Utshovঅধ্যায় 194
194.1
মার্কণ্ডেয় উবাচ
স এবমুক্তো রাজর্ষিরুত্তঙ্কেনাপরাজিতঃ
উত্তঙ্কং কৌরবশ্রেষ্ঠ কৃতাঞ্জলিরথাব্রবীৎ
194.2
ন তেঽভিগমনং ব্রহ্মন্মোঘমেতদ্ভবিষ্যতি
পুত্রো মমায়ং ভগবন্কুবলাশ্ব ইতি স্মৃতঃ
194.3
ধৃতিমান্ক্ষিপ্রকারী চ বীর্যেণাপ্রতিমো ভুবি
প্রিয়ং বৈ সর্বমেতত্তে করিষ্যতি ন সংশয়ঃ
194.4
পুত্রৈঃ পরিবৃতঃ সর্বৈঃ শূরৈঃ পরিঘবাহুভিঃ
বিসর্জয়স্ব মাং ব্রহ্মন্ন্যস্তশস্ত্রোঽস্মি সাংপ্রতম্
194.5
তথাস্ত্বিতি চ তেনোক্তো মুনিনামিততেজসা
স তমাদিশ্য তনয়মুত্তঙ্কায় মহাত্মনে
ক্রিয়তামিতি রাজর্ষির্জগাম বনমুত্তমম্
194.6
যুধিষ্ঠির উবাচ
ক এষ ভগবন্দৈত্যো মহাবীর্যস্তপোধন
কস্য পুত্রোঽথ নপ্তা বা এতদিচ্ছামি বেদিতুম্
194.7
এবং মহাবলো দৈত্যো ন শ্রুতো মে তপোধন
এতদিচ্ছামি ভগবন্যাথাতথ্যেন বেদিতুম্
সর্বমেব মহাপ্রাজ্ঞ বিস্তরেণ তপোধন
194.8
মার্কণ্ডেয় উবাচ
শৃণু রাজন্নিদং সর্বং যথাবৃত্তং নরাধিপ
একার্ণবে তদা ঘোরে নষ্টে স্থাবরজঙ্গমে
প্রনষ্টেষু চ ভূতেষু সর্বেষু ভরতর্ষভ
194.9
প্রভবঃ সর্বভূতানাং শাশ্বতঃ পুরুষোঽব্যয়ঃ
সুষ্বাপ ভগবান্বিষ্ণুরপ্শয্যামেক এব হ
নাগস্য ভোগে মহতি শেষস্যামিততেজসঃ
194.10
লোককর্তা মহাভাগ ভগবানচ্যুতো হরিঃ
নাগভোগেন মহতা পরিরভ্য মহীমিমাম্
194.11
স্বপতস্তস্য দেবস্য পদ্মং সূর্যসমপ্রভম্
নাভ্যাং বিনিঃসৃতং তত্র যত্রোত্পন্নঃ পিতামহঃ
সাক্ষাল্লোকগুরুর্ব্রহ্মা পদ্মে সূর্যেন্দুসপ্রভে
194.12
চতুর্বেদশ্চতুর্মূর্তিস্তথৈব চ চতুর্মুখঃ
স্বপ্রভাবাদ্দুরাধর্ষো মহাবলপরাক্রমঃ
194.13
কস্যচিত্ত্বথ কালস্য দানবৌ বীর্যবত্তরৌ
মধুশ্চ কৈটভশ্চৈব দৃষ্টবন্তৌ হরিং প্রভুম্
194.14
শয়ানং শয়নে দিব্যে নাগভোগে মহাদ্যুতিম্
বহুয়োজনবিস্তীর্ণে বহুয়োজনমায়তে
194.15
কিরীটকৌস্তুভধরং পীতকৌশেয়বাসসম্
দীপ্যমানং শ্রিয়া রাজংস্তেজসা বপুষা তথা
সহস্রসূর্যপ্রতিমমদ্ভুতোপমদর্শনম্
194.16
বিস্ময়ঃ সুমহানাসীন্মধুকৈটভয়োস্তদা
দৃষ্ট্বা পিতামহং চৈব পদ্মে পদ্মনিভেক্ষণম্
194.17
বিত্রাসয়েতামথ তৌ ব্রহ্মাণমমিতৌজসম্
বিত্রাস্যমানো বহুশো ব্রহ্মা তাভ্যাং মহায়শাঃ
অকম্পয়ত্পদ্মনালং ততোঽবুধ্যত কেশবঃ
194.18
অথাপশ্যত গোবিন্দো দানবৌ বীর্যবত্তরৌ
দৃষ্ট্বা তাবব্রবীদ্দেবঃ স্বাগতং বাং মহাবলৌ
দদানি বাং বরং শ্রেষ্ঠং প্রীতির্হি মম জায়তে
194.19
তৌ প্রহস্য হৃষীকেশং মহাবীর্যৌ মহাসুরৌ
প্রত্যব্রূতাং মহারাজ সহিতৌ মধুসূদনম্
194.20
আবাং বরয় দেব ত্বং বরদৌ স্বঃ সুরোত্তম
দাতারৌ স্বো বরং তুভ্যং তদ্ব্রবীহ্যবিচারয়ন্
194.21
ভগবানুবাচ
প্রতিগৃহ্ণে বরং বীরাবীপ্সিতশ্চ বরো মম
যুবাং হি বীর্যসংপন্নৌ ন বামস্তি সমঃ পুমান্
194.22
বধ্যত্বমুপগচ্ছেতাং মম সত্যপরাক্রমৌ
এতদিচ্ছাম্যহং কামং প্রাপ্তুং লোকহিতায় বৈ
194.23
মধুকৈটভাবূচতুঃ
অনৃতং নোক্তপূর্বং নৌ স্বৈরেষ্বপি কুতোঽন্যথা
সত্যে ধর্মে চ নিরতৌ বিদ্ধ্যাবাং পুরুষোত্তম
194.24
বলে রূপে চ বীর্যে চ শমে চ ন সমোঽস্তি নৌ
ধর্মে তপসি দানে চ শীলসত্ত্বদমেষু চ
194.25
উপপ্লবো মহানস্মানুপাবর্তত কেশব
উক্তং প্রতিকুরুষ্ব ত্বং কালো হি দুরতিক্রমঃ
194.26
আবামিচ্ছাবহে দেব কৃতমেকং ত্বয়া বিভো
অনাবৃতেঽস্মিন্নাকাশে বধং সুরবরোত্তম
194.27
পুত্রত্বমভিগচ্ছাব তব চৈব সুলোচন
বর এষ বৃতো দেব তদ্বিদ্ধি সুরসত্তম
194.28
ভগবানুবাচ
বাঢমেবং করিষ্যামি সর্বমেতদ্ভবিষ্যতি
194.29
মার্কণ্ডেয় উবাচ
বিচিন্ত্য ত্বথ গোবিন্দো নাপশ্যদ্যদনাবৃতম্
অবকাশং পৃথিব্যাং বা দিবি বা মধুসূদনঃ
194.30
স্বকাবনাবৃতাবূরূ দৃষ্ট্বা দেববরস্তদা
মধুকৈটভয়ো রাজঞ্শিরসী মধুসূদনঃ
চক্রেণ শিতধারেণ ন্যকৃন্তত মহায়শাঃ