Utshovঅধ্যায় 202
202.1
মার্কণ্ডেয় উবাচ
এবমুক্তঃ স বিপ্রস্তু ধর্মব্যাধেন ভারত
কথামকথয়দ্ভূয়ো মনসঃ প্রীতিবর্ধনীম্
202.2
ব্রাহ্মণ
মহাভূতানি যান্যাহুঃ পঞ্চ ধর্মবিদাং বর
একৈকস্য গুণান্সম্যক্পঞ্চানামপি মে বদ
202.3
ব্যাধ উবাচ
ভূমিরাপস্তথা জ্যোতির্বায়ুরাকাশমেব চ
গুণোত্তরাণি সর্বাণি তেষাং বক্ষ্যামি তে গুণান্
202.4
ভূমিঃ পঞ্চগুণা ব্রহ্মন্নুদকং চ চতুর্গুণম্
গুণাস্ত্রয়স্তেজসি চ ত্রয়শ্চাকাশবাতয়োঃ
202.5
শব্দঃ স্পর্শশ্চ রূপং চ রসো গন্ধশ্চ পঞ্চমঃ
এতে গুণাঃ পঞ্চ ভূমেঃ সর্বেভ্যো গুণবত্তরাঃ
202.6
শব্দঃ স্পর্শশ্চ রূপং চ রসশ্চাপি দ্বিজোত্তম
অপামেতে গুণা ব্রহ্মন্কীর্তিতাস্তব সুব্রত
202.7
শব্দঃ স্পর্শশ্চ রূপং চ তেজসোঽথ গুণাস্ত্রয়ঃ
শব্দঃ স্পর্শশ্চ বায়ৌ তু শব্দ আকাশ এব চ
202.8
এতে পঞ্চদশ ব্রহ্মন্গুণা ভূতেষু পঞ্চসু
বর্তন্তে সর্বভূতেষু যেষু লোকাঃ প্রতিষ্ঠিতাঃ
অন্যোন্যং নাতিবর্তন্তে সংপচ্চ ভবতি দ্বিজ
202.9
যদা তু বিষমীভাবমাচরন্তি চরাচরাঃ
তদা দেহী দেহমন্যং ব্যতিরোহতি কালতঃ
202.10
আনুপূর্ব্যা বিনশ্যন্তি জায়ন্তে চানুপূর্বশঃ
তত্র তত্র হি দৃশ্যন্তে ধাতবঃ পাঞ্চভৌতিকাঃ
যৈরাবৃতমিদং সর্বং জগত্স্থাবরজঙ্গমম্
202.11
ইন্দ্রিয়ৈঃ সৃজ্যতে যদ্যত্তত্তদ্ব্যক্তমিতি স্মৃতম্
অব্যক্তমিতি বিজ্ঞেয়ং লিঙ্গগ্রাহ্যমতীন্দ্রিয়ম্
202.12
যথাস্বং গ্রাহকান্যেষাং শব্দাদীনামিমানি তু
ইন্দ্রিয়াণি যদা দেহী ধারয়ন্নিহ তপ্যতে
202.13
লোকে বিততমাত্মানং লোকং চাত্মনি পশ্যতি
পরাবরজ্ঞঃ সক্তঃ সন্সর্বভূতানি পশ্যতি
202.14
পশ্যতঃ সর্বভূতানি সর্বাবস্থাসু সর্বদা
ব্রহ্মভূতস্য সংয়োগো নাশুভেনোপপদ্যতে
202.15
জ্ঞানমূলাত্মকং ক্লেশমতিবৃত্তস্য মোহজম্
লোকো বুদ্ধিপ্রকাশেন জ্ঞেয়মার্গেণ দৃশ্যতে
202.16
অনাদিনিধনং জন্তুমাত্ময়োনিং সদাব্যয়ম্
অনৌপম্যমমূর্তং চ ভগবানাহ বুদ্ধিমান্
তপোমূলমিদং সর্বং যন্মাং বিপ্রানুপৃচ্ছসি
202.17
ইন্দ্রিয়াণ্যেব তত্সর্বং যত্স্বর্গনরকাবুভৌ
নিগৃহীতবিসৃষ্টানি স্বর্গায় নরকায় চ
202.18
এষ যোগবিধিঃ কৃত্স্নো যাবদিন্দ্রিয়ধারণম্
এতন্মূলং হি তপসঃ কৃত্স্নস্য নরকস্য চ
202.19
ইন্দ্রিয়াণাং প্রসঙ্গেন দোষমৃচ্ছত্যসংশয়ম্
সংনিয়ম্য তু তান্যেব ততঃ সিদ্ধিমবাপ্নুতে
202.20
ষণ্ণামাত্মনি নিত্যানামৈশ্বর্যং যোঽধিগচ্ছতি
ন স পাপৈঃ কুতোঽনর্থৈর্যুজ্যতে বিজিতেন্দ্রিয়ঃ
202.21
রথঃ শরীরং পুরুষস্য দৃষ্ট;মাত্মা নিয়ন্তেন্দ্রিয়াণ্যাহুরশ্বান্
তৈরপ্রমত্তঃ কুশলী সদশ্বৈ;র্দান্তৈঃ সুখং যাতি রথীব ধীরঃ
202.22
ষণ্ণামাত্মনি নিত্যানামিন্দ্রিয়াণাং প্রমাথিনাম্
যো ধীরো ধারয়েদ্রশ্মীন্স স্যাত্পরমসারথিঃ
202.23
ইন্দ্রিয়াণাং প্রসৃষ্টানাং হয়ানামিব বর্ত্মসু
ধৃতিং কুর্বীত সারথ্যে ধৃত্যা তানি জয়েদ্ধ্রুবম্
202.24
ইন্দ্রিয়াণাং হি চরতাং যন্মনোঽনুবিধীয়তে
তদস্য হরতে বুদ্ধিং নাবং বায়ুরিবাম্ভসি
202.25
যেষু বিপ্রতিপদ্যন্তে ষট্সু মোহাত্ফলাগমে
তেষ্বধ্যবসিতাধ্যায়ী বিন্দতে ধ্যানজং ফলম্