Utshovঅধ্যায় 184
184.1
মার্কণ্ডেয় উবাচ
অত্রৈব চ সরস্বত্যা গীতং পরপুরংজয়
পৃষ্টয়া মুনিনা বীর শৃণু তার্ক্ষ্যেণ ধীমতা
184.2
তার্ক্ষ্য উবাচ
কিং নু শ্রেয়ঃ পুরুষস্যেহ ভদ্রে; কথং কুর্বন্ন চ্যবতে স্বধর্মাৎ
আচক্ষ্ব মে চারুসর্বাঙ্গি সর্বং; ত্বয়ানুশিষ্টো ন চ্যবেয়ং স্বধর্মাৎ
184.3
কথং চাগ্নিং জুহুয়াং পূজয়ে বা; কস্মিন্কালে কেন ধর্মো ন নশ্যেৎ
এতত্সর্বং সুভগে প্রব্রবীহি; যথা লোকান্বিরজাঃ সংচরেয়ম্
184.4
মার্কণ্ডেয় উবাচ
এবং পৃষ্টা প্রীতিয়ুক্তেন তেন; শুশ্রূষুমীক্ষ্যোত্তমবুদ্ধিয়ুক্তম্
তার্ক্ষ্যং বিপ্রং ধর্ময়ুক্তং হিতং চ; সরস্বতী বাক্যমিদং বভাষে
184.5
সরস্বত্যুবাচ
যো ব্রহ্ম জানাতি যথাপ্রদেশং; স্বাধ্যায়নিত্যঃ শুচিরপ্রমত্তঃ
স বৈ পুরো দেবপুরস্য গন্তা; সহামরৈঃ প্রাপ্নুয়াত্প্রীতিয়োগম্
184.6
তত্র স্ম রম্যা বিপুলা বিশোকাঃ; সুপুষ্পিতাঃ পুষ্করিণ্যঃ সুপুণ্যাঃ
অকর্দমা মীনবত্যঃ সুতীর্থা; হিরণ্ময়ৈরাবৃতাঃ পুণ্ডরীকৈঃ
184.7
তাসাং তীরেষ্বাসতে পুণ্যকর্মা; মহীয়মানঃ পৃথগপ্সরোভিঃ
সুপুণ্যগন্ধাভিরলংকৃতাভি;র্হিরণ্যবর্ণাভিরতীব হৃষ্টঃ
184.8
পরং লোকং গোপ্রদাস্ত্বাপ্নুবন্তি; দত্ত্বানড্বাহং সূর্যলোকং ব্রজন্তি
বাসো দত্ত্বা চন্দ্রমসঃ স লোকং; দত্ত্বা হিরণ্যমমৃতত্বমেতি
184.9
ধেনুং দত্ত্বা সুব্রতাং সাধুদোহাং; কল্যাণবত্সামপলায়িনীং চ
যাবন্তি রোমাণি ভবন্তি তস্যা;স্তাবদ্বর্ষাণ্যশ্নুতে স্বর্গলোকম্
184.10
অনড্বাহং সুব্রতং যো দদাতি; হলস্য বোঢারমনন্তবীর্যম্
ধুরংধরং বলবন্তং যুবানং; প্রাপ্নোতি লোকান্দশ ধেনুদস্য
184.11
যঃ সপ্ত বর্ষাণি জুহোতি তার্ক্ষ্য; হব্যং ত্বগ্নৌ সুব্রতঃ সাধুশীলঃ
সপ্তাবরান্সপ্ত পূর্বান্পুনাতি; পিতামহানাত্মনঃ কর্মভিঃ স্বৈঃ
184.12
তার্ক্ষ্য উবাচ
কিমগ্নিহোত্রস্য ব্রতং পুরাণ;মাচক্ষ্ব মে পৃচ্ছতশ্চারুরূপে
ত্বয়ানুশিষ্টোঽহমিহাদ্য বিদ্যাং; যদগ্নিহোত্রস্য ব্রতং পুরাণম্
184.13
সরস্বত্যুবাচ
