Utshovঅধ্যায় 193
193.1
মার্কণ্ডেয় উবাচ
ইক্ষ্বাকৌ সংস্থিতে রাজঞ্শশাদঃ পৃথিবীমিমাম্
প্রাপ্তঃ পরমধর্মাত্মা সোঽয়োধ্যায়াং নৃপোঽভবৎ
193.2
শশাদস্য তু দায়াদঃ ককুত্স্থো নাম বীর্যবান্
অনেনাশ্চাপি কাকুত্স্থঃ পৃথুশ্চানেনসঃ সুতঃ
193.3
বিষ্বগশ্বঃ পৃথোঃ পুত্রস্তস্মাদার্দ্রস্তু জজ্ঞিবান্
আর্দ্রস্য যুবনাশ্বস্তু শ্রাবস্তস্তস্য চাত্মজঃ
193.4
জজ্ঞে শ্রাবস্তকো রাজা শ্রাবস্তী যেন নির্মিতা
শ্রাবস্তস্য তু দায়াদো বৃহদশ্বো মহাবলঃ
বৃহদশ্বসুতশ্চাপি কুবলাশ্ব ইতি স্মৃতঃ
193.5
কুবলাশ্বস্য পুত্রাণাং সহস্রাণ্যেকবিংশতিঃ
সর্বে বিদ্যাসু নিষ্ণাতা বলবন্তো দুরাসদাঃ
193.6
কুবলাশ্বস্তু পিতৃতো গুণৈরভ্যধিকোঽভবৎ
সময়ে তং ততো রাজ্যে বৃহদশ্বোঽভ্যষেচয়ৎ
কুবলাশ্বং মহারাজ শূরমুত্তমধার্মিকম্
193.7
পুত্রসংক্রামিতশ্রীস্তু বৃহদশ্বো মহীপতিঃ
জগাম তপসে ধীমাংস্তপোবনমমিত্রহা
193.8
অথ শুশ্রাব রাজর্ষিং তমুত্তঙ্কো যুধিষ্ঠির
বনং সংপ্রস্থিতং রাজন্বৃহদশ্বং দ্বিজোত্তমঃ
193.9
তমুত্তঙ্কো মহাতেজাঃ সর্বাস্ত্রবিদুষাং বরম্
ন্যবারয়দমেয়াত্মা সমাসাদ্য নরোত্তমম্
193.10
উত্তঙ্ক উবাচ
ভবতা রক্ষণং কার্যং তত্তাবত্কর্তুমর্হসি
নিরুদ্বিগ্না বয়ং রাজংস্ত্বত্প্রসাদাদ্বসেমহি
193.11
ত্বয়া হি পৃথিবী রাজন্রক্ষ্যমাণা মহাত্মনা
ভবিষ্যতি নিরুদ্বিগ্না নারণ্যং গন্তুমর্হসি
193.12
পালনে হি মহান্ধর্মঃ প্রজানামিহ দৃশ্যতে
ন তথা দৃশ্যতেঽরণ্যে মা তে ভূদ্বুদ্ধিরীদৃশী
193.13
ঈদৃশো ন হি রাজেন্দ্র ধর্মঃ ক্বচন দৃশ্যতে
প্রজানাং পালনে যো বৈ পুরা রাজর্ষিভিঃ কৃতঃ
রক্ষিতব্যাঃ প্রজা রাজ্ঞা তাস্ত্বং রক্ষিতুমর্হসি
193.14
নিরুদ্বিগ্নস্তপশ্চর্তুং ন হি শক্নোমি পার্থিব
মমাশ্রমসমীপে বৈ সমেষু মরুধন্বসু
193.15
সমুদ্রো বালুকাপূর্ণ উজ্জানক ইতি স্মৃতঃ
বহুয়োজনবিস্তীর্ণো বহুয়োজনমায়তঃ
193.16
তত্র রৌদ্রো দানবেন্দ্রো মহাবীর্যপরাক্রমঃ
মধুকৈটভয়োঃ পুত্রো ধুন্ধুর্নাম সুদারুণঃ
193.17
অন্তর্ভূমিগতো রাজন্বসত্যমিতবিক্রমঃ
তং নিহত্য মহারাজ বনং ত্বং গন্তুমর্হসি
193.18
শেতে লোকবিনাশায় তপ আস্থায় দারুণম্
ত্রিদশানাং বিনাশায় লোকানাং চাপি পার্থিব
193.19
অবধ্যো দেবতানাং স দৈত্যানামথ রক্ষসাম্
নাগানামথ যক্ষাণাং গন্ধর্বাণাং চ সর্বশঃ
অবাপ্য স বরং রাজন্সর্বলোকপিতামহাৎ
193.20
তং বিনাশয় ভদ্রং তে মা তে বুদ্ধিরতোঽন্যথা
প্রাপ্স্যসে মহতীং কীর্তিং শাশ্বতীমব্যয়াং ধ্রুবাম্
193.21
ক্রূরস্য স্বপতস্তস্য বালুকান্তর্হিতস্য বৈ
সংবত্সরস্য পর্যন্তে নিঃশ্বাসঃ সংপ্রবর্ততে
যদা তদা ভূশ্চলতি সশৈলবনকাননা
193.22
তস্য নিঃশ্বাসবাতেন রজ উদ্ধূয়তে মহৎ
আদিত্যপথমাবৃত্য সপ্তাহং ভূমিকম্পনম্
সবিস্ফুলিঙ্গং সজ্বালং সধূমং হ্যতিদারুণম্
193.23
তেন রাজন্ন শক্নোমি তস্মিন্স্থাতুং স্ব আশ্রমে
তং বিনাশয় রাজেন্দ্র লোকানাং হিতকাম্যয়া
লোকাঃ স্বস্থা ভবন্ত্বদ্য তস্মিন্বিনিহতেঽসুরে
193.24
ত্বং হি তস্য বিনাশায় পর্যাপ্ত ইতি মে মতিঃ
তেজসা তব তেজশ্চ বিষ্ণুরাপ্যায়য়িষ্যতি
193.25
বিষ্ণুনা চ বরো দত্তো মম পূর্বং ততো বধে
যস্তং মহাসুরং রৌদ্রং বধিষ্যতি মহীপতিঃ
তেজস্তং বৈষ্ণবমিতি প্রবেক্ষ্যতি দুরাসদম্
193.26
তত্তেজস্ত্বং সমাধায় রাজেন্দ্র ভুবি দুঃসহম্
তং নিষূদয় সংদুষ্টং দৈত্যং রৌদ্রপরাক্রমম্
193.27
ন হি ধুন্ধুর্মহাতেজাস্তেজসাল্পেন শক্যতে
নির্দগ্ধুং পৃথিবীপাল স হি বর্ষশতৈরপি