Utshovঅধ্যায় 188
188.1
বৈশংপায়ন উবাচ
এবমুক্তাস্তু তে পার্থা যমৌ চ পুরুষর্ষভৌ
দ্রৌপদ্যা কৃষ্ণয়া সার্ধং নমশ্চক্রুর্জনার্দনম্
188.2
স চৈতান্পুরুষব্যাঘ্র সাম্না পরমবল্গুনা
সান্ত্বয়ামাস মানার্হান্মন্যমানো যথাবিধি
188.3
যুধিষ্ঠিরস্তু কৌন্তেয়ো মার্কণ্ডেয়ং মহামুনিম্
পুনঃ পপ্রচ্ছ সাম্রাজ্যে ভবিষ্যাং জগতো গতিম্
188.4
আশ্চর্যভূতং ভবতঃ শ্রুতং নো বদতাং বর
মুনে ভার্গব যদ্বৃত্তং যুগাদৌ প্রভবাপ্যয়ৌ
188.5
অস্মিন্কলিয়ুগেঽপ্যস্তি পুনঃ কৌতূহলং মম
সমাকুলেষু ধর্মেষু কিং নু শেষং ভবিষ্যতি
188.6
কিংবীর্যা মানবাস্তত্র কিমাহারবিহারিণঃ
কিমায়ুষঃ কিংবসনা ভবিষ্যন্তি যুগক্ষয়ে
188.7
কাং চ কাষ্ঠাং সমাসাদ্য পুনঃ সংপত্স্যতে কৃতম্
বিস্তরেণ মুনে ব্রূহি বিচিত্রাণীহ ভাষসে
188.8
ইত্যুক্তঃ স মুনিশ্রেষ্ঠঃ পুনরেবাভ্যভাষত
রময়ন্বৃষ্ণিশার্দূলং পাণ্ডবাংশ্চ মহামুনিঃ
188.9
মার্কণ্ডেয় উবাচ
ভবিষ্যং সর্বলোকস্য বৃত্তান্তং ভরতর্ষভ
কলুষং কালমাসাদ্য কথ্যমানং নিবোধ মে
188.10
কৃতে চতুষ্পাত্সকলো নির্ব্যাজোপাধিবর্জিতঃ
বৃষঃ প্রতিষ্ঠিতো ধর্মো মনুষ্যেষ্বভবত্পুরা
188.11
অধর্মপাদবিদ্ধস্তু ত্রিভিরংশৈঃ প্রতিষ্ঠিতঃ
ত্রেতায়াং দ্বাপরেঽর্ধেন ব্যামিশ্রো ধর্ম উচ্যতে
188.12
ত্রিভিরংশৈরধর্মস্তু লোকানাক্রম্য তিষ্ঠতি
চতুর্থাংশেন ধর্মস্তু মনুষ্যানুপতিষ্ঠতি
188.13
আয়ুর্বীর্যমথো বুদ্ধির্বলং তেজশ্চ পাণ্ডব
মনুষ্যাণামনুয়ুগং হ্রসতীতি নিবোধ মে
188.14
রাজানো ব্রাহ্মণা বৈশ্যাঃ শূদ্রাশ্চৈব যুধিষ্ঠির
ব্যাজৈর্ধর্মং চরিষ্যন্তি ধর্মবৈতংসিকা নরাঃ
188.15
সত্যং সংক্ষেপ্স্যতে লোকে নরৈঃ পণ্ডিতমানিভিঃ
সত্যহান্যা ততস্তেষামায়ুরল্পং ভবিষ্যতি
188.16
আয়ুষঃ প্রক্ষয়াদ্বিদ্যাং ন শক্ষ্যন্ত্যুপশিক্ষিতুম্
বিদ্যাহীনানবিজ্ঞানাল্লোভোঽপ্যভিভবিষ্যতি
188.17
লোভক্রোধপরা মূঢাঃ কামসক্তাশ্চ মানবাঃ
বৈরবদ্ধা ভবিষ্যন্তি পরস্পরবধেপ্সবঃ
188.18
ব্রাহ্মণাঃ ক্ষত্রিয়া বৈশ্যাঃ সংকীর্যন্তঃ পরস্পরম্
শূদ্রতুল্যা ভবিষ্যন্তি তপঃসত্যবিবর্জিতাঃ
188.19
অন্ত্যা মধ্যা ভবিষ্যন্তি মধ্যাশ্চান্তাবসায়িনঃ
ঈদৃশো ভবিতা লোকো যুগান্তে পর্যুপস্থিতে
