Utshovঅধ্যায় 180
180.1
বৈশংপায়ন উবাচ
কাম্যকং প্রাপ্য কৌন্তেয়া যুধিষ্ঠিরপুরোগমাঃ
কৃতাতিথ্যা মুনিগণৈর্নিষেদুঃ সহ কৃষ্ণয়া
180.2
ততস্তান্পরিবিশ্বস্তান্বসতঃ পাণ্ডুনন্দনান্
ব্রাহ্মণা বহবস্তত্র সমন্তাত্পর্যবারয়ন্
180.3
অথাব্রবীদ্দ্বিজঃ কশ্চিদর্জুনস্য প্রিয়ঃ সখা
এষ্যতীহ মহাবাহুর্বশী শৌরিরুদারধীঃ
180.4
বিদিতা হি হরের্যূয়মিহায়াতাঃ কুরূদ্বহাঃ
সদা হি দর্শনাকাঙ্ক্ষী শ্রেয়োঽন্বেষী চ বো হরিঃ
180.5
বহুবত্সরজীবী চ মার্কণ্ডেয়ো মহাতপাঃ
স্বাধ্যায়তপসা যুক্তঃ ক্ষিপ্রং যুষ্মান্সমেষ্যতি
180.6
তথৈব তস্য ব্রুবতঃ প্রত্যদৃশ্যত কেশবঃ
সৈন্যসুগ্রীবয়ুক্তেন রথেন রথিনাং বরঃ
180.7
মঘবানিব পৌলোম্যা সহিতঃ সত্যভাময়া
উপায়াদ্দেবকীপুত্রো দিদৃক্ষুঃ কুরুসত্তমান্
180.8
অবতীর্য রথাত্কৃষ্ণো ধর্মরাজং যথাবিধি
ববন্দে মুদিতো ধীমান্ভীমং চ বলিনাং বরম্
180.9
পূজয়ামাস ধৌম্যং চ যমাভ্যামভিবাদিতঃ
পরিষ্বজ্য গুডাকেশং দ্রৌপদীং পর্যসান্ত্বয়ৎ
180.10
স দৃষ্ট্বা ফল্গুনং বীরং চিরস্য প্রিয়মাগতম্
পর্যষ্বজত দাশার্হঃ পুনঃ পুনররিংদমম্
180.11
তথৈব সত্যভামাপি দ্রৌপদীং পরিষস্বজে
পাণ্ডবানাং প্রিয়াং ভার্যাং কৃষ্ণস্য মহিষী প্রিয়া
180.12
ততস্তে পাণ্ডবাঃ সর্বে সভার্যাঃ সপুরোহিতাঃ
আনর্চুঃ পুণ্ডরীকাক্ষং পরিবব্রুশ্চ সর্বশঃ
180.13
কৃষ্ণস্তু পার্থেন সমেত্য বিদ্বা;ন্ধনংজয়েনাসুরতর্জনেন
বভৌ যথা ভূতপতির্মহাত্মা; সমেত্য সাক্ষাদ্ভগবান্গুহেন
180.14
ততঃ সমস্তানি কিরীটমালী; বনেষু বৃত্তানি গদাগ্রজায়
উক্ত্বা যথাবত্পুনরন্বপৃচ্ছ;ত্কথং সুভদ্রা চ তথাভিমন্যুঃ
180.15
স পূজয়িত্বা মধুহা যথাব;ত্পার্থাংশ্চ কৃষ্ণাং চ পুরোহিতং চ
উবাচ রাজানমভিপ্রশংস;ন্যুধিষ্ঠিরং তত্র সহোপবিশ্য
180.16
ধর্মঃ পরঃ পাণ্ডব রাজ্যলাভা;ত্তস্যার্থমাহুস্তপ এব রাজন্
সত্যার্জবাভ্যাং চরতা স্বধর্মং; জিতস্তবায়ং চ পরশ্চ লোকঃ
180.17
অধীতমগ্রে চরতা ব্রতানি; সম্যগ্ধনুর্বেদমবাপ্য কৃত্স্নম্
ক্ষাত্রেণ ধর্মেণ বসূনি লব্ধ্বা; সর্বে হ্যবাপ্তাঃ ক্রতবঃ পুরাণাঃ
180.18
ন গ্রাম্যধর্মেষু রতিস্তবাস্তি; কামান্ন কিংচিত্কুরুষে নরেন্দ্র
