Utshovঅধ্যায় 185
185.1
বৈশংপায়ন উবাচ
ততঃ স পাণ্ডবো ভূয়ো মার্কণ্ডেয়মুবাচ হ
কথয়স্বেহ চরিতং মনোর্বৈবস্বতস্য মে
185.2
মার্কণ্ডেয় উবাচ
বিবস্বতঃ সুতো রাজন্পরমর্ষিঃ প্রতাপবান্
বভূব নরশার্দূল প্রজাপতিসমদ্যুতিঃ
185.3
ওজসা তেজসা লক্ষ্ম্যা তপসা চ বিশেষতঃ
অতিচক্রাম পিতরং মনুঃ স্বং চ পিতামহম্
185.4
ঊর্ধ্ববাহুর্বিশালায়াং বদর্যাং স নরাধিপঃ
একপাদস্থিতস্তীব্রং চচার সুমহত্তপঃ
185.5
অবাক্শিরাস্তথা চাপি নেত্রৈরনিমিষৈর্দৃঢম্
সোঽতপ্যত তপো ঘোরং বর্ষাণাময়ুতং তদা
185.6
তং কদাচিত্তপস্যন্তমার্দ্রচীরজটাধরম্
বীরিণীতীরমাগম্য মত্স্যো বচনমব্রবীৎ
185.7
ভগবন্ক্ষুদ্রমত্স্যোঽস্মি বলবদ্ভ্যো ভয়ং মম
মত্স্যেভ্যো হি ততো মাং ত্বং ত্রাতুমর্হসি সুব্রত
185.8
দুর্বলং বলবন্তো হি মত্স্যং মত্স্যা বিশেষতঃ
ভক্ষয়ন্তি যথা বৃত্তির্বিহিতা নঃ সনাতনী
185.9
তস্মাদ্ভয়ৌঘান্মহতো মজ্জন্তং মাং বিশেষতঃ
ত্রাতুমর্হসি কর্তাস্মি কৃতে প্রতিকৃতং তব
185.10
স মত্স্যবচনং শ্রুত্বা কৃপয়াভিপরিপ্লুতঃ
মনুর্বৈবস্বতোঽগৃহ্ণাত্তং মত্স্যং পাণিনা স্বয়ম্
185.11
উদকান্তমুপানীয় মত্স্যং বৈবস্বতো মনুঃ
অলিঞ্জরে প্রাক্ষিপত্স চন্দ্রাংশুসদৃশপ্রভম্
185.12
স তত্র ববৃধে রাজন্মত্স্যঃ পরমসত্কৃতঃ
পুত্রবচ্চাকরোত্তস্মিন্মনুর্ভাবং বিশেষতঃ
185.13
অথ কালেন মহতা স মত্স্যঃ সুমহানভূৎ
অলিঞ্জরে জলে চৈব নাসৌ সমভবত্কিল
185.14
অথ মত্স্যো মনুং দৃষ্ট্বা পুনরেবাভ্যভাষত
ভগবন্সাধু মেঽদ্যান্যত্স্থানং সংপ্রতিপাদয়
185.15
উদ্ধৃত্যালিঞ্জরাত্তস্মাত্ততঃ স ভগবান্মুনিঃ
তং মত্স্যমনয়দ্বাপীং মহতীং স মনুস্তদা
185.16
তত্র তং প্রাক্ষিপচ্চাপি মনুঃ পরপুরংজয়
অথাবর্ধত মত্স্যঃ স পুনর্বর্ষগণান্বহূন্
185.17
দ্বিয়োজনায়তা বাপী বিস্তৃতা চাপি যোজনম্
তস্যাং নাসৌ সমভবন্মত্স্যো রাজীবলোচন
বিচেষ্টিতুং বা কৌন্তেয় মত্স্যো বাপ্যাং বিশাং পতে
185.18
মনুং মত্স্যস্ততো দৃষ্ট্বা পুনরেবাভ্যভাষত
নয় মাং ভগবন্সাধো সমুদ্রমহিষীং প্রভো
গঙ্গাং তত্র নিবত্স্যামি যথা বা তাত মন্যসে