188.20
বস্ত্রাণাং প্রবরা শাণী ধান্যানাং কোরদূষকাঃ
ভার্যামিত্রাশ্চ পুরুষা ভবিষ্যন্তি যুগক্ষয়ে
188.21
মত্স্যামিষেণ জীবন্তো দুহন্তশ্চাপ্যজৈডকম্
গোষু নষ্টাসু পুরুষা ভবিষ্যন্তি যুগক্ষয়ে
188.22
অন্যোন্যং পরিমুষ্ণন্তো হিংসয়ন্তশ্চ মানবাঃ
অজপা নাস্তিকাঃ স্তেনা ভবিষ্যন্তি যুগক্ষয়ে
188.23
সরিত্তীরেষু কুদ্দালৈর্বাপয়িষ্যন্তি চৌষধীঃ
তাশ্চাপ্যল্পফলাস্তেষাং ভবিষ্যন্তি যুগক্ষয়ে
188.24
শ্রাদ্ধে দৈবে চ পুরুষা যে চ নিত্যং ধৃতব্রতাঃ
তেঽপি লোভসমায়ুক্তা ভোক্ষ্যন্তীহ পরস্পরম্
188.25
পিতা পুত্রস্য ভোক্তা চ পিতুঃ পুত্রস্তথৈব চ
অতিক্রান্তানি ভোজ্যানি ভবিষ্যন্তি যুগক্ষয়ে
188.26
ন ব্রতানি চরিষ্যন্তি ব্রাহ্মণা বেদনিন্দকাঃ
ন যক্ষ্যন্তি ন হোষ্যন্তি হেতুবাদবিলোভিতাঃ
188.27
নিম্নে কৃষিং করিষ্যন্তি যোক্ষ্যন্তি ধুরি ধেনুকাঃ
একহায়নবত্সাংশ্চ বাহয়িষ্যন্তি মানবাঃ
188.28
পুত্রঃ পিতৃবধং কৃত্বা পিতা পুত্রবধং তথা
নিরুদ্বেগো বৃহদ্বাদী ন নিন্দামুপলপ্স্যতে
188.29
ম্লেচ্ছভূতং জগত্সর্বং নিষ্ক্রিয়ং যজ্ঞবর্জিতম্
ভবিষ্যতি নিরানন্দমনুত্সবমথো তথা
188.30
প্রায়শঃ কৃপণানাং হি তথা বন্ধুমতামপি
বিধবানাং চ বিত্তানি হরিষ্যন্তীহ মানবাঃ
188.31
অল্পবীর্যবলাঃ স্তব্ধা লোভমোহপরায়ণাঃ
তত্কথাদানসংতুষ্টা দুষ্টানামপি মানবাঃ
পরিগ্রহং করিষ্যন্তি পাপাচারপরিগ্রহাঃ
188.32
সংঘাতয়ন্তঃ কৌন্তেয় রাজানঃ পাপবুদ্ধয়ঃ
পরস্পরবধোদ্যুক্তা মূর্খাঃ পণ্ডিতমানিনঃ
ভবিষ্যন্তি যুগস্যান্তে ক্ষত্রিয়া লোককণ্টকাঃ
188.33
অরক্ষিতারো লুব্ধাশ্চ মানাহংকারদর্পিতাঃ
কেবলং দণ্ডরুচয়ো ভবিষ্যন্তি যুগক্ষয়ে
188.34
আক্রম্যাক্রম্য সাধূনাং দারাংশ্চৈব ধনানি চ
ভোক্ষ্যন্তে নিরনুক্রোশা রুদতামপি ভারত
188.35
ন কন্যাং যাচতে কশ্চিন্নাপি কন্যা প্রদীয়তে
স্বয়ংগ্রাহা ভবিষ্যন্তি যুগান্তে পর্যুপস্থিতে
188.36
রাজানশ্চাপ্যসংতুষ্টাঃ পরার্থান্মূঢচেতসঃ
সর্বোপায়ৈর্হরিষ্যন্তি যুগান্তে পর্যুপস্থিতে
188.37
ম্লেচ্ছীভূতং জগত্সর্বং ভবিষ্যতি চ ভারত
হস্তো হস্তং পরিমুষেদ্যুগান্তে পর্যুপস্থিতে
188.38
সত্যং সংক্ষিপ্যতে লোকে নরৈঃ পণ্ডিতমানিভিঃ
