Utshovঅধ্যায় 195
195.1
মার্কণ্ডেয় উবাচ
ধুন্ধুর্নাম মহাতেজাস্তয়োঃ পুত্রো মহাদ্যুতিঃ
স তপোঽতপ্যত মহন্মহাবীর্যপরাক্রমঃ
195.2
অতিষ্ঠদেকপাদেন কৃশো ধমনিসংততঃ
তস্মৈ ব্রহ্মা দদৌ প্রীতো বরং বব্রে স চ প্রভো
195.3
দেবদানবয়ক্ষাণাং সর্পগন্ধর্বরক্ষসাম্
অবধ্যোঽহং ভবেয়ং বৈ বর এষ বৃতো ময়া
195.4
এবং ভবতু গচ্ছেতি তমুবাচ পিতামহঃ
স এবমুক্তস্তত্পাদৌ মূর্ধ্না স্পৃশ্য জগাম হ
195.5
স তু ধুন্ধুর্বরং লব্ধ্বা মহাবীর্যপরাক্রমঃ
অনুস্মরন্পিতৃবধং ততো বিষ্ণুমুপাদ্রবৎ
195.6
স তু দেবান্সগন্ধর্বাঞ্জিত্বা ধুন্ধুরমর্ষণঃ
ববাধ সর্বানসকৃদ্দেবান্বিষ্ণুং চ বৈ ভৃশম্
195.7
সমুদ্রো বালুকাপূর্ণ উজ্জানক ইতি স্মৃতঃ
আগম্য চ স দুষ্টাত্মা তং দেশং ভরতর্ষভ
বাধতে স্ম পরং শক্ত্যা তমুত্তঙ্কাশ্রমং প্রভো
195.8
অন্তর্ভূমিগতস্তত্র বালুকান্তর্হিতস্তদা
মধুকৈটভয়োঃ পুত্রো ধুন্ধুর্ভীমপরাক্রমঃ
195.9
শেতে লোকবিনাশায় তপোবলসমাশ্রিতঃ
উত্তঙ্কস্যাশ্রমাভ্যাশে নিঃশ্বসন্পাবকার্চিষঃ
195.10
এতস্মিন্নেব কালে তু সভৃত্যবলবাহনঃ
কুবলাশ্বো নরপতিরন্বিতো বলশালিনাম্
195.11
সহস্রৈরেকবিংশত্যা পুত্রাণামরিমর্দনঃ
প্রায়াদুত্তঙ্কসহিতো ধুন্ধোস্তস্য নিবেশনম্
195.12
তমাবিশত্ততো বিষ্ণুর্ভগবাংস্তেজসা প্রভুঃ
উত্তঙ্কস্য নিয়োগেন লোকানাং হিতকাম্যয়া
195.13
তস্মিন্প্রয়াতে দুর্ধর্ষে দিবি শব্দো মহানভূৎ
এষ শ্রীমান্নৃপসুতো ধুন্ধুমারো ভবিষ্যতি
195.14
দিব্যৈশ্চ পুষ্পৈস্তং দেবাঃ সমন্তাত্পর্যবাকিরন্
দেবদুন্দুভয়শ্চৈব নেদুঃ স্বয়মুদীরিতাঃ
195.15
শীতশ্চ বায়ুঃ প্রববৌ প্রয়াণে তস্য ধীমতঃ
বিপাংসুলাং মহীং কুর্বন্ববর্ষ চ সুরেশ্বরঃ
195.16
অন্তরিক্ষে বিমানানি দেবতানাং যুধিষ্ঠির
তত্রৈব সমদৃশ্যন্ত ধুন্ধুর্যত্র মহাসুরঃ
195.17
কুবলাশ্বস্য ধুন্ধোশ্চ যুদ্ধকৌতূহলান্বিতাঃ
দেবগন্ধর্বসহিতাঃ সমবৈক্ষন্মহর্ষয়ঃ
195.18
নারায়ণেন কৌরব্য তেজসাপ্যায়িতস্তদা
স গতো নৃপতিঃ ক্ষিপ্রং পুত্রৈস্তৈঃ সর্বতোদিশম্
195.19
অর্ণবং খানয়ামাস কুবলাশ্বো মহীপতিঃ
কুবলাশ্বস্য পুত্রৈস্তু তস্মিন্বৈ বালুকার্ণবে
195.20
সপ্তভির্দিবসৈঃ খাত্বা দৃষ্টো ধুন্ধুর্মহাবলঃ
আসীদ্ঘোরং বপুস্তস্য বালুকান্তর্হিতং মহৎ
দীপ্যমানং যথা সূর্যস্তেজসা ভরতর্ষভ
195.21
ততো ধুন্ধুর্মহারাজ দিশমাশ্রিত্য পশ্চিমাম্
সুপ্তোঽভূদ্রাজশার্দূল কালানলসমদ্যুতিঃ
195.22
