তমেবংবাদিনমিষ্টজনশোকপরীতাত্মা রাজা প্রোবাচ
ন হি ক্ষম্যতে তন্ময়া
হনিষ্যাম্যেতান্
এতৈর্দুরাত্মভিঃ প্রিয়া মে ভক্ষিতা
সর্বথৈব মে বধ্যা মণ্ডূকাঃ
নার্হসি বিদ্বন্মামুপরোদ্ধুমিতি

190.37

স তদ্বাক্যমুপলভ্য ব্যথিতেন্দ্রিয়মনাঃ প্রোবাচ
প্রসীদ রাজন্
অহমায়ুর্নাম মণ্ডূকরাজঃ
মম সা দুহিতা সুশোভনা নাম
তস্যা দৌঃশীল্যমেতৎ
বহবো হি রাজানস্তয়া বিপ্রলব্ধপূর্বা ইতি

190.38

তমব্রবীদ্রাজা
তয়াস্ম্যর্থী
সা মে দীয়তামিতি

190.39

অথৈনাং রাজ্ঞে পিতাদাৎ
অব্রবীচ্চৈনাম্
এনং রাজানং শুশ্রূষস্বেতি

190.40

স উবাচ দুহিতরম্
যস্মাত্ত্বয়া রাজানো বিপ্রলব্ধাস্তস্মাদব্রহ্মণ্যানি তবাপত্যানি ভবিষ্যন্ত্যনৃতকত্বাত্তবেতি

190.41

স চ রাজা তামুপলভ্য তস্যাং সুরতগুণনিবদ্ধহৃদয়ো লোকত্রয়ৈশ্বর্যমিবোপলভ্য হর্ষবাষ্পকলয়া বাচা প্রণিপত্যাভিপূজ্য মণ্ডূকরাজানমব্রবীৎ
অনুগৃহীতোঽস্মীতি

190.42

স চ মণ্ডূকরাজো জামাতরমনুজ্ঞাপ্য যথাগতমগচ্ছৎ

190.43

অথ কস্যচিত্কালস্য তস্যাং কুমারাস্ত্রয়স্তস্য রাজ্ঞঃ সংবভূবুঃ শলো দলো বলশ্চেতি
ততস্তেষাং জ্যেষ্ঠং শলং সময়ে পিতা রাজ্যেঽভিষিচ্য তপসি ধৃতাত্মা বনং জগাম

190.44

অথ কদাচিচ্ছলো মৃগয়ামচরৎ
মৃগং চাসাদ্য রথেনান্বধাবৎ

190.45

সূতং চোবাচ
শীঘ্রং মাং বহস্বেতি

190.46

স তথোক্তঃ সূতো রাজানমব্রবীৎ
মা ক্রিয়তামনুবন্ধঃ
নৈষ শক্যস্ত্বয়া মৃগো গ্রহীতুং যদ্যপি তে রথে যুক্তৌ বাম্যৌ স্যাতামিতি

190.47

ততোঽব্রবীদ্রাজা সূতম্
আচক্ষ্ব মে বাম্যৌ
হন্মি বা ত্বামিতি

190.48

স এবমুক্তো রাজভয়ভীতো বামদেবশাপভীতশ্চ সন্নাচখ্যৌ রাজ্ঞে
বামদেবস্যাশ্বৌ বাম্যৌ মনোজবাবিতি

190.49

অথৈনমেবং ব্রুবাণমব্রবীদ্রাজা
বামদেবাশ্রমং যাহীতি

190.50

স গত্বা বামদেবাশ্রমং তমৃষিমব্রবীৎ
ভগবন্মৃগো ময়া বিদ্ধঃ পলায়তে
তং সংভাবয়েয়ম্
অর্হসি মে বাম্যৌ দাতুমিতি

190.51

তমব্রবীদৃষিঃ
দদানি তে বাম্যৌ
কৃতকার্যেণ ভবতা মমৈব নির্যাত্যৌ ক্ষিপ্রমিতি

190.52

স চ তাবশ্বৌ প্রতিগৃহ্যানুজ্ঞাপ্য চর্ষিং প্রায়াদ্বাম্যসংয়ুক্তেন রথেন মৃগং প্রতি
গচ্ছংশ্চাব্রবীত্সূতম্
অশ্বরত্নাবিমাবয়োগ্যৌ ব্রাহ্মণানাম্
নৈতৌ প্রতিদেয়ৌ বামদেবায়েতি