স্থবিরা বালমতয়ো বালাঃ স্থবিরবুদ্ধয়ঃ
188.39
ভীরবঃ শূরমানীনঃ শূরা ভীরুবিষাদিনঃ
ন বিশ্বসন্তি চান্যোন্যং যুগান্তে পর্যুপস্থিতে
188.40
একাহার্যং জগত্সর্বং লোভমোহব্যবস্থিতম্
অধর্মো বর্ধতি মহান্ন চ ধর্মঃ প্রবর্ততে
188.41
ব্রাহ্মণাঃ ক্ষত্রিয়া বৈশ্যা ন শিষ্যন্তি জনাধিপ
একবর্ণস্তদা লোকো ভবিষ্যতি যুগক্ষয়ে
188.42
ন ক্ষংস্যতি পিতা পুত্রং পুত্রশ্চ পিতরং তথা
ভার্যা চ পতিশুশ্রূষাং ন করিষ্যতি কাচন
188.43
যে যবান্না জনপদা গোধূমান্নাস্তথৈব চ
তান্দেশান্সংশ্রয়িষ্যন্তি যুগান্তে পর্যুপস্থিতে
188.44
স্বৈরাহারাশ্চ পুরুষা যোষিতশ্চ বিশাং পতে
অন্যোন্যং ন সহিষ্যন্তি যুগান্তে পর্যুপস্থিতে
188.45
ম্লেচ্ছভূতং জগত্সর্বং ভবিষ্যতি যুধিষ্ঠির
ন শ্রাদ্ধৈর্হি পিতৄংশ্চাপি তর্পয়িষ্যন্তি মানবাঃ
188.46
ন কশ্চিত্কস্যচিচ্ছ্রোতা ন কশ্চিত্কস্যচিদ্গুরুঃ
তমোগ্রস্তস্তদা লোকো ভবিষ্যতি নরাধিপ
188.47
পরমায়ুশ্চ ভবিতা তদা বর্ষাণি ষোডশ
ততঃ প্রাণান্বিমোক্ষ্যন্তি যুগান্তে পর্যুপস্থিতে
188.48
পঞ্চমে বাথ ষষ্ঠে বা বর্ষে কন্যা প্রসূয়তে
সপ্তবর্ষাষ্টবর্ষাশ্চ প্রজাস্যন্তি নরাস্তদা
188.49
পত্যৌ স্ত্রী তু তদা রাজন্পুরুষো বা স্ত্রিয়ং প্রতি
যুগান্তে রাজশার্দূল ন তোষমুপয়াস্যতি
188.50
অল্পদ্রব্যা বৃথালিঙ্গা হিংসা চ প্রভবিষ্যতি
ন কশ্চিত্কস্যচিদ্দাতা ভবিষ্যতি যুগক্ষয়ে
188.51
অট্টশূলা জনপদাঃ শিবশূলাশ্চতুষ্পথাঃ
কেশশূলাঃ স্ত্রিয়শ্চাপি ভবিষ্যন্তি যুগক্ষয়ে
188.52
ম্লেচ্ছাঃ ক্রূরাঃ সর্বভক্ষা দারুণাঃ সর্বকর্মসু
ভাবিনঃ পশ্চিমে কালে মনুষ্যা নাত্র সংশয়ঃ
188.53
ক্রয়বিক্রয়কালে চ সর্বঃ সর্বস্য বঞ্চনম্
যুগান্তে ভরতশ্রেষ্ঠ বৃত্তিলোভাত্করিষ্যতি
188.54
জ্ঞানানি চাপ্যবিজ্ঞায় করিষ্যন্তি ক্রিয়াস্তথা
আত্মচ্ছন্দেন বর্তন্তে যুগান্তে পর্যুপস্থিতে
188.55
স্বভাবাত্ক্রূরকর্মাণশ্চান্যোন্যমভিশঙ্কিনঃ
ভবিতারো জনাঃ সর্বে সংপ্রাপ্তে যুগসংক্ষয়ে
188.56
আরামাংশ্চৈব বৃক্ষাংশ্চ নাশয়িষ্যন্তি নির্ব্যথাঃ
ভবিতা সংক্ষয়ো লোকে জীবিতস্য চ দেহিনাম্
188.57
তথা লোভাভিভূতাশ্চ চরিষ্যন্তি মহীমিমাম্
