Utshovঅধ্যায় 198
198.1
মার্কণ্ডেয় উবাচ
চিন্তয়িত্বা তদাশ্চর্যং স্ত্রিয়া প্রোক্তমশেষতঃ
বিনিন্দন্স দ্বিজোঽঽত্মানমাগস্কৃত ইবাবভৌ
198.2
চিন্তয়ানঃ স ধর্মস্য সূক্ষ্মাং গতিমথাব্রবীৎ
শ্রদ্দধানেন ভাব্যং বৈ গচ্ছামি মিথিলামহম্
198.3
কৃতাত্মা ধর্মবিত্তস্যাং ব্যাধো নিবসতে কিল
তং গচ্ছাম্যহমদ্যৈব ধর্মং প্রষ্টুং তপোধনম্
198.4
ইতি সংচিন্ত্য মনসা শ্রদ্দধানঃ স্ত্রিয়া বচঃ
বলাকাপ্রত্যয়েনাসৌ ধর্ম্যৈশ্চ বচনৈঃ শুভৈঃ
সংপ্রতস্থে স মিথিলাং কৌতূহলসমন্বিতঃ
198.5
অতিক্রামন্নরণ্যানি গ্রামাংশ্চ নগরাণি চ
ততো জগাম মিথিলাং জনকেন সুরক্ষিতাম্
198.6
ধর্মসেতুসমাকীর্ণাং যজ্ঞোত্সববতীং শুভাম্
গোপুরাট্টালকবতীং গৃহপ্রাকারশোভিতাম্
198.7
প্রবিশ্য স পুরীং রম্যাং বিমানৈর্বহুভির্বৃতাম্
পণ্যৈশ্চ বহুভির্যুক্তাং সুবিভক্তমহাপথাম্
198.8
অশ্বৈ রথৈস্তথা নাগৈর্যানৈশ্চ বহুভির্বৃতাম্
হৃষ্টপুষ্টজনাকীর্ণাং নিত্যোত্সবসমাকুলাম্
198.9
সোঽপশ্যদ্বহুবৃত্তান্তাং ব্রাহ্মণঃ সমতিক্রমন্
ধর্মব্যাধমপৃচ্ছচ্চ স চাস্য কথিতো দ্বিজৈঃ
198.10
অপশ্যত্তত্র গত্বা তং সূনামধ্যে ব্যবস্থিতম্
মার্গমাহিষমাংসানি বিক্রীণন্তং তপস্বিনম্
আকুলত্বাত্তু ক্রেতৄণামেকান্তে সংস্থিতো দ্বিজঃ
198.11
স তু জ্ঞাত্বা দ্বিজং প্রাপ্তং সহসা সংভ্রমোত্থিতঃ
আজগাম যতো বিপ্রঃ স্থিত একান্ত আসনে
198.12
ব্যাধ উবাচ
অভিবাদয়ে ত্বা ভগবন্স্বাগতং তে দ্বিজোত্তম
অহং ব্যাধস্তু ভদ্রং তে কিং করোমি প্রশাধি মাম্
198.13
একপত্ন্যা যদুক্তোঽসি গচ্ছ ত্বং মিথিলামিতি
জানাম্যেতদহং সর্বং যদর্থং ত্বমিহাগতঃ
198.14
মার্কণ্ডেয় উবাচ
শ্রুত্বা তু তস্য তদ্বাক্যং স বিপ্রো ভৃশহর্ষিতঃ
দ্বিতীয়মিদমাশ্চর্যমিত্যচিন্তয়ত দ্বিজঃ
198.15
অদেশস্থং হি তে স্থানমিতি ব্যাধোঽব্রবীদ্দ্বিজম্
গৃহং গচ্ছাব ভগবন্যদি রোচয়সেঽনঘ
198.16
বাঢমিত্যেব সংহৃষ্টো বিপ্রো বচনমব্রবীৎ
অগ্রতস্তু দ্বিজং কৃত্বা স জগাম গৃহান্প্রতি
198.17
প্রবিশ্য চ গৃহং রম্যমাসনেনাভিপূজিতঃ
পাদ্যমাচমনীয়ং চ প্রতিগৃহ্য দ্বিজোত্তমঃ
198.18
ততঃ সুখোপবিষ্টস্তং ব্যাধং বচনমব্রবীৎ
কর্মৈতদ্বৈ ন সদৃশং ভবতঃ প্রতিভাতি মে
অনুতপ্যে ভৃশং তাত তব ঘোরেণ কর্মণা
198.19
ব্যাধ উবাচ
