Utshovঅধ্যায় 192
192.1
বৈশংপায়ন উবাচ
যুধিষ্ঠিরো ধর্মরাজঃ পপ্রচ্ছ ভরতর্ষভ
মার্কণ্ডেয়ং তপোবৃদ্ধং দীর্ঘায়ুষমকল্মষম্
192.2
বিদিতাস্তব ধর্মজ্ঞ দেবদানবরাক্ষসাঃ
রাজবংশাশ্চ বিবিধা ঋষিবংশাশ্চ শাশ্বতাঃ
ন তেঽস্ত্যবিদিতং কিংচিদস্মিঁল্লোকে দ্বিজোত্তম
192.3
কথাং বেত্সি মুনে দিব্যাং মনুষ্যোরগরক্ষসাম্
এতদিচ্ছাম্যহং শ্রোতুং তত্ত্বেন কথিতং দ্বিজ
192.4
কুবলাশ্ব ইতি খ্যাত ইক্ষ্বাকুরপরাজিতঃ
কথং নাম বিপর্যাসাদ্ধুন্ধুমারত্বমাগতঃ
192.5
এতদিচ্ছামি তত্ত্বেন জ্ঞাতুং ভার্গবসত্তম
বিপর্যস্তং যথা নাম কুবলাশ্বস্য ধীমতঃ
192.6
মার্কণ্ডেয় উবাচ
হন্ত তে কথয়িষ্যামি শৃণু রাজন্যুধিষ্ঠির
ধর্মিষ্ঠমিদমাখ্যানং ধুন্ধুমারস্য তচ্ছৃণু
192.7
যথা স রাজা ইক্ষ্বাকুঃ কুবলাশ্বো মহীপতিঃ
ধুন্ধুমারত্বমগমত্তচ্ছৃণুষ্ব মহীপতে
192.8
মহর্ষির্বিশ্রুতস্তাত উত্তঙ্ক ইতি ভারত
মরুধন্বসু রম্যেষু আশ্রমস্তস্য কৌরব
192.9
উত্তঙ্কস্তু মহারাজ তপোঽতপ্যত্সুদুশ্চরম্
আরিরাধয়িষুর্বিষ্ণুং বহূন্বর্ষগণান্বিভো
192.10
তস্য প্রীতঃ স ভগবান্সাক্ষাদ্দর্শনমেয়িবান্
দৃষ্ট্বৈব চর্ষিঃ প্রহ্বস্তং তুষ্টাব বিবিধৈঃ স্তবৈঃ
192.11
ত্বয়া দেব প্রজাঃ সর্বাঃ সদেবাসুরমানবাঃ
স্থাবরাণি চ ভূতানি জঙ্গমানি তথৈব চ
ব্রহ্ম বেদাশ্চ বেদ্যং চ ত্বয়া সৃষ্টং মহাদ্যুতে
192.12
শিরস্তে গগনং দেব নেত্রে শশিদিবাকরৌ
নিঃশ্বাসঃ পবনশ্চাপি তেজোঽগ্নিশ্চ তবাচ্যুত
বাহবস্তে দিশঃ সর্বাঃ কুক্ষিশ্চাপি মহার্ণবঃ
192.13
ঊরূ তে পর্বতা দেব খং নাভির্মধুসূদন
পাদৌ তে পৃথিবী দেবী রোমাণ্যোষধয়স্তথা
192.14
ইন্দ্রসোমাগ্নিবরুণা দেবাসুরমহোরগাঃ
প্রহ্বাস্ত্বামুপতিষ্ঠন্তি স্তুবন্তো বিবিধৈঃ স্তবৈঃ
192.15
ত্বয়া ব্যাপ্তানি সর্বাণি ভূতানি ভুবনেশ্বর
যোগিনঃ সুমহাবীর্যাঃ স্তুবন্তি ত্বাং মহর্ষয়ঃ
192.16
ত্বয়ি তুষ্টে জগত্স্বস্থং ত্বয়ি ক্রুদ্ধে মহদ্ভয়ম্
ভয়ানামপনেতাসি ত্বমেকঃ পুরুষোত্তম
192.17
দেবানাং মানুষাণাং চ সর্বভূতসুখাবহঃ
ত্রিভির্বিক্রমণৈর্দেব ত্রয়ো লোকাস্ত্বয়াহৃতাঃ
অসুরাণাং সমৃদ্ধানাং বিনাশশ্চ ত্বয়া কৃতঃ
192.18
তব বিক্রমণৈর্দেবা নির্বাণমগমন্পরম্
পরাভবং চ দৈত্যেন্দ্রাস্ত্বয়ি ক্রুদ্ধে মহাদ্যুতে
192.19
ত্বং হি কর্তা বিকর্তা চ ভূতানামিহ সর্বশঃ
আরাধয়িত্বা ত্বাং দেবাঃ সুখমেধন্তি সর্বশঃ
192.20
এবং স্তুতো হৃষীকেশ উত্তঙ্কেন মহাত্মনা
উত্তঙ্কমব্রবীদ্বিষ্ণুঃ প্রীতস্তেঽহং বরং বৃণু
192.21
উত্তঙ্ক উবাচ
পর্যাপ্তো মে বরো হ্যেষ যদহং দৃষ্টবান্হরিম্
পুরুষং শাশ্বতং দিব্যং স্রষ্টারং জগতঃ প্রভুম্
192.22
বিষ্ণুরুবাচ
প্রীতস্তেঽহমলৌল্যেন ভক্ত্যা চ দ্বিজসত্তম
অবশ্যং হি ত্বয়া ব্রহ্মন্মত্তো গ্রাহ্যো বরো দ্বিজ
192.23
এবং সংছন্দ্যমানস্তু বরেণ হরিণা তদা
উত্তঙ্কঃ প্রাঞ্জলির্বব্রে বরং ভরতসত্তম
192.24
যদি মে ভগবান্প্রীতঃ পুণ্ডরীকনিভেক্ষণঃ
ধর্মে সত্যে দমে চৈব বুদ্ধির্ভবতু মে সদা
অভ্যাসশ্চ ভবেদ্ভক্ত্যা ত্বয়ি নিত্যং মহেশ্বর
192.25
বিষ্ণুরুবাচ
সর্বমেতদ্ধি ভবিতা মত্প্রসাদাত্তব দ্বিজ
প্রতিভাস্যতি যোগশ্চ যেন যুক্তো দিবৌকসাম্
ত্রয়াণামপি লোকানাং মহত্কার্যং করিষ্যসি
192.26
উত্সাদনার্থং লোকানাং ধুন্ধুর্নাম মহাসুরঃ
তপস্যতি তপো ঘোরং শৃণু যস্তং হনিষ্যতি
192.27
বৃহদশ্ব ইতি খ্যাতো ভবিষ্যতি মহীপতিঃ
তস্য পুত্রঃ শুচির্দান্তঃ কুবলাশ্ব ইতি শ্রুতঃ
192.28
স যোগবলমাস্থায় মামকং পার্থিবোত্তমঃ
শাসনাত্তব বিপ্রর্ষে ধুন্ধুমারো ভবিষ্যতি
192.29
মার্কণ্ডেয় উবাচ
উত্তঙ্কমেবমুক্ত্বা তু বিষ্ণুরন্তরধীয়ত