ন চার্থলোভাত্প্রজহাসি ধর্মং; তস্মাত্স্বভাবাদসি ধর্মরাজঃ
180.19
দানং চ সত্যং চ তপশ্চ রাজ;ঞ্শ্রদ্ধা চ শান্তিশ্চ ধৃতিঃ ক্ষমা চ
অবাপ্য রাষ্ট্রাণি বসূনি ভোগা;নেষা পরা পার্থ সদা রতিস্তে
180.20
যদা জনৌঘঃ কুরুজাঙ্গলানাং; কৃষ্ণাং সভায়ামবশামপশ্যৎ
অপেতধর্মব্যবহারবৃত্তং; সহেত তত্পাণ্ডব কস্ত্বদন্যঃ
180.21
অসংশয়ং সর্বসমৃদ্ধকামঃ; ক্ষিপ্রং প্রজাঃ পালয়িতাসি সম্যক্
ইমে বয়ং নিগ্রহণে কুরূণাং; যদি প্রতিজ্ঞা ভবতঃ সমাপ্তা
180.22
ধৌম্যং চ কৃষ্ণাং চ যুধিষ্ঠিরং চ; যমৌ চ ভীমং চ দশার্হসিংহঃ
উবাচ দিষ্ট্যা ভবতাং শিবেন; প্রাপ্তঃ কিরীটী মুদিতঃ কৃতাস্ত্রঃ
180.23
প্রোবাচ কৃষ্ণামপি যাজ্ঞসেনীং; দশার্হভর্তা সহিতঃ সুহৃদ্ভিঃ
কৃষ্ণে ধনুর্বেদরতিপ্রধানাঃ; সত্যব্রতাস্তে শিশবঃ সুশীলাঃ
সদ্ভিঃ সদৈবাচরিতং সমাধিং; চরন্তি পুত্রাস্তব যাজ্ঞসেনি
180.24
রাজ্যেন রাষ্ট্রৈশ্চ নিমন্ত্র্যমাণাঃ; পিত্রা চ কৃষ্ণে তব সোদরৈশ্চ
ন যজ্ঞসেনস্য ন মাতুলানাং; গৃহেষু বালা রতিমাপ্নুবন্তি
180.25
আনর্তমেবাভিমুখাঃ শিবেন; গত্বা ধনুর্বেদরতিপ্রধানাঃ
তবাত্মজা বৃষ্ণিপুরং প্রবিশ্য; ন দৈবতেভ্যঃ স্পৃহয়ন্তি কৃষ্ণে
180.26
যথা ত্বমেবার্হসি তেষু বৃত্তিং; প্রয়োক্তুমার্যা চ যথৈব কুন্তী
তেষ্বপ্রমাদেন সদা করোতি; তথা চ ভূয়শ্চ তথা সুভদ্রা
180.27
যথানিরুদ্ধস্য যথাভিমন্যো;র্যথা সুনীথস্য যথৈব ভানোঃ
তথা বিনেতা চ গতিশ্চ কৃষ্ণে; তবাত্মজানামপি রৌক্মিণেয়ঃ
180.28
গদাসিচর্মগ্রহণেষু শূরা;নস্ত্রেষু শিক্ষাসু রথাশ্বয়ানে
সম্যগ্বিনেতা বিনয়ত্যতন্দ্রী;স্তাংশ্চাভিমন্যুঃ সততং কুমারঃ
180.29
স চাপি সম্যক্প্রণিধায় শিক্ষা;মস্ত্রাণি চৈষাং গুরুবত্প্রদায়
তবাত্মজানাং চ তথাভিমন্যোঃ; পরাক্রমৈস্তুষ্যতি রৌক্মিণেয়ঃ
180.30
যদা বিহারং প্রসমীক্ষমাণাঃ; প্রয়ান্তি পুত্রাস্তব যাজ্ঞসেনি
একৈকমেষামনুয়ান্তি তত্র; রথাশ্চ যানানি চ দন্তিনশ্চ
180.31
অথাব্রবীদ্ধর্মরাজং তু কৃষ্ণো; দশার্হয়োধাঃ কুকুরান্ধকাশ্চ
এতে নিদেশং তব পালয়ন্তি; তিষ্ঠন্তি যত্রেচ্ছসি তত্র রাজন্
180.32
আবর্ততাং কার্মুকবেগবাতা; হলায়ুধপ্রগ্রহণা মধূনাম্
সেনা তবার্থেষু নরেন্দ্র যত্তা; সসাদিপত্ত্যশ্বরথা সনাগা
