Utshovঅধ্যায় 191
191.1
বৈশংপায়ন উবাচ
মার্কণ্ডেয়মৃষয়ঃ পাণ্ডবাশ্চ পর্যপৃচ্ছন্
অস্তি কশ্চিদ্ভবতশ্চিরজাততর ইতি
191.2
স তানুবাচ
অস্তি খলু রাজর্ষিরিন্দ্রদ্যুম্নো নাম ক্ষীণপুণ্যস্ত্রিদিবাত্প্রচ্যুতঃ
কীর্তিস্তে ব্যুচ্ছিন্নেতি
স মামুপাতিষ্ঠৎ
অথ প্রত্যভিজানাতি মাং ভবানিতি
191.3
তমহমব্রুবম্
ন বয়ং রাসায়নিকাঃ শরীরোপতাপেনাত্মনঃ সমারভামহেঽর্থানামনুষ্ঠানম্
191.4
অস্তি খলু হিমবতি প্রাকারকর্ণো নামোলূকঃ
স ভবন্তং যদি জানীয়াৎ
প্রকৃষ্টে চাধ্বনি হিমবান্
তত্রাসৌ প্রতিবসতীতি
191.5
স মামশ্বো ভূত্বা তত্রাবহদ্যত্র বভূবোলূকঃ
191.6
অথৈনং স রাজর্ষিঃ পর্যপৃচ্ছৎ
প্রত্যভিজানাতি মাং ভবানিতি
191.7
স মুহূর্তং ধ্যাত্বাব্রবীদেনম্
নাভিজানে ভবন্তমিতি
191.8
স এবমুক্তো রাজর্ষিরিন্দ্রদ্যুম্নঃ পুনস্তমুলূকমব্রবীৎ
অস্তি কশ্চিদ্ভবতশ্চিরজাততর ইতি
191.9
স এবমুক্তোঽব্রবীদেনম্
অস্তি খল্বিন্দ্রদ্যুম্নসরো নাম
তস্মিন্নাডীজঙ্ঘো নাম বকঃ প্রতিবসতি
সোঽস্মত্তশ্চিরজাততরঃ
তং পৃচ্ছেতি
191.10
তত ইন্দ্রদ্যুম্নো মাং চোলূকং চাদায় তত্সরোঽগচ্ছদ্যত্রাসৌ নাডীজঙ্ঘো নাম বকো বভূব
191.11
সোঽস্মাভিঃ পৃষ্টঃ
ভবানিন্দ্রদ্যুম্নং রাজানং প্রত্যভিজানাতীতি
191.12
স এবমুক্তোঽব্রবীন্মুহূর্তং ধ্যাত্বা
নাভিজানাম্যহমিন্দ্রদ্যুম্নং রাজানমিতি
191.13
ততঃ সোঽস্মাভিঃ পৃষ্টঃ
অস্তি কশ্চিদন্যো ভবতশ্চিরজাততর ইতি
191.14
স নোঽব্রবীদস্তি খল্বিহৈব সরস্যকূপারো নাম কচ্ছপঃ প্রতিবসতি
স মত্তশ্চিরজাততর ইতি
স যদি কথংচিদভিজানীয়াদিমং রাজানং তমকূপারং পৃচ্ছাম ইতি
191.15
ততঃ স বকস্তমকূপারং কচ্ছপং বিজ্ঞাপয়ামাস
অস্ত্যস্মাকমভিপ্রেতং ভবন্তং কংচিদর্থমভিপ্রষ্টুম্
সাধ্বাগম্যতাং তাবদিতি
191.16
এতচ্ছ্রুত্বা স কচ্ছপস্তস্মাত্সরস উত্থায়াভ্যগচ্ছদ্যত্র তিষ্ঠামো বয়ং তস্য সরসস্তীরে
191.17
আগতং চৈনং বয়মপৃচ্ছাম
ভবানিন্দ্রদ্যুম্নং রাজানমভিজানাতীতি
191.18
স মুহূর্তং ধ্যাত্বা বাষ্পপূর্ণনয়ন উদ্বিগ্নহৃদয়ো বেপমানো বিসংজ্ঞকল্পঃ প্রাঞ্জলিরব্রবীৎ
কিমহমেনং ন প্রত্যভিজানামি
অহং হ্যনেন সহস্রকৃত্বঃ পূর্বমগ্নিচিতিষূপহিতপূর্বঃ
সরশ্চেদমস্য দক্ষিণাদত্তাভির্গোভিরতিক্রমমাণাভিঃ কৃতম্
অত্র চাহং প্রতিবসামীতি
191.19
অথৈতত্কচ্ছপেনোদাহৃতং শ্রুত্বা সমনন্তরং দেবলোকাদ্দেবরথঃ প্রাদুরাসীৎ
191.20
বাচশ্চাশ্রূয়ন্তেন্দ্রদ্যুম্নং প্রতি
প্রস্তুতস্তে স্বর্গঃ
যথোচিতং স্থানমভিপদ্যস্ব
কীর্তিমানসি
অব্যগ্রো যাহীতি
191.21
দিবং স্পৃশতি ভূমিং চ শব্দঃ পুণ্যস্য কর্মণঃ
যাবত্স শব্দো ভবতি তাবত্পুরুষ উচ্যতে
191.22
অকীর্তিঃ কীর্ত্যতে যস্য লোকে ভূতস্য কস্যচিৎ
পতত্যেবাধমাঁল্লোকান্যাবচ্ছব্দঃ স কীর্ত্যতে
191.23
তস্মাত্কল্যাণবৃত্তঃ স্যাদত্যন্তায় নরো ভুবি
বিহায় বৃত্তং পাপিষ্ঠং ধর্মমেবাভিসংশ্রয়েৎ
191.24
ইত্যেতচ্ছ্রুত্বা স রাজাব্রবীৎ
তিষ্ঠ তাবদ্যাবদিদানীমিমৌ বৃদ্ধৌ যথাস্থানং প্রতিপাদয়ামীতি
191.25
স মাং প্রাকারকর্ণং চোলূকং যথোচিতে স্থানে প্রতিপাদ্য তেনৈব যানেন সংসিদ্ধো যথোচিতং স্থানং প্রতিপন্নঃ
191.26
এতন্ময়ানুভূতং চিরজীবিনা দৃষ্টমিতি পাণ্ডবানুবাচ মার্কণ্ডেয়ঃ
191.27
পাণ্ডবাশ্চোচুঃ প্রীতাঃ
সাধু
শোভনং কৃতং ভবতা রাজানমিন্দ্রদ্যুম্নং স্বর্গলোকাচ্চ্যুতং স্বে স্থানে স্বর্গে পুনঃ প্রতিপাদয়তেতি
191.28
অথৈনানব্রবীদসৌ
ননু দেবকীপুত্রেণাপি কৃষ্ণেন নরকে মজ্জমানো রাজর্ষির্নৃগস্তস্মাত্কৃচ্ছ্রাত্সমুদ্ধৃত্য পুনঃ স্বর্গং প্রতিপাদিত ইতি