UtshovChapter 195
195.1
मार्कण्डेय उवाच
धुन्धुर्नाम महातेजास्तयोः पुत्रो महाद्युतिः
स तपोऽतप्यत महन्महावीर्यपराक्रमः
Markandeya uvacha
Dhundhurnama mahatejastayoh putro mahadyutih
Sa tapotapyata mahanmahaviryaparakramah
195.2
अतिष्ठदेकपादेन कृशो धमनिसंततः
तस्मै ब्रह्मा ददौ प्रीतो वरं वव्रे स च प्रभो
Atishthadekapadena krisho dhamanisantatah
Tasmai brahma dadau prito varam vavre sa cha prabho
195.3
देवदानवयक्षाणां सर्पगन्धर्वरक्षसाम्
अवध्योऽहं भवेयं वै वर एष वृतो मया
Devadanavayakshanam sarpagandharvarakshasam
Avadhyoham bhaveyam vai vara esha vrito maya
195.4
एवं भवतु गच्छेति तमुवाच पितामहः
स एवमुक्तस्तत्पादौ मूर्ध्ना स्पृश्य जगाम ह
Evam bhavatu gachchheti tamuvacha pitamahah
Sa evamuktastatpadau murdhna sprishya jagama ha
195.5
स तु धुन्धुर्वरं लब्ध्वा महावीर्यपराक्रमः
अनुस्मरन्पितृवधं ततो विष्णुमुपाद्रवत्
Sa tu dhundhurvaram labdhva mahaviryaparakramah
Anusmaranpitrivadham tato vishnumupadravat
195.6
स तु देवान्सगन्धर्वाञ्जित्वा धुन्धुरमर्षणः
बबाध सर्वानसकृद्देवान्विष्णुं च वै भृशम्
Sa tu devansagandharvanjitva dhundhuramarshanah
Babadha sarvanasakriddevanvishnum cha vai bhrisham
195.7
समुद्रो वालुकापूर्ण उज्जानक इति स्मृतः
आगम्य च स दुष्टात्मा तं देशं भरतर्षभ
बाधते स्म परं शक्त्या तमुत्तङ्काश्रमं प्रभो
Samudro valukapurna ujjanaka iti smritah
Agamya cha sa dushtatma tam desham bharatarshabha
Badhate sma param shaktya tamuttankashramam prabho
195.8
अन्तर्भूमिगतस्तत्र वालुकान्तर्हितस्तदा
मधुकैटभयोः पुत्रो धुन्धुर्भीमपराक्रमः
Antarbhumigatastatra valukantarhitastada
Madhukaitabhayoh putro dhundhurbhimaparakramah
195.9
शेते लोकविनाशाय तपोबलसमाश्रितः
उत्तङ्कस्याश्रमाभ्याशे निःश्वसन्पावकार्चिषः
Shete lokavinashaya tapobalasamashritah
Uttankasyashramabhyashe nihshvasanpavakarchishah
195.10
एतस्मिन्नेव काले तु सभृत्यबलवाहनः
कुवलाश्वो नरपतिरन्वितो बलशालिनाम्
Etasminneva kale tu sabhrityabalavahanah
Kuvalashvo narapatiranvito balashalinam
195.11
सहस्रैरेकविंशत्या पुत्राणामरिमर्दनः
प्रायादुत्तङ्कसहितो धुन्धोस्तस्य निवेशनम्
Sahasrairekavinshatya putranamarimardanah
Prayaduttankasahito dhundhostasya niveshanam
195.12
तमाविशत्ततो विष्णुर्भगवांस्तेजसा प्रभुः
उत्तङ्कस्य नियोगेन लोकानां हितकाम्यया
Tamavishattato vishnurbhagavanstejasa prabhuh
Uttankasya niyogena lokanam hitakamyaya
195.13
तस्मिन्प्रयाते दुर्धर्षे दिवि शब्दो महानभूत्
एष श्रीमान्नृपसुतो धुन्धुमारो भविष्यति
Tasminprayate durdharshe divi shabdo mahanabhut
Esha shrimannripasuto dhundhumaro bhavishyati
195.14
दिव्यैश्च पुष्पैस्तं देवाः समन्तात्पर्यवाकिरन्
देवदुन्दुभयश्चैव नेदुः स्वयमुदीरिताः
Divyaishcha pushpaistam devah samantatparyavakiran
Devadundubhayashchaiva neduh svayamudiritah
195.15
शीतश्च वायुः प्रववौ प्रयाणे तस्य धीमतः