কুলোচিতমিদং কর্ম পিতৃপৈতামহং মম
বর্তমানস্য মে ধর্মে স্বে মন্যুং মা কৃথা দ্বিজ
198.20
ধাত্রা তু বিহিতং পূর্বং কর্ম স্বং পালয়াম্যহম্
প্রয়ত্নাচ্চ গুরূ বৃদ্ধৌ শুশ্রূষেঽহং দ্বিজোত্তম
198.21
সত্যং বদে নাভ্যসূয়ে যথাশক্তি দদামি চ
দেবতাতিথিভৃত্যানামবশিষ্টেন বর্তয়ে
198.22
ন কুত্সয়াম্যহং কিংচিন্ন গর্হে বলবত্তরম্
কৃতমন্বেতি কর্তারং পুরা কর্ম দ্বিজোত্তম
198.23
কৃষিগোরক্ষ্যবাণিজ্যমিহ লোকস্য জীবনম্
দণ্ডনীতিস্ত্রয়ী বিদ্যা তেন লোকা ভবন্ত্যুত
198.24
কর্ম শূদ্রে কৃষির্বৈশ্যে সংগ্রামঃ ক্ষত্রিয়ে স্মৃতঃ
ব্রহ্মচর্যং তপো মন্ত্রাঃ সত্যং চ ব্রাহ্মণে সদা
198.25
রাজা প্রশাস্তি ধর্মেণ স্বকর্মনিরতাঃ প্রজাঃ
বিকর্মাণশ্চ যে কেচিত্তান্যুনক্তি স্বকর্মসু
198.26
ভেতব্যং হি সদা রাজ্ঞাং প্রজানামধিপা হি তে
মারয়ন্তি বিকর্মস্থং লুব্ধা মৃগমিবেষুভিঃ
198.27
জনকস্যেহ বিপ্রর্ষে বিকর্মস্থো ন বিদ্যতে
স্বকর্মনিরতা বর্ণাশ্চত্বারোঽপি দ্বিজোত্তম
198.28
স এষ জনকো রাজা দুর্বৃত্তমপি চেত্সুতম্
দণ্ড্যং দণ্ডে নিক্ষিপতি তথা ন গ্লাতি ধার্মিকম্
198.29
সুয়ুক্তচারো নৃপতিঃ সর্বং ধর্মেণ পশ্যতি
শ্রীশ্চ রাজ্যং চ দণ্ডশ্চ ক্ষত্রিয়াণাং দ্বিজোত্তম
198.30
রাজানো হি স্বধর্মেণ শ্রিয়মিচ্ছন্তি ভূয়সীম্
সর্বেষামেব বর্ণানাং ত্রাতা রাজা ভবত্যুত
198.31
পরেণ হি হতান্ব্রহ্মন্বরাহমহিষানহম্
ন স্বয়ং হন্মি বিপ্রর্ষে বিক্রীণামি সদা ত্বহম্
198.32
ন ভক্ষয়ামি মাংসানি ঋতুগামী তথা হ্যহম্
সদোপবাসী চ তথা নক্তভোজী তথা দ্বিজ
198.33
অশীলশ্চাপি পুরুষো ভূত্বা ভবতি শীলবান্
প্রাণিহিংসারতশ্চাপি ভবতে ধার্মিকঃ পুনঃ
198.34
ব্যভিচারান্নরেন্দ্রাণাং ধর্মঃ সংকীর্যতে মহান্
অধর্মো বর্ধতে চাপি সংকীর্যন্তে তথা প্রজাঃ
198.35
উরুণ্ডা বামনাঃ কুব্জাঃ স্থূলশীর্ষাস্তথৈব চ
ক্লীবাশ্চান্ধাশ্চ জায়ন্তে বধিরা লম্বচূচুকাঃ
পার্থিবানামধর্মত্বাত্প্রজানামভবঃ সদা
198.36
স এষ রাজা জনকঃ সর্বং ধর্মেণ পশ্যতি
অনুগৃহ্ণন্প্রজাঃ সর্বাঃ স্বধর্মনিরতাঃ সদা
198.37
যে চৈব মাং প্রশংসন্তি যে চ নিন্দন্তি মানবাঃ
সর্বান্সুপরিণীতেন কর্মণা তোষয়াম্যহম্
198.38
যে জীবন্তি স্বধর্মেণ সংভুঞ্জন্তে চ পার্থিবাঃ
