Utshovঅধ্যায় 186
186.1
বৈশংপায়ন উবাচ
ততঃ স পুনরেবাথ মার্কণ্ডেয়ং যশস্বিনম্
পপ্রচ্ছ বিনয়োপেতো ধর্মরাজো যুধিষ্ঠিরঃ
186.2
নৈকে যুগসহস্রান্তাস্ত্বয়া দৃষ্টা মহামুনে
ন চাপীহ সমঃ কশ্চিদায়ুষা তব বিদ্যতে
বর্জয়িত্বা মহাত্মানং ব্রাহ্মণং পরমেষ্ঠিনম্
186.3
অনন্তরিক্ষে লোকেঽস্মিন্দেবদানববর্জিতে
ত্বমেব প্রলয়ে বিপ্র ব্রহ্মাণমুপতিষ্ঠসি
186.4
প্রলয়ে চাপি নির্বৃত্তে প্রবুদ্ধে চ পিতামহে
ত্বমেব সৃজ্যমানানি ভূতানীহ প্রপশ্যসি
186.5
চতুর্বিধানি বিপ্রর্ষে যথাবত্পরমেষ্ঠিনা
বায়ুভূতা দিশঃ কৃত্বা বিক্ষিপ্যাপস্ততস্ততঃ
186.6
ত্বয়া লোকগুরুঃ সাক্ষাত্সর্বলোকপিতামহঃ
আরাধিতো দ্বিজশ্রেষ্ঠ তত্পরেণ সমাধিনা
186.7
তস্মাত্সর্বান্তকো মৃত্যুর্জরা বা দেহনাশিনী
ন ত্বা বিশতি বিপ্রর্ষে প্রসাদাত্পরমেষ্ঠিনঃ
186.8
যদা নৈব রবির্নাগ্নির্ন বায়ুর্ন চ চন্দ্রমাঃ
নৈবান্তরিক্ষং নৈবোর্বী শেষং ভবতি কিংচন
186.9
তস্মিন্নেকার্ণবে লোকে নষ্টে স্থাবরজঙ্গমে
নষ্টে দেবাসুরগণে সমুত্সন্নমহোরগে
186.10
শয়ানমমিতাত্মানং পদ্মে পদ্মনিকেতনম্
ত্বমেকঃ সর্বভূতেশং ব্রহ্মাণমুপতিষ্ঠসি
186.11
এতত্প্রত্যক্ষতঃ সর্বং পূর্ববৃত্তং দ্বিজোত্তম
তস্মাদিচ্ছামহে শ্রোতুং সর্বহেত্বাত্মিকাং কথাম্
186.12
অনুভূতং হি বহুশস্ত্বয়ৈকেন দ্বিজোত্তম
ন তেঽস্ত্যবিদিতং কিংচিত্সর্বলোকেষু নিত্যদা
186.13
মার্কণ্ডেয় উবাচ
হন্ত তে কথয়িষ্যামি নমস্কৃত্বা স্বয়ম্ভুবে
পুরুষায় পুরাণায় শাশ্বতায়াব্যয়ায় চ
186.14
য এষ পৃথুদীর্ঘাক্ষঃ পীতবাসা জনার্দনঃ
এষ কর্তা বিকর্তা চ সর্বভাবনভূতকৃৎ
186.15
অচিন্ত্যং মহদাশ্চর্যং পবিত্রমপি চোত্তমম্
অনাদিনিধনং ভূতং বিশ্বমক্ষয়মব্যয়ম্
186.16
এষ কর্তা ন ক্রিয়তে কারণং চাপি পৌরুষে
যো হ্যেনং পুরুষং বেত্তি দেবা অপি ন তং বিদুঃ
186.17
সর্বমাশ্চর্যমেবৈতন্নির্বৃত্তং রাজসত্তম
আদিতো মনুজব্যাঘ্র কৃত্স্নস্য জগতঃ ক্ষয়ে
186.18
চত্বার্যাহুঃ সহস্রাণি বর্ষাণাং তত্কৃতং যুগম্
তস্য তাবচ্ছতী সংধ্যা সংধ্যাংশশ্চ ততঃ পরম্
186.19
