Utshovঅধ্যায় 200
200.1
মার্কণ্ডেয় উবাচ
ধর্মব্যাধস্তু নিপুণং পুনরেব যুধিষ্ঠির
বিপ্রর্ষভমুবাচেদং সর্বধর্মভৃতাং বরঃ
200.2
শ্রুতিপ্রমাণো ধর্মো হি বৃদ্ধানামিতি ভাষিতম্
সূক্ষ্মা গতির্হি ধর্মস্য বহুশাখা হ্যনন্তিকা
200.3
প্রাণাত্যয়ে বিবাহে চ বক্তব্যমনৃতং ভবেৎ
অনৃতং চ ভবেত্সত্যং সত্যং চৈবানৃতং ভবেৎ
200.4
যদ্ভূতহিতমত্যন্তং তত্সত্যমিতি ধারণা
বিপর্যয়কৃতোঽধর্মঃ পশ্য ধর্মস্য সূক্ষ্মতাম্
200.5
যত্করোত্যশুভং কর্ম শুভং বা দ্বিজসত্তম
অবশ্যং তত্সমাপ্নোতি পুরুষো নাত্র সংশয়ঃ
200.6
বিষমাং চ দশাং প্রাপ্য দেবান্গর্হতি বৈ ভৃশম্
আত্মনঃ কর্মদোষাণি ন বিজানাত্যপণ্ডিতঃ
200.7
মূঢো নৈকৃতিকশ্চাপি চপলশ্চ দ্বিজোত্তম
সুখদুঃখবিপর্যাসো যদা সমুপপদ্যতে
নৈনং প্রজ্ঞা সুনীতং বা ত্রায়তে নৈব পৌরুষম্
200.8
যো যমিচ্ছেদ্যথা কামং তং তং কামং সমশ্নুয়াৎ
যদি স্যাদপরাধীনং পুরুষস্য ক্রিয়াফলম্
200.9
সংয়তাশ্চাপি দক্ষাশ্চ মতিমন্তশ্চ মানবাঃ
দৃশ্যন্তে নিষ্ফলাঃ সন্তঃ প্রহীণাঃ সর্বকর্মভিঃ
200.10
ভূতানামপরঃ কশ্চিদ্ধিংসায়াং সততোত্থিতঃ
বঞ্চনায়াং চ লোকস্য স সুখেনেহ জীবতি
200.11
অচেষ্টমানমাসীনং শ্রীঃ কংচিদুপতিষ্ঠতি
কশ্চিত্কর্মাণি কুর্বন্হি ন প্রাপ্যমধিগচ্ছতি
200.12
দেবানিষ্ট্বা তপস্তপ্ত্বা কৃপণৈঃ পুত্রগৃদ্ধিভিঃ
দশমাসধৃতা গর্ভে জায়ন্তে কুলপাংসনাঃ
200.13
অপরে ধনধান্যৈশ্চ ভোগৈশ্চ পিতৃসংচিতৈঃ
বিপুলৈরভিজায়ন্তে লব্ধাস্তৈরেব মঙ্গলৈঃ
200.14
কর্মজা হি মনুষ্যাণাং রোগা নাস্ত্যত্র সংশয়ঃ
আধিভিশ্চৈব বাধ্যন্তে ব্যাধৈঃ ক্ষুদ্রমৃগা ইব
200.15
তে চাপি কুশলৈর্বৈদ্যৈর্নিপুণৈঃ সংভৃতৌষধৈঃ
ব্যাধয়ো বিনিবার্যন্তে মৃগা ব্যাধৈরিব দ্বিজ
200.16
যেষামস্তি চ ভোক্তব্যং গ্রহণীদোষপীডিতাঃ
ন শক্নুবন্তি তে ভোক্তুং পশ্য ধর্মভৃতাং বর
200.17
অপরে বাহুবলিনঃ ক্লিশ্যন্তে বহবো জনাঃ
দুঃখেন চাধিগচ্ছন্তি ভোজনং দ্বিজসত্তম
200.18
ইতি লোকমনাক্রন্দং মোহশোকপরিপ্লুতম্
স্রোতসাসকৃদাক্ষিপ্তং হ্রিয়মাণং বলীয়সা
200.19
ন ম্রিয়েয়ুর্ন জীর্যেয়ুঃ সর্বে স্যুঃ সার্বকামিকাঃ