ন কিংচিদুপজীবন্তি দক্ষা উত্থানশীলিনঃ
198.39
শক্ত্যান্নদানং সততং তিতিক্ষা ধর্মনিত্যতা
যথার্হং প্রতিপূজা চ সর্বভূতেষু বৈ দয়া
ত্যাগান্নান্যত্র মর্ত্যানাং গুণাস্তিষ্ঠন্তি পূরুষে
198.40
মৃষাবাদং পরিহরেত্কুর্যাত্প্রিয়ময়াচিতঃ
ন চ কামান্ন সংরম্ভান্ন দ্বেষাদ্ধর্মমুত্সৃজেৎ
198.41
প্রিয়ে নাতিভৃশং হৃষ্যেদপ্রিয়ে ন চ সংজ্বরেৎ
ন মুহ্যেদর্থকৃচ্ছ্রেষু ন চ ধর্মং পরিত্যজেৎ
198.42
কর্ম চেত্কিংচিদন্যত্স্যাদিতরন্ন সমাচরেৎ
যত্কল্যাণমভিধ্যায়েত্তত্রাত্মানং নিয়োজয়েৎ
198.43
ন পাপং প্রতি পাপঃ স্যাত্সাধুরেব সদা ভবেৎ
আত্মনৈব হতঃ পাপো যঃ পাপং কর্তুমিচ্ছতি
198.44
কর্ম চৈতদসাধূনাং বৃজিনানামসাধুবৎ
ন ধর্মোঽস্তীতি মন্বানাঃ শুচীনবহসন্তি যে
অশ্রদ্দধানা ধর্মস্য তে নশ্যন্তি ন সংশয়ঃ
198.45
মহাদৃতিরিবাধ্মাতঃ পাপো ভবতি নিত্যদা
মূঢানামবলিপ্তানামসারং ভাষিতং ভবেৎ
দর্শয়ত্যন্তরাত্মানং দিবা রূপমিবাংশুমান্
198.46
ন লোকে রাজতে মূর্খঃ কেবলাত্মপ্রশংসয়া
অপি চেহ মৃজা হীনঃ কৃতবিদ্যঃ প্রকাশতে
198.47
অব্রুবন্কস্যচিন্নিন্দামাত্মপূজামবর্ণয়ন্
ন কশ্চিদ্গুণসংপন্নঃ প্রকাশো ভুবি দৃশ্যতে
198.48
বিকর্মণা তপ্যমানঃ পাপাদ্বিপরিমুচ্যতে
নৈতত্কুর্যাং পুনরিতি দ্বিতীয়াত্পরিমুচ্যতে
198.49
কর্মণা যেন তেনেহ পাপাদ্দ্বিজবরোত্তম
এবং শ্রুতিরিয়ং ব্রহ্মন্ধর্মেষু পরিদৃশ্যতে
198.50
পাপান্যবুদ্ধ্বেহ পুরা কৃতানি; প্রাগ্ধর্মশীলো বিনিহন্তি পশ্চাৎ
ধর্মো ব্রহ্মন্নুদতে পূরুষাণাং; যত্কুর্বতে পাপমিহ প্রমাদাৎ
198.51
পাপং কৃত্বা হি মন্যেত নাহমস্মীতি পূরুষঃ
চিকীর্ষেদেব কল্যাণং শ্রদ্দধানোঽনসূয়কঃ
198.52
বসনস্যেব ছিদ্রাণি সাধূনাং বিবৃণোতি যঃ
পাপং চেত্পুরুষঃ কৃত্বা কল্যাণমভিপদ্যতে
মুচ্যতে সর্বপাপেভ্যো মহাভ্রৈরিব চন্দ্রমাঃ
198.53
যথাদিত্যঃ সমুদ্যন্বৈ তমঃ সর্বং ব্যপোহতি
এবং কল্যাণমাতিষ্ঠন্সর্বপাপৈঃ প্রমুচ্যতে
198.54
পাপানাং বিদ্ধ্যধিষ্ঠানং লোভমেব দ্বিজোত্তম
লুব্ধাঃ পাপং ব্যবস্যন্তি নরা নাতিবহুশ্রুতাঃ
অধর্মা ধর্মরূপেণ তৃণৈঃ কূপা ইবাবৃতাঃ
198.55
তেষাং দমঃ পবিত্রাণি প্রলাপা ধর্মসংশ্রিতাঃ
সর্বং হি বিদ্যতে তেষু শিষ্টাচারঃ সুদুর্লভঃ
198.56
মার্কণ্ডেয় উবাচ
স তু বিপ্রো মহাপ্রাজ্ঞো ধর্মব্যাধমপৃচ্ছত
