Utshovঅধ্যায় 187
187.1
দেব উবাচ
কামং দেবাপি মাং বিপ্র ন বিজানন্তি তত্ত্বতঃ
ত্বত্প্রীত্যা তু প্রবক্ষ্যামি যথেদং বিসৃজাম্যহম্
187.2
পিতৃভক্তোঽসি বিপ্রর্ষে মাং চৈব শরণং গতঃ
অতো দৃষ্টোঽস্মি তে সাক্ষাদ্ব্রহ্মচর্যং চ তে মহৎ
187.3
আপো নারা ইতি প্রোক্তাঃ সংজ্ঞানাম কৃতং ময়া
তেন নারায়ণোঽস্ম্যুক্তো মম তদ্ধ্যয়নং সদা
187.4
অহং নারায়ণো নাম প্রভবঃ শাশ্বতোঽব্যয়ঃ
বিধাতা সর্বভূতানাং সংহর্তা চ দ্বিজোত্তম
187.5
অহং বিষ্ণুরহং ব্রহ্মা শক্রশ্চাহং সুরাধিপঃ
অহং বৈশ্রবণো রাজা যমঃ প্রেতাধিপস্তথা
187.6
অহং শিবশ্চ সোমশ্চ কশ্যপশ্চ প্রজাপতিঃ
অহং ধাতা বিধাতা চ যজ্ঞশ্চাহং দ্বিজোত্তম
187.7
অগ্নিরাস্যং ক্ষিতিঃ পাদৌ চন্দ্রাদিত্যৌ চ লোচনে
সদিশং চ নভঃ কায়ো বায়ুর্মনসি মে স্থিতঃ
187.8
ময়া ক্রতুশতৈরিষ্টং বহুভিঃ স্বাপ্তদক্ষিণৈঃ
যজন্তে বেদবিদুষো মাং দেবয়জনে স্থিতম্
187.9
পৃথিব্যাং ক্ষত্রিয়েন্দ্রাশ্চ পার্থিবাঃ স্বর্গকাঙ্ক্ষিণঃ
যজন্তে মাং তথা বৈশ্যাঃ স্বর্গলোকজিগীষবঃ
187.10
চতুঃসমুদ্রপর্যন্তাং মেরুমন্দরভূষণাম্
শেষো ভূত্বাহমেবৈতাং ধারয়ামি বসুংধরাম্
187.11
বারাহং রূপমাস্থায় ময়েয়ং জগতী পুরা
মজ্জমানা জলে বিপ্র বীর্যেণাসীত্সমুদ্ধৃতা
187.12
অগ্নিশ্চ বডবাবক্ত্রো ভূত্বাহং দ্বিজসত্তম
পিবাম্যপঃ সমাবিদ্ধাস্তাশ্চৈব বিসৃজাম্যহম্
187.13
ব্রহ্ম বক্ত্রং ভুজৌ ক্ষত্রমূরূ মে সংশ্রিতা বিশঃ
পাদৌ শূদ্রা ভজন্তে মে বিক্রমেণ ক্রমেণ চ
187.14
ঋগ্বেদঃ সামবেদশ্চ যজুর্বেদোঽপ্যথর্বণঃ
মত্তঃ প্রাদুর্ভবন্ত্যেতে মামেব প্রবিশন্তি চ
187.15
যতয়ঃ শান্তিপরমা যতাত্মানো মুমুক্ষবঃ
কামক্রোধদ্বেষমুক্তা নিঃসঙ্গা বীতকল্মষাঃ
187.16
সত্ত্বস্থা নিরহংকারা নিত্যমধ্যাত্মকোবিদাঃ
মামেব সততং বিপ্রাশ্চিন্তয়ন্ত উপাসতে
187.17
অহং সংবর্তকো জ্যোতিরহং সংবর্তকো যমঃ
অহং সংবর্তকঃ সূর্যো অহং সংবর্তকোঽনিলঃ
187.18
তারারূপাণি দৃশ্যন্তে যান্যেতানি নভস্তলে
মম রূপাণ্যথৈতানি বিদ্ধি ত্বং দ্বিজসত্তম
187.19