विपांसुलां महीं कुर्वन्ववर्ष च सुरेश्वरः
Shitashcha vayuh pravavau prayane tasya dhimatah
Vipansulam mahim kurvanvavarsha cha sureshvarah
195.16
अन्तरिक्षे विमानानि देवतानां युधिष्ठिर
तत्रैव समदृश्यन्त धुन्धुर्यत्र महासुरः
Antarikshe vimanani devatanam yudhishthira
Tatraiva samadrishyanta dhundhuryatra mahasurah
195.17
कुवलाश्वस्य धुन्धोश्च युद्धकौतूहलान्विताः
देवगन्धर्वसहिताः समवैक्षन्महर्षयः
Kuvalashvasya dhundhoshcha yuddhakautuhalanvitah
Devagandharvasahitah samavaikshanmaharshayah
195.18
नारायणेन कौरव्य तेजसाप्यायितस्तदा
स गतो नृपतिः क्षिप्रं पुत्रैस्तैः सर्वतोदिशम्
Narayanena kauravya tejasapyayitastada
Sa gato nripatih kshipram putraistaih sarvatodisham
195.19
अर्णवं खानयामास कुवलाश्वो महीपतिः
कुवलाश्वस्य पुत्रैस्तु तस्मिन्वै वालुकार्णवे
Arnavam khanayamasa kuvalashvo mahipatih
Kuvalashvasya putraistu tasminvai valukarnave
195.20
सप्तभिर्दिवसैः खात्वा दृष्टो धुन्धुर्महाबलः
आसीद्घोरं वपुस्तस्य वालुकान्तर्हितं महत्
दीप्यमानं यथा सूर्यस्तेजसा भरतर्षभ
Saptabhirdivasaih khatva drishto dhundhurmahabalah
Asidghoram vapustasya valukantarhitam mahat
Dipyamanam yatha suryastejasa bharatarshabha
195.21
ततो धुन्धुर्महाराज दिशमाश्रित्य पश्चिमाम्
सुप्तोऽभूद्राजशार्दूल कालानलसमद्युतिः
Tato dhundhurmaharaja dishamashritya pashchimam
Suptobhudrajashardula kalanalasamadyutih
195.22
कुवलाश्वस्य पुत्रैस्तु सर्वतः परिवारितः
अभिद्रुतः शरैस्तीक्ष्णैर्गदाभिर्मुसलैरपि
पट्टिशैः परिघैः प्रासैः खड्गैश्च विमलैः शितैः
Kuvalashvasya putraistu sarvatah parivaritah
Abhidrutah sharaistikshnairgadabhirmusalairapi
Pattishaih parighaih prasaih khadgaishcha vimalaih shitaih
195.23
स वध्यमानः संक्रुद्धः समुत्तस्थौ महाबलः
क्रुद्धश्चाभक्षयत्तेषां शस्त्राणि विविधानि च
Sa vadhyamanah sankruddhah samuttasthau mahabalah
Kruddhashchabhakshayattesham shastrani vividhani cha
195.24
आस्याद्वमन्पावकं स संवर्तकसमं तदा
तान्सर्वान्नृपतेः पुत्रानदहत्स्वेन तेजसा
Asyadvamanpavakam sa sanvartakasamam tada
Tansarvannripateh putranadahatsvena tejasa
195.25
मुखजेनाग्निना क्रुद्धो लोकानुद्वर्तयन्निव
क्षणेन राजशार्दूल पुरेव कपिलः प्रभुः
सगरस्यात्मजान्क्रुद्धस्तदद्भुतमिवाभवत्
Mukhajenagnina kruddho lokanudvartayanniva
Kshanena rajashardula pureva kapilah prabhuh
Sagarasyatmajankruddhastadadbhutamivabhavat
195.26
तेषु क्रोधाग्निदग्धेषु तदा भरतसत्तम
तं प्रबुद्धं महात्मानं कुम्भकर्णमिवापरम्
आससाद महातेजाः कुवलाश्वो महीपतिः
Teshu krodhagnidagdheshu tada bharatasattama
Tam prabuddham mahatmanam kumbhakarnamivaparam
Asasada mahatejah kuvalashvo mahipatih
195.27
तस्य वारि महाराज सुस्राव बहु देहतः
तदापीयत तत्तेजो राजा वारिमयं नृप
योगी योगेन वह्निं च शमयामास वारिणा
Tasya vari maharaja susrava bahu dehatah
Tadapiyata tattejo raja varimayam nripa
