Utshovঅধ্যায় 203
203.1
মার্কণ্ডেয় উবাচ
এবং তু সূক্ষ্মে কথিতে ধর্মব্যাধেন ভারত
ব্রাহ্মণঃ স পুনঃ সূক্ষ্মং পপ্রচ্ছ সুসমাহিতঃ
203.2
ব্রাহ্মণ উবাচ
সত্ত্বস্য রজসশ্চৈব তমসশ্চ যথাতথম্
গুণাংস্তত্ত্বেন মে ব্রূহি যথাবদিহ পৃচ্ছতঃ
203.3
ব্যাধ উবাচ
হন্ত তে কথয়িষ্যামি যন্মাং ত্বং পরিপৃচ্ছসি
এষাং গুণান্পৃথক্ত্বেন নিবোধ গদতো মম
203.4
মোহাত্মকং তমস্তেষাং রজ এষাং প্রবর্তকম্
প্রকাশবহুলত্বাচ্চ সত্ত্বং জ্যায় ইহোচ্যতে
203.5
অবিদ্যাবহুলো মূঢঃ স্বপ্নশীলো বিচেতনঃ
দুর্দৃশীকস্তমোধ্বস্তঃ সক্রোধস্তামসোঽলসঃ
203.6
প্রবৃত্তবাক্যো মন্ত্রী চ যোঽনুরাগ্যভ্যসূয়কঃ
বিবিত্সমানো বিপ্রর্ষে স্তব্ধো মানী স রাজসঃ
203.7
প্রকাশবহুলো ধীরো নির্বিবিত্সোঽনসূয়কঃ
অক্রোধনো নরো ধীমান্দান্তশ্চৈব স সাত্ত্বিকঃ
203.8
সাত্ত্বিকস্ত্বথ সংবুদ্ধো লোকবৃত্তেন ক্লিশ্যতে
যদা বুধ্যতি বোদ্ধব্যং লোকবৃত্তং জুগুপ্সতে
203.9
বৈরাগ্যস্য হি রূপং তু পূর্বমেব প্রবর্ততে
মৃদুর্ভবত্যহংকারঃ প্রসীদত্যার্জবং চ যৎ
203.10
ততোঽস্য সর্বদ্বংদ্বানি প্রশাম্যন্তি পরস্পরম্
ন চাস্য সংয়মো নাম ক্বচিদ্ভবতি কশ্চন
203.11
শূদ্রয়োনৌ হি জাতস্য সদ্গুণানুপতিষ্ঠতঃ
বৈশ্যত্বং ভবতি ব্রহ্মন্ক্ষত্রিয়ত্বং তথৈব চ
203.12
আর্জবে বর্তমানস্য ব্রাহ্মণ্যমভিজায়তে
গুণাস্তে কীর্তিতাঃ সর্বে কিং ভূয়ঃ শ্রোতুমিচ্ছসি
203.13
ব্রাহ্মণ উবাচ
পার্থিবং ধাতুমাসাদ্য শারীরোঽগ্নিঃ কথং ভবেৎ
অবকাশবিশেষেণ কথং বর্তয়তেঽনিলঃ
203.14
মার্কণ্ডেয় উবাচ
প্রশ্নমেতং সমুদ্দিষ্টং ব্রাহ্মণেন যুধিষ্ঠির
ব্যাধঃ স কথয়ামাস ব্রাহ্মণায় মহাত্মনে
203.15
ব্যাধ উবাচ
মূর্ধানমাশ্রিতো বহ্নিঃ শরীরং পরিপালয়ন্
প্রাণো মূর্ধনি চাগ্নৌ চ বর্তমানো বিচেষ্টতে
ভূতং ভব্যং ভবিষ্যচ্চ সর্বং প্রাণে প্রতিষ্ঠিতম্
203.16
শ্রেষ্ঠং তদেব ভূতানাং ব্রহ্মজ্যোতিরুপাস্মহে
স জন্তুঃ সর্বভূতাত্মা পুরুষঃ স সনাতনঃ
মনো বুদ্ধিরহংকারো ভূতানাং বিষয়শ্চ সঃ
