অধ্যায় 204

204.1

মার্কণ্ডেয় উবাচ
এবং সংকথিতে কৃত্স্নে মোক্ষধর্মে যুধিষ্ঠির
দৃঢং প্রীতমনা বিপ্রো ধর্মব্যাধমুবাচ হ

204.2

ন্যায়য়ুক্তমিদং সর্বং ভবতা পরিকীর্তিতম্
ন তেঽস্ত্যবিদিতং কিংচিদ্ধর্মেষ্বিহ হি দৃশ্যতে

204.3

ব্যাধ উবাচ
প্রত্যক্ষং মম যো ধর্মস্তং পশ্য দ্বিজসত্তম
যেন সিদ্ধিরিয়ং প্রাপ্তা ময়া ব্রাহ্মণপুংগব

204.4

উত্তিষ্ঠ ভগবন্ক্ষিপ্রং প্রবিশ্যাভ্যন্তরং গৃহম্
দ্রষ্টুমর্হসি ধর্মজ্ঞ মাতরং পিতরং চ মে

204.5

মার্কণ্ডেয় উবাচ
ইত্যুক্তঃ স প্রবিশ্যাথ দদর্শ পরমার্চিতম্
সৌধং হৃদ্যং চতুঃশালমতীব চ মনোহরম্

204.6

দেবতাগৃহসংকাশং দৈবতৈশ্চ সুপূজিতম্
শয়নাসনসংবাধং গন্ধৈশ্চ পরমৈর্যুতম্

204.7

তত্র শুক্লাম্বরধরৌ পিতরাবস্য পূজিতৌ
কৃতাহারৌ সুতুষ্টৌ তাবুপবিষ্টৌ বরাসনে
ধর্মব্যাধস্তু তৌ দৃষ্ট্বা পাদেষু শিরসাপতৎ

204.8

বৃদ্ধাবূচতুঃ
উত্তিষ্ঠোত্তিষ্ঠ ধর্মজ্ঞ ধর্মস্ত্বামভিরক্ষতু
প্রীতৌ স্বস্তব শৌচেন দীর্ঘমায়ুরবাপ্নুহি
সত্পুত্রেণ ত্বয়া পুত্র নিত্যকালং সুপূজিতৌ

204.9

ন তেঽন্যদ্দৈবতং কিংচিদ্দৈবতেষ্বপি বর্ততে
প্রয়তত্বাদ্দ্বিজাতীনাং দমেনাসি সমন্বিতঃ

204.10

পিতুঃ পিতামহা যে চ তথৈব প্রপিতামহাঃ
প্রীতাস্তে সততং পুত্র দমেনাবাং চ পূজয়া

204.11

মনসা কর্মণা বাচা শুশ্রূষা নৈব হীয়তে
ন চান্যা বিতথা বুদ্ধির্দৃশ্যতে সাংপ্রতং তব

204.12

জামদগ্ন্যেন রামেণ যথা বৃদ্ধৌ সুপূজিতৌ
তথা ত্বয়া কৃতং সর্বং তদ্বিশিষ্টং চ পুত্রক

204.13

মার্কণ্ডেয় উবাচ
ততস্তং ব্রাহ্মণং তাভ্যাং ধর্মব্যাধো ন্যবেদয়ৎ
তৌ স্বাগতেন তং বিপ্রমর্চয়ামাসতুস্তদা

204.14

প্রতিগৃহ্য চ তাং পূজাং দ্বিজঃ পপ্রচ্ছ তাবুভৌ
সপুত্রাভ্যাং সভৃত্যাভ্যাং কচ্চিদ্বাং কুশলং গৃহে
অনাময়ং চ বাং কচ্চিত্সদৈবেহ শরীরয়োঃ

204.15

বৃদ্ধাবূচতুঃ
কুশলং নো গৃহে বিপ্র ভৃত্যবর্গে চ সর্বশঃ
কচ্চিত্ত্বমপ্যবিঘ্নেন সংপ্রাপ্তো ভগবন্নিহ

204.16

মার্কণ্ডেয় উবাচ
বাঢমিত্যেব তৌ বিপ্রঃ প্রত্যুবাচ মুদান্বিতঃ
ধর্মব্যাধস্তু তং বিপ্রমর্থবদ্বাক্যমব্রবীৎ

204.17

পিতা মাতা চ ভগবন্নেতৌ মে দৈবতং পরম্
যদ্দৈবতেভ্যঃ কর্তব্যং তদেতাভ্যাং করোম্যহম্

204.18

ত্রয়স্ত্রিংশদ্যথা দেবাঃ সর্বে শক্রপুরোগমাঃ
সংপূজ্যাঃ সর্বলোকস্য তথা বৃদ্ধাবিমৌ মম

204.19

উপহারানাহরন্তো দেবতানাং যথা দ্বিজাঃ
কুর্বতে তদ্বদেতাভ্যাং করোম্যহমতন্দ্রিতঃ

204.20

এতৌ মে পরমং ব্রহ্মন্পিতা মাতা চ দৈবতম্
এতৌ পুষ্পৈঃ ফলৈ রত্নৈস্তোষয়ামি সদা দ্বিজ

204.21

এতাবেবাগ্নয়ো মহ্যং যান্বদন্তি মনীষিণঃ
যজ্ঞা বেদাশ্চ চত্বারঃ সর্বমেতৌ মম দ্বিজ

204.22

এতদর্থং মম প্রাণা ভার্যা পুত্রাঃ সুহৃজ্জনাঃ
সপুত্রদারঃ শুশ্রূষাং নিত্যমেব করোম্যহম্

204.23

স্বয়ং চ স্নাপয়াম্যেতৌ তথা পাদৌ প্রধাবয়ে
আহারং সংপ্রয়চ্ছামি স্বয়ং চ দ্বিজসত্তম

204.24

অনুকূলাঃ কথা বচ্মি বিপ্রিয়ং পরিবর্জয়ন্
অধর্মেণাপি সংয়ুক্তং প্রিয়মাভ্যাং করোম্যহম্

204.25

ধর্মমেব গুরুং জ্ঞাত্বা করোমি দ্বিজসত্তম
অতন্দ্রিতঃ সদা বিপ্র শুশ্রূষাং বৈ করোম্যহম্

204.26

পঞ্চৈব গুরবো ব্রহ্মন্পুরুষস্য বুভূষতঃ
পিতা মাতাগ্নিরাত্মা চ গুরুশ্চ দ্বিজসত্তম

204.27

এতেষু যস্তু বর্তেত সম্যগেব দ্বিজোত্তম
ভবেয়ুরগ্নয়স্তস্য পরিচীর্ণাস্তু নিত্যশঃ
গার্হস্থ্যে বর্তমানস্য ধর্ম এষ সনাতনঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.