Utshovঅধ্যায় 178
178.1
যুধিষ্ঠির উবাচ
ভবানেতাদৃশো লোকে বেদবেদাঙ্গপারগঃ
ব্রূহি কিং কুর্বতঃ কর্ম ভবেদ্গতিরনুত্তমা
178.2
সর্প উবাচ
পাত্রে দত্ত্বা প্রিয়াণ্যুক্ত্বা সত্যমুক্ত্বা চ ভারত
অহিংসানিরতঃ স্বর্গং গচ্ছেদিতি মতির্মম
178.3
যুধিষ্ঠির উবাচ
দানাদ্বা সর্প সত্যাদ্বা কিমতো গুরু দৃশ্যতে
অহিংসাপ্রিয়য়োশ্চৈব গুরুলাঘবমুচ্যতাম্
178.4
সর্প উবাচ
দানে রতত্বং সত্যং চ অহিংসা প্রিয়মেব চ
এষাং কার্যগরীয়স্ত্বাদ্দৃশ্যতে গুরুলাঘবম্
178.5
কস্মাচ্চিদ্দানয়োগাদ্ধি সত্যমেব বিশিষ্যতে
সত্যবাক্যাচ্চ রাজেন্দ্র কিংচিদ্দানং বিশিষ্যতে
178.6
এবমেব মহেষ্বাস প্রিয়বাক্যান্মহীপতে
অহিংসা দৃশ্যতে গুর্বী ততশ্চ প্রিয়মিষ্যতে
178.7
এবমেতদ্ভবেদ্রাজন্কার্যাপেক্ষমনন্তরম্
যদভিপ্রেতমন্যত্তে ব্রূহি যাবদ্ব্রবীম্যহম্
178.8
যুধিষ্ঠির উবাচ
কথং স্বর্গে গতিঃ সর্প কর্মণাং চ ফলং ধ্রুবম্
অশরীরস্য দৃশ্যেত বিষয়াংশ্চ ব্রবীহি মে
178.9
সর্প উবাচ
তিস্রো বৈ গতয়ো রাজন্পরিদৃষ্টাঃ স্বকর্মভিঃ
মানুষ্যং স্বর্গবাসশ্চ তির্যগ্যোনিশ্চ তত্ত্রিধা
178.10
তত্র বৈ মানুষাল্লোকাদ্দানাদিভিরতন্দ্রিতঃ
অহিংসার্থসমায়ুক্তৈঃ কারণৈঃ স্বর্গমশ্নুতে
178.11
বিপরীতৈশ্চ রাজেন্দ্র কারণৈর্মানুষো ভবেৎ
তির্যগ্যোনিস্তথা তাত বিশেষশ্চাত্র বক্ষ্যতে
178.12
কামক্রোধসমায়ুক্তো হিংসালোভসমন্বিতঃ
মনুষ্যত্বাত্পরিভ্রষ্টস্তির্যগ্যোনৌ প্রসূয়তে
178.13
তির্যগ্যোন্যাং পৃথগ্ভাবো মনুষ্যত্বে বিধীয়তে
গবাদিভ্যস্তথাশ্বেভ্যো দেবত্বমপি দৃশ্যতে
178.14
সোঽয়মেতা গতীঃ সর্বা জন্তুশ্চরতি কার্যবান্
নিত্যে মহতি চাত্মানমবস্থাপয়তে নৃপ
178.15
জাতো জাতশ্চ বলবান্ভুঙ্ক্তে চাত্মা স দেহবান্
ফলার্থস্তাত নিষ্পৃক্তঃ প্রজালক্ষণভাবনঃ
178.16
যুধিষ্ঠির উবাচ
শব্দে স্পর্শে চ রূপে চ তথৈব রসগন্ধয়োঃ
তস্যাধিষ্ঠানমব্যগ্রং ব্রূহি সর্প যথাতথম্
178.17
কিং ন গৃহ্ণাসি বিষয়ান্যুগপত্ত্বং মহামতে
এতাবদুচ্যতাং চোক্তং সর্বং পন্নগসত্তম
178.18
সর্প উবাচ
যদাত্মদ্রব্যমায়ুষ্মন্দেহসংশ্রয়ণান্বিতম্
করণাধিষ্ঠিতং ভোগানুপভুঙ্ক্তে যথাবিধি
178.19
জ্ঞানং চৈবাত্র বুদ্ধিশ্চ মনশ্চ ভরতর্ষভ
তস্য ভোগাধিকরণে করণানি নিবোধ মে
178.20
মনসা তাত পর্যেতি ক্রমশো বিষয়ানিমান্
বিষয়ায়তনস্থেন ভূতাত্মা ক্ষেত্রনিঃসৃতঃ
178.21
অত্র চাপি নরব্যাঘ্র মনো জন্তোর্বিধীয়তে
তস্মাদ্যুগপদস্যাত্র গ্রহণং নোপপদ্যতে
178.22
স আত্মা পুরুষব্যাঘ্র ভ্রুবোরন্তরমাশ্রিতঃ
দ্রব্যেষু সৃজতে বুদ্ধিং বিবিধেষু পরাবরাম্
178.23
বুদ্ধেরুত্তরকালং চ বেদনা দৃশ্যতে বুধৈঃ
এষ বৈ রাজশার্দূল বিধিঃ ক্ষেত্রজ্ঞভাবনঃ
178.24
যুধিষ্ঠির উবাচ
মনসশ্চাপি বুদ্ধেশ্চ ব্রূহি মে লক্ষণং পরম্
এতদধ্যাত্মবিদুষাং পরং কার্যং বিধীয়তে
178.25
সর্প উবাচ
বুদ্ধিরাত্মানুগা তাত উত্পাতেন বিধীয়তে
