Utshovঅধ্যায় 199
199.1
মার্কণ্ডেয় উবাচ
স তু বিপ্রমথোবাচ ধর্মব্যাধো যুধিষ্ঠির
যদহং হ্যাচরে কর্ম ঘোরমেতদসংশয়ম্
199.2
বিধিস্তু বলবান্ব্রহ্মন্দুস্তরং হি পুরাকৃতম্
পুরাকৃতস্য পাপস্য কর্মদোষো ভবত্যয়ম্
দোষস্যৈতস্য বৈ ব্রহ্মন্বিঘাতে যত্নবানহম্
199.3
বিধিনা বিহিতে পূর্বং নিমিত্তং ঘাতকো ভবেৎ
নিমিত্তভূতা হি বয়ং কর্মণোঽস্য দ্বিজোত্তম
199.4
যেষাং হতানাং মাংসানি বিক্রীণামো বয়ং দ্বিজ
তেষামপি ভবেদ্ধর্ম উপভোগেন ভক্ষণাৎ
দেবতাতিথিভৃত্যানাং পিতৄণাং প্রতিপূজনাৎ
199.5
ওষধ্যো বীরুধশ্চাপি পশবো মৃগপক্ষিণঃ
অন্নাদ্যভূতা লোকস্য ইত্যপি শ্রূয়তে শ্রুতিঃ
199.6
আত্মমাংসপ্রদানেন শিবিরৌশীনরো নৃপঃ
স্বর্গং সুদুর্লভং প্রাপ্তঃ ক্ষমাবান্দ্বিজসত্তম
199.7
রাজ্ঞো মহানসে পূর্বং রন্তিদেবস্য বৈ দ্বিজ
দ্বে সহস্রে তু বধ্যেতে পশূনামন্বহং তদা
199.8
সমাংসং দদতো হ্যন্নং রন্তিদেবস্য নিত্যশঃ
অতুলা কীর্তিরভবন্নৃপস্য দ্বিজসত্তম
চাতুর্মাস্যেষু পশবো বধ্যন্ত ইতি নিত্যশঃ
199.9
অগ্নয়ো মাংসকামাশ্চ ইত্যপি শ্রূয়তে শ্রুতিঃ
যজ্ঞেষু পশবো ব্রহ্মন্বধ্যন্তে সততং দ্বিজৈঃ
সংস্কৃতাঃ কিল মন্ত্রৈশ্চ তেঽপি স্বর্গমবাপ্নুবন্
199.10
যদি নৈবাগ্নয়ো ব্রহ্মন্মাংসকামাভবন্পুরা
ভক্ষ্যং নৈব ভবেন্মাংসং কস্যচিদ্দ্বিজসত্তম
199.11
অত্রাপি বিধিরুক্তশ্চ মুনিভির্মাংসভক্ষণে
দেবতানাং পিতৄণাং চ ভুঙ্ক্তে দত্ত্বা তু যঃ সদা
যথাবিধি যথাশ্রদ্ধং ন স দুষ্যতি ভক্ষণাৎ
199.12
অমাংসাশী ভবত্যেবমিত্যপি শ্রূয়তে শ্রুতিঃ
ভার্যাং গচ্ছন্ব্রহ্মচারী ঋতৌ ভবতি ব্রাহ্মণঃ
199.13
সত্যানৃতে বিনিশ্চিত্য অত্রাপি বিধিরুচ্যতে
সৌদাসেন পুরা রাজ্ঞা মানুষা ভক্ষিতা দ্বিজ
শাপাভিভূতেন ভৃশমত্র কিং প্রতিভাতি তে
199.14
স্বধর্ম ইতি কৃত্বা তু ন ত্যজামি দ্বিজোত্তম
পুরাকৃতমিতি জ্ঞাত্বা জীবাম্যেতেন কর্মণা
199.15
স্বকর্ম ত্যজতো ব্রহ্মন্নধর্ম ইহ দৃশ্যতে
স্বকর্মনিরতো যস্তু স ধর্ম ইতি নিশ্চয়ঃ
199.16
পূর্বং হি বিহিতং কর্ম দেহিনং ন বিমুঞ্চতি
ধাত্রা বিধিরয়ং দৃষ্টো বহুধা কর্মনির্ণয়ে
199.17
দ্রষ্টব্যং তু ভবেত্প্রাজ্ঞ ক্রূরে কর্মণি বর্ততা
কথং কর্ম শুভং কুর্যাং কথং মুচ্যে পরাভবাৎ