185.19
এবমুক্তো মনুর্মত্স্যমনয়দ্ভগবান্বশী
নদীং গঙ্গাং তত্র চৈনং স্বয়ং প্রাক্ষিপদচ্যুতঃ
185.20
স তত্র ববৃধে মত্স্যঃ কিংচিত্কালমরিংদম
ততঃ পুনর্মনুং দৃষ্ট্বা মত্স্যো বচনমব্রবীৎ
185.21
গঙ্গায়াং হি ন শক্নোমি বৃহত্ত্বাচ্চেষ্টিতুং প্রভো
সমুদ্রং নয় মামাশু প্রসীদ ভগবন্নিতি
185.22
উদ্ধৃত্য গঙ্গাসলিলাত্ততো মত্স্যং মনুঃ স্বয়ম্
সমুদ্রমনয়ত্পার্থ তত্র চৈনমবাসৃজৎ
185.23
সুমহানপি মত্স্যঃ সন্স মনোর্মনসস্তদা
আসীদ্যথেষ্টহার্যশ্চ স্পর্শগন্ধসুখশ্চ বৈ
185.24
যদা সমুদ্রে প্রক্ষিপ্তঃ স মত্স্যো মনুনা তদা
তত এনমিদং বাক্যং স্ময়মান ইবাব্রবীৎ
185.25
ভগবন্কৃতা হি মে রক্ষা ত্বয়া সর্বা বিশেষতঃ
প্রাপ্তকালং তু যত্কার্যং ত্বয়া তচ্ছ্রূয়তাং মম
185.26
অচিরাদ্ভগবন্ভৌমমিদং স্থাবরজঙ্গমম্
সর্বমেব মহাভাগ প্রলয়ং বৈ গমিষ্যতি
185.27
সংপ্রক্ষালনকালোঽয়ং লোকানাং সমুপস্থিতঃ
তস্মাত্ত্বাং বোধয়াম্যদ্য যত্তে হিতমনুত্তমম্
185.28
ত্রসানাং স্থাবরাণাং চ যচ্চেঙ্গং যচ্চ নেঙ্গতি
তস্য সর্বস্য সংপ্রাপ্তঃ কালঃ পরমদারুণঃ
185.29
নৌশ্চ কারয়িতব্যা তে দৃঢা যুক্তবটাকরা
তত্র সপ্তর্ষিভিঃ সার্ধমারুহেথা মহামুনে
185.30
বীজানি চৈব সর্বাণি যথোক্তানি ময়া পুরা
তস্যামারোহয়ের্নাবি সুসংগুপ্তানি ভাগশঃ
185.31
নৌস্থশ্চ মাং প্রতীক্ষেথাস্তদা মুনিজনপ্রিয়
আগমিষ্যাম্যহং শৃঙ্গী বিজ্ঞেয়স্তেন তাপস
185.32
এবমেতত্ত্বয়া কার্যমাপৃষ্টোঽসি ব্রজাম্যহম্
নাতিশঙ্ক্যমিদং চাপি বচনং তে মমাভিভো
185.33
এবং করিষ্য ইতি তং স মত্স্যং প্রত্যভাষত
জগ্মতুশ্চ যথাকামমনুজ্ঞাপ্য পরস্পরম্
185.34
ততো মনুর্মহারাজ যথোক্তং মত্স্যকেন হ
বীজান্যাদায় সর্বাণি সাগরং পুপ্লুবে তদা
নাবা তু শুভয়া বীর মহোর্মিণমরিংদম
185.35
চিন্তয়ামাস চ মনুস্তং মত্স্যং পৃথিবীপতে
স চ তচ্চিন্তিতং জ্ঞাত্বা মত্স্যঃ পরপুরংজয়
শৃঙ্গী তত্রাজগামাশু তদা ভরতসত্তম
185.36
তং দৃষ্ট্বা মনুজেন্দ্রেন্দ্র মনুর্মত্স্যং জলার্ণবে