শিষ্টাচারং কথমহং বিদ্যামিতি নরোত্তম
এতন্মহামতে ব্যাধ প্রব্রবীহি যথাতথম্
198.57
ব্যাধ উবাচ
যজ্ঞো দানং তপো বেদাঃ সত্যং চ দ্বিজসত্তম
পঞ্চৈতানি পবিত্রাণি শিষ্টাচারেষু নিত্যদা
198.58
কামক্রোধৌ বশে কৃত্বা দম্ভং লোভমনার্জবম্
ধর্ম ইত্যেব সংতুষ্টাস্তে শিষ্টাঃ শিষ্টসংমতাঃ
198.59
ন তেষাং বিদ্যতেঽবৃত্তং যজ্ঞস্বাধ্যায়শীলিনাম্
আচারপালনং চৈব দ্বিতীয়ং শিষ্টলক্ষণম্
198.60
গুরুশুশ্রূষণং সত্যমক্রোধো দানমেব চ
এতচ্চতুষ্টয়ং ব্রহ্মঞ্শিষ্টাচারেষু নিত্যদা
198.61
শিষ্টাচারে মনঃ কৃত্বা প্রতিষ্ঠাপ্য চ সর্বশঃ
যাময়ং লভতে তুষ্টিং সা ন শক্যা হ্যতোঽন্যথা
198.62
বেদস্যোপনিষত্সত্যং সত্যস্যোপনিষদ্দমঃ
দমস্যোপনিষত্ত্যাগঃ শিষ্টাচারেষু নিত্যদা
198.63
যে তু ধর্মমসূয়ন্তে বুদ্ধিমোহান্বিতা নরাঃ
অপথা গচ্ছতাং তেষামনুয়াতাপি পীড্যতে
198.64
যে তু শিষ্টাঃ সুনিয়তাঃ শ্রুতিত্যাগপরায়ণাঃ
ধর্ম্যং পন্থানমারূঢাঃ সত্যধর্মপরায়ণাঃ
198.65
নিয়চ্ছন্তি পরাং বুদ্ধিং শিষ্টাচারান্বিতা নরাঃ
উপাধ্যায়মতে যুক্তাঃ স্থিত্যা ধর্মার্থদর্শিনঃ
198.66
নাস্তিকান্ভিন্নমর্যাদান্ক্রূরান্পাপমতৌ স্থিতান্
ত্যজ তাঞ্জ্ঞানমাশ্রিত্য ধার্মিকানুপসেব্য চ
198.67
কামলোভগ্রহাকীর্ণাং পঞ্চেন্দ্রিয়জলাং নদীম্
নাবং ধৃতিময়ীং কৃত্বা জন্মদুর্গাণি সংতর
198.68
ক্রমেণ সংচিতো ধর্মো বুদ্ধিয়োগময়ো মহান্
শিষ্টাচারে ভবেত্সাধূ রাগঃ শুক্লেব বাসসি
198.69
অহিংসা সত্যবচনং সর্বভূতহিতং পরম্
অহিংসা পরমো ধর্মঃ স চ সত্যে প্রতিষ্ঠিতঃ
সত্যে কৃত্বা প্রতিষ্ঠাং তু প্রবর্তন্তে প্রবৃত্তয়ঃ
198.70
সত্যমেব গরীয়স্তু শিষ্টাচারনিষেবিতম্
আচারশ্চ সতাং ধর্মঃ সন্তশ্চাচারলক্ষণাঃ
198.71
যো যথাপ্রকৃতির্জন্তুঃ স্বাং স্বাং প্রকৃতিমশ্নুতে
পাপাত্মা ক্রোধকামাদীন্দোষানাপ্নোত্যনাত্মবান্
198.72
আরম্ভো ন্যায়য়ুক্তো যঃ স হি ধর্ম ইতি স্মৃতঃ
অনাচারস্ত্বধর্মেতি এতচ্ছিষ্টানুশাসনম্
198.73
অক্রুধ্যন্তোঽনসূয়ন্তো নিরহংকারমত্সরাঃ
ঋজবঃ শমসংপন্নাঃ শিষ্টাচারা ভবন্তি তে
198.74
ত্রৈবিদ্যবৃদ্ধাঃ শুচয়ো বৃত্তবন্তো মনস্বিনঃ
গুরুশুশ্রূষবো দান্তাঃ শিষ্টাচারা ভবন্ত্যুত
198.75
তেষামদীনসত্ত্বানাং দুষ্করাচারকর্মণাম্
