষ্মাণং ভোগৈশ্চন্দ্রার্কমণ্ডলৈঃ
চিত্রাঙ্গমজিনৈশ্চিত্রৈর্হরিদ্রাসদৃশচ্ছবিম্

গুহাকারেণ বক্ত্রেণ চতুর্দংষ্ট্রেণ রাজতা
দীপ্তাক্ষেণাতিতাম্রেণ লিহন্তং সৃক্কিণী মুহুঃ

ত্রাসনং সর্বভূতানাং কালান্তকয়মোপমম্
নিঃশ্বাসক্ষ্বেডনাদেন ভর্ত্সয়ন্তমিব স্থিতম্

স ভীমং সহসাভ্যেত্য পৃদাকুঃ ক্ষুধিতো ভৃশম্
জগ্রাহাজগরো গ্রাহো ভুজয়োরুভয়োর্বলাৎ

তেন সংস্পৃষ্টমাত্রস্য ভীমসেনস্য বৈ তদা
সংজ্ঞা মুমোহ সহসা বরদানেন তস্য হ

দশ নাগসহস্রাণি ধারয়ন্তি হি যদ্বলম্
তদ্বলং ভীমসেনস্য ভুজয়োরসমং পরৈঃ

স তেজস্বী তথা তেন ভুজগেন বশীকৃতঃ
বিস্ফুরঞ্শনকৈর্ভীমো ন শশাক বিচেষ্টিতুম্

নাগায়ুতসমপ্রাণঃ সিংহস্কন্ধো মহাভুজঃ
গৃহীতো ব্যজহাত্সত্ত্বং বরদানেন মোহিতঃ

স হি প্রয়ত্নমকরোত্তীব্রমাত্মবিমোক্ষণে
ন চৈনমশকদ্বীরঃ কথংচিত্প্রতিবাধিতুম্