ত্রীণি বর্ষসহস্রাণি ত্রেতায়ুগমিহোচ্যতে
তস্য তাবচ্ছতী সংধ্যা সংধ্যাংশশ্চ ততঃ পরম্
186.20
তথা বর্ষসহস্রে দ্বে দ্বাপরং পরিমাণতঃ
তস্যাপি দ্বিশতী সংধ্যা সংধ্যাংশশ্চ ততঃ পরম্
186.21
সহস্রমেকং বর্ষাণাং ততঃ কলিয়ুগং স্মৃতম্
তস্য বর্ষশতং সংধ্যা সংধ্যাংশশ্চ ততঃ পরম্
সংধ্যাসংধ্যাংশয়োস্তুল্যং প্রমাণমুপধারয়
186.22
ক্ষীণে কলিয়ুগে চৈব প্রবর্ততি কৃতং যুগম্
এষা দ্বাদশসাহস্রী যুগাখ্যা পরিকীর্তিতা
186.23
এতত্সহস্রপর্যন্তমহো ব্রাহ্মমুদাহৃতম্
বিশ্বং হি ব্রহ্মভবনে সর্বশঃ পরিবর্ততে
লোকানাং মনুজব্যাঘ্র প্রলয়ং তং বিদুর্বুধাঃ
186.24
অল্পাবশিষ্টে তু তদা যুগান্তে ভরতর্ষভ
সহস্রান্তে নরাঃ সর্বে প্রায়শোঽনৃতবাদিনঃ
186.25
যজ্ঞপ্রতিনিধিঃ পার্থ দানপ্রতিনিধিস্তথা
ব্রতপ্রতিনিধিশ্চৈব তস্মিন্কালে প্রবর্ততে
186.26
ব্রাহ্মণাঃ শূদ্রকর্মাণস্তথা শূদ্রা ধনার্জকাঃ
ক্ষত্রধর্মেণ বাপ্যত্র বর্তয়ন্তি গতে যুগে
186.27
নিবৃত্তয়জ্ঞস্বাধ্যায়াঃ পিণ্ডোদকবিবর্জিতাঃ
ব্রাহ্মণাঃ সর্বভক্ষাশ্চ ভবিষ্যন্তি কলৌ যুগে
186.28
অজপা ব্রাহ্মণাস্তাত শূদ্রা জপপরায়ণাঃ
বিপরীতে তদা লোকে পূর্বরূপং ক্ষয়স্য তৎ
186.29
বহবো ম্লেচ্ছরাজানঃ পৃথিব্যাং মনুজাধিপ
মিথ্যানুশাসিনঃ পাপা মৃষাবাদপরায়ণাঃ
186.30
আন্ধ্রাঃ শকাঃ পুলিন্দাশ্চ যবনাশ্চ নরাধিপাঃ
কাম্বোজা ঔর্ণিকাঃ শূদ্রাস্তথাভীরা নরোত্তম
186.31
ন তদা ব্রাহ্মণঃ কশ্চিত্স্বধর্মমুপজীবতি
ক্ষত্রিয়া অপি বৈশ্যাশ্চ বিকর্মস্থা নরাধিপ
186.32
অল্পায়ুষঃ স্বল্পবলা অল্পতেজঃপরাক্রমাঃ
অল্পদেহাল্পসারাশ্চ তথা সত্যাল্পভাষিণঃ
186.33
বহুশূন্যা জনপদা মৃগব্যালাবৃতা দিশঃ
যুগান্তে সমনুপ্রাপ্তে বৃথা চ ব্রহ্মচারিণঃ
ভোবাদিনস্তথা শূদ্রা ব্রাহ্মণাশ্চার্যবাদিনঃ
186.34
যুগান্তে মনুজব্যাঘ্র ভবন্তি বহুজন্তবঃ
ন তথা ঘ্রাণয়ুক্তাশ্চ সর্বগন্ধা বিশাং পতে
রসাশ্চ মনুজব্যাঘ্র ন তথা স্বাদুয়োগিনঃ
186.35
বহুপ্রজা হ্রস্বদেহাঃ শীলাচারবিবর্জিতাঃ
মুখেভগাঃ স্ত্রিয়ো রাজন্ভবিষ্যন্তি যুগক্ষয়ে
186.36
অট্টশূলা জনপদাঃ শিবশূলাশ্চতুষ্পথাঃ