রত্নাকরাঃ সমুদ্রাশ্চ সর্ব এব চতুর্দিশম্
বসনং শয়নং চৈব নিলয়ং চৈব বিদ্ধি মে
187.20
কামং ক্রোধং চ হর্ষং চ ভয়ং মোহং তথৈব চ
মমৈব বিদ্ধি রূপাণি সর্বাণ্যেতানি সত্তম
187.21
প্রাপ্নুবন্তি নরা বিপ্র যত্কৃত্বা কর্মশোভনম্
সত্যং দানং তপশ্চোগ্রমহিংসা চৈব জন্তুষু
187.22
মদ্বিধানেন বিহিতা মম দেহবিহারিণঃ
ময়াভিভূতবিজ্ঞানা বিচেষ্টন্তে ন কামতঃ
187.23
সম্যগ্বেদমধীয়ানা যজন্তো বিবিধৈর্মখৈঃ
শান্তাত্মানো জিতক্রোধাঃ প্রাপ্নুবন্তি দ্বিজাতয়ঃ
187.24
প্রাপ্তুং ন শক্যো যো বিদ্বন্নরৈর্দুষ্কৃতকর্মভিঃ
লোভাভিভূতৈঃ কৃপণৈরনার্যৈরকৃতাত্মভিঃ
187.25
তং মাং মহাফলং বিদ্ধি পদং সুকৃতকর্মণঃ
দুষ্প্রাপং বিপ্রমূঢানাং মার্গং যোগৈর্নিষেবিতম্
187.26
যদা যদা চ ধর্মস্য গ্লানির্ভবতি সত্তম
অভ্যুত্থানমধর্মস্য তদাত্মানং সৃজাম্যহম্
187.27
দৈত্যা হিংসানুরক্তাশ্চ অবধ্যাঃ সুরসত্তমৈঃ
রাক্ষসাশ্চাপি লোকেঽস্মিন্যদোত্পত্স্যন্তি দারুণাঃ
187.28
তদাহং সংপ্রসূয়ামি গৃহেষু শুভকর্মণাম্
প্রবিষ্টো মানুষং দেহং সর্বং প্রশময়াম্যহম্
187.29
সৃষ্ট্বা দেবমনুষ্যাংশ্চ গন্ধর্বোরগরাক্ষসান্
স্থাবরাণি চ ভূতানি সংহরাম্যাত্মমায়য়া
187.30
কর্মকালে পুনর্দেহমনুচিন্ত্য সৃজাম্যহম্
প্রবিশ্য মানুষং দেহং মর্যাদাবন্ধকারণাৎ
187.31
শ্বেতঃ কৃতয়ুগে বর্ণঃ পীতস্ত্রেতায়ুগে মম
রক্তো দ্বাপরমাসাদ্য কৃষ্ণঃ কলিয়ুগে তথা
187.32
ত্রয়ো ভাগা হ্যধর্মস্য তস্মিন্কালে ভবন্ত্যুত
অন্তকালে চ সংপ্রাপ্তে কালো ভূত্বাতিদারুণঃ
ত্রৈলোক্যং নাশয়াম্যেকঃ কৃত্স্নং স্থাবরজঙ্গমম্
187.33
অহং ত্রিবর্ত্মা সর্বাত্মা সর্বলোকসুখাবহঃ
অভিভূঃ সর্বগোঽনন্তো হৃষীকেশ উরুক্রমঃ
187.34
কালচক্রং নয়াম্যেকো ব্রহ্মন্নহমরূপি বৈ
শমনং সর্বভূতানাং সর্বলোককৃতোদ্যমম্
187.35
এবং প্রণিহিতঃ সম্যঙ্ময়াত্মা মুনিসত্তম
সর্বভূতেষু বিপ্রেন্দ্র ন চ মাং বেত্তি কশ্চন
187.36
যচ্চ কিংচিত্ত্বয়া প্রাপ্তং ময়ি ক্লেশাত্মকং দ্বিজ
সুখোদয়ায় তত্সর্বং শ্রেয়সে চ তবানঘ
187.37
