UtshovChapter 183
183.1
मार्कण्डेय उवाच
भूय एव तु माहात्म्यं ब्राह्मणानां निबोध मे
वैन्यो नामेह राजर्षिरश्वमेधाय दीक्षितः
तमत्रिर्गन्तुमारेभे वित्तार्थमिति नः श्रुतम्
Markandeya uvacha
Bhuya eva tu mahatmyam brahmananam nibodha me
Vainyo nameha rajarshirashvamedhaya dikshitah
Tamatrirgantumarebhe vittarthamiti nah shrutam
183.2
भूयोऽथ नानुरुध्यत्स धर्मव्यक्तिनिदर्शनात्
संचिन्त्य स महातेजा वनमेवान्वरोचयत्
धर्मपत्नीं समाहूय पुत्रांश्चेदमुवाच ह
Bhuyotha nanurudhyatsa dharmavyaktinidarshanat
Sanchintya sa mahateja vanamevanvarochayat
Dharmapatnim samahuya putranshchedamuvacha ha
183.3
प्राप्स्यामः फलमत्यन्तं बहुलं निरुपद्रवम्
अरण्यगमनं क्षिप्रं रोचतां वो गुणाधिकम्
Prapsyamah phalamatyantam bahulam nirupadravam
Aranyagamanam kshipram rochatam vo gunadhikam
183.4
तं भार्या प्रत्युवाचेदं धर्ममेवानुरुध्यती
वैन्यं गत्वा महात्मानमर्थयस्व धनं बहु
स ते दास्यति राजर्षिर्यजमानोऽर्थिने धनम्
Tam bharya pratyuvachedam dharmamevanurudhyati
Vainyam gatva mahatmanamarthayasva dhanam bahu
Sa te dasyati rajarshiryajamanorthine dhanam
183.5
तत आदाय विप्रर्षे प्रतिगृह्य धनं बहु
भृत्यान्सुतान्संविभज्य ततो व्रज यथेप्सितम्
एष वै परमो धर्मो धर्मविद्भिरुदाहृतः
Tata adaya viprarshe pratigrihya dhanam bahu
Bhrityansutansanvibhajya tato vraja yathepsitam
Esha vai paramo dharmo dharmavidbhirudahritah
183.6
अत्रिरुवाच
कथितो मे महाभागे गौतमेन महात्मना
वैन्यो धर्मार्थसंयुक्तः सत्यव्रतसमन्वितः
Atriruvacha
Kathito me mahabhage gautamena mahatmana
Vainyo dharmarthasanyuktah satyavratasamanvitah
183.7
किं त्वस्ति तत्र द्वेष्टारो निवसन्ति हि मे द्विजाः
यथा मे गौतमः प्राह ततो न व्यवसाम्यहम्
Kim tvasti tatra dveshtaro nivasanti hi me dvijah
Yatha me gautamah praha tato na vyavasamyaham
183.8
तत्र स्म वाचं कल्याणीं धर्मकामार्थसंहिताम्
मयोक्तामन्यथा ब्रूयुस्ततस्ते वै निरर्थकाम्
Tatra sma vacham kalyanim dharmakamarthasanhitam
Mayoktamanyatha bruyustataste vai nirarthakam
183.9
गमिष्यामि महाप्राज्ञे रोचते मे वचस्तव
गाश्च मे दास्यते वैन्यः प्रभूतं चार्थसंचयम्
Gamishyami mahapragye rochate me vachastava
Gashcha me dasyate vainyah prabhutam charthasanchayam
183.10
मार्कण्डेय उवाच
एवमुक्त्वा जगामाशु वैन्ययज्ञं महातपाः
गत्वा च यज्ञायतनमत्रिस्तुष्टाव तं नृपम्
Markandeya uvacha
Evamuktva jagamashu vainyayagyam mahatapah
Gatva cha yagyayatanamatristushtava tam nripam
183.11
राजन्वैन्य त्वमीशश्च भुवि त्वं प्रथमो नृपः