ন চাশুচির্নাপ্যনির্ণিক্তপাণি;র্নাব্রহ্মবিজ্জুহুয়ান্নাবিপশ্চিৎ
বুভুক্ষবঃ শুচিকামা হি দেবা; নাশ্রদ্দধানাদ্ধি হবির্জুষন্তি
184.14
নাশ্রোত্রিয়ং দেবহব্যে নিয়ুঞ্জ্যা;ন্মোঘং পরা সিঞ্চতি তাদৃশো হি
অপূর্ণমশ্রোত্রিয়মাহ তার্ক্ষ্য; ন বৈ তাদৃগ্জুহুয়াদগ্নিহোত্রম্
184.15
কৃশানুং যে জুহ্বতি শ্রদ্দধানাঃ; সত্যব্রতা হুতশিষ্টাশিনশ্চ
গবাং লোকং প্রাপ্য তে পুণ্যগন্ধং; পশ্যন্তি দেবং পরমং চাপি সত্যম্
184.16
তার্ক্ষ্য উবাচ
ক্ষেত্রজ্ঞভূতাং পরলোকভাবে; কর্মোদয়ে বুদ্ধিমতিপ্রবিষ্টাম্
প্রজ্ঞাং চ দেবীং সুভগে বিমৃশ্য; পৃচ্ছামি ত্বাং কা হ্যসি চারুরূপে
184.17
সরস্বত্যুবাচ
অগ্নিহোত্রাদহমভ্যাগতাস্মি; বিপ্রর্ষভাণাং সংশয়চ্ছেদনায়
ত্বত্সংয়োগাদহমেতদব্রুবং; ভাবে স্থিতা তথ্যমর্থং যথাবৎ
184.18
তার্ক্ষ্য উবাচ
ন হি ত্বয়া সদৃশী কাচিদস্তি; বিভ্রাজসে হ্যতিমাত্রং যথা শ্রীঃ
রূপং চ তে দিব্যমত্যন্তকান্তং; প্রজ্ঞাং চ দেবীং সুভগে বিভর্ষি
184.19
সরস্বত্যুবাচ
শ্রেষ্ঠানি যানি দ্বিপদাং বরিষ্ঠ; যজ্ঞেষু বিদ্বন্নুপপাদয়ন্তি
তৈরেবাহং সংপ্রবৃদ্ধা ভবামি; আপ্যায়িতা রূপবতী চ বিপ্র
184.20
যচ্চাপি দ্রব্যমুপয়ুজ্যতে হ; বানস্পত্যমায়সং পার্থিবং বা
দিব্যেন রূপেণ চ প্রজ্ঞয়া চ; তেনৈব সিদ্ধিরিতি বিদ্ধি বিদ্বন্
184.21
তার্ক্ষ্য উবাচ
ইদং শ্রেয়ঃ পরমং মন্যমানা; ব্যায়চ্ছন্তে মুনয়ঃ সংপ্রতীতাঃ
আচক্ষ্ব মে তং পরমং বিশোকং; মোক্ষং পরং যং প্রবিশন্তি ধীরাঃ
184.22
সরস্বত্যুবাচ
তং বৈ পরং বেদবিদঃ প্রপন্নাঃ; পরং পরেভ্যঃ প্রথিতং পুরাণম্
স্বাধ্যায়দানব্রতপুণ্যয়োগৈ;স্তপোধনা বীতশোকা বিমুক্তাঃ
184.23
তস্যাথ মধ্যে বেতসঃ পুণ্যগন্ধঃ; সহস্রশাখো বিমলো বিভাতি
তস্য মূলাত্সরিতঃ প্রস্রবন্তি; মধূদকপ্রস্রবণা রমণ্যঃ
184.24
শাখাং শাখাং মহানদ্যঃ সংয়ান্তি সিকতাসমাঃ
ধানাপূপা মাংসশাকাঃ সদা পায়সকর্দমাঃ
184.25
যস্মিন্নগ্নিমুখা দেবাঃ সেন্দ্রাঃ সহ মরুদ্গণৈঃ
ঈজিরে ক্রতুভিঃ শ্রেষ্ঠৈস্তত্পদং পরমং মুনে