Yogi yogena vahnim cha shamayamasa varina
195.28
ब्रह्मास्त्रेण तदा राजा दैत्यं क्रूरपराक्रमम्
ददाह भरतश्रेष्ठ सर्वलोकाभयाय वै
Brahmastrena tada raja daityam kruraparakramam
Dadaha bharatashreshtha sarvalokabhayaya vai
195.29
सोऽस्त्रेण दग्ध्वा राजर्षिः कुवलाश्वो महासुरम्
सुरशत्रुममित्रघ्नस्त्रिलोकेश इवापरः
धुन्धुमार इति ख्यातो नाम्ना समभवत्ततः
Sostrena dagdhva rajarshih kuvalashvo mahasuram
Surashatrumamitraghnastrilokesha ivaparah
Dhundhumara iti khyato namna samabhavattatah
195.30
प्रीतैश्च त्रिदशैः सर्वैर्महर्षिसहितैस्तदा
वरं वृणीष्वेत्युक्तः स प्राञ्जलिः प्रणतस्तदा
अतीव मुदितो राजन्निदं वचनमब्रवीत्
Pritaishcha tridashaih sarvairmaharshisahitaistada
Varam vrinishvetyuktah sa pranjalih pranatastada
Ativa mudito rajannidam vachanamabravit
195.31
दद्यां वित्तं द्विजाग्र्येभ्यः शत्रूणां चापि दुर्जयः
सख्यं च विष्णुना मे स्याद्भूतेष्वद्रोह एव च
धर्मे रतिश्च सततं स्वर्गे वासस्तथाक्षयः
Dadyam vittam dvijagryebhyah shatrunam chapi durjayah
Sakhyam cha vishnuna me syadbhuteshvadroha eva cha
Dharme ratishcha satatam svarge vasastathakshayah
195.32
तथास्त्विति ततो देवैः प्रीतैरुक्तः स पार्थिवः
ऋषिभिश्च सगन्धर्वैरुत्तङ्केन च धीमता
Tathastviti tato devaih pritairuktah sa parthivah
Rishibhishcha sagandharvairuttankena cha dhimata
195.33
सभाज्य चैनं विविधैराशीर्वादैस्ततो नृपम्
देवा महर्षयश्चैव स्वानि स्थानानि भेजिरे
Sabhajya chainam vividhairashirvadaistato nripam
Deva maharshayashchaiva svani sthanani bhejire
195.34
तस्य पुत्रास्त्रयः शिष्टा युधिष्ठिर तदाभवन्
दृढाश्वः कपिलाश्वश्च चन्द्राश्वश्चैव भारत
तेभ्यः परम्परा राजन्निक्ष्वाकूणां महात्मनाम्
Tasya putrastrayah shishta yudhishthira tadabhavan
Dridhashvah kapilashvashcha chandrashvashchaiva bharata
Tebhyah parampara rajannikshvakunam mahatmanam
195.35
एवं स निहतस्तेन कुवलाश्वेन सत्तम
धुन्धुर्दैत्यो महावीर्यो मधुकैटभयोः सुतः
Evam sa nihatastena kuvalashvena sattama
Dhundhurdaityo mahaviryo madhukaitabhayoh sutah
195.36
कुवलाश्वस्तु नृपतिर्धुन्धुमार इति स्मृतः
नाम्ना च गुणसंयुक्तस्तदा प्रभृति सोऽभवत्
Kuvalashvastu nripatirdhundhumara iti smritah
Namna cha gunasanyuktastada prabhriti sobhavat
195.37
एतत्ते सर्वमाख्यातं यन्मां त्वं परिपृच्छसि
धौन्धुमारमुपाख्यानं प्रथितं यस्य कर्मणा
Etatte sarvamakhyatam yanmam tvam pariprichchhasi
Dhaundhumaramupakhyanam prathitam yasya karmana
195.38
इदं तु पुण्यमाख्यानं विष्णोः समनुकीर्तनम्
शृणुयाद्यः स धर्मात्मा पुत्रवांश्च भवेन्नरः
Idam tu punyamakhyanam vishnoh samanukirtanam
Shrinuyadyah sa dharmatma putravanshcha bhavennarah
195.39
आयुष्मान्धृतिमांश्चैव श्रुत्वा भवति पर्वसु
न च व्याधिभयं किंचित्प्राप्नोति विगतज्वरः
Ayushmandhritimanshchaiva shrutva bhavati parvasu
Na cha vyadhibhayam kinchitprapnoti vigatajvarah