ব্রাহ্মণাশ্চ ভবিষ্যন্তি ব্রহ্মস্বানি চ ভুঞ্জতে
188.58
হাহাকৃতা দ্বিজাশ্চৈব ভয়ার্তা বৃষলার্দিতাঃ
ত্রাতারমলভন্তো বৈ ভ্রমিষ্যন্তি মহীমিমাম্
188.59
জীবিতান্তকরা রৌদ্রাঃ ক্রূরাঃ প্রাণিবিহিংসকাঃ
যদা ভবিষ্যন্তি নরাস্তদা সংক্ষেপ্স্যতে যুগম্
188.60
আশ্রয়িষ্যন্তি চ নদীঃ পর্বতান্বিষমাণি চ
প্রধাবমানা বিত্রস্তা দ্বিজাঃ কুরুকুলোদ্বহ
188.61
দস্যুপ্রপীডিতা রাজন্কাকা ইব দ্বিজোত্তমাঃ
কুরাজভিশ্চ সততং করভারপ্রপীডিতাঃ
188.62
ধৈর্যং ত্যক্ত্বা মহীপাল দারুণে যুগসংক্ষয়ে
বিকর্মাণি করিষ্যন্তি শূদ্রাণাং পরিচারকাঃ
188.63
শূদ্রা ধর্মং প্রবক্ষ্যন্তি ব্রাহ্মণাঃ পর্যুপাসকাঃ
শ্রোতারশ্চ ভবিষ্যন্তি প্রামাণ্যেন ব্যবস্থিতাঃ
188.64
বিপরীতশ্চ লোকোঽয়ং ভবিষ্যত্যধরোত্তরঃ
এডূকান্পূজয়িষ্যন্তি বর্জয়িষ্যন্তি দেবতাঃ
শূদ্রাঃ পরিচরিষ্যন্তি ন দ্বিজান্যুগসংক্ষয়ে
188.65
আশ্রমেষু মহর্ষীণাং ব্রাহ্মণাবসথেষু চ
দেবস্থানেষু চৈত্যেষু নাগানামালয়েষু চ
188.66
এডূকচিহ্না পৃথিবী ন দেবগৃহভূষিতা
ভবিষ্যতি যুগে ক্ষীণে তদ্যুগান্তস্য লক্ষণম্
188.67
যদা রৌদ্রা ধর্মহীনা মাংসাদাঃ পানপাস্তথা
ভবিষ্যন্তি নরা নিত্যং তদা সংক্ষেপ্স্যতে যুগম্
188.68
পুষ্পে পুষ্পং যদা রাজন্ফলে ফলমুপাশ্রিতম্
প্রজাস্যতি মহারাজ তদা সংক্ষেপ্স্যতে যুগম্
188.69
অকালবর্ষী পর্জন্যো ভবিষ্যতি গতে যুগে
অক্রমেণ মনুষ্যাণাং ভবিষ্যতি তদা ক্রিয়া
বিরোধমথ যাস্যন্তি বৃষলা ব্রাহ্মণৈঃ সহ
188.70
মহী ম্লেচ্ছসমাকীর্ণা ভবিষ্যতি ততোঽচিরাৎ
করভারভয়াদ্বিপ্রা ভজিষ্যন্তি দিশো দশ
188.71
নির্বিশেষা জনপদা নরাবৃষ্টিভিরর্দিতাঃ
আশ্রমানভিপত্স্যন্তি ফলমূলোপজীবিনঃ
188.72
এবং পর্যাকুলে লোকে মর্যাদা ন ভবিষ্যতি
ন স্থাস্যন্ত্যুপদেশে চ শিষ্যা বিপ্রিয়কারিণঃ
188.73
আচার্যোপনিধিশ্চৈব বত্স্যতে তদনন্তরম্
অর্থয়ুক্ত্যা প্রবত্স্যন্তি মিত্রসংবন্ধিবান্ধবাঃ
অভাবঃ সর্বভূতানাং যুগান্তে চ ভবিষ্যতি
188.74
দিশঃ প্রজ্বলিতাঃ সর্বা নক্ষত্রাণি চলানি চ
জ্যোতীংষি প্রতিকূলানি বাতাঃ পর্যাকুলাস্তথা
উল্কাপাতাশ্চ বহবো মহাভয়নিদর্শকাঃ
188.75
ষড্ভিরন্যৈশ্চ সহিতো ভাস্করঃ প্রতপিষ্যতি