নাপ্রিয়ং প্রতিপশ্যেয়ুর্বশিত্বং যদি বৈ ভবেৎ
200.20
উপর্যুপরি লোকস্য সর্বো গন্তুং সমীহতে
যততে চ যথাশক্তি ন চ তদ্বর্ততে তথা
200.21
বহবঃ সংপ্রদৃশ্যন্তে তুল্যনক্ষত্রমঙ্গলাঃ
মহচ্চ ফলবৈষম্যং দৃশ্যতে কর্মসংধিষু
200.22
ন কশ্চিদীশতে ব্রহ্মন্স্বয়ংগ্রাহস্য সত্তম
কর্মণাং প্রাকৃতানাং বৈ ইহ সিদ্ধিঃ প্রদৃশ্যতে
200.23
যথা শ্রুতিরিয়ং ব্রহ্মঞ্জীবঃ কিল সনাতনঃ
শরীরমধ্রুবং লোকে সর্বেষাং প্রাণিনামিহ
200.24
বধ্যমানে শরীরে তু দেহনাশো ভবত্যুত
জীবঃ সংক্রমতেঽন্যত্র কর্মবন্ধনিবন্ধনঃ
200.25
ব্রাহ্মণ উবাচ
কথং ধর্মভৃতাং শ্রেষ্ঠ জীবো ভবতি শাশ্বতঃ
এতদিচ্ছাম্যহং জ্ঞাতুং তত্ত্বেন বদতাং বর
200.26
ব্যাধ উবাচ
ন জীবনাশোঽস্তি হি দেহভেদে; মিথ্যৈতদাহুর্ম্রিয়তেতি মূঢাঃ
জীবস্তু দেহান্তরিতঃ প্রয়াতি; দশার্ধতৈবাস্য শরীরভেদঃ
200.27
অন্যো হি নাশ্নাতি কৃতং হি কর্ম; স এব কর্তা সুখদুঃখভাগী
যত্তেন কিংচিদ্ধি কৃতং হি কর্ম; তদশ্নুতে নাস্তি কৃতস্য নাশঃ
200.28
অপুণ্যশীলাশ্চ ভবন্তি পুণ্যা; নরোত্তমাঃ পাপকৃতো ভবন্তি
নরোঽনুয়াতস্ত্বিহ কর্মভিঃ স্বৈ;স্ততঃ সমুত্পদ্যতি ভাবিতস্তৈঃ
200.29
ব্রাহ্মণ উবাচ
কথং সংভবতে যোনৌ কথং বা পুণ্যপাপয়োঃ
জাতীঃ পুণ্যা হ্যপুণ্যাশ্চ কথং গচ্ছতি সত্তম
200.30
ব্যাধ উবাচ
গর্ভাধানসমায়ুক্তং কর্মেদং সংপ্রদৃশ্যতে
সমাসেন তু তে ক্ষিপ্রং প্রবক্ষ্যামি দ্বিজোত্তম
200.31
যথা সংভৃতসংভারঃ পুনরেব প্রজায়তে
শুভকৃচ্ছুভয়োনীষু পাপকৃত্পাপয়োনিষু
200.32
শুভৈঃ প্রয়োগৈর্দেবত্বং ব্যামিশ্রৈর্মানুষো ভবেৎ
মোহনীয়ৈর্বিয়োনীষু ত্বধোগামী চ কিল্বিষৈঃ
200.33
জাতিমৃত্যুজরাদুঃখৈঃ সততং সমভিদ্রুতঃ
সংসারে পচ্যমানশ্চ দোষৈরাত্মকৃতৈর্নরঃ
200.34
তির্যগ্যোনিসহস্রাণি গত্বা নরকমেব চ
জীবাঃ সংপরিবর্তন্তে কর্মবন্ধনিবন্ধনাঃ
200.35
জন্তুস্তু কর্মভিস্তৈস্তৈঃ স্বকৃতৈঃ প্রেত্য দুঃখিতঃ
তদ্দুঃখপ্রতিঘাতার্থমপুণ্যাং যোনিমশ্নুতে
200.36
ততঃ কর্ম সমাদত্তে পুনরন্যন্নবং বহু
পচ্যতে তু পুনস্তেন ভুক্ত্বাপথ্যমিবাতুরঃ