स्तुवन्ति त्वां मुनिगणास्त्वदन्यो नास्ति धर्मवित्
Rajanvainya tvamishashcha bhuvi tvam prathamo nripah
Stuvanti tvam muniganastvadanyo nasti dharmavit
183.12
तमब्रवीदृषिस्तत्र वचः क्रुद्धो महातपाः
मैवमत्रे पुनर्ब्रूया न ते प्रज्ञा समाहिता
अत्र नः प्रथमं स्थाता महेन्द्रो वै प्रजापतिः
Tamabravidrishistatra vachah kruddho mahatapah
Maivamatre punarbruya na te pragya samahita
Atra nah prathamam sthata mahendro vai prajapatih
183.13
अथात्रिरपि राजेन्द्र गौतमं प्रत्यभाषत
अयमेव विधाता च यथैवेन्द्रः प्रजापतिः
त्वमेव मुह्यसे मोहान्न प्रज्ञानं तवास्ति ह
Athatrirapi rajendra gautamam pratyabhashata
Ayameva vidhata cha yathaivendrah prajapatih
Tvameva muhyase mohanna pragyanam tavasti ha
183.14
गौतम उवाच
जानामि नाहं मुह्यामि त्वं विवक्षुर्विमुह्यसे
स्तोष्यसेऽभ्युदयप्रेप्सुस्तस्य दर्शनसंश्रयात्
Gautama uvacha
Janami naham muhyami tvam vivakshurvimuhyase
Stoshyasebhyudayaprepsustasya darshanasanshrayat
183.15
न वेत्थ परमं धर्मं न चावैषि प्रयोजनम्
बालस्त्वमसि मूढश्च वृद्धः केनापि हेतुना
Na vettha paramam dharmam na chavaishi prayojanam
Balastvamasi mudhashcha vriddhah kenapi hetuna
183.16
मार्कण्डेय उवाच
विवदन्तौ तथा तौ तु मुनीनां दर्शने स्थितौ
ये तस्य यज्ञे संवृत्तास्तेऽपृच्छन्त कथं त्विमौ
Markandeya uvacha
Vivadantau tatha tau tu muninam darshane sthitau
Ye tasya yagye sanvrittasteprichchhanta katham tvimau
183.17
प्रवेशः केन दत्तोऽयमनयोर्वैन्यसंसदि
उच्चैः समभिभाषन्तौ केन कार्येण विष्ठितौ
Praveshah kena dattoyamanayorvainyasansadi
Uchchaih samabhibhashantau kena karyena vishthitau
183.18
ततः परमधर्मात्मा काश्यपः सर्वधर्मवित्
विवादिनावनुप्राप्तौ तावुभौ प्रत्यवेदयत्
Tatah paramadharmatma kashyapah sarvadharmavit
Vivadinavanupraptau tavubhau pratyavedayat
183.19
अथाब्रवीत्सदस्यांस्तु गौतमो मुनिसत्तमान्
आवयोर्व्याहृतं प्रश्नं शृणुत द्विजपुंगवाः
वैन्यो विधातेत्याहात्रिरत्र नः संशयो महान्
Athabravitsadasyanstu gautamo munisattaman
Avayorvyahritam prashnam shrinuta dvijapungavah
Vainyo vidhatetyahatriratra nah sanshayo mahan
183.20
श्रुत्वैव तु महात्मानो मुनयोऽभ्यद्रवन्द्रुतम्
सनत्कुमारं धर्मज्ञं संशयच्छेदनाय वै
Shrutvaiva tu mahatmano munayobhyadravandrutam
Sanatkumaram dharmagyam sanshayachchhedanaya vai
183.21
स च तेषां वचः श्रुत्वा यथातत्त्वं महातपाः
प्रत्युवाचाथ तानेवं धर्मार्थसहितं वचः
Sa cha tesham vachah shrutva yathatattvam mahatapah
Pratyuvachatha tanevam dharmarthasahitam vachah
183.22