কেশশূলাঃ স্ত্রিয়ো রাজন্ভবিষ্যন্তি যুগক্ষয়ে
186.37
অল্পক্ষীরাস্তথা গাবো ভবিষ্যন্তি জনাধিপ
অল্পপুষ্পফলাশ্চাপি পাদপা বহুবায়সাঃ
186.38
ব্রহ্মবধ্যাবলিপ্তানাং তথা মিথ্যাভিশংসিনাম্
নৃপাণাং পৃথিবীপাল প্রতিগৃহ্ণন্তি বৈ দ্বিজাঃ
186.39
লোভমোহপরীতাশ্চ মিথ্যাধর্মধ্বজাবৃতাঃ
ভিক্ষার্থং পৃথিবীপাল চঞ্চূর্যন্তে দ্বিজৈর্দিশঃ
186.40
করভারভয়াত্পুংসো গৃহস্থাঃ পরিমোষকাঃ
মুনিচ্ছদ্মাকৃতিচ্ছন্না বাণিজ্যমুপজীবতে
186.41
মিথ্যা চ নখরোমাণি ধারয়ন্তি নরাস্তদা
অর্থলোভান্নরব্যাঘ্র বৃথা চ ব্রহ্মচারিণঃ
186.42
আশ্রমেষু বৃথাচারাঃ পানপা গুরুতল্পগাঃ
ঐহলৌকিকমীহন্তে মাংসশোণিতবর্ধনম্
186.43
বহুপাষণ্ডসংকীর্ণাঃ পরান্নগুণবাদিনঃ
আশ্রমা মনুজব্যাঘ্র ন ভবন্তি যুগক্ষয়ে
186.44
যথর্তুবর্ষী ভগবান্ন তথা পাকশাসনঃ
ন তদা সর্ববীজানি সম্যগ্রোহন্তি ভারত
অধর্মফলমত্যর্থং তদা ভবতি চানঘ
186.45
তথা চ পৃথিবীপাল যো ভবেদ্ধর্মসংয়ুতঃ
অল্পায়ুঃ স হি মন্তব্যো ন হি ধর্মোঽস্তি কশ্চন
186.46
ভূয়িষ্ঠং কূটমানৈশ্চ পণ্যং বিক্রীণতে জনাঃ
বণিজশ্চ নরব্যাঘ্র বহুমায়া ভবন্ত্যুত
186.47
ধর্মিষ্ঠাঃ পরিহীয়ন্তে পাপীয়ান্বর্ধতে জনঃ
ধর্মস্য বলহানিঃ স্যাদধর্মশ্চ বলী তথা
186.48
অল্পায়ুষো দরিদ্রাশ্চ ধর্মিষ্ঠা মানবাস্তদা
দীর্ঘায়ুষঃ সমৃদ্ধাশ্চ বিধর্মাণো যুগক্ষয়ে
186.49
অধর্মিষ্ঠৈরুপায়ৈশ্চ প্রজা ব্যবহরন্ত্যুত
সংচয়েনাপি চাল্পেন ভবন্ত্যাঢ্যা মদান্বিতাঃ
186.50
ধনং বিশ্বাসতো ন্যস্তং মিথো ভূয়িষ্ঠশো নরাঃ
হর্তুং ব্যবসিতা রাজন্মায়াচারসমন্বিতাঃ
186.51
পুরুষাদানি সত্ত্বানি পক্ষিণোঽথ মৃগাস্তথা
নগরাণাং বিহারেষু চৈত্যেষ্বপি চ শেরতে
186.52
সপ্তবর্ষাষ্টবর্ষাশ্চ স্ত্রিয়ো গর্ভধরা নৃপ
দশদ্বাদশবর্ষাণাং পুংসাং পুত্রঃ প্রজায়তে
186.53
ভবন্তি ষোডশে বর্ষে নরাঃ পলিতিনস্তথা
আয়ুঃক্ষয়ো মনুষ্যাণাং ক্ষিপ্রমেব প্রপদ্যতে
186.54
ক্ষীণে যুগে মহারাজ তরুণা বৃদ্ধশীলিনঃ
তরুণানাং চ যচ্ছীলং তদ্বৃদ্ধেষু প্রজায়তে
186.55
বিপরীতাস্তদা নার্যো বঞ্চয়িত্বা রহঃ পতীন্