200.37
অজস্রমেব দুঃখার্তোঽদুঃখিতঃ সুখসংজ্ঞিতঃ
ততোঽনিবৃত্তবন্ধত্বাত্কর্মণামুদয়াদপি
পরিক্রামতি সংসারে চক্রবদ্বহুবেদনঃ
200.38
স চেন্নিবৃত্তবন্ধস্তু বিশুদ্ধশ্চাপি কর্মভিঃ
প্রাপ্নোতি সুকৃতাঁল্লোকান্যত্র গত্বা ন শোচতি
200.39
পাপং কুর্বন্পাপবৃত্তঃ পাপস্যান্তং ন গচ্ছতি
তস্মাত্পুণ্যং যতেত্কর্তুং বর্জয়েত চ পাতকম্
200.40
অনসূয়ুঃ কৃতজ্ঞশ্চ কল্যাণান্যেব সেবতে
সুখানি ধর্মমর্থং চ স্বর্গং চ লভতে নরঃ
200.41
সংস্কৃতস্য হি দান্তস্য নিয়তস্য যতাত্মনঃ
প্রাজ্ঞস্যানন্তরা বৃত্তিরিহ লোকে পরত্র চ
200.42
সতাং ধর্মেণ বর্তেত ক্রিয়াং শিষ্টবদাচরেৎ
অসংক্লেশেন লোকস্য বৃত্তিং লিপ্সেত বৈ দ্বিজ
200.43
সন্তি হ্যাগতবিজ্ঞানাঃ শিষ্টাঃ শাস্ত্রবিচক্ষণাঃ
স্বধর্মেণ ক্রিয়া লোকে কর্মণঃ সোঽপ্যসংকরঃ
200.44
প্রাজ্ঞো ধর্মেণ রমতে ধর্মং চৈবোপজীবতি
তস্য ধর্মাদবাপ্তেষু ধনেষু দ্বিজসত্তম
তস্যৈব সিঞ্চতে মূলং গুণান্পশ্যতি যত্র বৈ
200.45
ধর্মাত্মা ভবতি হ্যেবং চিত্তং চাস্য প্রসীদতি
স মৈত্রজনসংতুষ্ট ইহ প্রেত্য চ নন্দতি
200.46
শব্দং স্পর্শং তথা রূপং গন্ধানিষ্টাংশ্চ সত্তম
প্রভুত্বং লভতে চাপি ধর্মস্যৈতত্ফলং বিদুঃ
200.47
ধর্মস্য চ ফলং লব্ধ্বা ন তৃপ্যতি মহাদ্বিজ
অতৃপ্যমাণো নির্বেদমাদত্তে জ্ঞানচক্ষুষা
200.48
প্রজ্ঞাচক্ষুর্নর ইহ দোষং নৈবানুরুধ্যতে
বিরজ্যতি যথাকামং ন চ ধর্মং বিমুঞ্চতি
200.49
সর্বত্যাগে চ যততে দৃষ্ট্বা লোকং ক্ষয়াত্মকম্
ততো মোক্ষে প্রয়ততে নানুপায়াদুপায়তঃ
200.50
এবং নির্বেদমাদত্তে পাপং কর্ম জহাতি চ
ধার্মিকশ্চাপি ভবতি মোক্ষং চ লভতে পরম্
200.51
তপো নিঃশ্রেয়সং জন্তোস্তস্য মূলং শমো দমঃ
তেন সর্বানবাপ্নোতি কামান্যান্মনসেচ্ছতি
200.52
ইন্দ্রিয়াণাং নিরোধেন সত্যেন চ দমেন চ
ব্রহ্মণঃ পদমাপ্নোতি যত্পরং দ্বিজসত্তম
200.53
ব্রাহ্মণ উবাচ
ইন্দ্রিয়াণি তু যান্যাহুঃ কানি তানি যতব্রত
নিগ্রহশ্চ কথং কার্যো নিগ্রহস্য চ কিং ফলম্
200.54
কথং চ ফলমাপ্নোতি তেষাং ধর্মভৃতাং বর
এতদিচ্ছামি তত্ত্বেন ধর্মং জ্ঞাতুং সুধার্মিক