Utshovঅধ্যায় 181
181.1
বৈশংপায়ন উবাচ
তং বিবক্ষন্তমালক্ষ্য কুরুরাজো মহামুনিম্
কথাসংজননার্থায় চোদয়ামাস পাণ্ডবঃ
181.2
ভবান্দৈবতদৈত্যানামৃষীণাং চ মহাত্মনাম্
রাজর্ষীণাং চ সর্বেষাং চরিতজ্ঞঃ সনাতনঃ
181.3
সেব্যশ্চোপাসিতব্যশ্চ মতো নঃ কাঙ্ক্ষিতশ্চিরম্
অয়ং চ দেবকীপুত্রঃ প্রাপ্তোঽস্মানবলোককঃ
181.4
ভবত্যেব হি মে বুদ্ধির্দৃষ্ট্বাত্মানং সুখাচ্চ্যুতম্
ধার্তরাষ্ট্রাংশ্চ দুর্বৃত্তানৃধ্যতঃ প্রেক্ষ্য সর্বশঃ
181.5
কর্মণঃ পুরুষঃ কর্তা শুভস্যাপ্যশুভস্য চ
স্বফলং তদুপাশ্নাতি কথং কর্তা স্বিদীশ্বরঃ
181.6
অথ বা সুখদুঃখেষু নৃণাং ব্রহ্মবিদাং বর
ইহ বা কৃতমন্বেতি পরদেহেঽথ বা পুনঃ
181.7
দেহী চ দেহং সংত্যজ্য মৃগ্যমাণঃ শুভাশুভৈঃ
কথং সংয়ুজ্যতে প্রেত্য ইহ বা দ্বিজসত্তম
181.8
ঐহলৌকিকমেবৈতদুতাহো পারলৌকিকম্
ক্ব চ কর্মাণি তিষ্ঠন্তি জন্তোঃ প্রেতস্য ভার্গব
181.9
মার্কণ্ডেয় উবাচ
ত্বদ্যুক্তোঽয়মনুপ্রশ্নো যথাবদ্বদতাং বর
বিদিতং বেদিতব্যং তে স্থিত্যর্থমনুপৃচ্ছসি
181.10
অত্র তে বর্তয়িষ্যামি তদিহৈকমনাঃ শৃণু
যথেহামুত্র চ নরঃ সুখদুঃখমুপাশ্নুতে
181.11
নির্মলানি শরীরাণি বিশুদ্ধানি শরীরিণাম্
সসর্জ ধর্মতন্ত্রাণি পূর্বোত্পন্নঃ প্রজাপতিঃ
181.12
অমোঘবলসংকল্পাঃ সুব্রতাঃ সত্যবাদিনঃ
ব্রহ্মভূতা নরাঃ পুণ্যাঃ পুরাণাঃ কুরুনন্দন
181.13
সর্বে দেবৈঃ সমায়ান্তি স্বচ্ছন্দেন নভস্তলম্
ততশ্চ পুনরায়ান্তি সর্বে স্বচ্ছন্দচারিণঃ
181.14
স্বচ্ছন্দমরণাশ্চাসন্নরাঃ স্বচ্ছন্দজীবিনঃ
অল্পবাধা নিরাতঙ্কা সিদ্ধার্থা নিরুপদ্রবাঃ
181.15
দ্রষ্টারো দেবসংঘানামৃষীণাং চ মহাত্মনাম্
প্রত্যক্ষাঃ সর্বধর্মাণাং দান্তা বিগতমত্সরাঃ
181.16
আসন্বর্ষসহস্রাণি তথা পুত্রসহস্রিণঃ
ততঃ কালান্তরেঽন্যস্মিন্পৃথিবীতলচারিণঃ
181.17
কামক্রোধাভিভূতাস্তে মায়াব্যাজোপজীবিনঃ
লোভমোহাভিভূতাশ্চ ত্যক্তা দেবৈস্ততো নরাঃ
181.18
অশুভৈঃ কর্মভিঃ পাপাস্তির্যঙ্নরকগামিনঃ
সংসারেষু বিচিত্রেষু পচ্যমানাঃ পুনঃ পুনঃ
181.19
মোঘেষ্টা মোঘসংকল্পা মোঘজ্ঞানা বিচেতসঃ
সর্বাতিশঙ্কিনশ্চৈব সংবৃত্তাঃ ক্লেশভাগিনঃ
অশুভৈঃ কর্মভিশ্চাপি প্রায়শঃ পরিচিহ্নিতাঃ
181.20
দৌষ্কুল্যা ব্যাধিবহুলা দুরাত্মানোঽপ্রতাপিনঃ
ভবন্ত্যল্পায়ুষঃ পাপা রৌদ্রকর্মফলোদয়াঃ
নাথন্তঃ সর্বকামানাং নাস্তিকা ভিন্নসেতবঃ
181.21
জন্তোঃ প্রেতস্য কৌন্তেয় গতিঃ স্বৈরিহ কর্মভিঃ
প্রাজ্ঞস্য হীনবুদ্ধেশ্চ কর্মকোশঃ ক্ব তিষ্ঠতি
181.22