ব্যুচ্চরন্ত্যপি দুঃশীলা দাসৈঃ পশুভিরেব চ
186.56
তস্মিন্যুগসহস্রান্তে সংপ্রাপ্তে চায়ুষঃ ক্ষয়ে
অনাবৃষ্টির্মহারাজ জায়তে বহুবার্ষিকী
186.57
ততস্তান্যল্পসারাণি সত্ত্বানি ক্ষুধিতানি চ
প্রলয়ং যান্তি ভূয়িষ্ঠং পৃথিব্যাং পৃথিবীপতে
186.58
ততো দিনকরৈর্দীপ্তৈঃ সপ্তভির্মনুজাধিপ
পীয়তে সলিলং সর্বং সমুদ্রেষু সরিত্সু চ
186.59
যচ্চ কাষ্ঠং তৃণং চাপি শুষ্কং চার্দ্রং চ ভারত
সর্বং তদ্ভস্মসাদ্ভূতং দৃশ্যতে ভরতর্ষভ
186.60
ততঃ সংবর্তকো বহ্নির্বায়ুনা সহ ভারত
লোকমাবিশতে পূর্বমাদিত্যৈরুপশোষিতম্
186.61
ততঃ স পৃথিবীং ভিত্ত্বা সমাবিশ্য রসাতলম্
দেবদানবয়ক্ষাণাং ভয়ং জনয়তে মহৎ
186.62
নির্দহন্নাগলোকং চ যচ্চ কিংচিত্ক্ষিতাবিহ
অধস্তাত্পৃথিবীপাল সর্বং নাশয়তে ক্ষণাৎ
186.63
ততো যোজনবিংশানাং সহস্রাণি শতানি চ
নির্দহত্যশিবো বায়ুঃ স চ সংবর্তকোঽনলঃ
186.64
সদেবাসুরগন্ধর্বং সয়ক্ষোরগরাক্ষসম্
ততো দহতি দীপ্তঃ স সর্বমেব জগদ্বিভুঃ
186.65
ততো গজকুলপ্রখ্যাস্তডিন্মালাবিভূষিতাঃ
উত্তিষ্ঠন্তি মহামেঘা নভস্যদ্ভুতদর্শনাঃ
186.66
কেচিন্নীলোত্পলশ্যামাঃ কেচিত্কুমুদসংনিভাঃ
কেচিত্কিঞ্জল্কসংকাশাঃ কেচিত্পীতাঃ পয়োধরাঃ
186.67
কেচিদ্ধারিদ্রসংকাশাঃ কাকাণ্ডকনিভাস্তথা
কেচিত্কমলপত্রাভাঃ কেচিদ্ধিঙ্গুলকপ্রভাঃ
186.68
কেচিত্পুরবরাকারাঃ কেচিদ্গজকুলোপমাঃ
কেচিদঞ্জনসংকাশাঃ কেচিন্মকরসংস্থিতাঃ
বিদ্যুন্মালাপিনদ্ধাঙ্গাঃ সমুত্তিষ্ঠন্তি বৈ ঘনাঃ
186.69
ঘোররূপা মহারাজ ঘোরস্বননিনাদিতাঃ
ততো জলধরাঃ সর্বে ব্যাপ্নুবন্তি নভস্তলম্
186.70
তৈরিয়ং পৃথিবী সর্বা সপর্বতবনাকরা
আপূর্যতে মহারাজ সলিলৌঘপরিপ্লুতা
186.71
ততস্তে জলদা ঘোরা রাবিণঃ পুরুষর্ষভ
সর্বতঃ প্লাবয়ন্ত্যাশু চোদিতাঃ পরমেষ্ঠিনা
186.72
বর্ষমাণা মহত্তোয়ং পূরয়ন্তো বসুংধরাম্
সুঘোরমশিবং রৌদ্রং নাশয়ন্তি চ পাবকম্
186.73
ততো দ্বাদশ বর্ষাণি পয়োদাস্ত উপপ্লবে
ধারাভিঃ পূরয়ন্তো বৈ চোদ্যমানা মহাত্মনা
186.74
ততঃ সমুদ্রঃ স্বাং বেলামতিক্রামতি ভারত
পর্বতাশ্চ বিশীর্যন্তে মহী চাপি বিশীর্যতে
