Utshovঅধ্যায় 177
177.1
বৈশংপায়ন উবাচ
যুধিষ্ঠিরস্তমাসাদ্য সর্পভোগাভিবেষ্টিতম্
দয়িতং ভ্রাতরং বীরমিদং বচনমব্রবীৎ
177.2
কুন্তীমাতঃ কথমিমামাপদং ত্বমবাপ্তবান্
কশ্চায়ং পর্বতাভোগপ্রতিমঃ পন্নগোত্তমঃ
177.3
স ধর্মরাজমালক্ষ্য ভ্রাতা ভ্রাতরমগ্রজম্
কথয়ামাস তত্সর্বং গ্রহণাদি বিচেষ্টিতম্
177.4
যুধিষ্ঠির উবাচ
দেবো বা যদি বা দৈত্য উরগো বা ভবান্যদি
সত্যং সর্প বচো ব্রূহি পৃচ্ছতি ত্বাং যুধিষ্ঠিরঃ
177.5
কিমাহৃত্য বিদিত্বা বা প্রীতিস্তে স্যাদ্ভুজংগম
কিমাহারং প্রয়চ্ছামি কথং মুঞ্চেদ্ভবানিমম্
177.6
সর্প উবাচ
নহুষো নাম রাজাহমাসং পূর্বস্তবানঘ
প্রথিতঃ পঞ্চমঃ সোমাদায়োঃ পুত্রো নরাধিপ
177.7
ক্রতুভিস্তপসা চৈব স্বাধ্যায়েন দমেন চ
ত্রৈলোক্যৈশ্বর্যমব্যগ্রং প্রাপ্তো বিক্রমণেন চ
177.8
তদৈশ্বর্যং সমাসাদ্য দর্পো মামগমত্তদা
সহস্রং হি দ্বিজাতীনামুবাহ শিবিকাং মম
177.9
ঐশ্বর্যমদমত্তোঽহমবমন্য ততো দ্বিজান্
ইমামগস্ত্যেন দশামানীতঃ পৃথিবীপতে
177.10
ন তু মামজহাত্প্রজ্ঞা যাবদদ্যেতি পাণ্ডব
তস্যৈবানুগ্রহাদ্রাজন্নগস্ত্যস্য মহাত্মনঃ
177.11
ষষ্ঠে কালে মমাহারঃ প্রাপ্তোঽয়মনুজস্তব
নাহমেনং বিমোক্ষ্যামি ন চান্যমভিকাময়ে
177.12
প্রশ্নানুচ্চারিতাংস্তু ত্বং ব্যাহরিষ্যসি চেন্মম
অথ পশ্চাদ্বিমোক্ষ্যামি ভ্রাতরং তে বৃকোদরম্
177.13
যুধিষ্ঠির উবাচ
ব্রূহি সর্প যথাকামং প্রতিবক্ষ্যামি তে বচঃ
অপি চেচ্ছক্নুয়াং প্রীতিমাহর্তুং তে ভুজংগম
177.14
বেদ্যং যদ্ব্রাহ্মণেনেহ তদ্ভবান্বেত্তি কেবলম্
সর্পরাজ ততঃ শ্রুত্বা প্রতিবক্ষ্যামি তে বচঃ
177.15
সর্প উবাচ
ব্রাহ্মণঃ কো ভবেদ্রাজন্বেদ্যং কিং চ যুধিষ্ঠির
ব্রবীহ্যতিমতিং ত্বাং হি বাক্যৈরনুমিমীমহে
177.16
যুধিষ্ঠির উবাচ
সত্যং দানং ক্ষমা শীলমানৃশংস্যং দমো ঘৃণা
দৃশ্যন্তে যত্র নাগেন্দ্র স ব্রাহ্মণ ইতি স্মৃতঃ
177.17
বেদ্যং সর্প পরং ব্রহ্ম নির্দুঃখমসুখং চ যৎ
যত্র গত্বা ন শোচন্তি ভবতঃ কিং বিবক্ষিতম্