सनत्कुमार उवाच
ब्रह्म क्षत्रेण सहितं क्षत्रं च ब्रह्मणा सह
राजा वै प्रथमो धर्मः प्रजानां पतिरेव च
स एव शक्रः शुक्रश्च स धाता स बृहस्पतिः
Sanatkumara uvacha
Brahma kshatrena sahitam kshatram cha brahmana saha
Raja vai prathamo dharmah prajanam patireva cha
Sa eva shakrah shukrashcha sa dhata sa brihaspatih
183.23
प्रजापतिर्विराट्सम्राट्क्षत्रियो भूपतिर्नृपः
य एभिः स्तूयते शब्दैः कस्तं नार्चितुमर्हति
Prajapatirviratsamratkshatriyo bhupatirnripah
Ya ebhih stuyate shabdaih kastam narchitumarhati
183.24
पुरायोनिर्युधाजिच्च अभिया मुदितो भवः
स्वर्णेता सहजिद्बभ्रुरिति राजाभिधीयते
Purayoniryudhajichcha abhiya mudito bhavah
Svarneta sahajidbabhruriti rajabhidhiyate
183.25
सत्यमन्युर्युधाजीवः सत्यधर्मप्रवर्तकः
अधर्मादृषयो भीता बलं क्षत्रे समादधन्
Satyamanyuryudhajivah satyadharmapravartakah
Adharmadrishayo bhita balam kshatre samadadhan
183.26
आदित्यो दिवि देवेषु तमो नुदति तेजसा
तथैव नृपतिर्भूमावधर्मं नुदते भृशम्
Adityo divi deveshu tamo nudati tejasa
Tathaiva nripatirbhumavadharmam nudate bhrisham
183.27
अतो राज्ञः प्रधानत्वं शास्त्रप्रामाण्यदर्शनात्
उत्तरः सिध्यते पक्षो येन राजेति भाषितम्
Ato ragyah pradhanatvam shastrapramanyadarshanat
Uttarah sidhyate paksho yena rajeti bhashitam
183.28
मार्कण्डेय उवाच
ततः स राजा संहृष्टः सिद्धे पक्षे महामनाः
तमत्रिमब्रवीत्प्रीतः पूर्वं येनाभिसंस्तुतः
Markandeya uvacha
Tatah sa raja sanhrishtah siddhe pakshe mahamanah
Tamatrimabravitpritah purvam yenabhisanstutah
183.29
यस्मात्सर्वमनुष्येषु ज्यायांसं मामिहाब्रवीः
सर्वदेवैश्च विप्रर्षे संमितं श्रेष्ठमेव च
तस्मात्तेऽहं प्रदास्यामि विविधं वसु भूरि च
Yasmatsarvamanushyeshu jyayansam mamihabravih
Sarvadevaishcha viprarshe sammitam shreshthameva cha
Tasmatteham pradasyami vividham vasu bhuri cha
183.30
दासीसहस्रं श्यामानां सुवस्त्राणामलंकृतम्
दश कोट्यो हिरण्यस्य रुक्मभारांस्तथा दश
एतद्ददानि ते विप्र सर्वज्ञस्त्वं हि मे मतः
Dasisahasram shyamanam suvastranamalankritam
Dasha kotyo hiranyasya rukmabharanstatha dasha
Etaddadani te vipra sarvagyastvam hi me matah
183.31
तदत्रिर्न्यायतः सर्वं प्रतिगृह्य महामनाः
प्रत्याजगाम तेजस्वी गृहानेव महातपाः
Tadatrirnyayatah sarvam pratigrihya mahamanah
Pratyajagama tejasvi grihaneva mahatapah
183.32
प्रदाय च धनं प्रीतः पुत्रेभ्यः प्रयतात्मवान्
तपः समभिसंधाय वनमेवान्वपद्यत
Pradaya cha dhanam pritah putrebhyah prayatatmavan
Tapah samabhisandhaya vanamevanvapadyata