অধ্যায় 201

201.1

মার্কণ্ডেয় উবাচ
এবমুক্তস্তু বিপ্রেণ ধর্মব্যাধো যুধিষ্ঠির
প্রত্যুবাচ যথা বিপ্রং তচ্ছৃণুষ্ব নরাধিপ

ব্যাধ উবাচ
বিজ্ঞানার্থং মনুষ্যাণাং মনঃ পূর্বং প্রবর্ততে
তত্প্রাপ্য কামং ভজতে ক্রোধং চ দ্বিজসত্তম

ততস্তদর্থং যততে কর্ম চারভতে মহৎ
ইষ্টানাং রূপগন্ধানামভ্যাসং চ নিষেবতে

ততো রাগঃ প্রভবতি দ্বেষশ্চ তদনন্তরম্
ততো লোভঃ প্রভবতি মোহশ্চ তদনন্তরম্

তস্য লোভাভিভূতস্য রাগদ্বেষহতস্য চ
ন ধর্মে জায়তে বুদ্ধির্ব্যাজাদ্ধর্মং করোতি চ

ব্যাজেন চরতে ধর্মমর্থং ব্যাজেন রোচতে
ব্যাজেন সিধ্যমানেষু ধনেষু দ্বিজসত্তম
তত্রৈব রমতে বুদ্ধিস্ততঃ পাপং চিকীর্ষতি

সুহৃদ্ভির্বার্যমাণশ্চ পণ্ডিতৈশ্চ দ্বিজোত্তম
উত্তরং শ্রুতিসংবদ্ধং ব্রবীতি শ্রুতিয়োজিতম্

অধর্মস্ত্রিবিধস্তস্য বর্ধতে রাগদোষতঃ
পাপং চিন্তয়তে চাপি ব্রবীতি চ করোতি চ

তস্যাধর্মপ্রবৃত্তস্য গুণা নশ্যন্তি সাধবঃ
একশীলাশ্চ মিত্রত্বং ভজন্তে পাপকর্মিণঃ

স তেনাসুখমাপ্নোতি পরত্র চ বিহন্যতে
পাপাত্মা ভবতি হ্যেবং ধর্মলাভং তু মে শৃণু

যস্ত্বেতান্প্রজ্ঞয়া দোষান্পূর্বমেবানুপশ্যতি
কুশলঃ সুখদুঃখেষু সাধূংশ্চাপ্যুপসেবতে
তস্য সাধুসমারম্ভাদ্বুদ্ধির্ধর্মেষু জায়তে

ব্রাহ্মণ উবাচ
ব্রবীষি সূনৃতং ধর্মং যস্য বক্তা ন বিদ্যতে
দিব্যপ্রভাবঃ সুমহানৃষিরেব মতোঽসি মে

ব্যাধ উবাচ
ব্রাহ্মণা বৈ মহাভাগাঃ পিতরোঽগ্রভুজঃ সদা
তেষাং সর্বাত্মনা কার্যং প্রিয়ং লোকে মনীষিণা

যত্তেষাং চ প্রিয়ং তত্তে বক্ষ্যামি দ্বিজসত্তম
নমস্কৃত্বা ব্রাহ্মণেভ্যো ব্রাহ্মীং বিদ্যাং নিবোধ মে

ইদং বিশ্বং জগত্সর্বমজয্যং চাপি সর্বশঃ
মহাভূতাত্মকং ব্রহ্মন্নাতঃ পরতরং ভবেৎ

মহাভূতানি খং বায়ুরগ্নিরাপস্তথা চ ভূঃ
শব্দঃ স্পর্শশ্চ রূপং চ রসো গন্ধশ্চ তদ্গুণাঃ

তেষামপি গুণাঃ সর্বে গুণবৃত্তিঃ পরস্পরম্
পূর্বপূর্বগুণাঃ সর্বে ক্রমশো গুণিষু ত্রিষু

ষষ্ঠস্তু চেতনা নাম মন ইত্যভিধীয়তে
সপ্তমী তু ভবেদ্বুদ্ধিরহংকারস্ততঃ পরম্

ইন্দ্রিয়াণি চ পঞ্চৈব রজঃ সত্ত্বং তমস্তথা
ইত্যেষ সপ্তদশকো রাশিরব্যক্তসংজ্ঞকঃ

সর্বৈরিহেন্দ্রিয়ার্থৈস্তু ব্যক্তাব্যক্তৈঃ সুসংবৃতঃ
চতুর্বিংশক ইত্যেষ ব্যক্তাব্যক্তময়ো গুণঃ
এতত্তে সর্বমাখ্যাতং কিং ভূয়ো শ্রোতুমিচ্ছসি