203.17
এবং ত্বিহ স সর্বত্র প্রাণেন পরিপাল্যতে
পৃষ্ঠতস্তু সমানেন স্বাং স্বাং গতিমুপাশ্রিতঃ
203.18
বস্তিমূলে গুদে চৈব পাবকঃ সমুপাশ্রিতঃ
বহন্মূত্রং পুরীষং চাপ্যপানঃ পরিবর্ততে
203.19
প্রয়ত্নে কর্মণি বলে য একস্ত্রিষু বর্ততে
উদান ইতি তং প্রাহুরধ্যাত্মবিদুষো জনাঃ
203.20
সংধৌ সংধৌ সংনিবিষ্টঃ সর্বেষ্বপি তথানিলঃ
শরীরেষু মনুষ্যাণাং ব্যান ইত্যুপদিষ্যতে
203.21
ধাতুষ্বগ্নিস্তু বিততঃ স তু বায়ুসমীরিতঃ
রসান্ধাতূংশ্চ দোষাংশ্চ বর্তয়ন্পরিধাবতি
203.22
প্রাণানাং সংনিপাতাত্তু সংনিপাতঃ প্রজায়তে
ঊষ্মা চাগ্নিরিতি জ্ঞেয়ো যোঽন্নং পচতি দেহিনাম্
203.23
অপানোদানয়োর্মধ্যে প্রাণব্যানৌ সমাহিতৌ
সমন্বিতস্ত্বধিষ্ঠানং সম্যক্পচতি পাবকঃ
203.24
তস্যাপি পায়ুপর্যন্তস্তথা স্যাদ্গুদসংজ্ঞিতঃ
স্রোতাংসি তস্মাজ্জায়ন্তে সর্বপ্রাণেষু দেহিনাম্
203.25
অগ্নিবেগবহঃ প্রাণো গুদান্তে প্রতিহন্যতে
স ঊর্ধ্বমাগম্য পুনঃ সমুত্ক্ষিপতি পাবকম্
203.26
পক্বাশয়স্ত্বধো নাভ্যা ঊর্ধ্বমামাশয়ঃ স্থিতঃ
নাভিমধ্যে শরীরস্য প্রাণাঃ সর্বে প্রতিষ্ঠিতাঃ
203.27
প্রবৃত্তা হৃদয়াত্সর্বাস্তির্যগূর্ধ্বমধস্তথা
বহন্ত্যন্নরসান্নাড্যো দশ প্রাণপ্রচোদিতাঃ
203.28
যোগিনামেষ মার্গস্তু যেন গচ্ছন্তি তত্পরম্
জিতক্লমাসনা ধীরা মূর্ধন্যাত্মানমাদধুঃ
এবং সর্বেষু বিততৌ প্রাণাপানৌ হি দেহিষু
203.29
একাদশবিকারাত্মা কলাসংভারসংভৃতঃ
মূর্তিমন্তং হি তং বিদ্ধি নিত্যং কর্মজিতাত্মকম্
203.30
তস্মিন্যঃ সংস্থিতো হ্যগ্নির্নিত্যং স্থাল্যামিবাহিতঃ
আত্মানং তং বিজানীহি নিত্যং যোগজিতাত্মকম্
203.31
দেবো যঃ সংস্থিতস্তস্মিন্নব্বিন্দুরিব পুষ্করে
ক্ষেত্রজ্ঞং তং বিজানীহি নিত্যং ত্যাগজিতাত্মকম্
203.32
জীবাত্মকানি জানীহি রজঃ সত্ত্বং তমস্তথা
জীবমাত্মগুণং বিদ্ধি তথাত্মানং পরাত্মকম্
203.33
সচেতনং জীবগুণং বদন্তি; স চেষ্টতে চেষ্টয়তে চ সর্বম্
ততঃ পরং ক্ষেত্রবিদো বদন্তি; প্রাকল্পয়দ্যো ভুবনানি সপ্ত
