অধ্যায় 183

183.1

মার্কণ্ডেয় উবাচ
ভূয় এব তু মাহাত্ম্যং ব্রাহ্মণানাং নিবোধ মে
বৈন্যো নামেহ রাজর্ষিরশ্বমেধায় দীক্ষিতঃ
তমত্রির্গন্তুমারেভে বিত্তার্থমিতি নঃ শ্রুতম্

183.2

ভূয়োঽথ নানুরুধ্যত্স ধর্মব্যক্তিনিদর্শনাৎ
সংচিন্ত্য স মহাতেজা বনমেবান্বরোচয়ৎ
ধর্মপত্নীং সমাহূয় পুত্রাংশ্চেদমুবাচ হ

183.3

প্রাপ্স্যামঃ ফলমত্যন্তং বহুলং নিরুপদ্রবম্
অরণ্যগমনং ক্ষিপ্রং রোচতাং বো গুণাধিকম্

183.4

তং ভার্যা প্রত্যুবাচেদং ধর্মমেবানুরুধ্যতী
বৈন্যং গত্বা মহাত্মানমর্থয়স্ব ধনং বহু
স তে দাস্যতি রাজর্ষির্যজমানোঽর্থিনে ধনম্

183.5

তত আদায় বিপ্রর্ষে প্রতিগৃহ্য ধনং বহু
ভৃত্যান্সুতান্সংবিভজ্য ততো ব্রজ যথেপ্সিতম্
এষ বৈ পরমো ধর্মো ধর্মবিদ্ভিরুদাহৃতঃ

183.6

অত্রিরুবাচ
কথিতো মে মহাভাগে গৌতমেন মহাত্মনা
বৈন্যো ধর্মার্থসংয়ুক্তঃ সত্যব্রতসমন্বিতঃ

183.7

কিং ত্বস্তি তত্র দ্বেষ্টারো নিবসন্তি হি মে দ্বিজাঃ
যথা মে গৌতমঃ প্রাহ ততো ন ব্যবসাম্যহম্

183.8

তত্র স্ম বাচং কল্যাণীং ধর্মকামার্থসংহিতাম্
ময়োক্তামন্যথা ব্রূয়ুস্ততস্তে বৈ নিরর্থকাম্

183.9

গমিষ্যামি মহাপ্রাজ্ঞে রোচতে মে বচস্তব
গাশ্চ মে দাস্যতে বৈন্যঃ প্রভূতং চার্থসংচয়ম্

183.10

মার্কণ্ডেয় উবাচ
এবমুক্ত্বা জগামাশু বৈন্যয়জ্ঞং মহাতপাঃ
গত্বা চ যজ্ঞায়তনমত্রিস্তুষ্টাব তং নৃপম্

183.11

রাজন্বৈন্য ত্বমীশশ্চ ভুবি ত্বং প্রথমো নৃপঃ
স্তুবন্তি ত্বাং মুনিগণাস্ত্বদন্যো নাস্তি ধর্মবিৎ

183.12

তমব্রবীদৃষিস্তত্র বচঃ ক্রুদ্ধো মহাতপাঃ
মৈবমত্রে পুনর্ব্রূয়া ন তে প্রজ্ঞা সমাহিতা
অত্র নঃ প্রথমং স্থাতা মহেন্দ্রো বৈ প্রজাপতিঃ

183.13

অথাত্রিরপি রাজেন্দ্র গৌতমং প্রত্যভাষত
অয়মেব বিধাতা চ যথৈবেন্দ্রঃ প্রজাপতিঃ
ত্বমেব মুহ্যসে মোহান্ন প্রজ্ঞানং তবাস্তি হ

183.14

গৌতম উবাচ
জানামি নাহং মুহ্যামি ত্বং বিবক্ষুর্বিমুহ্যসে
স্তোষ্যসেঽভ্যুদয়প্রেপ্সুস্তস্য দর্শনসংশ্রয়াৎ

183.15

ন বেত্থ পরমং ধর্মং ন চাবৈষি প্রয়োজনম্
বালস্ত্বমসি মূঢশ্চ বৃদ্ধঃ কেনাপি হেতুনা

183.16

মার্কণ্ডেয় উবাচ
বিবদন্তৌ তথা তৌ তু মুনীনাং দর্শনে স্থিতৌ
যে তস্য যজ্ঞে সংবৃত্তাস্তেঽপৃচ্ছন্ত কথং ত্বিমৌ