190.53

এবমুক্ত্বা মৃগমবাপ্য স্বনগরমেত্যাশ্বাবন্তঃপুরেঽস্থাপয়ৎ

190.54

অথর্ষিশ্চিন্তয়ামাস
তরুণো রাজপুত্রঃ কল্যাণং পত্রমাসাদ্য রমতে
ন মে প্রতিনির্যাতয়তি
অহো কষ্টমিতি

190.55

মনসা নিশ্চিত্য মাসি পূর্ণে শিষ্যমব্রবীৎ
গচ্ছাত্রেয়
রাজানং ব্রূহি
যদি পর্যাপ্তং নির্যাতয়োপাধ্যায়বাম্যাবিতি

190.56

স গত্বৈবং তং রাজানমব্রবীৎ

190.57

তং রাজা প্রত্যুবাচ
রাজ্ঞামেতদ্বাহনম্
অনর্হা ব্রাহ্মণা রত্নানামেবংবিধানাম্
কিং চ ব্রাহ্মণানামশ্বৈঃ কার্যম্
সাধু প্রতিগম্যতামিতি

190.58

স গত্বৈবমুপাধ্যায়ায়াচষ্ট

190.59

তচ্ছ্রুত্বা বচনমপ্রিয়ং বামদেবঃ ক্রোধপরীতাত্মা স্বয়মেব রাজানমভিগম্যাশ্বার্থমভ্যচোদয়ৎ
ন চাদাদ্রাজা

190.60

বামদেব উবাচ
প্রয়চ্ছ বাম্যৌ মম পার্থিব ত্বং; কৃতং হি তে কার্যমন্যৈরশক্যম্
মা ত্বা বধীদ্বরুণো ঘোরপাশৈ;র্ব্রহ্মক্ষত্রস্যান্তরে বর্তমানঃ

190.61

রাজোবাচ
অনড্বাহৌ সুব্রতৌ সাধু দান্তা;বেতদ্বিপ্রাণাং বাহনং বামদেব
তাভ্যাং যাহি ত্বং যত্র কামো মহর্ষে; ছন্দাংসি বৈ ত্বাদৃশং সংবহন্তি

190.62

বামদেব উবাচ
ছন্দাংসি বৈ মাদৃশং সংবহন্তি; লোকেঽমুষ্মিন্পার্থিব যানি সন্তি
অস্মিংস্তু লোকে মম যানমেত;দস্মদ্বিধানামপরেষাং চ রাজন্

190.63

রাজোবাচ
চত্বারো বা গর্দভাস্ত্বাং বহন্তু; শ্রেষ্ঠাশ্বতর্যো হরয়ো বা তুরংগাঃ
তৈস্ত্বং যাহি ক্ষত্রিয়স্যৈষ বাহো; মম বাম্যৌ ন তবৈতৌ হি বিদ্ধি

190.64

বামদেব উবাচ
ঘোরং ব্রতং ব্রাহ্মণস্যৈতদাহু;রেতদ্রাজন্যদিহাজীবমানঃ
অয়স্ময়া ঘোররূপা মহান্তো; বহন্তু ত্বাং শিতশূলাশ্চতুর্ধা

190.65

রাজোবাচ
যে ত্বা বিদুর্ব্রাহ্মণং বামদেব; বাচা হন্তুং মনসা কর্মণা বা
তে ত্বাং সশিষ্যমিহ পাতয়ন্তু; মদ্বাক্যনুন্নাঃ শিতশূলাসিহস্তাঃ

190.66

বামদেব উবাচ
নানুয়োগা ব্রাহ্মণানাং ভবন্তি; বাচা রাজন্মনসা কর্মণা বা
যস্ত্বেবং ব্রহ্ম তপসান্বেতি বিদ্বাং;স্তেন শ্রেষ্ঠো ভবতি হি জীবমানঃ

190.67

মার্কণ্ডেয় উবাচ
এবমুক্তে বামদেবেন রাজ;ন্সমুত্তস্থূ রাক্ষসা ঘোররূপাঃ
তৈঃ শূলহস্তৈর্বধ্যমানঃ স রাজা; প্রোবাচেদং বাক্যমুচ্চৈস্তদানীম্

190.68

ইক্ষ্বাকবো যদি ব্রহ্মন্দলো বা; বিধেয়া মে যদি বান্যে বিশোঽপি
নোত্স্রক্ষ্যেঽহং বামদেবস্য বাম্যৌ; নৈবংবিধা ধর্মশীলা ভবন্তি

