Utshovঅধ্যায় 189
189.1
মার্কণ্ডেয় উবাচ
ততশ্চোরক্ষয়ং কৃত্বা দ্বিজেভ্যঃ পৃথিবীমিমাম্
বাজিমেধে মহায়জ্ঞে বিধিবত্কল্পয়িষ্যতি
189.2
স্থাপয়িত্বা স মর্যাদাঃ স্বয়ম্ভুবিহিতাঃ শুভাঃ
বনং পুণ্যয়শঃকর্মা জরাবান্সংশ্রয়িষ্যতি
189.3
তচ্ছীলমনুবর্ত্স্যন্তে মনুষ্যা লোকবাসিনঃ
বিপ্রৈশ্চোরক্ষয়ে চৈব কৃতে ক্ষেমং ভবিষ্যতি
189.4
কৃষ্ণাজিনানি শক্তীশ্চ ত্রিশূলান্যায়ুধানি চ
স্থাপয়ন্বিপ্রশার্দূলো দেশেষু বিজিতেষু চ
189.5
সংস্তূয়মানো বিপ্রেন্দ্রৈর্মানয়ানো দ্বিজোত্তমান্
কল্কিশ্চরিষ্যতি মহীং সদা দস্যুবধে রতঃ
189.6
হা তাত হা সুতেত্যেবং তাস্তা বাচঃ সুদারুণাঃ
বিক্রোশমানান্সুভৃশং দস্যূন্নেষ্যতি সংক্ষয়ম্
189.7
ততোঽধর্মবিনাশো বৈ ধর্মবৃদ্ধিশ্চ ভারত
ভবিষ্যতি কৃতে প্রাপ্তে ক্রিয়াবাংশ্চ জনস্তথা
189.8
আরামাশ্চৈব চৈত্যাশ্চ তটাকান্যবটাস্তথা
যজ্ঞক্রিয়াশ্চ বিবিধা ভবিষ্যন্তি কৃতে যুগে
189.9
ব্রাহ্মণাঃ সাধবশ্চৈব মুনয়শ্চ তপস্বিনঃ
আশ্রমাঃ সহপাষণ্ডাঃ স্থিতাঃ সত্যে জনাঃ প্রজাঃ
189.10
জাস্যন্তি সর্ববীজানি উপ্যমানানি চৈব হ
সর্বেষ্বৃতুষু রাজেন্দ্র সর্বং সস্যং ভবিষ্যতি
189.11
নরা দানেষু নিরতা ব্রতেষু নিয়মেষু চ
জপয়জ্ঞপরা বিপ্রা ধর্মকামা মুদা যুতাঃ
পালয়িষ্যন্তি রাজানো ধর্মেণেমাং বসুংধরাম্
189.12
ব্যবহাররতা বৈশ্যা ভবিষ্যন্তি কৃতে যুগে
ষট্কর্মনিরতা বিপ্রাঃ ক্ষত্রিয়া রক্ষণে রতাঃ
189.13
শুশ্রূষায়াং রতাঃ শূদ্রাস্তথা বর্ণত্রয়স্য চ
এষ ধর্মঃ কৃতয়ুগে ত্রেতায়াং দ্বাপরে তথা
পশ্চিমে যুগকালে চ যঃ স তে সংপ্রকীর্তিতঃ
189.14
সর্বলোকস্য বিদিতা যুগসংখ্যা চ পাণ্ডব
এতত্তে সর্বমাখ্যাতমতীতানাগতং ময়া
বায়ুপ্রোক্তমনুস্মৃত্য পুরাণমৃষিসংস্তুতম্
189.15
এবং সংসারমার্গা মে বহুশশ্চিরজীবিনা
দৃষ্টাশ্চৈবানুভূতাশ্চ তাংস্তে কথিতবানহম্
189.16
ইদং চৈবাপরং ভূয়ঃ সহ ভ্রাতৃভিরচ্যুত
ধর্মসংশয়মোক্ষার্থং নিবোধ বচনং মম
189.17
ধর্মে ত্বয়াত্মা সংয়োজ্যো নিত্যং ধর্মভৃতাং বর
ধর্মাত্মা হি সুখং রাজা প্রেত্য চেহ চ নন্দতি
189.18
নিবোধ চ শুভাং বাণীং যাং প্রবক্ষ্যামি তেঽনঘ
ন ব্রাহ্মণে পরিভবঃ কর্তব্যস্তে কদাচন
ব্রাহ্মণো রুষিতো হন্যাদপি লোকান্প্রতিজ্ঞয়া
189.19
বৈশংপায়ন উবাচ
মার্কণ্ডেয়বচঃ শ্রুত্বা কুরূণাং প্রবরো নৃপঃ
উবাচ বচনং ধীমান্পরমং পরমদ্যুতিঃ
189.20
কস্মিন্ধর্মে ময়া স্থেয়ং প্রজাঃ সংরক্ষতা মুনে
কথং চ বর্তমানো বৈ ন চ্যবেয়ং স্বধর্মতঃ
189.21
মার্কণ্ডেয় উবাচ
দয়াবান্সর্বভূতেষু হিতো রক্তোঽনসূয়কঃ
অপত্যানামিব স্বেষাং প্রজানাং রক্ষণে রতঃ
চর ধর্মং ত্যজাধর্মং পিতৄন্দেবাংশ্চ পূজয়
189.22
প্রমাদাদ্যত্কৃতং তেঽভূত্সংয়গ্দানেন তজ্জয়
অলং তে মানমাশ্রিত্য সততং পরবান্ভব
189.23
বিজিত্য পৃথিবীং সর্বাং মোদমানঃ সুখী ভব
এষ ভূতো ভবিষ্যশ্চ ধর্মস্তে সমুদীরিতঃ
189.24
ন তেঽস্ত্যবিদিতং কিংচিদতীতানাগতং ভুবি
তস্মাদিমং পরিক্লেশং ত্বং তাত হৃদি মা কৃথাঃ
189.25
এষ কালো মহাবাহো অপি সর্বদিবৌকসাম্
মুহ্যন্তি হি প্রজাস্তাত কালেনাভিপ্রচোদিতাঃ
189.26
মা চ তেঽত্র বিচারো ভূদ্যন্ময়োক্তং তবানঘ
অতিশঙ্ক্য বচো হ্যেতদ্ধর্মলোপো ভবেত্তব
189.27
জাতোঽসি প্রথিতে বংশে কুরূণাং ভরতর্ষভ
কর্মণা মনসা বাচা সর্বমেতত্সমাচর
189.28
যুধিষ্ঠির উবাচ
যত্ত্বয়োক্তং দ্বিজশ্রেষ্ঠ বাক্যং শ্রুতিমনোহরম্
তথা করিষ্যে যত্নেন ভবতঃ শাসনং বিভো
189.29
ন মে লোভোঽস্তি বিপ্রেন্দ্র ন ভয়ং ন চ মত্সরঃ
করিষ্যামি হি তত্সর্বমুক্তং যত্তে ময়ি প্রভো
189.30
বৈশংপায়ন উবাচ
শ্রুত্বা তু বচনং তস্য পাণ্ডবস্য মহাত্মনঃ
প্রহৃষ্টাঃ পাণ্ডবা রাজন্সহিতাঃ শার্ঙ্গধন্বনা
189.31
তথা কথাং শুভাং শ্রুত্বা মার্কণ্ডেয়স্য ধীমতঃ
বিস্মিতাঃ সমপদ্যন্ত পুরাণস্য নিবেদনাৎ