183.17

প্রবেশঃ কেন দত্তোঽয়মনয়োর্বৈন্যসংসদি
উচ্চৈঃ সমভিভাষন্তৌ কেন কার্যেণ বিষ্ঠিতৌ

183.18

ততঃ পরমধর্মাত্মা কাশ্যপঃ সর্বধর্মবিৎ
বিবাদিনাবনুপ্রাপ্তৌ তাবুভৌ প্রত্যবেদয়ৎ

183.19

অথাব্রবীত্সদস্যাংস্তু গৌতমো মুনিসত্তমান্
আবয়োর্ব্যাহৃতং প্রশ্নং শৃণুত দ্বিজপুংগবাঃ
বৈন্যো বিধাতেত্যাহাত্রিরত্র নঃ সংশয়ো মহান্

183.20

শ্রুত্বৈব তু মহাত্মানো মুনয়োঽভ্যদ্রবন্দ্রুতম্
সনত্কুমারং ধর্মজ্ঞং সংশয়চ্ছেদনায় বৈ

183.21

স চ তেষাং বচঃ শ্রুত্বা যথাতত্ত্বং মহাতপাঃ
প্রত্যুবাচাথ তানেবং ধর্মার্থসহিতং বচঃ

183.22

সনত্কুমার উবাচ
ব্রহ্ম ক্ষত্রেণ সহিতং ক্ষত্রং চ ব্রহ্মণা সহ
রাজা বৈ প্রথমো ধর্মঃ প্রজানাং পতিরেব চ
স এব শক্রঃ শুক্রশ্চ স ধাতা স বৃহস্পতিঃ

183.23

প্রজাপতির্বিরাট্সম্রাট্ক্ষত্রিয়ো ভূপতির্নৃপঃ
য এভিঃ স্তূয়তে শব্দৈঃ কস্তং নার্চিতুমর্হতি

183.24

পুরায়োনির্যুধাজিচ্চ অভিয়া মুদিতো ভবঃ
স্বর্ণেতা সহজিদ্বভ্রুরিতি রাজাভিধীয়তে

183.25

সত্যমন্যুর্যুধাজীবঃ সত্যধর্মপ্রবর্তকঃ
অধর্মাদৃষয়ো ভীতা বলং ক্ষত্রে সমাদধন্

183.26

আদিত্যো দিবি দেবেষু তমো নুদতি তেজসা
তথৈব নৃপতির্ভূমাবধর্মং নুদতে ভৃশম্

183.27

অতো রাজ্ঞঃ প্রধানত্বং শাস্ত্রপ্রামাণ্যদর্শনাৎ
উত্তরঃ সিধ্যতে পক্ষো যেন রাজেতি ভাষিতম্

183.28

মার্কণ্ডেয় উবাচ
ততঃ স রাজা সংহৃষ্টঃ সিদ্ধে পক্ষে মহামনাঃ
তমত্রিমব্রবীত্প্রীতঃ পূর্বং যেনাভিসংস্তুতঃ

183.29

যস্মাত্সর্বমনুষ্যেষু জ্যায়াংসং মামিহাব্রবীঃ
সর্বদেবৈশ্চ বিপ্রর্ষে সংমিতং শ্রেষ্ঠমেব চ
তস্মাত্তেঽহং প্রদাস্যামি বিবিধং বসু ভূরি চ

183.30

দাসীসহস্রং শ্যামানাং সুবস্ত্রাণামলংকৃতম্
দশ কোট্যো হিরণ্যস্য রুক্মভারাংস্তথা দশ
এতদ্দদানি তে বিপ্র সর্বজ্ঞস্ত্বং হি মে মতঃ

183.31

তদত্রির্ন্যায়তঃ সর্বং প্রতিগৃহ্য মহামনাঃ
প্রত্যাজগাম তেজস্বী গৃহানেব মহাতপাঃ

183.32

প্রদায় চ ধনং প্রীতঃ পুত্রেভ্যঃ প্রয়তাত্মবান্
তপঃ সমভিসংধায় বনমেবান্বপদ্যত

Contains text from DharmicData, made available under the Open Database License (ODbL). Simple meanings are written by AI and can contain mistakes.