অধ্যায় 196

196.1

বৈশংপায়ন উবাচ
ততো যুধিষ্ঠিরো রাজা মার্কণ্ডেয়ং মহাদ্যুতিম্
পপ্রচ্ছ ভরতশ্রেষ্ঠো ধর্মপ্রশ্নং সুদুর্বচম্

শ্রোতুমিচ্ছামি ভগবন্স্ত্রীণাং মাহাত্ম্যমুত্তমম্
কথ্যমানং ত্বয়া বিপ্র সূক্ষ্মং ধর্মং চ তত্ত্বতঃ

প্রত্যক্ষেণ হি বিপ্রর্ষে দেবা দৃশ্যন্তি সত্তম
সূর্যাচন্দ্রমসৌ বায়ুঃ পৃথিবী বহ্নিরেব চ

পিতা মাতা চ ভগবন্গাব এব চ সত্তম
যচ্চান্যদেব বিহিতং তচ্চাপি ভৃগুনন্দন

মন্যেঽহং গুরুবত্সর্বমেকপত্ন্যস্তথা স্ত্রিয়ঃ
পতিব্রতানাং শুশ্রূষা দুষ্করা প্রতিভাতি মে

পতিব্রতানাং মাহাত্ম্যং বক্তুমর্হসি নঃ প্রভো
নিরুধ্য চেন্দ্রিয়গ্রামং মনঃ সংরুধ্য চানঘ
পতিং দৈবতবচ্চাপি চিন্তয়ন্ত্যঃ স্থিতা হি যাঃ

ভগবন্দুষ্করং হ্যেতত্প্রতিভাতি মম প্রভো
মাতাপিতৃষু শুশ্রূষা স্ত্রীণাং ভর্তৃষু চ দ্বিজ

স্ত্রীণাং ধর্মাত্সুঘোরাদ্ধি নান্যং পশ্যামি দুষ্করম্
সাধ্বাচারাঃ স্ত্রিয়ো ব্রহ্মন্যত্কুর্বন্তি সদাদৃতাঃ
দুষ্করং বত কুর্বন্তি পিতরো মাতরশ্চ বৈ

একপত্ন্যশ্চ যা নার্যো যাশ্চ সত্যং বদন্ত্যুত
কুক্ষিণা দশ মাসাংশ্চ গর্ভং সংধারয়ন্তি যাঃ
নার্যঃ কালেন সংভূয় কিমদ্ভুততরং ততঃ

সংশয়ং পরমং প্রাপ্য বেদনামতুলামপি
প্রজায়ন্তে সুতান্নার্যো দুঃখেন মহতা বিভো
পুষ্ণন্তি চাপি মহতা স্নেহেন দ্বিজসত্তম

যে চ ক্রূরেষু সর্বেষু বর্তমানা জুগুপ্সিতাঃ
স্বকর্ম কুর্বন্তি সদা দুষ্করং তচ্চ মে মতম্

ক্ষত্রধর্মসমাচারং তথ্যং চাখ্যাহি মে দ্বিজ
ধর্মঃ সুদুর্লভো বিপ্র নৃশংসেন দুরাত্মনা

এতদিচ্ছামি ভগবন্প্রশ্নং প্রশ্নবিদাং বর
শ্রোতুং ভৃগুকুলশ্রেষ্ঠ শুশ্রূষে তব সুব্রত

মার্কণ্ডেয় উবাচ
হন্ত তে সর্বমাখ্যাস্যে প্রশ্নমেতং সুদুর্বচম্
তত্ত্বেন ভরতশ্রেষ্ঠ গদতস্তন্নিবোধ মে

মাতরং সদৃশীং তাত পিতৄনন্যে চ মন্যতে
দুষ্করং কুরুতে মাতা বিবর্ধয়তি যা প্রজাঃ

তপসা দেবতেজ্যাভির্বন্দনেন তিতিক্ষয়া
অভিচারৈরুপায়ৈশ্চ ঈহন্তে পিতরঃ সুতান্

এবং কৃচ্ছ্রেণ মহতা পুত্রং প্রাপ্য সুদুর্লভম্
চিন্তয়ন্তি সদা বীর কীদৃশোঽয়ং ভবিষ্যতি

আশংসতে চ পুত্রেষু পিতা মাতা চ ভারত
যশঃ কীর্তিমথৈশ্বর্যং প্রজা ধর্মং তথৈব চ

তয়োরাশাং তু সফলাং যঃ করোতি স ধর্মবিৎ
পিতা মাতা চ রাজেন্দ্র তুষ্যতো যস্য নিত্যদা
ইহ প্রেত্য চ তস্যাথ কীর্তির্ধর্মশ্চ শাশ্বতঃ

নৈব যজ্ঞঃ স্ত্রিয়ঃ কশ্চিন্ন শ্রাদ্ধং নোপবাসকম্
যা তু ভর্তরি শুশ্রূষা তয়া স্বর্গমুপাশ্নুতে

এতত্প্রকরণং রাজন্নধিকৃত্য যুধিষ্ঠির
প্রতিব্রতানাং নিয়তং ধর্মং চাবহিতঃ শৃণু