কুবলাশ্বস্য পুত্রৈস্তু সর্বতঃ পরিবারিতঃ
অভিদ্রুতঃ শরৈস্তীক্ষ্ণৈর্গদাভির্মুসলৈরপি
পট্টিশৈঃ পরিঘৈঃ প্রাসৈঃ খড্গৈশ্চ বিমলৈঃ শিতৈঃ
195.23
স বধ্যমানঃ সংক্রুদ্ধঃ সমুত্তস্থৌ মহাবলঃ
ক্রুদ্ধশ্চাভক্ষয়ত্তেষাং শস্ত্রাণি বিবিধানি চ
195.24
আস্যাদ্বমন্পাবকং স সংবর্তকসমং তদা
তান্সর্বান্নৃপতেঃ পুত্রানদহত্স্বেন তেজসা
195.25
মুখজেনাগ্নিনা ক্রুদ্ধো লোকানুদ্বর্তয়ন্নিব
ক্ষণেন রাজশার্দূল পুরেব কপিলঃ প্রভুঃ
সগরস্যাত্মজান্ক্রুদ্ধস্তদদ্ভুতমিবাভবৎ
195.26
তেষু ক্রোধাগ্নিদগ্ধেষু তদা ভরতসত্তম
তং প্রবুদ্ধং মহাত্মানং কুম্ভকর্ণমিবাপরম্
আসসাদ মহাতেজাঃ কুবলাশ্বো মহীপতিঃ
195.27
তস্য বারি মহারাজ সুস্রাব বহু দেহতঃ
তদাপীয়ত তত্তেজো রাজা বারিময়ং নৃপ
যোগী যোগেন বহ্নিং চ শময়ামাস বারিণা
195.28
ব্রহ্মাস্ত্রেণ তদা রাজা দৈত্যং ক্রূরপরাক্রমম্
দদাহ ভরতশ্রেষ্ঠ সর্বলোকাভয়ায় বৈ
195.29
সোঽস্ত্রেণ দগ্ধ্বা রাজর্ষিঃ কুবলাশ্বো মহাসুরম্
সুরশত্রুমমিত্রঘ্নস্ত্রিলোকেশ ইবাপরঃ
ধুন্ধুমার ইতি খ্যাতো নাম্না সমভবত্ততঃ
195.30
প্রীতৈশ্চ ত্রিদশৈঃ সর্বৈর্মহর্ষিসহিতৈস্তদা
বরং বৃণীষ্বেত্যুক্তঃ স প্রাঞ্জলিঃ প্রণতস্তদা
অতীব মুদিতো রাজন্নিদং বচনমব্রবীৎ
195.31
দদ্যাং বিত্তং দ্বিজাগ্র্যেভ্যঃ শত্রূণাং চাপি দুর্জয়ঃ
সখ্যং চ বিষ্ণুনা মে স্যাদ্ভূতেষ্বদ্রোহ এব চ
ধর্মে রতিশ্চ সততং স্বর্গে বাসস্তথাক্ষয়ঃ
195.32
তথাস্ত্বিতি ততো দেবৈঃ প্রীতৈরুক্তঃ স পার্থিবঃ
ঋষিভিশ্চ সগন্ধর্বৈরুত্তঙ্কেন চ ধীমতা
195.33
সভাজ্য চৈনং বিবিধৈরাশীর্বাদৈস্ততো নৃপম্
দেবা মহর্ষয়শ্চৈব স্বানি স্থানানি ভেজিরে
195.34
তস্য পুত্রাস্ত্রয়ঃ শিষ্টা যুধিষ্ঠির তদাভবন্
দৃঢাশ্বঃ কপিলাশ্বশ্চ চন্দ্রাশ্বশ্চৈব ভারত
তেভ্যঃ পরম্পরা রাজন্নিক্ষ্বাকূণাং মহাত্মনাম্
195.35
এবং স নিহতস্তেন কুবলাশ্বেন সত্তম
ধুন্ধুর্দৈত্যো মহাবীর্যো মধুকৈটভয়োঃ সুতঃ
195.36
কুবলাশ্বস্তু নৃপতির্ধুন্ধুমার ইতি স্মৃতঃ
নাম্না চ গুণসংয়ুক্তস্তদা প্রভৃতি সোঽভবৎ
195.37
এতত্তে সর্বমাখ্যাতং যন্মাং ত্বং পরিপৃচ্ছসি
ধৌন্ধুমারমুপাখ্যানং প্রথিতং যস্য কর্মণা
195.38
ইদং তু পুণ্যমাখ্যানং বিষ্ণোঃ সমনুকীর্তনম্
শৃণুয়াদ্যঃ স ধর্মাত্মা পুত্রবাংশ্চ ভবেন্নরঃ
195.39
আয়ুষ্মান্ধৃতিমাংশ্চৈব শ্রুত্বা ভবতি পর্বসু
ন চ ব্যাধিভয়ং কিংচিত্প্রাপ্নোতি বিগতজ্বরঃ