শৃঙ্গিণং তং যথোক্তেন রূপেণাদ্রিমিবোচ্ছ্রিতম্
185.37
বটাকরময়ং পাশমথ মত্স্যস্য মূর্ধনি
মনুর্মনুজশার্দূল তস্মিঞ্শৃঙ্গে ন্যবেশয়ৎ
185.38
সংয়তস্তেন পাশেন মত্স্যঃ পরপুরংজয়
বেগেন মহতা নাবং প্রাকর্ষল্লবণাম্ভসি
185.39
স ততার তয়া নাবা সমুদ্রং মনুজেশ্বর
নৃত্যমানমিবোর্মীভির্গর্জমানমিবাম্ভসা
185.40
ক্ষোভ্যমাণা মহাবাতৈঃ সা নৌস্তস্মিন্মহোদধৌ
ঘূর্ণতে চপলেব স্ত্রী মত্তা পরপুরংজয়
185.41
নৈব ভূমির্ন চ দিশঃ প্রদিশো বা চকাশিরে
সর্বমাম্ভসমেবাসীত্খং দ্যৌশ্চ নরপুংগব
185.42
এবংভূতে তদা লোকে সংকুলে ভরতর্ষভ
অদৃশ্যন্ত সপ্তর্ষয়ো মনুর্মত্স্যঃ সহৈব হ
185.43
এবং বহূন্বর্ষগণাংস্তাং নাবং সোঽথ মত্স্যকঃ
চকর্ষাতন্দ্রিতো রাজংস্তস্মিন্সলিলসংচয়ে
185.44
ততো হিমবতঃ শৃঙ্গং যত্পরং পুরুষর্ষভ
তত্রাকর্ষত্ততো নাবং স মত্স্যঃ কুরুনন্দন
185.45
ততোঽব্রবীত্তদা মত্স্যস্তানৃষীন্প্রহসঞ্শনৈঃ
অস্মিন্হিমবতঃ শৃঙ্গে নাবং বধ্নীত মাচিরম্
185.46
সা বদ্ধা তত্র তৈস্তূর্ণমৃষিভির্ভরতর্ষভ
নৌর্মত্স্যস্য বচঃ শ্রুত্বা শৃঙ্গে হিমবতস্তদা
185.47
তচ্চ নৌবন্ধনং নাম শৃঙ্গং হিমবতঃ পরম্
খ্যাতমদ্যাপি কৌন্তেয় তদ্বিদ্ধি ভরতর্ষভ
185.48
অথাব্রবীদনিমিষস্তানৃষীন্সহিতাংস্তদা
অহং প্রজাপতির্ব্রহ্মা মত্পরং নাধিগম্যতে
মত্স্যরূপেণ যূয়ং চ ময়াস্মান্মোক্ষিতা ভয়াৎ
185.49
মনুনা চ প্রজাঃ সর্বাঃ সদেবাসুরমানবাঃ
স্রষ্টব্যাঃ সর্বলোকাশ্চ যচ্চেঙ্গং যচ্চ নেঙ্গতি
185.50
তপসা চাতিতীব্রেণ প্রতিভাস্য ভবিষ্যতি
মত্প্রসাদাত্প্রজাসর্গে ন চ মোহং গমিষ্যতি
185.51
ইত্যুক্ত্বা বচনং মত্স্যঃ ক্ষণেনাদর্শনং গতঃ
স্রষ্টুকামঃ প্রজাশ্চাপি মনুর্বৈবস্বতঃ স্বয়ম্
প্রমূঢোঽভূত্প্রজাসর্গে তপস্তেপে মহত্ততঃ
185.52
তপসা মহতা যুক্তঃ সোঽথ স্রষ্টুং প্রচক্রমে
সর্বাঃ প্রজা মনুঃ সাক্ষাদ্যথাবদ্ভরতর্ষভ
185.53
ইত্যেতন্মাত্স্যকং নাম পুরাণং পরিকীর্তিতম্
আখ্যানমিদমাখ্যাতং সর্বপাপহরং ময়া
185.54
য ইদং শৃণুয়ান্নিত্যং মনোশ্চরিতমাদিতঃ
স সুখী সর্বসিদ্ধার্থঃ স্বর্গলোকমিয়ান্নরঃ