যচ্চ কিংচিত্ত্বয়া লোকে দৃষ্টং স্থাবরজঙ্গমম্
বিহিতঃ সর্বথৈবাসৌ মমাত্মা মুনিসত্তম
187.38
অর্ধং মম শরীরস্য সর্বলোকপিতামহঃ
অহং নারায়ণো নাম শঙ্খচক্রগদাধরঃ
187.39
যাবদ্যুগানাং বিপ্রর্ষে সহস্রপরিবর্তনম্
তাবত্স্বপিমি বিশ্বাত্মা সর্বলোকপিতামহঃ
187.40
এবং সর্বমহং কালমিহাসে মুনিসত্তম
অশিশুঃ শিশুরূপেণ যাবদ্ব্রহ্মা ন বুধ্যতে
187.41
ময়া চ বিপ্র দত্তোঽয়ং বরস্তে ব্রহ্মরূপিণা
অসকৃত্পরিতুষ্টেন বিপ্রর্ষিগণপূজিত
187.42
সর্বমেকার্ণবং দৃষ্ট্বা নষ্টং স্থাবরজঙ্গমম্
বিক্লবোঽসি ময়া জ্ঞাতস্ততস্তে দর্শিতং জগৎ
187.43
অভ্যন্তরং শরীরস্য প্রবিষ্টোঽসি যদা মম
দৃষ্ট্বা লোকং সমস্তং চ বিস্মিতো নাববুধ্যসে
187.44
ততোঽসি বক্ত্রাদ্বিপ্রর্ষে দ্রুতং নিঃসারিতো ময়া
আখ্যাতস্তে ময়া চাত্মা দুর্জ্ঞেয়োঽপি সুরাসুরৈঃ
187.45
যাবত্স ভগবান্ব্রহ্মা ন বুধ্যতি মহাতপাঃ
তাবত্ত্বমিহ বিপ্রর্ষে বিশ্রব্ধশ্চর বৈ সুখম্
187.46
ততো বিবুদ্ধে তস্মিংস্তু সর্বলোকপিতামহে
একীভূতো হি স্রক্ষ্যামি শরীরাদ্দ্বিজসত্তম
187.47
আকাশং পৃথিবীং জ্যোতির্বায়ুং সলিলমেব চ
লোকে যচ্চ ভবেচ্ছেষমিহ স্থাবরজঙ্গমম্
187.48
মার্কণ্ডেয় উবাচ
ইত্যুক্ত্বান্তর্হিতস্তাত স দেবঃ পরমাদ্ভুতঃ
প্রজাশ্চেমাঃ প্রপশ্যামি বিচিত্রা বহুধাকৃতাঃ
187.49
এতদ্দৃষ্টং ময়া রাজংস্তস্মিন্প্রাপ্তে যুগক্ষয়ে
আশ্চর্যং ভরতশ্রেষ্ঠ সর্বধর্মভৃতাং বর
187.50
যঃ স দেবো ময়া দৃষ্টঃ পুরা পদ্মনিভেক্ষণঃ
স এষ পুরুষব্যাঘ্র সংবন্ধী তে জনার্দনঃ
187.51
অস্যৈব বরদানাদ্ধি স্মৃতির্ন প্রজহাতি মাম্
দীর্ঘমায়ুশ্চ কৌন্তেয় স্বচ্ছন্দমরণং তথা
187.52
স এষ কৃষ্ণো বার্ষ্ণেয়ঃ পুরাণপুরুষো বিভুঃ
আস্তে হরিরচিন্ত্যাত্মা ক্রীডন্নিব মহাভুজঃ
187.53
এষ ধাতা বিধাতা চ সংহর্তা চৈব সাত্বতঃ
শ্রীবত্সবক্ষা গোবিন্দঃ প্রজাপতিপতিঃ প্রভুঃ
187.54
দৃষ্ট্বেমং বৃষ্ণিশার্দূলং স্মৃতির্মামিয়মাগতা
আদিদেবমজং বিষ্ণুং পুরুষং পীতবাসসম্
187.55
সর্বেষামেব ভূতানাং পিতা মাতা চ মাধবঃ
গচ্ছধ্বমেনং শরণং শরণ্যং কৌরবর্ষভাঃ