177.18
সর্প উবাচ
চাতুর্বর্ণ্যং প্রমাণং চ সত্যং চ ব্রহ্ম চৈব হ
শূদ্রেষ্বপি চ সত্যং চ দানমক্রোধ এব চ
আনৃশংস্যমহিংসা চ ঘৃণা চৈব যুধিষ্ঠির
177.19
বেদ্যং যচ্চাত্থ নির্দুঃখমসুখং চ নরাধিপ
তাভ্যাং হীনং পদং চান্যন্ন তদস্তীতি লক্ষয়ে
177.20
যুধিষ্ঠির উবাচ
শূদ্রে চৈতদ্ভবেল্লক্ষ্যং দ্বিজে তচ্চ ন বিদ্যতে
ন বৈ শূদ্রো ভবেচ্ছূদ্রো ব্রাহ্মণো ন চ ব্রাহ্মণঃ
177.21
যত্রৈতল্লক্ষ্যতে সর্প বৃত্তং স ব্রাহ্মণঃ স্মৃতঃ
যত্রৈতন্ন ভবেত্সর্প তং শূদ্রমিতি নির্দিশেৎ
177.22
যত্পুনর্ভবতা প্রোক্তং ন বেদ্যং বিদ্যতেতি হ
তাভ্যাং হীনমতীত্যাত্র পদং নাস্তীতি চেদপি
177.23
এবমেতন্মতং সর্প তাভ্যাং হীনং ন বিদ্যতে
যথা শীতোষ্ণয়োর্মধ্যে ভবেন্নোষ্ণং ন শীততা
177.24
এবং বৈ সুখদুঃখাভ্যাং হীনমস্তি পদং ক্বচিৎ
এষা মম মতিঃ সর্প যথা বা মন্যতে ভবান্
177.25
সর্প উবাচ
যদি তে বৃত্ততো রাজন্ব্রাহ্মণঃ প্রসমীক্ষিতঃ
ব্যর্থা জাতিস্তদায়ুষ্মন্কৃতির্যাবন্ন দৃশ্যতে
177.26
যুধিষ্ঠির উবাচ
জাতিরত্র মহাসর্প মনুষ্যত্বে মহামতে
সংকরাত্সর্ববর্ণানাং দুষ্পরীক্ষ্যেতি মে মতিঃ
177.27
সর্বে সর্বাস্বপত্যানি জনয়ন্তি যদা নরাঃ
বাঙ্মৈথুনমথো জন্ম মরণং চ সমং নৃণাম্
177.28
ইদমার্ষং প্রমাণং চ যে যজামহ ইত্যপি
তস্মাচ্ছীলং প্রধানেষ্টং বিদুর্যে তত্ত্বদর্শিনঃ
177.29
প্রাঙ্নাভিবর্ধনাত্পুংসো জাতকর্ম বিধীয়তে
তত্রাস্য মাতা সাবিত্রী পিতা ত্বাচার্য উচ্যতে
177.30
বৃত্ত্যা শূদ্রসমো হ্যেষ যাবদ্বেদে ন জায়তে
অস্মিন্নেবং মতিদ্বৈধে মনুঃ স্বায়ম্ভুবোঽব্রবীৎ
177.31
কৃতকৃত্যাঃ পুনর্বর্ণা যদি বৃত্তং ন বিদ্যতে
সংকরস্তত্র নাগেন্দ্র বলবান্প্রসমীক্ষিতঃ
177.32
যত্রেদানীং মহাসর্প সংস্কৃতং বৃত্তমিষ্যতে
তং ব্রাহ্মণমহং পূর্বমুক্তবান্ভুজগোত্তম
177.33
সর্প উবাচ
শ্রুতং বিদিতবেদ্যস্য তব বাক্যং যুধিষ্ঠির
ভক্ষয়েয়মহং কস্মাদ্ভ্রাতরং তে বৃকোদরম্