180.33
প্রস্থাপ্যতাং পাণ্ডব ধার্তরাষ্ট্রঃ; সুয়োধনঃ পাপকৃতাং বরিষ্ঠঃ
স সানুবন্ধঃ সসুহৃদ্গণশ্চ; সৌভস্য সৌভাধিপতেশ্চ মার্গম্
180.34
কামং তথা তিষ্ঠ নরেন্দ্র তস্মি;ন্যথা কৃতস্তে সময়ঃ সভায়াম্
দাশার্হয়োধৈস্তু সসাদিয়োধং; প্রতীক্ষতাং নাগপুরং ভবন্তম্
180.35
ব্যপেতমন্যুর্ব্যপনীতপাপ্মা; বিহৃত্য যত্রেচ্ছসি তত্র কামম্
ততঃ সমৃদ্ধং প্রথমং বিশোকঃ; প্রপত্স্যসে নাগপুরং সরাষ্ট্রম্
180.36
ততস্তদাজ্ঞায় মতং মহাত্মা; যথাবদুক্তং পুরুষোত্তমেন
প্রশস্য বিপ্রেক্ষ্য চ ধর্মরাজঃ; কৃতাঞ্জলিঃ কেশবমিত্যুবাচ
180.37
অসংশয়ং কেশব পাণ্ডবানাং; ভবান্গতিস্ত্বচ্ছরণা হি পার্থাঃ
কালোদয়ে তচ্চ ততশ্চ ভূয়ঃ; কর্তা ভবান্কর্ম ন সংশয়োঽস্তি
180.38
যথাপ্রতিজ্ঞং বিহৃতশ্চ কালঃ; সর্বাঃ সমা দ্বাদশ নির্জনেষু
অজ্ঞাতচর্যাং বিধিবত্সমাপ্য; ভবদ্গতাঃ কেশব পাণ্ডবেয়াঃ
180.39
বৈশংপায়ন উবাচ
তথা বদতি বার্ষ্ণেয়ে ধর্মরাজে চ ভারত
অথ পশ্চাত্তপোবৃদ্ধো বহুবর্ষসহস্রধৃক্
প্রত্যদৃশ্যত ধর্মাত্মা মার্কণ্ডেয়ো মহাতপাঃ
180.40
তমাগতমৃষিং বৃদ্ধং বহুবর্ষসহস্রিণম্
আনর্চুর্ব্রাহ্মণাঃ সর্বে কৃষ্ণশ্চ সহ পাণ্ডবৈঃ
180.41
তমর্চিতং সুবিশ্বস্তমাসীনমৃষিসত্তমম্
ব্রাহ্মণানাং মতেনাহ পাণ্ডবানাং চ কেশবঃ
180.42
শুশ্রূষবঃ পাণ্ডবাস্তে ব্রাহ্মণাশ্চ সমাগতাঃ
দ্রৌপদী সত্যভামা চ তথাহং পরমং বচঃ
180.43
পুরাবৃত্তাঃ কথাঃ পুণ্যাঃ সদাচারাঃ সনাতনাঃ
রাজ্ঞাং স্ত্রীণামৃষীণাং চ মার্কণ্ডেয় বিচক্ষ্ব নঃ
180.44
তেষু তত্রোপবিষ্টেষু দেবর্ষিরপি নারদঃ
আজগাম বিশুদ্ধাত্মা পাণ্ডবানবলোককঃ
180.45
তমপ্যথ মহাত্মানং সর্বে তু পুরুষর্ষভাঃ
পাদ্যার্ঘ্যাভ্যাং যথান্যায়মুপতস্থুর্মনীষিণম্
180.46
নারদস্ত্বথ দেবর্ষির্জ্ঞাত্বা তাংস্তু কৃতক্ষণান্
মার্কণ্ডেয়স্য বদতস্তাং কথামন্বমোদত
180.47
উবাচ চৈনং কালজ্ঞঃ স্ময়ন্নিব স নারদঃ
ব্রহ্মর্ষে কথ্যতাং যত্তে পাণ্ডবেষু বিবক্ষিতম্
180.48
এবমুক্তঃ প্রত্যুবাচ মার্কণ্ডেয়ো মহাতপাঃ
ক্ষণং কুরুধ্বং বিপুলমাখ্যাতব্যং ভবিষ্যতি
180.49
এবমুক্তাঃ ক্ষণং চক্রুঃ পাণ্ডবাঃ সহ তৈর্দ্বিজৈঃ
মধ্যংদিনে যথাদিত্যং প্রেক্ষন্তস্তং মহামুনিম্