186.75
সর্বতঃ সহসা ভ্রান্তাস্তে পয়োদা নভস্তলম্
সংবেষ্টয়িত্বা নশ্যন্তি বায়ুবেগপরাহতাঃ
186.76
ততস্তং মারুতং ঘোরং স্বয়ম্ভূর্মনুজাধিপ
আদিপদ্মালয়ো দেবঃ পীত্বা স্বপিতি ভারত
186.77
তস্মিন্নেকার্ণবে ঘোরে নষ্টে স্থাবরজঙ্গমে
নষ্টে দেবাসুরগণে যক্ষরাক্ষসবর্জিতে
186.78
নির্মনুষ্যে মহীপাল নিঃশ্বাপদমহীরুহে
অনন্তরিক্ষে লোকেঽস্মিন্ভ্রমাম্যেকোঽহমাদৃতঃ
186.79
একার্ণবে জলে ঘোরে বিচরন্পার্থিবোত্তম
অপশ্যন্সর্বভূতানি বৈক্লব্যমগমং পরম্
186.80
ততঃ সুদীর্ঘং গত্বা তু প্লবমানো নরাধিপ
শ্রান্তঃ ক্বচিন্ন শরণং লভাম্যহমতন্দ্রিতঃ
186.81
ততঃ কদাচিত্পশ্যামি তস্মিন্সলিলসংপ্লবে
ন্যগ্রোধং সুমহান্তং বৈ বিশালং পৃথিবীপতে
186.82
শাখায়াং তস্য বৃক্ষস্য বিস্তীর্ণায়াং নরাধিপ
পর্যঙ্কে পৃথিবীপাল দিব্যাস্তরণসংস্তৃতে
186.83
উপবিষ্টং মহারাজ পূর্ণেন্দুসদৃশাননম্
ফুল্লপদ্মবিশালাক্ষং বালং পশ্যামি ভারত
186.84
ততো মে পৃথিবীপাল বিস্ময়ঃ সুমহানভূৎ
কথং ত্বয়ং শিশুঃ শেতে লোকে নাশমুপাগতে
186.85
তপসা চিন্তয়ংশ্চাপি তং শিশুং নোপলক্ষয়ে
ভূতং ভব্যং ভবিষ্যচ্চ জানন্নপি নরাধিপ
186.86
অতসীপুষ্পবর্ণাভঃ শ্রীবত্সকৃতলক্ষণঃ
সাক্ষাল্লক্ষ্ম্যা ইবাবাসঃ স তদা প্রতিভাতি মে
186.87
ততো মামব্রবীদ্বালঃ স পদ্মনিভলোচনঃ
শ্রীবত্সধারী দ্যুতিমান্বাক্যং শ্রুতিসুখাবহম্
186.88
জানামি ত্বা পরিশ্রান্তং তাত বিশ্রামকাঙ্ক্ষিণম্
মার্কণ্ডেয় ইহাস্স্ব ত্বং যাবদিচ্ছসি ভার্গব
186.89
অভ্যন্তরং শরীরং মে প্রবিশ্য মুনিসত্তম
আস্স্ব ভো বিহিতো বাসঃ প্রসাদস্তে কৃতো ময়া
186.90
ততো বালেন তেনৈবমুক্তস্যাসীত্তদা মম
নির্বেদো জীবিতে দীর্ঘে মনুষ্যত্বে চ ভারত
186.91
ততো বালেন তেনাস্যং সহসা বিবৃতং কৃতম্
তস্যাহমবশো বক্ত্রং দৈবয়োগাত্প্রবেশিতঃ
186.92
ততঃ প্রবিষ্টস্তত্কুক্ষিং সহসা মনুজাধিপ
সরাষ্ট্রনগরাকীর্ণাং কৃত্স্নাং পশ্যামি মেদিনীম্
186.93
গঙ্গাং শতদ্রুং সীতাং চ যমুনামথ কৌশিকীম্
চর্মণ্বতীং বেত্রবতীং চন্দ্রভাগাং সরস্বতীম্
186.94
সিন্ধুং চৈব বিপাশাং চ নদীং গোদাবরীমপি
