অধ্যায় 179

179.1

বৈশংপায়ন উবাচ
নিদাঘান্তকরঃ কালঃ সর্বভূতসুখাবহঃ
তত্রৈব বসতাং তেষাং প্রাবৃট্সমভিপদ্যত

ছাদয়ন্তো মহাঘোষাঃ খং দিশশ্চ বলাহকাঃ
প্রববর্ষুর্দিবারাত্রমসিতাঃ সততং তদা

তপাত্যয়নিকেতাশ্চ শতশোঽথ সহস্রশঃ
অপেতার্কপ্রভাজালাঃ সবিদ্যুদ্বিমলপ্রভাঃ

বিরূঢশষ্পা পৃথিবী মত্তদংশসরীসৃপা
বভূব পয়সা সিক্তা শান্তধূমরজোঽরুণা

ন স্ম প্রজ্ঞায়তে কিংচিদম্ভসা সমবস্তৃতে
সমং বা বিষমং বাপি নদ্যো বা স্থাবরাণি বা

ক্ষুব্ধতোয়া মহাঘোষাঃ শ্বসমানা ইবাশুগাঃ
সিন্ধবঃ শোভয়াং চক্রুঃ কাননানি তপাত্যয়ে

নদতাং কাননান্তেষু শ্রূয়ন্তে বিবিধাঃ স্বনাঃ
বৃষ্টিভিস্তাড্যমানানাং বরাহমৃগপক্ষিণাম্

স্তোককাঃ শিখিনশ্চৈব পুংস্কোকিলগণৈঃ সহ
মত্তাঃ পরিপতন্তি স্ম দর্দুরাশ্চৈব দর্পিতাঃ

তথা বহুবিধাকারা প্রাবৃণ্মেঘানুনাদিতা
অভ্যতীতা শিবা তেষাং চরতাং মরুধন্বসু

ক্রৌঞ্চহংসগণাকীর্ণা শরত্প্রণিহিতাভবৎ
রূঢকক্ষবনপ্রস্থা প্রসন্নজলনিম্নগা

বিমলাকাশনক্ষত্রা শরত্তেষাং শিবাভবৎ
মৃগদ্বিজসমাকীর্ণা পাণ্ডবানাং মহাত্মনাম্

পশ্যন্তঃ শান্তরজসঃ ক্ষপা জলদশীতলাঃ
গ্রহনক্ষত্রসংঘৈশ্চ সোমেন চ বিরাজিতাঃ

কুমুদৈঃ পুণ্ডরীকৈশ্চ শীতবারিধরাঃ শিবাঃ
নদীঃ পুষ্করিণীশ্চৈব দদৃশুঃ সমলংকৃতাঃ

আকাশনীকাশতটাং নীপনীবারসংকুলাম্
বভূব চরতাং হর্ষঃ পুণ্যতীর্থাং সরস্বতীম্

তে বৈ মুমুদিরে বীরাঃ প্রসন্নসলিলাং শিবাম্
পশ্যন্তো দৃঢধন্বানঃ পরিপূর্ণাং সরস্বতীম্

তেষাং পুণ্যতমা রাত্রিঃ পর্বসংধৌ স্ম শারদী
তত্রৈব বসতামাসীত্কার্ত্তিকী জনমেজয়

পুণ্যকৃদ্ভির্মহাসত্ত্বৈস্তাপসৈঃ সহ পাণ্ডবাঃ
তত্সর্বং ভরতশ্রেষ্ঠাঃ সমূহুর্যোগমুত্তমম্

তমিস্রাভ্যুদয়ে তস্মিন্ধৌম্যেন সহ পাণ্ডবাঃ
সূতৈঃ পৌরোগবৈশ্চৈব কাম্যকং প্রয়য়ুর্বনম্