Utshovঅধ্যায় 206
206.1
ব্যাধ উবাচ
এবং শপ্তোঽহমৃষিণা তদা দ্বিজবরোত্তম
অভিপ্রসাদয়মৃষিং গিরা বাক্যবিশারদম্
206.2
অজানতা ময়াকার্যমিদমদ্য কৃতং মুনে
ক্ষন্তুমর্হসি তত্সর্বং প্রসীদ ভগবন্নিতি
206.3
ঋষিরুবাচ
নান্যথা ভবিতা শাপ এবমেতদসংশয়ম্
আনৃশংস্যাদহং কিংচিত্কর্তানুগ্রহমদ্য তে
206.4
শূদ্রয়োনৌ বর্তমানো ধর্মজ্ঞো ভবিতা হ্যসি
মাতাপিত্রোশ্চ শুশ্রূষাং করিষ্যসি ন সংশয়ঃ
206.5
তয়া শুশ্রূষয়া সিদ্ধিং মহতীং সমবাপ্স্যসি
জাতিস্মরশ্চ ভবিতা স্বর্গং চৈব গমিষ্যসি
শাপক্ষয়ান্তে নির্বৃত্তে ভবিতাসি পুনর্দ্বিজঃ
206.6
ব্যাধ উবাচ
এবং শপ্তঃ পুরা তেন ঋষিণাস্ম্যুগ্রতেজসা
প্রসাদশ্চ কৃতস্তেন মমৈবং দ্বিপদাং বর
206.7
শরং চোদ্ধৃতবানস্মি তস্য বৈ দ্বিজসত্তম
আশ্রমং চ ময়া নীতো ন চ প্রাণৈর্ব্যয়ুজ্যত
206.8
এতত্তে সর্বমাখ্যাতং যথা মম পুরাভবৎ
অভিতশ্চাপি গন্তব্যং ময়া স্বর্গং দ্বিজোত্তম
206.9
ব্রাহ্মণ উবাচ
এবমেতানি পুরুষা দুঃখানি চ সুখানি চ
প্রাপ্নুবন্তি মহাবুদ্ধে নোত্কণ্ঠাং কর্তুমর্হসি
দুষ্করং হি কৃতং তাত জানতা জাতিমাত্মনঃ
206.10
কর্মদোষশ্চ বৈ বিদ্বন্নাত্মজাতিকৃতেন বৈ
কংচিত্কালং মৃষ্যতাং বৈ ততোঽসি ভবিতা দ্বিজঃ
সাংপ্রতং চ মতো মেঽসি ব্রাহ্মণো নাত্র সংশয়ঃ
206.11
ব্রাহ্মণঃ পতনীয়েষু বর্তমানো বিকর্মসু
দাম্ভিকো দুষ্কৃতপ্রায়ঃ শূদ্রেণ সদৃশো ভবেৎ
206.12
যস্তু শূদ্রো দমে সত্যে ধর্মে চ সততোত্থিতঃ
তং ব্রাহ্মণমহং মন্যে বৃত্তেন হি ভবেদ্দ্বিজঃ
206.13
কর্মদোষেণ বিষমাং গতিমাপ্নোতি দারুণাম্
ক্ষীণদোষমহং মন্যে চাভিতস্ত্বাং নরোত্তম
206.14
কর্তুমর্হসি নোত্কণ্ঠাং ত্বদ্বিধা হ্যবিষাদিনঃ
লোকবৃত্তান্তবৃত্তজ্ঞা নিত্যং ধর্মপরায়ণাঃ
206.15
ব্যাধ উবাচ
প্রজ্ঞয়া মানসং দুঃখং হন্যাচ্ছারীরমৌষধৈঃ
এতদ্বিজ্ঞানসামর্থ্যং ন বালৈঃ সমতাং ব্রজেৎ
206.16
অনিষ্টসংপ্রয়োগাচ্চ বিপ্রয়োগাত্প্রিয়স্য চ
মানুষা মানসৈর্দুঃখৈর্যুজ্যন্তে অল্পবুদ্ধয়ঃ
206.17
গুণৈর্ভূতানি যুজ্যন্তে বিয়ুজ্যন্তে তথৈব চ
সর্বাণি নৈতদেকস্য শোকস্থানং হি বিদ্যতে
