Utshovঅধ্যায় 176
176.1
বৈশংপায়ন উবাচ
স ভীমসেনস্তেজস্বী তথা সর্পবশং গতঃ
চিন্তয়ামাস সর্পস্য বীর্যমত্যদ্ভুতং মহৎ
176.2
উবাচ চ মহাসর্পং কাময়া ব্রূহি পন্নগ
কস্ত্বং ভো ভুজগশ্রেষ্ঠ কিং ময়া চ করিষ্যসি
176.3
পাণ্ডবো ভীমসেনোঽহং ধর্মরাজাদনন্তরঃ
নাগায়ুতসমপ্রাণস্ত্বয়া নীতঃ কথং বশম্
176.4
সিংহাঃ কেসরিণো ব্যাঘ্রা মহিষা বারণাস্তথা
সমাগতাশ্চ বহুশো নিহতাশ্চ ময়া মৃধে
176.5
দানবাশ্চ পিশাচাশ্চ রাক্ষসাশ্চ মহাবলাঃ
ভুজবেগমশক্তা মে সোঢুং পন্নগসত্তম
176.6
কিং নু বিদ্যাবলং কিং বা বরদানমথো তব
উদ্যোগমপি কুর্বাণো বশগোঽস্মি কৃতস্ত্বয়া
176.7
অসত্যো বিক্রমো নৄণামিতি মে নিশ্চিতা মতিঃ
যথেদং মে ত্বয়া নাগ বলং প্রতিহতং মহৎ
176.8
ইত্যেবংবাদিনং বীরং ভীমমক্লিষ্টকারিণম্
ভোগেন মহতা সর্পঃ সমন্তাত্পর্যবেষ্টয়ৎ
176.9
নিগৃহ্য তং মহাবাহুং ততঃ স ভুজগস্তদা
বিমুচ্যাস্য ভুজৌ পীনাবিদং বচনমব্রবীৎ
176.10
দিষ্ট্যা ত্বং ক্ষুধিতস্যাদ্য দেবৈর্ভক্ষো মহাভুজ
দিষ্ট্যা কালস্য মহতঃ প্রিয়াঃ প্রাণা হি দেহিনাম্
176.11
যথা ত্বিদং ময়া প্রাপ্তং ভুজংগত্বমরিংদম
তদবশ্যং ময়া খ্যাপ্যং তবাদ্য শৃণু সত্তম
176.12
ইমামবস্থাং সংপ্রাপ্তো হ্যহং কোপান্মনীষিণাম্
শাপস্যান্তং পরিপ্রেপ্সুঃ সর্পস্য কথয়ামি তৎ
176.13
নহুষো নাম রাজর্ষির্ব্যক্তং তে শ্রোত্রমাগতঃ
তবৈব পূর্বঃ পূর্বেষামায়োর্বংশকরঃ সুতঃ
176.14
সোঽহং শাপাদগস্ত্যস্য ব্রাহ্মণানবমন্য চ
ইমামবস্থামাপন্নঃ পশ্য দৈবমিদং মম
176.15
ত্বাং চেদবধ্যমায়ান্তমতীব প্রিয়দর্শনম্
অহমদ্যোপয়োক্ষ্যামি বিধানং পশ্য যাদৃশম্
176.16
ন হি মে মুচ্যতে কশ্চিত্কথংচিদ্গ্রহণং গতঃ
গজো বা মহিষো বাপি ষষ্ঠে কালে নরোত্তম
176.17
নাসি কেবলসর্পেণ তির্যগ্যোনিষু বর্ততা
গৃহীতঃ কৌরবশ্রেষ্ঠ বরদানমিদং মম
176.18
পততা হি বিমানাগ্রান্ময়া শক্রাসনাদ্দ্রুতম্
কুরু শাপান্তমিত্যুক্তো ভগবান্মুনিসত্তমঃ
176.19
স মামুবাচ তেজস্বী কৃপয়াভিপরিপ্লুতঃ
মোক্ষস্তে ভবিতা রাজন্কস্মাচ্চিত্কালপর্যয়াৎ
176.20
ততোঽস্মি পতিতো ভূমৌ ন চ মামজহাত্স্মৃতিঃ
স্মার্তমস্তি পুরাণং মে যথৈবাধিগতং তথা
176.21
যস্তু তে ব্যাহৃতান্প্রশ্নান্প্রতিব্রূয়াদ্বিশেষবিৎ
স ত্বাং মোক্ষয়িতা শাপাদিতি মামব্রবীদৃষিঃ
176.22
গৃহীতস্য ত্বয়া রাজন্প্রাণিনোঽপি বলীয়সঃ
সত্ত্বভ্রংশোঽধিকস্যাপি সর্বস্যাশু ভবিষ্যতি
176.23
ইতি চাপ্যহমশ্রৌষং বচস্তেষাং দয়াবতাম্
ময়ি সংজাতহার্দানামথ তেঽন্তর্হিতা দ্বিজাঃ
176.24
সোঽহং পরমদুষ্কর্মা বসামি নিরয়েঽশুচৌ
সর্পয়োনিমিমাং প্রাপ্য কালাকাঙ্ক্ষী মহাদ্যুতে
176.25
তমুবাচ মহাবাহুর্ভীমসেনো ভুজংগমম্
ন তে কুপ্যে মহাসর্প ন চাত্মানং বিগর্হয়ে
176.26
যস্মাদভাবী ভাবী বা মনুষ্যঃ সুখদুঃখয়োঃ