তুমুলাশ্চাপি নির্হ্রাদা দিগ্দাহাশ্চাপি সর্বশঃ
কবন্ধান্তর্হিতো ভানুরুদয়াস্তময়ে তদা
188.76
অকালবর্ষী চ তদা ভবিষ্যতি সহস্রদৃক্
সস্যানি চ ন রোক্ষ্যন্তি যুগান্তে পর্যুপস্থিতে
188.77
অভীক্ষ্ণং ক্রূরবাদিন্যঃ পরুষা রুদিতপ্রিয়াঃ
ভর্তৄণাং বচনে চৈব ন স্থাস্যন্তি তদা স্ত্রিয়ঃ
188.78
পুত্রাশ্চ মাতাপিতরৌ হনিষ্যন্তি যুগক্ষয়ে
সূদয়িষ্যন্তি চ পতীন্স্ত্রিয়ঃ পুত্রানপাশ্রিতাঃ
188.79
অপর্বণি মহারাজ সূর্যং রাহুরুপৈষ্যতি
যুগান্তে হুতভুক্চাপি সর্বতঃ প্রজ্বলিষ্যতি
188.80
পানীয়ং ভোজনং চৈব যাচমানাস্তদাধ্বগাঃ
ন লপ্স্যন্তে নিবাসং চ নিরস্তাঃ পথি শেরতে
188.81
নির্ঘাতবায়সা নাগাঃ শকুনাঃ সমৃগদ্বিজাঃ
রূক্ষা বাচো বিমোক্ষ্যন্তি যুগান্তে পর্যুপস্থিতে
188.82
মিত্রসংবন্ধিনশ্চাপি সংত্যক্ষ্যন্তি নরাস্তদা
জনং পরিজনং চাপি যুগান্তে পর্যুপস্থিতে
188.83
অথ দেশান্দিশশ্চাপি পত্তনানি পুরাণি চ
ক্রমশঃ সংশ্রয়িষ্যন্তি যুগান্তে পর্যুপস্থিতে
188.84
হা তাত হা সুতেত্যেবং তদা বাচঃ সুদারুণাঃ
বিক্রোশমানশ্চান্যোন্যং জনো গাং পর্যটিষ্যতি
188.85
ততস্তুমুলসংঘাতে বর্তমানে যুগক্ষয়ে
দ্বিজাতিপূর্বকো লোকঃ ক্রমেণ প্রভবিষ্যতি
188.86
ততঃ কালান্তরেঽন্যস্মিন্পুনর্লোকবিবৃদ্ধয়ে
ভবিষ্যতি পুনর্দৈবমনুকূলং যদৃচ্ছয়া
188.87
যদা চন্দ্রশ্চ সূর্যশ্চ তথা তিষ্যবৃহস্পতী
একরাশৌ সমেষ্যন্তি প্রপত্স্যতি তদা কৃতম্
188.88
কালবর্ষী চ পর্জন্যো নক্ষত্রাণি শুভানি চ
প্রদক্ষিণা গ্রহাশ্চাপি ভবিষ্যন্ত্যনুলোমগাঃ
ক্ষেমং সুভিক্ষমারোগ্যং ভবিষ্যতি নিরাময়ম্
188.89
কল্কির্বিষ্ণুয়শা নাম দ্বিজঃ কালপ্রচোদিতঃ
উত্পত্স্যতে মহাবীর্যো মহাবুদ্ধিপরাক্রমঃ
188.90
সংভূতঃ সংভলগ্রামে ব্রাহ্মণাবসথে শুভে
মনসা তস্য সর্বাণি বাহনান্যায়ুধানি চ
উপস্থাস্যন্তি যোধাশ্চ শস্ত্রাণি কবচানি চ
188.91
স ধর্মবিজয়ী রাজা চক্রবর্তী ভবিষ্যতি
স চেমং সংকুলং লোকং প্রসাদমুপনেষ্যতি
188.92
উত্থিতো ব্রাহ্মণো দীপ্তঃ ক্ষয়ান্তকৃদুদারধীঃ
স সংক্ষেপো হি সর্বস্য যুগস্য পরিবর্তকঃ
188.93
স সর্বত্র গতান্ক্ষুদ্রান্ব্রাহ্মণৈঃ পরিবারিতঃ
উত্সাদয়িষ্যতি তদা সর্বান্ম্লেচ্ছগণান্দ্বিজঃ