তদাশ্রিতা হি সংজ্ঞৈষা বিধিস্তস্যৈষণে ভবেৎ
178.26
বুদ্ধের্গুণবিধির্নাস্তি মনস্তু গুণবদ্ভবেৎ
বুদ্ধিরুত্পদ্যতে কার্যে মনস্তূত্পন্নমেব হি
178.27
এতদ্বিশেষণং তাত মনোবুদ্ধ্যোর্ময়েরিতম্
ত্বমপ্যত্রাভিসংবুদ্ধঃ কথং বা মন্যতে ভবান্
178.28
যুধিষ্ঠির উবাচ
অহো বুদ্ধিমতাং শ্রেষ্ঠ শুভা বুদ্ধিরিয়ং তব
বিদিতং বেদিতব্যং তে কস্মান্মামনুপৃচ্ছসি
178.29
সর্বজ্ঞং ত্বাং কথং মোহ আবিশত্স্বর্গবাসিনম্
এবমদ্ভুতকর্মাণমিতি মে সংশয়ো মহান্
178.30
সর্প উবাচ
সুপ্রজ্ঞমপি চেচ্ছূরমৃদ্ধির্মোহয়তে নরম্
বর্তমানঃ সুখে সর্বো নাবৈতীতি মতির্মম
178.31
সোঽহমৈশ্বর্যমোহেন মদাবিষ্টো যুধিষ্ঠির
পতিতঃ প্রতিসংবুদ্ধস্ত্বাং তু সংবোধয়াম্যহম্
178.32
কৃতং কার্যং মহারাজ ত্বয়া মম পরংতপ
ক্ষীণঃ শাপঃ সুকৃচ্ছ্রো মে ত্বয়া সংভাষ্য সাধুনা
178.33
অহং হি দিবি দিব্যেন বিমানেন চরন্পুরা
অভিমানেন মত্তঃ সন্কংচিন্নান্যমচিন্তয়ম্
178.34
ব্রহ্মর্ষিদেবগন্ধর্বয়ক্ষরাক্ষসকিংনরাঃ
করান্মম প্রয়চ্ছন্তি সর্বে ত্রৈলোক্যবাসিনঃ
178.35
চক্ষুষা যং প্রপশ্যামি প্রাণিনং পৃথিবীপতে
তস্য তেজো হরাম্যাশু তদ্ধি দৃষ্টিবলং মম
178.36
ব্রহ্মর্ষীণাং সহস্রং হি উবাহ শিবিকাং মম
স মামপনয়ো রাজন্ভ্রংশয়ামাস বৈ শ্রিয়ঃ
178.37
তত্র হ্যগস্ত্যঃ পাদেন বহন্স্পৃষ্টো ময়া মুনিঃ
অদৃষ্টেন ততোঽস্ম্যুক্তো ধ্বংস সর্পেতি বৈ রুষা
178.38
ততস্তস্মাদ্বিমানাগ্রাত্প্রচ্যুতশ্চ্যুতভূষণঃ
প্রপতন্বুবুধেঽঽত্মানং ব্যালীভূতমধোমুখম্
178.39
অয়াচং তমহং বিপ্রং শাপস্যান্তো ভবেদিতি
অজ্ঞানাত্সংপ্রবৃত্তস্য ভগবন্ক্ষন্তুমর্হসি
178.40
ততঃ স মামুবাচেদং প্রপতন্তং কৃপান্বিতঃ
যুধিষ্ঠিরো ধর্মরাজঃ শাপাত্ত্বাং মোক্ষয়িষ্যতি
178.41
অভিমানস্য ঘোরস্য বলস্য চ নরাধিপ
ফলে ক্ষীণে মহারাজ ফলং পুণ্যমবাপ্স্যসি
178.42
ততো মে বিস্ময়ো জাতস্তদ্দৃষ্ট্বা তপসো বলম্
ব্রহ্ম চ ব্রাহ্মণত্বং চ যেন ত্বাহমচূচুদম্
178.43
সত্যং দমস্তপো যোগমহিংসা দাননিত্যতা
সাধকানি সদা পুংসাং ন জাতির্ন কুলং নৃপ
178.44
অরিষ্ট এষ তে ভ্রাতা ভীমো মুক্তো মহাভুজঃ
স্বস্তি তেঽস্তু মহারাজ গমিষ্যামি দিবং পুনঃ
178.45
বৈশংপায়ন উবাচ
ইত্যুক্ত্বাজগরং দেহং ত্যক্ত্বা স নহুষো নৃপঃ
দিব্যং বপুঃ সমাস্থায় গতস্ত্রিদিবমেব হ
178.46
যুধিষ্ঠিরোঽপি ধর্মাত্মা ভ্রাত্রা ভীমেন সংগতঃ
ধৌম্যেন সহিতঃ শ্রীমানাশ্রমং পুনরভ্যগাৎ
178.47
ততো দ্বিজেভ্যঃ সর্বেভ্যঃ সমেতেভ্যো যথাতথম্
কথয়ামাস তত্সর্বং ধর্মরাজো যুধিষ্ঠিরঃ
178.48
তচ্ছ্রুত্বা তে দ্বিজাঃ সর্বে ভ্রাতরশ্চাস্য তে ত্রয়ঃ
আসন্সুব্রীডিতা রাজন্দ্রৌপদী চ যশস্বিনী
178.49
তে তু সর্বে দ্বিজশ্রেষ্ঠাঃ পাণ্ডবানাং হিতেপ্সয়া
মৈবমিত্যব্রুবন্ভীমং গর্হয়ন্তোঽস্য সাহসম্
178.50
পাণ্ডবাস্তু ভয়ান্মুক্তং প্রেক্ষ্য ভীমং মহাবলম্
হর্ষমাহারয়াং চক্রুর্বিজহ্রুশ্চ মুদা যুতাঃ