190.69

এবং ব্রুবন্নেব স যাতুধানৈ;র্হতো জগামাশু মহীং ক্ষিতীশঃ
ততো বিদিত্বা নৃপতিং নিপাতিত;মিক্ষ্বাকবো বৈ দলমভ্যষিঞ্চন্

190.70

রাজ্যে তদা তত্র গত্বা স বিপ্রঃ; প্রোবাচেদং বচনং বামদেবঃ
দলং রাজানং ব্রাহ্মণানাং হি দেয়;মেবং রাজন্সর্বধর্মেষু দৃষ্টম্

190.71

বিভেষি চেত্ত্বমধর্মান্নরেন্দ্র; প্রয়চ্ছ মে শীঘ্রমেবাদ্য বাম্যৌ
এতচ্ছ্রুত্বা বামদেবস্য বাক্যং; স পার্থিবঃ সূতমুবাচ রোষাৎ

190.72

একং হি মে সায়কং চিত্ররূপং; দিগ্ধং বিষেণাহর সংগৃহীতম্
যেন বিদ্ধো বামদেবঃ শয়ীত; সংদশ্যমানঃ শ্বভিরার্তরূপঃ

190.73

বামদেব উবাচ
জানামি পুত্রং দশবর্ষং তবাহং; জাতং মহিষ্যাং শ্যেনজিতং নরেন্দ্র
তং জহি ত্বং মদ্বচনাত্প্রণুন্ন;স্তূর্ণং প্রিয়ং সায়কৈর্ঘোররূপৈঃ

190.74

মার্কণ্ডেয় উবাচ
এবমুক্তো বামদেবেন রাজ;ন্নন্তঃপুরে রাজপুত্রং জঘান
স সায়কস্তিগ্মতেজা বিসৃষ্টঃ; শ্রুত্বা দলস্তচ্চ বাক্যং বভাষে

190.75

ইক্ষ্বাকবো হন্ত চরামি বঃ প্রিয়ং; নিহন্মীমং বিপ্রমদ্য প্রমথ্য
আনীয়তামপরস্তিগ্মতেজাঃ; পশ্যধ্বং মে বীর্যমদ্য ক্ষিতীশাঃ

190.76

বামদেব উবাচ
যং ত্বমেনং সায়কং ঘোররূপং; বিষেণ দিগ্ধং মম সংদধাসি
ন ত্বমেনং শরবর্যং বিমোক্তুং; সংধাতুং বা শক্ষ্যসি মানবেন্দ্র

190.77

রাজোবাচ
ইক্ষ্বাকবঃ পশ্যত মাং গৃহীতং; ন বৈ শক্নোম্যেষ শরং বিমোক্তুম্
ন চাস্য কর্তুং নাশমভ্যুত্সহামি; আয়ুষ্মান্বৈ জীবতু বামদেবঃ

190.78

বামদেব উবাচ
সংস্পৃশৈনাং মহিষীং সায়কেন; ততস্তস্মাদেনসো মোক্ষ্যসে ত্বম্

190.79

মার্কণ্ডেয় উবাচ
ততস্তথা কৃতবান্পার্থিবস্তু; ততো মুনিং রাজপুত্রী বভাষে
যথা যুক্তং বামদেবাহমেনং; দিনে দিনে সংবিশন্তী ব্যশংসম্
ব্রাহ্মণেভ্যো মৃগয়ন্তী সূনৃতানি; তথা ব্রহ্মন্পুণ্যলোকং লভেয়ম্

190.80

বামদেব উবাচ
ত্বয়া ত্রাতং রাজকুলং শুভেক্ষণে; বরং বৃণীষ্বাপ্রতিমং দদানি তে
প্রশাধীমং স্বজনং রাজপুত্রি; ইক্ষ্বাকুরাজ্যং সুমহচ্চাপ্যনিন্দ্যে

190.81

রাজপুত্র্যুবাচ
বরং বৃণে ভগবন্নেকমেব; বিমুচ্যতাং কিল্বিষাদদ্য ভর্তা
শিবেন চাধ্যাহি সপুত্রবান্ধবং; বরো বৃতো হ্যেষ ময়া দ্বিজাগ্র্য

190.82

মার্কণ্ডেয় উবাচ
শ্রুত্বা বচঃ স মুনী রাজপুত্র্যা;স্তথাস্ত্বিতি প্রাহ কুরুপ্রবীর
ততঃ স রাজা মুদিতো বভূব; বাম্যৌ চাস্মৈ সংপ্রদদৌ প্রণম্য

Contains text from DharmicData, made available under the Open Database License (ODbL). Simple meanings are written by AI and can contain mistakes.