কর্মণস্তস্য ঘোরস্য বহুধা নির্ণয়ো ভবেৎ
199.18
দানে চ সত্যবাক্যে চ গুরুশুশ্রূষণে তথা
দ্বিজাতিপূজনে চাহং ধর্মে চ নিরতঃ সদা
অতিবাদাতিমানাভ্যাং নিবৃত্তোঽস্মি দ্বিজোত্তম
199.19
কৃষিং সাধ্বিতি মন্যন্তে তত্র হিংসা পরা স্মৃতা
কর্ষন্তো লাঙ্গলৈঃ পুংসো ঘ্নন্তি ভূমিশয়ান্বহূন্
জীবানন্যাংশ্চ বহুশস্তত্র কিং প্রতিভাতি তে
199.20
ধান্যবীজানি যান্যাহুর্ব্রীহ্যাদীনি দ্বিজোত্তম
সর্বাণ্যেতানি জীবানি তত্র কিং প্রতিভাতি তে
199.21
অধ্যাক্রম্য পশূংশ্চাপি ঘ্নন্তি বৈ ভক্ষয়ন্তি চ
বৃক্ষানথৌষধীশ্চৈব ছিন্দন্তি পুরুষা দ্বিজ
199.22
জীবা হি বহবো ব্রহ্মন্বৃক্ষেষু চ ফলেষু চ
উদকে বহবশ্চাপি তত্র কিং প্রতিভাতি তে
199.23
সর্বং ব্যাপ্তমিদং ব্রহ্মন্প্রাণিভিঃ প্রাণিজীবনৈঃ
মত্স্যা গ্রসন্তে মত্স্যাংশ্চ তত্র কিং প্রতিভাতি তে
199.24
সত্ত্বৈঃ সত্ত্বানি জীবন্তি বহুধা দ্বিজসত্তম
প্রাণিনোঽন্যোন্যভক্ষাশ্চ তত্র কিং প্রতিভাতি তে
199.25
চঙ্ক্রম্যমাণা জীবাংশ্চ ধরণীসংশ্রিতান্বহূন্
পদ্ভ্যাং ঘ্নন্তি নরা বিপ্র তত্র কিং প্রতিভাতি তে
199.26
উপবিষ্টাঃ শয়ানাশ্চ ঘ্নন্তি জীবাননেকশঃ
জ্ঞানবিজ্ঞানবন্তশ্চ তত্র কিং প্রতিভাতি তে
199.27
জীবৈর্গ্রস্তমিদং সর্বমাকাশং পৃথিবী তথা
অবিজ্ঞানাচ্চ হিংসন্তি তত্র কিং প্রতিভাতি তে
199.28
অহিংসেতি যদুক্তং হি পুরুষৈর্বিস্মিতৈঃ পুরা
কে ন হিংসন্তি জীবান্বৈ লোকেঽস্মিন্দ্বিজসত্তম
বহু সংচিন্ত্য ইহ বৈ নাস্তি কশ্চিদহিংসকঃ
199.29
অহিংসায়াং তু নিরতা যতয়ো দ্বিজসত্তম
কুর্বন্ত্যেব হি হিংসাং তে যত্নাদল্পতরা ভবেৎ
199.30
আলক্ষ্যাশ্চৈব পুরুষাঃ কুলে জাতা মহাগুণাঃ
মহাঘোরাণি কর্মাণি কৃত্বা লজ্জন্তি বৈ ন চ
199.31
সুহৃদঃ সুহৃদোঽন্যাংশ্চ দুর্হৃদশ্চাপি দুর্হৃদঃ
সম্যক্প্রবৃত্তান্পুরুষান্ন সম্যগনুপশ্যতঃ
199.32
সমৃদ্ধৈশ্চ ন নন্দন্তি বান্ধবা বান্ধবৈরপি
গুরূংশ্চৈব বিনিন্দন্তি মূঢাঃ পণ্ডিতমানিনঃ
199.33
বহু লোকে বিপর্যস্তং দৃশ্যতে দ্বিজসত্তম
ধর্ময়ুক্তমধর্মং চ তত্র কিং প্রতিভাতি তে
199.34
বক্তুং বহুবিধং শক্যং ধর্মাধর্মেষু কর্মসু
স্বকর্মনিরতো যো হি স যশঃ প্রাপ্নুয়ান্মহৎ