Utshovঅধ্যায় 205
205.1
মার্কণ্ডেয় উবাচ
গুরূ নিবেদ্য বিপ্রায় তৌ মাতাপিতরাবুভৌ
পুনরেব স ধর্মাত্মা ব্যাধো ব্রাহ্মণমব্রবীৎ
205.2
প্রবৃত্তচক্ষুর্জাতোঽস্মি সংপশ্য তপসো বলম্
যদর্থমুক্তোঽসি তয়া গচ্ছস্ব মিথিলামিতি
205.3
পতিশুশ্রূষপরয়া দান্তয়া সত্যশীলয়া
মিথিলায়াং বসন্ব্যাধঃ স তে ধর্মান্প্রবক্ষ্যতি
205.4
ব্রাহ্মণ উবাচ
পতিব্রতায়াঃ সত্যায়াঃ শীলাঢ্যায়া যতব্রত
সংস্মৃত্য বাক্যং ধর্মজ্ঞ গুণবানসি মে মতঃ
205.5
ব্যাধ উবাচ
যত্তদা ত্বং দ্বিজশ্রেষ্ঠ তয়োক্তো মাং প্রতি প্রভো
দৃষ্টমেতত্তয়া সম্যগেকপত্ন্যা ন সংশয়ঃ
205.6
ত্বদনুগ্রহবুদ্ধ্যা তু বিপ্রৈতদ্দর্শিতং ময়া
বাক্যং চ শৃণু মে তাত যত্তে বক্ষ্যে হিতং দ্বিজ
205.7
ত্বয়া বিনিকৃতা মাতা পিতা চ দ্বিজসত্তম
অনিসৃষ্টোঽসি নিষ্ক্রান্তো গৃহাত্তাভ্যামনিন্দিত
বেদোচ্চারণকার্যার্থময়ুক্তং তত্ত্বয়া কৃতম্
205.8
তব শোকেন বৃদ্ধৌ তাবন্ধৌ জাতৌ তপস্বিনৌ
তৌ প্রসাদয়িতুং গচ্ছ মা ত্বা ধর্মোঽত্যগান্মহান্
205.9
তপস্বী ত্বং মহাত্মা চ ধর্মে চ নিরতঃ সদা
সর্বমেতদপার্থং তে ক্ষিপ্রং তৌ সংপ্রসাদয়
205.10
শ্রদ্দধস্ব মম ব্রহ্মন্নান্যথা কর্তুমর্হসি
গম্যতামদ্য বিপ্রর্ষে শ্রেয়স্তে কথয়াম্যহম্
205.11
ব্রাহ্মণ উবাচ
যদেতদুক্তং ভবতা সর্বং সত্যমসংশয়ম্
প্রীতোঽস্মি তব ধর্মজ্ঞ সাধ্বাচার গুণান্বিত
205.12
ব্যাধ উবাচ
দৈবতপ্রতিমো হি ত্বং যস্ত্বং ধর্মমনুব্রতঃ
পুরাণং শাশ্বতং দিব্যং দুষ্প্রাপমকৃতাত্মভিঃ
205.13
অতন্দ্রিতঃ কুরু ক্ষিপ্রং মাতাপিত্রোর্হি পূজনম্
অতঃ পরমহং ধর্মং নান্যং পশ্যামি কংচন
205.14
ব্রাহ্মণ উবাচ
ইহাহমাগতো দিষ্ট্যা দিষ্ট্যা মে সংগতং ত্বয়া
ঈদৃশা দুর্লভা লোকে নরা ধর্মপ্রদর্শকাঃ
205.15
একো নরসহস্রেষু ধর্মবিদ্বিদ্যতে ন বা
প্রীতোঽস্মি তব সত্যেন ভদ্রং তে পুরুষোত্তম
205.16
পতমানো হি নরকে ভবতাস্মি সমুদ্ধৃতঃ
ভবিতব্যমথৈবং চ যদ্দৃষ্টোঽসি ময়ানঘ
205.17
রাজা যয়াতির্দৌহিত্রৈঃ পতিতস্তারিতো যথা
সদ্ভিঃ পুরুষশার্দূল তথাহং ভবতা ত্বিহ
205.18
মাতাপিতৃভ্যাং শুশ্রূষাং করিষ্যে বচনাত্তব
নাকৃতাত্মা বেদয়তি ধর্মাধর্মবিনিশ্চয়ম্
205.19
দুর্জ্ঞেয়ঃ শাশ্বতো ধর্মঃ শূদ্রয়োনৌ হি বর্ততা
ন ত্বাং শূদ্রমহং মন্যে ভবিতব্যং হি কারণম্
যেন কর্মবিপাকেন প্রাপ্তেয়ং শূদ্রতা ত্বয়া
205.20
এতদিচ্ছামি বিজ্ঞাতুং তত্ত্বেন হি মহামতে
কাময়া ব্রূহি মে তথ্যং সর্বং ত্বং প্রয়তাত্মবান্
205.21
ব্যাধ উবাচ
অনতিক্রমণীয়া হি ব্রাহ্মণা বৈ দ্বিজোত্তম
শৃণু সর্বমিদং বৃত্তং পূর্বদেহে মমানঘ
205.22
অহং হি ব্রাহ্মণঃ পূর্বমাসং দ্বিজবরাত্মজ
বেদাধ্যায়ী সুকুশলো বেদাঙ্গানাং চ পারগঃ
আত্মদোষকৃতৈর্ব্রহ্মন্নবস্থাং প্রাপ্তবানিমাম্
205.23
কশ্চিদ্রাজা মম সখা ধনুর্বেদপরায়ণঃ
সংসর্গাদ্ধনুষি শ্রেষ্ঠস্ততোঽহমভবং দ্বিজ
205.24
এতস্মিন্নেব কালে তু মৃগয়াং নির্গতো নৃপঃ
সহিতো যোধমুখ্যৈশ্চ মন্ত্রিভিশ্চ সুসংবৃতঃ
ততোঽভ্যহন্মৃগাংস্তত্র সুবহূনাশ্রমং প্রতি
205.25
অথ ক্ষিপ্তঃ শরো ঘোরো ময়াপি দ্বিজসত্তম
তাডিতশ্চ মুনিস্তেন শরেণানতপর্বণা
205.26
ভূমৌ নিপতিতো ব্রহ্মন্নুবাচ প্রতিনাদয়ন্
নাপরাধ্যাম্যহং কিংচিত্কেন পাপমিদং কৃতম্
205.27
মন্বানস্তং মৃগং চাহং সংপ্রাপ্তঃ সহসা মুনিম্
অপশ্যং তমৃষিং বিদ্ধং শরেণানতপর্বণা
তমুগ্রতপসং বিপ্রং নিষ্টনন্তং মহীতলে
205.28
অকার্যকরণাচ্চাপি ভৃশং মে ব্যথিতং মনঃ
অজানতা কৃতমিদং ময়েত্যথ তমব্রুবম্
ক্ষন্তুমর্হসি মে ব্রহ্মন্নিতি চোক্তো ময়া মুনিঃ
205.29
ততঃ প্রত্যব্রবীদ্বাক্যমৃষির্মাং ক্রোধমূর্ছিতঃ
ব্যাধস্ত্বং ভবিতা ক্রূর শূদ্রয়োনাবিতি দ্বিজ