আগমে যদি বাপায়ে ন তত্র গ্লপয়েন্মনঃ
176.27
দৈবং পুরুষকারেণ কো নিবর্তিতুমর্হতি
দৈবমেব পরং মন্যে পুরুষার্থো নিরর্থকঃ
176.28
পশ্য দৈবোপঘাতাদ্ধি ভুজবীর্যব্যপাশ্রয়ম্
ইমামবস্থাং সংপ্রাপ্তমনিমিত্তমিহাদ্য মাম্
176.29
কিং তু নাদ্যানুশোচামি তথাত্মানং বিনাশিতম্
যথা তু বিপিনে ন্যস্তান্ভ্রাতৄন্রাজ্যপরিচ্যুতান্
176.30
হিমবাংশ্চ সুদুর্গোঽয়ং যক্ষরাক্ষসসংকুলঃ
মাং চ তে সমুদীক্ষন্তঃ প্রপতিষ্যন্তি বিহ্বলাঃ
176.31
বিনষ্টমথ বা শ্রুত্বা ভবিষ্যন্তি নিরুদ্যমাঃ
ধর্মশীলা ময়া তে হি বাধ্যন্তে রাজ্যগৃদ্ধিনা
176.32
অথ বা নার্জুনো ধীমান্বিষাদমুপয়াস্যতি
সর্বাস্ত্রবিদনাধৃষ্যো দেবগন্ধর্বরাক্ষসৈঃ
176.33
সমর্থঃ স মহাবাহুরেকাহ্না সুমহাবলঃ
দেবরাজমপি স্থানাত্প্রচ্যাবয়িতুমোজসা
176.34
কিং পুনর্ধৃতরাষ্ট্রস্য পুত্রং দুর্দ্যূতদেবিনম্
বিদ্বিষ্টং সর্বলোকস্য দম্ভলোভপরায়ণম্
176.35
মাতরং চৈব শোচামি কৃপণাং পুত্রগৃদ্ধিনীম্
যাস্মাকং নিত্যমাশাস্তে মহত্ত্বমধিকং পরৈঃ
176.36
কথং নু তস্যানাথায়া মদ্বিনাশাদ্ভুজংগম
অফলাস্তে ভবিষ্যন্তি ময়ি সর্বে মনোরথাঃ
176.37
নকুলঃ সহদেবশ্চ যমজৌ গুরুবর্তিনৌ
মদ্বাহুবলসংস্তব্ধৌ নিত্যং পুরুষমানিনৌ
176.38
নিরুত্সাহৌ ভবিষ্যেতে ভ্রষ্টবীর্যপরাক্রমৌ
মদ্বিনাশাত্পরিদ্যূনাবিতি মে বর্ততে মতিঃ
176.39
এবংবিধং বহু তদা বিললাপ বৃকোদরঃ
ভুজংগভোগসংরুদ্ধো নাশকচ্চ বিচেষ্টিতুম্
176.40
যুধিষ্ঠিরস্তু কৌন্তেয় বভূবাস্বস্থচেতনঃ
অনিষ্টদর্শনান্ঘোরানুত্পাতান্পরিচিন্তয়ন্
176.41
দারুণং হ্যশিবং নাদং শিবা দক্ষিণতঃ স্থিতা
দীপ্তায়াং দিশি বিত্রস্তা রৌতি তস্যাশ্রমস্য হ
176.42
একপক্ষাক্ষিচরণা বর্তিকা ঘোরদর্শনা
রুধিরং বমন্তী দদৃশে প্রত্যাদিত্যমপস্বরা
176.43
প্রববাবনিলো রূক্ষশ্চণ্ডঃ শর্করকর্ষণঃ
অপসব্যানি সর্বাণি মৃগপক্ষিরুতানি চ
176.44
পৃষ্ঠতো বায়সঃ কৃষ্ণো যাহি যাহীতি বাশতি
মুহুর্মুহুঃ প্রস্ফুরতি দক্ষিণোঽস্য ভুজস্তথা
176.45
হৃদয়ং চরণশ্চাপি বামোঽস্য পরিবর্ততে
সব্যস্যাক্ষ্ণো বিকারশ্চাপ্যনিষ্টঃ সমপদ্যত
176.46
স ধর্মরাজো মেধাবী শঙ্কমানো মহদ্ভয়ম্
দ্রৌপদীং পরিপপ্রচ্ছ ক্ব ভীম ইতি ভারত
176.47
শশংস তস্মৈ পাঞ্চালী চিরয়াতং বৃকোদরম্
স প্রতস্থে মহাবাহুর্ধৌম্যেন সহিতো নৃপঃ
176.48
দ্রৌপদ্যা রক্ষণং কার্যমিত্যুবাচ ধনংজয়ম্
নকুলং সহদেবং চ ব্যাদিদেশ দ্বিজান্প্রতি
176.49
স তস্য পদমুন্নীয় তস্মাদেবাশ্রমাত্প্রভুঃ
দদর্শ পৃথিবীং চিহ্নৈর্ভীমস্য পরিচিহ্নিতাম্
176.50
ধাবতস্তস্য বীরস্য মৃগার্থে বাতরংহসঃ
ঊরুবাতবিনির্ভগ্নান্দ্রুমান্ব্যাবর্জিতান্পথি
176.51
স গত্বা তৈস্তদা চিহ্নৈর্দদর্শ গিরিগহ্বরে
গৃহীতং ভুজগেন্দ্রেণ নিশ্চেষ্টমনুজং তথা