অধ্যায় 182

182.1

বৈশংপায়ন উবাচ
মার্কণ্ডেয়ং মহাত্মানমূচুঃ পাণ্ডুসুতাস্তদা
মাহাত্ম্যং দ্বিজমুখ্যানাং শ্রোতুমিচ্ছাম কথ্যতাম্

এবমুক্তঃ স ভগবান্মার্কণ্ডেয়ো মহাতপাঃ
উবাচ সুমহাতেজাঃ সর্বশাস্ত্রবিশারদঃ

হৈহয়ানাং কুলকরো রাজা পরপুরংজয়ঃ
কুমারো রূপসংপন্নো মৃগয়ামচরদ্বলী

চরমাণস্তু সোঽরণ্যে তৃণবীরুত্সমাবৃতে
কৃষ্ণাজিনোত্তরাসঙ্গং দদর্শ মুনিমন্তিকে
স তেন নিহতোঽরণ্যে মন্যমানেন বৈ মৃগম্

ব্যথিতঃ কর্ম তত্কৃত্বা শোকোপহতচেতনঃ
জগাম হৈহয়ানাং বৈ সকাশং প্রথিতাত্মনাম্

রাজ্ঞাং রাজীবনেত্রোসৌ কুমারঃ পৃথিবীপতে
তেষাং চ তদ্যথাবৃত্তং কথয়ামাস বৈ তদা

তং চাপি হিংসিতং তাত মুনিং মূলফলাশিনম্
শ্রুত্বা দৃষ্ট্বা চ তে তত্র বভূবুর্দীনমানসাঃ

কস্যায়মিতি তে সর্বে মার্গমাণাস্ততস্ততঃ
জগ্মুশ্চারিষ্টনেমেস্তে তার্ক্ষ্যস্যাশ্রমমঞ্জসা

তেঽভিবাদ্য মহাত্মানং তং মুনিং সংশিতব্রতম্
তস্থুঃ সর্বে স তু মুনিস্তেষাং পূজামথাহরৎ

তে তমূচুর্মহাত্মানং ন বয়ং সত্ক্রিয়াং মুনে
ত্বত্তোঽর্হাঃ কর্মদোষেণ ব্রাহ্মণো হিংসিতো হি নঃ

তানব্রবীত্স বিপ্রর্ষিঃ কথং বো ব্রাহ্মণো হতঃ
ক্ব চাসৌ ব্রূত সহিতাঃ পশ্যধ্বং মে তপোবলম্

তে তু তত্সর্বমখিলমাখ্যায়াস্মৈ যথাতথম্
নাপশ্যংস্তমৃষিং তত্র গতাসুং তে সমাগতাঃ
অন্বেষমাণাঃ সব্রীডাঃ স্বপ্নবদ্গতমানসাঃ

তানব্রবীত্তত্র মুনিস্তার্ক্ষ্যঃ পরপুরংজয়ঃ
স্যাদয়ং ব্রাহ্মণঃ সোঽথ যো যুষ্মাভির্বিনাশিতঃ
পুত্রো হ্যয়ং মম নৃপাস্তপোবলসমন্বিতঃ

তে তু দৃষ্ট্বৈব তমৃষিং বিস্ময়ং পরমং গতাঃ
মহদাশ্চর্যমিতি বৈ বিব্রুবাণা মহীপতে

মৃতো হ্যয়মতো দৃষ্টঃ কথং জীবিতমাপ্তবান্
কিমেতত্তপসো বীর্যং যেনায়ং জীবিতঃ পুনঃ
শ্রোতুমিচ্ছাম বিপ্রর্ষে যদি শ্রোতব্যমিত্যুত

স তানুবাচ নাস্মাকং মৃত্যুঃ প্রভবতে নৃপাঃ
কারণং বঃ প্রবক্ষ্যামি হেতুয়োগং সমাসতঃ

সত্যমেবাভিজানীমো নানৃতে কুর্মহে মনঃ
স্বধর্মমনুতিষ্ঠামস্তস্মান্মৃত্যুভয়ং ন নঃ

যদ্ব্রাহ্মণানাং কুশলং তদেষাং কথয়ামহে
নৈষাং দুশ্চরিতং ব্রূমস্তস্মান্মৃত্যুভয়ং ন নঃ

অতিথীনন্নপানেন ভৃত্যানত্যশনেন চ
তেজস্বিদেশবাসাচ্চ তস্মান্মৃত্যুভয়ং ন নঃ

এতদ্বৈ লেশমাত্রং বঃ সমাখ্যাতং বিমত্সরাঃ
গচ্ছধ্বং সহিতাঃ সর্বে ন পাপাদ্ভয়মস্তি বঃ

এবমস্ত্বিতি তে সর্বে প্রতিপূজ্য মহামুনিম্
স্বদেশমগমন্হৃষ্টা রাজানো ভরতর্ষভ