206.18
অনিষ্টেনান্বিতং পশ্যংস্তথা ক্ষিপ্রং বিরজ্যতে
ততশ্চ প্রতিকুর্বন্তি যদি পশ্যন্ত্যুপক্রমম্
শোচতো ন ভবেত্কিংচিত্কেবলং পরিতপ্যতে
206.19
পরিত্যজন্তি যে দুঃখং সুখং বাপ্যুভয়ং নরাঃ
ত এব সুখমেধন্তে জ্ঞানতৃপ্তা মনীষিণঃ
206.20
অসংতোষপরা মূঢাঃ সংতোষং যান্তি পণ্ডিতাঃ
অসংতোষস্য নাস্ত্যন্তস্তুষ্টিস্তু পরমং সুখম্
ন শোচন্তি গতাধ্বানঃ পশ্যন্তঃ পরমাং গতিম্
206.21
ন বিষাদে মনঃ কার্যং বিষাদো বিষমুত্তমম্
মারয়ত্যকৃতপ্রজ্ঞং বালং ক্রুদ্ধ ইবোরগঃ
206.22
যং বিষাদোঽভিভবতি বিষমে সমুপস্থিতে
তেজসা তস্য হীনস্য পুরুষার্থো ন বিদ্যতে
206.23
অবশ্যং ক্রিয়মাণস্য কর্মণো দৃশ্যতে ফলম্
ন হি নির্বেদমাগম্য কিংচিত্প্রাপ্নোতি শোভনম্
206.24
অথাপ্যুপায়ং পশ্যেত দুঃখস্য পরিমোক্ষণে
অশোচন্নারভেতৈব যুক্তশ্চাব্যসনী ভবেৎ
206.25
ভূতেষ্বভাবং সংচিন্ত্য যে তু বুদ্ধেঃ পরং গতাঃ
ন শোচন্তি কৃতপ্রজ্ঞাঃ পশ্যন্তঃ পরমাং গতিম্
206.26
ন শোচামি চ বৈ বিদ্বন্কালাকাঙ্ক্ষী স্থিতোঽস্ম্যহম্
এতৈর্নিদর্শনৈর্ব্রহ্মন্নাবসীদামি সত্তম
206.27
ব্রাহ্মণ উবাচ
কৃতপ্রজ্ঞোঽসি মেধাবী বুদ্ধিশ্চ বিপুলা তব
নাহং ভবন্তং শোচামি জ্ঞানতৃপ্তোঽসি ধর্মবিৎ
206.28
আপৃচ্ছে ত্বাং স্বস্তি তেঽস্তু ধর্মস্ত্বা পরিরক্ষতু
অপ্রমাদস্তু কর্তব্যো ধর্মে ধর্মভৃতাং বর
206.29
মার্কণ্ডেয় উবাচ
বাঢমিত্যেব তং ব্যাধঃ কৃতাঞ্জলিরুবাচ হ
প্রদক্ষিণমথো কৃত্বা প্রস্থিতো দ্বিজসত্তমঃ
206.30
স তু গত্বা দ্বিজঃ সর্বাং শুশ্রূষাং কৃতবাংস্তদা
মাতাপিতৃভ্যাং বৃদ্ধাভ্যাং যথান্যায়ং সুসংশিতঃ
206.31
এতত্তে সর্বমাখ্যাতং নিখিলেন যুধিষ্ঠির
পৃষ্টবানসি যং তাত ধর্মং ধর্মভৃতাং বর
206.32
পতিব্রতায়া মাহাত্ম্যং ব্রাহ্মণস্য চ সত্তম
মাতাপিত্রোশ্চ শুশ্রূষা ব্যাধে ধর্মশ্চ কীর্তিতঃ
206.33
যুধিষ্ঠির উবাচ
অত্যদ্ভুতমিদং ব্রহ্মন্ধর্মাখ্যানমনুত্তমম্
সর্বধর্মভৃতাং শ্রেষ্ঠ কথিতং দ্বিজসত্তম
206.34
সুখশ্রব্যতয়া বিদ্বন্মুহূর্তমিব মে গতম্
ন হি তৃপ্তোঽস্মি ভগবঞ্শৃণ্বানো ধর্মমুত্তমম্