স্বৈঃ কর্মভিঃ সত্কৃতানাং ঘোরত্বং সংপ্রণশ্যতি
198.76
তং সদাচারমাশ্চর্যং পুরাণং শাশ্বতং ধ্রুবম্
ধর্মং ধর্মেণ পশ্যন্তঃ স্বর্গং যান্তি মনীষিণঃ
198.77
আস্তিকা মানহীনাশ্চ দ্বিজাতিজনপূজকাঃ
শ্রুতবৃত্তোপসংপন্নাঃ তে সন্তঃ স্বর্গগামিনঃ
198.78
বেদোক্তঃ পরমো ধর্মো ধর্মশাস্ত্রেষু চাপরঃ
শিষ্টাচীর্ণশ্চ শিষ্টানাং ত্রিবিধং ধর্মলক্ষণম্
198.79
পারণং চাপি বিদ্যানাং তীর্থানামবগাহনম্
ক্ষমা সত্যার্জবং শৌচং শিষ্টাচারনিদর্শনম্
198.80
সর্বভূতদয়াবন্তো অহিংসানিরতাঃ সদা
পরুষং ন প্রভাষন্তে সদা সন্তো দ্বিজপ্রিয়াঃ
198.81
শুভানামশুভানাং চ কর্মণাং ফলসংচয়ে
বিপাকমভিজানন্তি তে শিষ্টাঃ শিষ্টসংমতাঃ
198.82
ন্যায়োপেতা গুণোপেতাঃ সর্বলোকহিতৈষিণঃ
সন্তঃ স্বর্গজিতঃ শুক্লাঃ সংনিবিষ্টাশ্চ সত্পথে
198.83
দাতারঃ সংবিভক্তারো দীনানুগ্রহকারিণঃ
সর্বভূতদয়াবন্তস্তে শিষ্টাঃ শিষ্টসংমতাঃ
198.84
সর্বপূজ্যাঃ শ্রুতধনাস্তথৈব চ তপস্বিনঃ
দাননিত্যাঃ সুখাঁল্লোকানাপ্নুবন্তীহ চ শ্রিয়ম্
198.85
পীডয়া চ কলত্রস্য ভৃত্যানাং চ সমাহিতাঃ
অতিশক্ত্যা প্রয়চ্ছন্তি সন্তঃ সদ্ভিঃ সমাগতাঃ
198.86
লোকয়াত্রাং চ পশ্যন্তো ধর্মমাত্মহিতানি চ
এবং সন্তো বর্তমানা এধন্তে শাশ্বতীঃ সমাঃ
198.87
অহিংসা সত্যবচনমানৃশংস্যমথার্জবম্
অদ্রোহো নাতিমানশ্চ হ্রীস্তিতিক্ষা দমঃ শমঃ
198.88
ধীমন্তো ধৃতিমন্তশ্চ ভূতানামনুকম্পকাঃ
অকামদ্বেষসংয়ুক্তাস্তে সন্তো লোকসত্কৃতাঃ
198.89
ত্রীণ্যেব তু পদান্যাহুঃ সতাং বৃত্তমনুত্তমম্
ন দ্রুহ্যেচ্চৈব দদ্যাচ্চ সত্যং চৈব সদা বদেৎ
198.90
সর্বত্র চ দয়াবন্তঃ সন্তঃ করুণবেদিনঃ
গচ্ছন্তীহ সুসংতুষ্টা ধর্ম্যং পন্থানমুত্তমম্
শিষ্টাচারা মহাত্মানো যেষাং ধর্মঃ সুনিশ্চিতঃ
198.91
অনসূয়া ক্ষমা শান্তিঃ সংতোষঃ প্রিয়বাদিতা
কামক্রোধপরিত্যাগঃ শিষ্টাচারনিষেবণম্
198.92
কর্মণা শ্রুতসংপন্নং সতাং মার্গমনুত্তমম্
শিষ্টাচারং নিষেবন্তে নিত্যং ধর্মেষ্বতন্দ্রিতাঃ
198.93
প্রজ্ঞাপ্রাসাদমারুহ্য মুহ্যতো মহতো জনান্
প্রেক্ষন্তো লোকবৃত্তানি বিবিধানি দ্বিজোত্তম
অতিপুণ্যানি পাপানি তানি দ্বিজবরোত্তম
198.94
এতত্তে সর্বমাখ্যাতং যথাপ্রজ্ঞং যথাশ্রুতম্
শিষ্টাচারগুণান্ব্রহ্মন্পুরস্কৃত্য দ্বিজর্ষভ