203.34
এবং সর্বেষু ভূতেষু ভূতাত্মা ন প্রকাশতে
দৃশ্যতে ত্বগ্র্যয়া বুদ্ধ্যা সূক্ষ্ময়া জ্ঞানবেদিভিঃ
203.35
চিত্তস্য হি প্রসাদেন হন্তি কর্ম শুভাশুভম্
প্রসন্নাত্মাত্মনি স্থিত্বা সুখমানন্ত্যমশ্নুতে
203.36
লক্ষণং তু প্রসাদস্য যথা তৃপ্তঃ সুখং স্বপেৎ
নিবাতে বা যথা দীপো দীপ্যেত্কুশলদীপিতঃ
203.37
পূর্বরাত্রে পরে চৈব যুঞ্জানঃ সততং মনঃ
লঘ্বাহারো বিশুদ্ধাত্মা পশ্যন্নাত্মানমাত্মনি
203.38
প্রদীপ্তেনেব দীপেন মনোদীপেন পশ্যতি
দৃষ্ট্বাত্মানং নিরাত্মানং তদা স তু বিমুচ্যতে
203.39
সর্বোপায়ৈস্তু লোভস্য ক্রোধস্য চ বিনিগ্রহঃ
এতত্পবিত্রং যজ্ঞানাং তপো বৈ সংক্রমো মতঃ
203.40
নিত্যং ক্রোধাত্তপো রক্ষেচ্ছ্রিয়ং রক্ষেত মত্সরাৎ
বিদ্যাং মানাপমানাভ্যামাত্মানং তু প্রমাদতঃ
203.41
আনৃশংস্যং পরো ধর্মঃ ক্ষমা চ পরমং বলম্
আত্মজ্ঞানং পরং জ্ঞানং পরং সত্যব্রতং ব্রতম্
203.42
সত্যস্য বচনং শ্রেয়ঃ সত্যং জ্ঞানং হিতং ভবেৎ
যদ্ভূতহিতমত্যন্তং তদ্বৈ সত্যং পরং মতম্
203.43
যস্য সর্বে সমারম্ভাঃ নিরাশীর্বন্ধনাঃ সদা
ত্যাগে যস্য হুতং সর্বং স ত্যাগী স চ বুদ্ধিমান্
203.44
যতো ন গুরুরপ্যেনং চ্যাবয়েদুপপাদয়ন্
তং বিদ্যাদ্ব্রহ্মণো যোগং বিয়োগং যোগসংজ্ঞিতম্
203.45
ন হিংস্যাত্সর্বভূতানি মৈত্রায়ণগতশ্চরেৎ
নেদং জীবিতমাসাদ্য বৈরং কুর্বীত কেনচিৎ
203.46
আকিংচন্যং সুসংতোষো নিরাশিত্বমচাপলম্
এতদেব পরং জ্ঞানং সদাত্মজ্ঞানমুত্তমম্
203.47
পরিগ্রহং পরিত্যজ্য ভব বুদ্ধ্যা যতব্রতঃ
অশোকং স্থানমাতিষ্ঠেন্নিশ্চলং প্রেত্য চেহ চ
203.48
তপোনিত্যেন দান্তেন মুনিনা সংয়তাত্মনা
অজিতং জেতুকামেন ভাব্যং সঙ্গেষ্বসঙ্গিনা
203.49
গুণাগুণমনাসঙ্গমেককার্যমনন্তরম্
এতদ্ব্রাহ্মণ তে বৃত্তমাহুরেকপদং সুখম্
203.50
পরিত্যজতি যো দুঃখং সুখং চাপ্যুভয়ং নরঃ
ব্রহ্ম প্রাপ্নোতি সোঽত্যন্তমসঙ্গেন চ গচ্ছতি
203.51
যথাশ্রুতমিদং সর্বং সমাসেন দ্বিজোত্তম
এতত্তে সর্বমাখ্যাতং কিং ভূয়ঃ শ্রোতুমিচ্ছসি