Utshovঅধ্যায় 197
197.1
মার্কণ্ডেয় উবাচ
কশ্চিদ্দ্বিজাতিপ্রবরো বেদাধ্যায়ী তপোধনঃ
তপস্বী ধর্মশীলশ্চ কৌশিকো নাম ভারত
197.2
সাঙ্গোপনিষদান্বেদানধীতে দ্বিজসত্তমঃ
স বৃক্ষমূলে কস্মিংশ্চিদ্বেদানুচ্চারয়ন্স্থিতঃ
197.3
উপরিষ্টাচ্চ বৃক্ষস্য বলাকা সংন্যলীয়ত
তয়া পুরীষমুত্সৃষ্টং ব্রাহ্মণস্য তদোপরি
197.4
তামবেক্ষ্য ততঃ ক্রুদ্ধঃ সমপধ্যায়ত দ্বিজঃ
ভৃশং ক্রোধাভিভূতেন বলাকা সা নিরীক্ষিতা
197.5
অপধ্যাতা চ বিপ্রেণ ন্যপতদ্বসুধাতলে
বলাকাং পতিতাং দৃষ্ট্বা গতসত্ত্বামচেতনাম্
কারুণ্যাদভিসংতপ্তঃ পর্যশোচত তাং দ্বিজঃ
197.6
অকার্যং কৃতবানস্মি রাগদ্বেষবলাত্কৃতঃ
ইত্যুক্ত্বা বহুশো বিদ্বান্গ্রামং ভৈক্ষায় সংশ্রিতঃ
197.7
গ্রামে শুচীনি প্রচরন্কুলানি ভরতর্ষভ
প্রবিষ্টস্তত্কুলং যত্র পূর্বং চরিতবাংস্তু সঃ
197.8
দেহীতি যাচমানো বৈ তিষ্ঠেত্যুক্তঃ স্ত্রিয়া ততঃ
শৌচং তু যাবত্কুরুতে ভাজনস্য কুটুম্বিনী
197.9
এতস্মিন্নন্তরে রাজন্ক্ষুধাসংপীডিতো ভৃশম্
ভর্তা প্রবিষ্টঃ সহসা তস্যা ভরতসত্তম
197.10
সা তু দৃষ্ট্বা পতিং সাধ্বী ব্রাহ্মণং ব্যপহায় তম্
পাদ্যমাচমনীয়ং চ দদৌ ভর্ত্রে তথাসনম্
197.11
প্রহ্বা পর্যচরচ্চাপি ভর্তারমসিতেক্ষণা
আহারেণাথ ভক্ষ্যৈশ্চ বাক্যৈঃ সুমধুরৈস্তথা
197.12
উচ্ছিষ্টং ভুঞ্জতে ভর্তুঃ সা তু নিত্যং যুধিষ্ঠির
দৈবতং চ পতিং মেনে ভর্তুশ্চিত্তানুসারিণী
197.13
ন কর্মণা ন মনসা নাত্যশ্নান্নাপি চাপিবৎ
তং সর্বভাবোপগতা পতিশুশ্রূষণে রতা
197.14
সাধ্বাচারা শুচির্দক্ষা কুটুম্বস্য হিতৈষিণী
ভর্তুশ্চাপি হিতং যত্তত্সততং সানুবর্ততে
197.15
দেবতাতিথিভৃত্যানাং শ্বশ্রূশ্বশুরয়োস্তথা
শুশ্রূষণপরা নিত্যং সততং সংয়তেন্দ্রিয়া
197.16
সা ব্রাহ্মণং তদা দৃষ্ট্বা সংস্থিতং ভৈক্ষকাঙ্ক্ষিণম্
কুর্বতী পতিশুশ্রূষাং সস্মারাথ শুভেক্ষণা
197.17
ব্রীডিতা সাভবত্সাধ্বী তদা ভরতসত্তম
ভিক্ষামাদায় বিপ্রায় নির্জগাম যশস্বিনী
197.18
ব্রাহ্মণ উবাচ
কিমিদং ভবতি ত্বং মাং তিষ্ঠেত্যুক্ত্বা বরাঙ্গনে
উপরোধং কৃতবতী ন বিসর্জিতবত্যসি
197.19
মার্কণ্ডেয় উবাচ
ব্রাহ্মণং ক্রোধসংতপ্তং জ্বলন্তমিব তেজসা
দৃষ্ট্বা সাধ্বী মনুষ্যেন্দ্র সান্ত্বপূর্বং বচোঽব্রবীৎ
197.20
ক্ষন্তুমর্হসি মে বিপ্র ভর্তা মে দৈবতং মহৎ
স চাপি ক্ষুধিতঃ শ্রান্তঃ প্রাপ্তঃ শুশ্রূষিতো ময়া
197.21
ব্রাহ্মণ উবাচ
ব্রাহ্মণা ন গরীয়াংসো গরীয়াংস্তে পতিঃ কৃতঃ
গৃহস্থধর্মে বর্তন্তী ব্রাহ্মণানবমন্যসে
197.22
ইন্দ্রোঽপ্যেষাং প্রণমতে কিং পুনর্মানুষা ভুবি
অবলিপ্তে ন জানীষে বৃদ্ধানাং ন শ্রুতং ত্বয়া
ব্রাহ্মণা হ্যগ্নিসদৃশা দহেয়ুঃ পৃথিবীমপি
197.23
স্ত্র্যুবাচ
নাবজানাম্যহং বিপ্রান্দেবৈস্তুল্যান্মনস্বিনঃ