ক্বস্থস্তত্সমুপাশ্নাতি সুকৃতং যদি বেতরৎ
ইতি তে দর্শনং যচ্চ তত্রাপ্যনুনয়ং শৃণু
181.23
অয়মাদিশরীরেণ দেবসৃষ্টেন মানবঃ
শুভানামশুভানাং চ কুরুতে সংচয়ং মহৎ
181.24
আয়ুষোঽন্তে প্রহায়েদং ক্ষীণপ্রায়ং কলেবরম্
সংভবত্যেব যুগপদ্যোনৌ নাস্ত্যন্তরাভবঃ
181.25
তত্রাস্য স্বকৃতং কর্ম ছায়েবানুগতং সদা
ফলত্যথ সুখার্হো বা দুঃখার্হো বাপি জায়তে
181.26
কৃতান্তবিধিসংয়ুক্তঃ স জন্তুর্লক্ষণৈঃ শুভৈঃ
অশুভৈর্বা নিরাদানো লক্ষ্যতে জ্ঞানদৃষ্টিভিঃ
181.27
এষা তাবদবুদ্ধীনাং গতিরুক্তা যুধিষ্ঠির
অতঃ পরং জ্ঞানবতাং নিবোধ গতিমুত্তমাম্
181.28
মনুষ্যাস্তপ্ততপসঃ সর্বাগমপরায়ণাঃ
স্থিরব্রতাঃ সত্যপরা গুরুশুশ্রূষণে রতাঃ
181.29
সুশীলাঃ শুক্লজাতীয়াঃ ক্ষান্তা দান্তাঃ সুতেজসঃ
শুভয়োন্যন্তরগতাঃ প্রায়শঃ শুভলক্ষণাঃ
181.30
জিতেন্দ্রিয়ত্বাদ্বশিনঃ শুক্লত্বান্মন্দরোগিণঃ
অল্পবাধপরিত্রাসাদ্ভবন্তি নিরুপদ্রবাঃ
181.31
চ্যবন্তং জায়মানং চ গর্ভস্থং চৈব সর্বশঃ
স্বমাত্মানং পরং চৈব বুধ্যন্তে জ্ঞানচক্ষুষঃ
কর্মভূমিমিমাং প্রাপ্য পুনর্যান্তি সুরালয়ম্
181.32
কিংচিদ্দৈবাদ্ধঠাত্কিংচিত্কিংচিদেব স্বকর্মভিঃ
প্রাপ্নুবন্তি নরা রাজন্মা তেঽস্ত্বন্যা বিচারণা
181.33
ইমামত্রোপমাং চাপি নিবোধ বদতাং বর
মনুষ্যলোকে যচ্ছ্রেয়ঃ পরং মন্যে যুধিষ্ঠির
181.34
ইহ বৈকস্য নামুত্র অমুত্রৈকস্য নো ইহ
ইহ চামুত্র চৈকস্য নামুত্রৈকস্য নো ইহ
181.35
ধনানি যেষাং বিপুলানি সন্তি; নিত্যং রমন্তে সুবিভূষিতাঙ্গাঃ
তেষাময়ং শত্রুবরঘ্ন লোকো; নাসৌ সদা দেহসুখে রতানাম্
181.36
যে যোগয়ুক্তাস্তপসি প্রসক্তাঃ; স্বাধ্যায়শীলা জরয়ন্তি দেহান্
জিতেন্দ্রিয়া ভূতহিতে নিবিষ্টা;স্তেষামসৌ নায়মরিঘ্ন লোকঃ
181.37
যে ধর্মমেব প্রথমং চরন্তি; ধর্মেণ লব্ধ্বা চ ধনানি কালে
দারানবাপ্য ক্রতুভির্যজন্তে; তেষাময়ং চৈব পরশ্চ লোকঃ
181.38
যে নৈব বিদ্যাং ন তপো ন দানং; ন চাপি মূঢাঃ প্রজনে যতন্তে
ন চাধিগচ্ছন্তি সুখান্যভাগ্যা;স্তেষাময়ং চৈব পরশ্চ নাস্তি
181.39
সর্বে ভবন্তস্ত্বতিবীর্যসত্ত্বা; দিব্যৌজসঃ সংহননোপপন্নাঃ
লোকাদমুষ্মাদবনিং প্রপন্নাঃ; স্বধীতবিদ্যাঃ সুরকার্যহেতোঃ
181.40
কৃত্বৈব কর্মাণি মহান্তি শূরা;স্তপোদমাচারবিহারশীলাঃ
দেবানৃষীন্প্রেতগণাংশ্চ সর্বা;ন্সংতর্পয়িত্বা বিধিনা পরেণ
181.41
স্বর্গং পরং পুণ্যকৃতাং নিবাসং; ক্রমেণ সংপ্রাপ্স্যথ কর্মভিঃ স্বৈঃ
মা ভূদ্বিশঙ্কা তব কৌরবেন্দ্র; দৃষ্ট্বাত্মনঃ ক্লেশমিমং সুখার্হ