বস্বোকসারাং নলিনীং নর্মদাং চৈব ভারত
186.95
নদীং তাম্রাং চ বেণ্ণাং চ পুণ্যতোয়াং শুভাবহাম্
সুবেণাং কৃষ্ণবেণাং চ ইরামাং চ মহানদীম্
শোণং চ পুরুষব্যাঘ্র বিশল্যাং কম্পুনামপি
186.96
এতাশ্চান্যাশ্চ নদ্যোঽহং পৃথিব্যাং যা নরোত্তম
পরিক্রামন্প্রপশ্যামি তস্য কুক্ষৌ মহাত্মনঃ
186.97
ততঃ সমুদ্রং পশ্যামি যাদোগণনিষেবিতম্
রত্নাকরমমিত্রঘ্ন নিধানং পয়সো মহৎ
186.98
ততঃ পশ্যামি গগনং চন্দ্রসূর্যবিরাজিতম্
জাজ্বল্যমানং তেজোভিঃ পাবকার্কসমপ্রভৈঃ
পশ্যামি চ মহীং রাজন্কাননৈরুপশোভিতাম্
186.99
যজন্তে হি তদা রাজন্ব্রাহ্মণা বহুভিঃ সবৈঃ
ক্ষত্রিয়াশ্চ প্রবর্তন্তে সর্ববর্ণানুরঞ্জনে
186.100
বৈশ্যাঃ কৃষিং যথান্যায়ং কারয়ন্তি নরাধিপ
শুশ্রূষায়াং চ নিরতা দ্বিজানাং বৃষলাস্তথা
186.101
ততঃ পরিপতন্রাজংস্তস্য কুক্ষৌ মহাত্মনঃ
হিমবন্তং চ পশ্যামি হেমকূটং চ পর্বতম্
186.102
নিষধং চাপি পশ্যামি শ্বেতং চ রজতাচিতম্
পশ্যামি চ মহীপাল পর্বতং গন্ধমাদনম্
186.103
মন্দরং মনুজব্যাঘ্র নীলং চাপি মহাগিরিম্
পশ্যামি চ মহারাজ মেরুং কনকপর্বতম্
186.104
মহেন্দ্রং চৈব পশ্যামি বিন্ধ্যং চ গিরিমুত্তমম্
মলয়ং চাপি পশ্যামি পারিয়াত্রং চ পর্বতম্
186.105
এতে চান্যে চ বহবো যাবন্তঃ পৃথিবীধরাঃ
তস্যোদরে ময়া দৃষ্টাঃ সর্বরত্নবিভূষিতাঃ
186.106
সিংহান্ব্যাঘ্রান্বরাহাংশ্চ নাগাংশ্চ মনুজাধিপ
পৃথিব্যাং যানি চান্যানি সত্ত্বানি জগতীপতে
তানি সর্বাণ্যহং তত্র পশ্যন্পর্যচরং তদা
186.107
কুক্ষৌ তস্য নরব্যাঘ্র প্রবিষ্টঃ সংচরন্দিশঃ
শক্রাদীংশ্চাপি পশ্যামি কৃত্স্নান্দেবগণাংস্তথা
186.108
গন্ধর্বাপ্সরসো যক্ষানৃষীংশ্চৈব মহীপতে
দৈত্যদানবসংঘাংশ্চ কালেয়াংশ্চ নরাধিপ
সিংহিকাতনয়াংশ্চাপি যে চান্যে সুরশত্রবঃ
186.109
যচ্চ কিংচিন্ময়া লোকে দৃষ্টং স্থাবরজঙ্গমম্
তদপশ্যমহং সর্বং তস্য কুক্ষৌ মহাত্মনঃ
ফলাহারঃ প্রবিচরন্কৃত্স্নং জগদিদং তদা
186.110
অন্তঃ শরীরে তস্যাহং বর্ষাণামধিকং শতম্
ন চ পশ্যামি তস্যাহমন্তং দেহস্য কুত্রচিৎ
186.111
সততং ধাবমানশ্চ চিন্তয়ানো বিশাং পতে