অপরাধমিমং বিপ্র ক্ষন্তুমর্হসি মেঽনঘ
197.24
জানামি তেজো বিপ্রাণাং মহাভাগ্যং চ ধীমতাম্
অপেয়ঃ সাগরঃ ক্রোধাত্কৃতো হি লবণোদকঃ
197.25
তথৈব দীপ্ততপসাং মুনীনাং ভাবিতাত্মনাম্
যেষাং ক্রোধাগ্নিরদ্যাপি দণ্ডকে নোপশাম্যতি
197.26
ব্রাহ্মণানাং পরিভবাদ্বাতাপিশ্চ দুরাত্মবান্
অগস্ত্যমৃষিমাসাদ্য জীর্ণঃ ক্রূরো মহাসুরঃ
197.27
প্রভাবা বহবশ্চাপি শ্রূয়ন্তে ব্রহ্মবাদিনাম্
ক্রোধঃ সুবিপুলো ব্রহ্মন্প্রসাদশ্চ মহাত্মনাম্
197.28
অস্মিংস্ত্বতিক্রমে ব্রহ্মন্ক্ষন্তুমর্হসি মেঽনঘ
পতিশুশ্রূষয়া ধর্মো যঃ স মে রোচতে দ্বিজ
197.29
দৈবতেষ্বপি সর্বেষু ভর্তা মে দৈবতং পরম্
অবিশেষেণ তস্যাহং কুর্যাং ধর্মং দ্বিজোত্তম
197.30
শুশ্রূষায়াঃ ফলং পশ্য পত্যুর্ব্রাহ্মণ যাদৃশম্
বলাকা হি ত্বয়া দগ্ধা রোষাত্তদ্বিদিতং মম
197.31
ক্রোধঃ শত্রুঃ শরীরস্থো মনুষ্যাণাং দ্বিজোত্তম
যঃ ক্রোধমোহৌ ত্যজতি তং দেবা ব্রাহ্মণং বিদুঃ
197.32
যো বদেদিহ সত্যানি গুরুং সংতোষয়েত চ
হিংসিতশ্চ ন হিংসেত তং দেবা ব্রাহ্মণং বিদুঃ
197.33
জিতেন্দ্রিয়ো ধর্মপরঃ স্বাধ্যায়নিরতঃ শুচিঃ
কামক্রোধৌ বশে যস্য তং দেবা ব্রাহ্মণং বিদুঃ
197.34
যস্য চাত্মসমো লোকো ধর্মজ্ঞস্য মনস্বিনঃ
সর্বধর্মেষু চ রতস্তং দেবা ব্রাহ্মণং বিদুঃ
197.35
যোঽধ্যাপয়েদধীয়ীত যজেদ্বা যাজয়ীত বা
দদ্যাদ্বাপি যথাশক্তি তং দেবা ব্রাহ্মণং বিদুঃ
197.36
ব্রহ্মচারী চ বেদান্যো অধীয়ীত দ্বিজোত্তমঃ
স্বাধ্যায়ে চাপ্রমত্তো বৈ তং দেবা ব্রাহ্মণং বিদুঃ
197.37
যদ্ব্রাহ্মণানাং কুশলং তদেষাং পরিকীর্তয়েৎ
সত্যং তথা ব্যাহরতাং নানৃতে রমতে মনঃ
197.38
ধনং তু ব্রাহ্মণস্যাহুঃ স্বাধ্যায়ং দমমার্জবম্
ইন্দ্রিয়াণাং নিগ্রহং চ শাশ্বতং দ্বিজসত্তম
সত্যার্জবে ধর্মমাহুঃ পরং ধর্মবিদো জনাঃ
197.39
দুর্জ্ঞেয়ঃ শাশ্বতো ধর্মঃ স তু সত্যে প্রতিষ্ঠিতঃ
শ্রুতিপ্রমাণো ধর্মঃ স্যাদিতি বৃদ্ধানুশাসনম্
197.40
বহুধা দৃশ্যতে ধর্মঃ সূক্ষ্ম এব দ্বিজোত্তম
ভবানপি চ ধর্মজ্ঞঃ স্বাধ্যায়নিরতঃ শুচিঃ
ন তু তত্ত্বেন ভগবন্ধর্মান্বেত্সীতি মে মতিঃ
197.41
মাতাপিতৃভ্যাং শুশ্রূষুঃ সত্যবাদী জিতেন্দ্রিয়ঃ
মিথিলায়াং বসন্ব্যাধঃ স তে ধর্মান্প্রবক্ষ্যতি
তত্র গচ্ছস্ব ভদ্রং তে যথাকামং দ্বিজোত্তম
197.42
অত্যুক্তমপি মে সর্বং ক্ষন্তুমর্হস্যনিন্দিত
স্ত্রিয়ো হ্যবধ্যাঃ সর্বেষাং যে ধর্মবিদুষো জনাঃ
197.43
ব্রাহ্মণ উবাচ
প্রীতোঽস্মি তব ভদ্রং তে গতঃ ক্রোধশ্চ শোভনে
উপালম্ভস্ত্বয়া হ্যুক্তো মম নিঃশ্রেয়সং পরম্
স্বস্তি তেঽস্তু গমিষ্যামি সাধয়িষ্যামি শোভনে
197.44
মার্কণ্ডেয় উবাচ
তয়া বিসৃষ্টো নির্গম্য স্বমেব ভবনং যয়ৌ
বিনিন্দন্স দ্বিজোঽঽত্মানং কৌশিকো নরসত্তম