আসাদয়ামি নৈবান্তং তস্য রাজন্মহাত্মনঃ
186.112
ততস্তমেব শরণং গতোঽস্মি বিধিবত্তদা
বরেণ্যং বরদং দেবং মনসা কর্মণৈব চ
186.113
ততোঽহং সহসা রাজন্বায়ুবেগেন নিঃসৃতঃ
মহাত্মনো মুখাত্তস্য বিবৃতাত্পুরুষোত্তম
186.114
ততস্তস্যৈব শাখায়াং ন্যগ্রোধস্য বিশাং পতে
আস্তে মনুজশার্দূল কৃত্স্নমাদায় বৈ জগৎ
186.115
তেনৈব বালবেষেণ শ্রীবত্সকৃতলক্ষণম্
আসীনং তং নরব্যাঘ্র পশ্যাম্যমিততেজসম্
186.116
ততো মামব্রবীদ্বীর স বালঃ প্রহসন্নিব
শ্রীবত্সধারী দ্যুতিমান্পীতবাসা মহাদ্যুতিঃ
186.117
অপীদানীং শরীরেঽস্মিন্মামকে মুনিসত্তম
উষিতস্ত্বং সুবিশ্রান্তো মার্কণ্ডেয় ব্রবীহি মে
186.118
মুহূর্তাদথ মে দৃষ্টিঃ প্রাদুর্ভূতা পুনর্নবা
যয়া নির্মুক্তমাত্মানমপশ্যং লব্ধচেতসম্
186.119
তস্য তাম্রতলৌ তাত চরণৌ সুপ্রতিষ্ঠিতৌ
সুজাতৌ মৃদুরক্তাভিরঙ্গুলীভিরলংকৃতৌ
186.120
প্রয়তেন ময়া মূর্ধ্না গৃহীত্বা হ্যভিবন্দিতৌ
দৃষ্ট্বাপরিমিতং তস্য প্রভাবমমিতৌজসঃ
186.121
বিনয়েনাঞ্জলিং কৃত্বা প্রয়ত্নেনোপগম্য চ
দৃষ্টো ময়া স ভূতাত্মা দেবঃ কমললোচনঃ
186.122
তমহং প্রাঞ্জলির্ভূত্বা নমস্কৃত্যেদমব্রুবম্
জ্ঞাতুমিচ্ছামি দেব ত্বাং মায়াং চেমাং তবোত্তমাম্
186.123
আস্যেনানুপ্রবিষ্টোঽহং শরীরং ভগবংস্তব
দৃষ্টবানখিলাঁল্লোকান্সমস্তাঞ্জঠরে তব
186.124
তব দেব শরীরস্থা দেবদানবরাক্ষসাঃ
যক্ষগন্ধর্বনাগাশ্চ জগত্স্থাবরজঙ্গমম্
186.125
ত্বত্প্রসাদাচ্চ মে দেব স্মৃতির্ন পরিহীয়তে
দ্রুতমন্তঃ শরীরে তে সততং পরিধাবতঃ
186.126
ইচ্ছামি পুণ্ডরীকাক্ষ জ্ঞাতুং ত্বাহমনিন্দিত
ইহ ভূত্বা শিশুঃ সাক্ষাত্কিং ভবানবতিষ্ঠতে
পীত্বা জগদিদং বিশ্বমেতদাখ্যাতুমর্হসি
186.127
কিমর্থং চ জগত্সর্বং শরীরস্থং তবানঘ
কিয়ন্তং চ ত্বয়া কালমিহ স্থেয়মরিংদম
186.128
এতদিচ্ছামি দেবেশ শ্রোতুং ব্রাহ্মণকাম্যয়া
ত্বত্তঃ কমলপত্রাক্ষ বিস্তরেণ যথাতথম্
মহদ্ধ্যেতদচিন্ত্যং চ যদহং দৃষ্টবান্প্রভো
186.129
ইত্যুক্তঃ স ময়া শ্রীমান্দেবদেবো মহাদ্যুতিঃ
সান্ত্বয়ন্মামিদং বাক্যমুবাচ বদতাং বরঃ